Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Ẹzla 7:1-28

NUHE E BẸHẸN LẸ

  • Ẹzla wá Jelusalẹm (1-10)

  • Wekanhlanmẹ Altakẹlikesi tọn hlan Ẹzla (11-26)

  • Ẹzla pà Jehovah (27-28)

7  To onú ehelẹ godo, to gandudu Ahọlu Altakẹlikesi+ Pẹlsia tọn whenu, Ẹzla*+ lẹkọwa. Ewọ yin visunnu Selaia+ tọn, visunnu Azalia tọn, visunnu Hilkia+ tọn,  visunnu Ṣalumi tọn, visunnu Zadọki tọn, visunnu Ahitubi tọn,  visunnu Amalia tọn, visunnu Azalia+ tọn, visunnu Melaiọti tọn,  visunnu Zelahia tọn, visunnu Uzi tọn, visunnu Buki tọn,  visunnu Abiṣua tọn, visunnu Finehasi+ tọn, visunnu Eleazali+ tọn, visunnu Aalọn+ he yin yẹwhenọgán lọ tọn.  Ẹzla ehe hẹji wá sọn Babilọni. Ewọ yin vọkan-basitọ* de he yọ́n* Osẹ́n Mose tọn+ lọ he Jehovah Jiwheyẹwhe ko na Islaeli ganji. Ahọlu sọ na ẹn nuhe ewọ biọ lẹpo, na alọ Jehovah Jiwheyẹwhe etọn tọn tin to e ji wutu.  Delẹ to Islaelivi lẹ mẹ, gọna yẹwhenọ lẹ, Levinu lẹ,+ hànjitọ lẹ,+ họ̀njinọtọ+ lẹ po devizọnwatọ tẹmpli mẹ tọn lẹ*+ po, hẹji yì Jelusalẹm to owhe ṣinawetọ gandudu Ahọlu Altakẹlikesi tọn mẹ.  Ẹzla sọ wá Jelusalẹm to osun atọ́ntọ owhe ṣinawetọ gandudu ahọlu lọ tọn mẹ.  E bẹ gbejizọnlin jẹeji sọn Babilọni to azán tintan osun tintan tọn gbè bo wá jẹ Jelusalẹm to azán tintan osun atọ́ntọ tọn gbè, na alọ dagbe Jiwheyẹwhe etọn tọn tin to e ji wutu.+ 10  Ẹzla ko wleawuna ahun etọn* nado nọ gbadopọnna Osẹ́n Jehovah tọn,+ nado nọ yí i do yizan mẹ podọ nado nọ plọnmẹ aṣẹdai po whẹdida etọn lẹ po to Islaeli.+ 11  Vọkan wekanhlanmẹ lọ tọn die, ehe Ahọlu Altakẹlikesi yí na Ẹzla yẹwhenọ lọ podọ vọkan-basitọ* lọ, yèdọ mẹhe yin azọ́nyọnẹntọ to nupinplọn* gando gbedide Jehovah tọn lẹ po aṣẹdai he e na Islaeli po lẹ go mẹ: 12  * “Altakẹlikesi,+ ahọlu ahọlu lẹ tọn hlan Ẹzla yẹwhenọ lọ, yèdọ vọkan-basitọ* Osẹ́n Jiwheyẹwhe olọn tọn tọn: Jijọho susu ni tin hlan we. Podọ todin 13  yẹn ko de gbedide de tọ́n dọ depope to omẹ Islaeli tọn lẹ mẹ he tin to ahọluduta ṣie glọ, gọna yẹwhenọ po Levinu yetọn he jlo na hodo we yì Jelusalẹm lẹ po ni yì.+ 14  Na ahọlu po ayinamẹtọ etọn ṣinawe lẹ po wẹ do we hlan nado yì dindona eyin Osẹ́n Jiwheyẹwhe towe tọn he tin to dè we* nọ yin hihodo to Juda po Jelusalẹm po, 15  bo bẹ fataka gọna sika he ahọlu po ayinamẹtọ etọn lẹ po ko na Jiwheyẹwhe Islaeli tọn, he nọ nọ̀ Jelusalẹm lọ sọn ojlo mẹ wá, 16  gọna fataka po sika po he hiẹ mọyi* to agbegbe* Babilọni tọn pete ji lẹpo, to pọmẹ hẹ nunina he gbẹtọ lẹ po yẹwhenọ lẹ po basi sọn ojlo mẹ wá na ohọ̀ Jiwheyẹwhe yetọn tọn, ehe tin to Jelusalẹm.+ 17  Hiẹ sọ dona yawu yí akuẹ ehe do họ̀ oyìnsú,+ agbò,+ lẹngbọvu,+ to pọmẹ hẹ avọ́nunina jinukun-lili tọn+ po avọ́nunina nùnù+ po bo na yí yé do sanvọ́ to agbà ohọ̀ Jiwheyẹwhe mìtọn tọn ji to Jelusalẹm. 18  “Podọ nudepope he yọ́n to nukun hiẹ po nọvisunnu towe lẹ po tọn mẹ, mì sọgan yí fataka po sika he pò lọ lẹ po do wà ẹ, sọgbe hẹ ojlo Jiwheyẹwhe mìtọn tọn. 19  Hiẹ sọ dona bẹ nuyizan he yin yíyí na we na sinsẹ̀nzọn ohọ̀ Jiwheyẹwhe towe tọn mẹ tọn lẹpo jo to Jiwheyẹwhe nukọn to Jelusalẹm.+ 20  Podọ dandannu he pò he yin bibiọ to hiẹ si na ohọ̀ Jiwheyẹwhe towe tọn lẹ wẹ hiẹ na na sọn adọkunnu sẹdotẹn ahọlu tọn mẹ.+ 21  “Yẹn, Ahọlu Altakẹlikesi, ko de gbedide de tọ́n hlan akuẹbẹhẹntọ he tin to lẹdo he tin to Tọ̀sisa lọ Godo* mẹ lẹpo, dọ nudepope he Ẹzla+ yẹwhenọ lọ, yèdọ vọkan-basitọ* Osẹ́n Jiwheyẹwhe olọn tọn tọn, biọ to mì si dona yin wiwà po awuyiya po, 22  kakajẹ fataka talẹnti* 100 ji, gọna likun ojlẹnu kọli* tọn 100, ovẹn ojlẹnu bati* tọn 100,+ amì ojlẹnu bati tọn 100+ po ojẹ̀ he jijlẹ etọn ma do dogbó po.+ 23  Mì gbọ nuhe Jiwheyẹwhe olọn tọn degbe etọn lẹpo ni yin wiwà po zohunhun po na ohọ̀ Jiwheyẹwhe olọn tọn,+ na homẹgble nikaa tin sọta mẹhe tin to ahọluduta ahọlu tọn glọ lẹ po visunnu ahọlu tọn lẹ po.+ 24  Avase sọ yin nina mì dọ mì ma dona biọ tòkuẹ, takuẹ+ kavi aliji-kuẹ depope yẹwhenọ lẹ, gọna Levinu lẹ, hànjitọ lẹ,+ họ̀njinọtọ lẹ, devizọnwatọ tẹmpli mẹ tọn lẹ*+ po mẹhe nọ wazọ́n to ohọ̀ Jiwheyẹwhe tọn ehe mẹ lẹ po. 25  “Podọ hiẹ, Ẹzla, sọgbe hẹ nuyọnẹn he yin nina we sọn Jiwheyẹwhe towe dè,* de whẹdọtọ lẹ po whẹdatọ lẹ po nado nọ dawhẹna mẹhe tin to lẹdo he tin to Tọ̀sisa lọ Godo mẹ lẹpo, yèdọ mẹhe yọ́n osẹ́n Jiwheyẹwhe towe tọn lẹpo; hiẹ nisọ plọn yé mẹdepope he ma yọ́n yé.+ 26  Eyin mẹdepope masọ setonuna Osẹ́n Jiwheyẹwhe towe tọn po osẹ́n ahọlu tọn po, e dona yin whẹdana to afọdopolọji, vlavo owhẹ̀ okú tọn, yinyan dogbé tọn, akuẹgbònamẹ tọn kavi zizedo gànpamẹ tọn.” 27  Na Jehovah Jiwheyẹwhe tọgbo mítọn lẹ tọn ni yin gigopana, yèdọ mẹhe zedo ahun ahọlu tọn mẹ nado doaṣọ́na ohọ̀ Jehovah tọn to Jelusalẹm!+ 28  E ko sọ do owanyi nugbo hia mi to ahọlu,+ ayinamẹtọ etọn lẹ+ po ahọvi huhlọnnọ ahọlu tọn lẹpo po nukọn. Enẹwutu wẹ n’wleawuna adọgbigbo,* na alọ Jehovah Jiwheyẹwhe ṣie tọn tin to ji e, yẹn sọ bẹ sunnu he yin nukọntọ* lẹpo pli sọn omẹ Islaeli tọn lẹ mẹ nado hẹji yì hẹ mi.

Nudọnamẹ Odò Tọn

Zẹẹmẹdo “Alọgọ.”
Kavi “wekantọ.”
Kavi “Ewọ yin azọ́nyọnẹntọ to vọkan-bibasi na.”
Kavi “Netinimi lẹ.” To paa mẹ, “mẹhe yin nina lẹ.”
Kavi “ko magbe to ahun etọn mẹ.”
Kavi “wekantọ.”
Kavi “yin vọkan-basitọ ohó lọ lẹ tọn.
Ẹzl 7:12 jẹ 7:26 yin kinkan to dowhenu do Alamaikigbe mẹ.
Kavi “wekantọ.”
To paa mẹ, “to alọ towe mẹ.”
To paa mẹ, “dín.”
Kavi “agbegbe fidugando.”
Kavi “to Euflate Godo.”
Kavi “wekantọ.”
Talẹnti dopo sọzẹn hẹ kg 34,2. Pọ́n Nud. B14.
Kọli dopo sọzẹn hẹ L 220. Pọ́n Nud. B14.
Bati dopo sọzẹn hẹ L 22. Pọ́n Nud. B14.
Kavi “Netinimi lẹ.” To paa mẹ, “mẹhe yin nina lẹ.”
To paa mẹ, “sọgbe hẹ nuyọnẹn Jiwheyẹwhe towe tọn he to alọ towe mẹ.”
Kavi “n’na huhlọn dee.”
To paa mẹ, “ota.”