Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Ẹzla 6:1-22

NUHE E BẸHẸN LẸ

  • Dodinnanu po gbedide Daliusi tọn po (1-12)

  • Tẹmpli lọ yin tadona bo yin kinklandowiwe (13-18)

  • Juwayi yin dùdù (19-22)

6  Whenẹnu wẹ Ahọlu Daliusi de gbedide de tọ́n bọ yé basi dodinnanu de to kandai hoho sẹdotẹn lẹ* fihe adọkunnu lẹ nọ yin bibẹdo to Babilọni.  Owe-hihá de sọ yin mimọ to figángán lọ to Ẹkbatana, to agbegbe* Media tọn mẹ, bọ nudọnamẹ he bọdego ehelẹ yin kinkan do e mẹ:  “To owhe tintan Ahọlu Kilusi tọn mẹ, Ahọlu Kilusi de gbedide de tọ́n gando ohọ̀ Jiwheyẹwhe tọn he to Jelusalẹm go+ dọmọ: ‘Mì gbọ ohọ̀ lọ ni yin vivọgbá taidi fihe yé na nọ sanvọ́ te, podọ dodonu etọn lẹ ni yin hinhẹn lodo; jiyiyi etọn dona yin awagbà 60,* gbigblo etọn nasọ yin awagbà 60,+  bọ zannu tito dahodaho atọ̀n na yin bibli do finẹ gọna owhlẹ tito dopo;+ mì sọ gbọ akuẹzinzan lọ ni yin súsú sọn owhé ahọlu tọn gbè.+  Humọ, mì gbọ nuyizan sika po fataka po tọn he tin to ohọ̀ Jiwheyẹwhe tọn mẹ bọ Nẹbukadnẹzali bẹ sọn tẹmpli mẹ to Jelusalẹm bo bẹ yé wá Babilọni lẹ+ ni yin bibẹ lẹkọ, na yé nido yin gigọ̀ yì otẹn yetọn mẹ to tẹmpli mẹ to Jelusalẹm bo yin bibẹdo ohọ̀ Jiwheyẹwhe tọn mẹ.’+  “Enẹwutu todin, mì nọla na finẹ—hiẹ Tatenai ayimatẹn-gán lẹdo he tin to Tọ̀sisa lọ Godo* tọn po Ṣetali-bozenai po, gọna hagbẹ towe lẹ he yin ayimatẹn-gán pẹvipẹvi na lẹdo he tin to Tọ̀sisa lọ Godo lẹ.+  Mì glọnalina azọ́n he to yìyì to ohọ̀ Jiwheyẹwhe tọn enẹ kọ̀n blo. Ayimatẹn-gán Ju lẹ tọn po mẹho Ju lẹ tọn lẹ po na vọ́ ohọ̀ Jiwheyẹwhe tọn enẹ gbá do otẹn etọn hoho lọ mẹ.  Humọ, yẹn sọ to gbedide de detọ́n gando nuhe mì dona wà na mẹho Ju lẹ tọn ehelẹ go to azọ́n ohọ̀ Jiwheyẹwhe tọn enẹ vivọgbá kọ̀n: Akuẹzinzan he nuhudo etọn tin lẹ ni yawu yin nina mẹho ehelẹ sọn adọkunnu ahọlu tọn mẹ,+ yèdọ sọn takuẹ he yin ṣinṣinyan to lẹdo he tin to Tọ̀sisa lọ Godo lẹ mẹ, na azọ́n lọ nido zindonukọn madoalọte.+  Podọ nudepope he nuhudo etọn tin—vlavo oyìnsú winyanwinyan,+ agbò+ po lẹngbọvu+ lẹ po na avọ́nunina mimẹ̀ hlan Jiwheyẹwhe olọn tọn, kavi likun,+ ojẹ̀,+ ovẹn+ po amì+ po kẹdẹdile yẹwhenọ he tin to Jelusalẹm lẹ dọ do—dona yin nina yé to gbesisọ mẹ to aihọngbè aihọngbè ma gblá, 10  na yé nido zindonukọn nado to avọ́nunina he nọ hẹn homẹhun Jiwheyẹwhe olọn tọn lẹ basi bo na to dẹ̀ho do ogbẹ̀ ahọlu tọn po visunnu etọn lẹ po tọn tamẹ.+ 11  N’ko sọ de gbedide de tọ́n dọ eyin mẹdepope tùnafọ osẹ́ndoai ehe ji, atinpo de na yin dindọn sún sọn ohọ̀ etọn go bọ ewọ na yin zizedaga bo na yin pipla* do e go, podọ ohọ̀ etọn na yin hinhẹn zun adàdo otò tọn* na oylan ehe wutu. 12  Podọ na Jiwheyẹwhe he ko hẹn oyín etọn nado gbọṣi finẹ+ ni de ahọlu depope kavi mẹdepope sẹ̀, eyin mẹlọ ze alọ etọn daga nado tùnafọ gbedide ehe ji bo họ́ ohọ̀ Jiwheyẹwhe tọn, he tin to Jelusalẹm. Yẹn Daliusi wẹ de gbedide ehe tọ́n. Mì gbọ e ni yin wiwà domọ to afọdopolọji.” 13  Whenẹnu, Tatenai, ayimatẹn-gán lẹdo he tin to Tọ̀sisa lọ Godo tọn, Ṣetali-bozenai+ po hagbẹ yetọn lẹ po yinuwa to afọdopolọji sọgbe hẹ nuhe Ahọlu Daliusi ko degbe etọn lẹpo. 14  Mẹho Ju lẹ tọn lẹ sọ zindonukọn to họ̀gbigbá lọ mẹ bosọ to nukọnyi to e kọ̀n,+ dile yé ko yin tudohomẹna gbọn dọdai Hagai+ yẹwhegán lọ po Zekalia,+ ovivi Ido tọn po dali do; yé dotana họ̀gbigbá lọ gbọn gbedide Jiwheyẹwhe Islaeli tọn+ dali podọ gbọn gbedide Kilusi,+ Daliusi+ po Ahọlu Altakẹlikesi+ Pẹlsia tọn po dali. 15  Yé sọ dotana ohọ̀ lọ gbigbá to azán atọ̀ntọ osun Adali* tọn gbè, to owhe ṣidopotọ gandudu Ahọlu Daliusi tọn mẹ. 16  Enẹgodo, Islaelivi lẹ, yẹwhenọ lẹ, Levinu lẹ+ po kanlinmọ dai tọn he pò lẹ po yí ayajẹ do hùn* ohọ̀ Jiwheyẹwhe tọn ehe. 17  Podọ to ohọ̀ Jiwheyẹwhe tọn ehe hùnhùn whenu, yé hẹn oyìnsú 100, agbò 200 po lẹngbọvu 400 po wá bosọ yí gbọgbọẹ asu 12 do sanvọ́ do Islaeli pete tamẹ taidi avọ́nunina ylando tọn, sọgbe hẹ sọha hẹnnu Islaeli tọn lẹ.+ 18  Yé sọ de yẹwhenọ lẹ to pipli yetọn lẹ mẹ podọ Levinu lẹ to pipli yetọn lẹ mẹ na sinsẹ̀nzọn Jiwheyẹwhe tọn to Jelusalẹm,+ sọgbe hẹ nuhe yin kinkandai to owe Mose tọn mẹ.+ 19  Kanlinmọ dai tọn lọ lẹ sọ basi hùnwhẹ Juwayi tọn to azán 14tọ osun tintan tọn gbè.+ 20  Yẹwhenọ lẹ po Levinu lẹ po, yèdọ yemẹpo to pọmẹ ko klọ́ yede wé,+ enẹwutu yemẹpo ko lẹzun wiwe; yé sọ hù kanlin Juwayi tọn na kanlinmọ dai tọn lọ lẹpo, na yẹwhenọ hatọ yetọn lẹ, podọ na yedelẹ. 21  Enẹgodo, Islaelivi he lẹkọwa sọn kanlinmọgbenu lọ lẹ sọ dù sọn e mẹ, gọna mẹdepope he kọnawudopọ hẹ yé bo ko klan yede dovo na mawé akọta aigba lọ tọn lẹ tọn nado basi sinsẹ̀n hlan* Jehovah Jiwheyẹwhe Islaeli tọn.+ 22  Yé sọ yí ayajẹ do basi Hùnwhẹ Akla Madotọ́n tọn+ na azán ṣinawe, na Jehovah hẹn yé jaya wutu podọ na ewọ ko hẹn ahun ahọlu Asilia tọn bọ̀,+ na yé bọ e do nọgodona yé* to azọ́n ohọ̀ Jiwheyẹwhe nugbo lọ, yèdọ Jiwheyẹwhe Islaeli tọn tọn mẹ wutu.

Nudọnamẹ Odò Tọn

To paa mẹ, “to ohọ̀ kandai lẹ tọn mẹ.”
Kavi “agbegbe fidugando.”
Nudi m 26,7. Pọ́n Nud. B14.
Kavi “to Euflate Godo.”
Kavi “bọ ewọ na yin whiwhè.”
Kavi vlavo, “ogbóji; afọdaitẹn.”
Pọ́n Nud. B15.
Kavi “do basi klandowiwe na.”
To paa mẹ, “nado dín.”
To paa mẹ, “bọ e do na huhlọn alọ yetọn.”