Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Ẹzla 5:1-17

NUHE E BẸHẸN LẸ

  • Ju lẹ vọ́ tẹmpli lọ gbigbá bẹjẹeji (1-5)

  • Tatenai kanwehlan hlan Daliusi (6-17)

5  Enẹgodo, yẹwhegán Hagai+ podọ yẹwhegán Zekalia+ he yin ovivi Ido+ tọn dọ dọdai na Ju he tin to Juda po Jelusalẹm po lẹ to oyín Jiwheyẹwhe Islaeli tọn he tin hẹ yé tọn mẹ.  Whenẹnu wẹ Zelubabẹli+ visunnu Ṣealtiẹli tọn po Jeṣua+ visunnu Jehozadaki tọn po jẹ ohọ̀ Jiwheyẹwhe tọn+ he to Jelusalẹm lọ vọ́ gbá ji; yẹwhegán Jiwheyẹwhe tọn lẹ sọ tin to yé dè bo to godonọna yé.+  To whenẹnu, Tatenai ayimatẹn-gán lẹdo he tin to Tọ̀sisa lọ Godo* lẹ tọn po Ṣetali-bozenai po gọna hagbẹ yetọn lẹ wá yé dè bo kanse yé dọmọ: “Mẹnu wẹ nagbè mì nado gbá ohọ̀ ehe podọ nado dotana ohọ̀ ehe?”*  Yé sọ kanse yé dọmọ: “Nawẹ sunnu he to azọ́nwa to ohọ̀ ehe kọ̀n lẹ nọ yin?”  Ṣigba, Jiwheyẹwhe to hihọ́-basina* mẹho Ju lẹ tọn+ lẹ bọ yé ma penugo nado hẹnalọdotena yé kakajẹ whenue linlin lẹ yin didohlan Daliusi bọ wekanhlanmẹ ahọlu tọn de yin didohlan gando whẹho lọ go.  Vọkan wekanhlanmẹ lọ tọn die, ehe Tatenai ayimatẹn-gán lẹdo he tin to Tọ̀sisa lọ Godo tọn, Ṣetali-bozenai po hagbẹ etọn lẹ po, gọna ayimatẹn-gán pẹvipẹvi lẹdo he tin to Tọ̀sisa lọ Godo lẹ tọn lẹ dohlan Ahọlu Daliusi;  yé do linlin lẹ hlan ẹn podọ nuhe yé kàn die: “Hlan Ahọlu Daliusi: “Jijọho lẹpo ni tin hlan we!  Gbọ e ni yin hinhẹn zun yinyọnẹn na ahọlu dọ mí yì agbegbe* Juda tọn ji to ohọ̀ Jiwheyẹwhe daho lọ tọn mẹ, bọ yè to ohọ̀ lọ gbá gbọn zannu dahodaho lẹ bibli do otẹn yetọn mẹ dali podọ owhlẹ lẹ to yinyin tito gbọn adó lọ lẹ mẹ. Gbẹtọ lẹ yí jejejininọ do to azọ́n lọ wà bo to vivẹnudo nado hẹn azọ́n lọ yinukọn.  Enẹwutu, mí kanse mẹho yetọn lẹ dọmọ: ‘Mẹnu wẹ nagbè mì nado gbá ohọ̀ ehe podọ nado dotana ohọ̀ ehe?’*+ 10  Mí sọ kanse yé nado dọ oyín yetọn na mí bọ mí nado dọ ẹ na we, na mí nido kàn oyín sunnu he to nukọntọ yin lẹ tọn. 11  “Nuhe yé gblọnna mí die: ‘Devizọnwatọ Jiwheyẹwhe olọn po aigba po tọn lẹ wẹ mí yin bọ mí to ohọ̀ he ko yin gbigbá bo yin tadona to owhe susu die gbọn ahọlu daho Islaeli tọn de dali lọ vọ́ gbá.+ 12  Ṣigba, na otọ́ mítọn lẹ hẹn homẹgble Jiwheyẹwhe olọn tọn lọ wutu,+ ewọ jo yé do alọ Ahọlu Nẹbukadnẹzali+ Babilọni tọn mẹ, yèdọ Kaldeanu lọ, mẹhe họ́ ohọ̀ lọ+ bo bẹ gbẹtọ lọ lẹ yì kanlinmọgbenu to Babilọni.+ 13  Amọ́, to owhe tintan Ahọlu Kilusi Babilọni tọn mẹ, Ahọlu Kilusi de gbedide de tọ́n nado vọ́ ohọ̀ Jiwheyẹwhe tọn lọ gbá.+ 14  Humọ, nuyizan sika po fataka po tọn he to ohọ̀ Jiwheyẹwhe tọn mẹ bọ Nẹbukadnẹzali bẹ sọn tẹmpli lọ mẹ to Jelusalẹm bo ko hẹnwa tẹmpli Babilọni tọn mẹ lọ lẹ wẹ Ahọlu Kilusi ko bẹ jẹgbonu sọn tẹmpli Babilọni tọn mẹ.+ Yé yin bibẹ na dawe de he nọ yin Ṣẹṣibazali,*+ mẹhe Kilusi yí do basi ayimatẹn-gán.+ 15  Kilusi sọ dọna ẹn dọmọ: “Yí nuyizan ehelẹ. Yì bo bẹ yé do tẹmpli he tin to Jelusalẹm lọ mẹ, bo gbọ ohọ̀ Jiwheyẹwhe tọn ni yin vivọgbá do otẹn etọn hoho lọ mẹ.”+ 16  Enẹwutu, Ṣẹṣibazali ehe wá bo do dodonu ohọ̀ Jiwheyẹwhe tọn,+ he tin to Jelusalẹm lọ tọn ai; sọn whenẹnu wẹ họ̀gbigbá lọ ko to yìyì kakajẹ din, ṣigba e ma ko yin tadona.’+ 17  “Todin, eyin e yọ́n to nukun ahọlu tọn mẹ, gbọ dodinnanu de ni yin bibasi to dọ́n to adọkunnu sẹdotẹn ahọlu tọn he to Babilọni lọ mẹ nado yọnẹn eyin Ahọlu Kilusi nagbè nado vọ́ ohọ̀ Jiwheyẹwhe tọn lọ gbá to Jelusalẹm;+ enẹgodo gbọ nudide ahọlu tọn gando whẹho ehe go ni yin didohlan mí.”

Nudọnamẹ Odò Tọn

Kavi “to Euflate Godo.”
Kavi “atinpo ehelẹ.”
To paa mẹ, “nukun Jiwheyẹwhe yetọn tọn tin to.”
Kavi “agbegbe fidugando.”
Kavi “atinpo ehelẹ.”
Vlavo Zelubabẹli to Ẹzl 2:2; 3:8.