Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Ẹzla 4:1-24

NUHE E BẸHẸN LẸ

  • Agọjijẹdo tẹmpli lọ vivọgbá (1-6)

  • Kẹntọ lẹ kanwehlan Ahọlu Altakẹlikesi (7-16)

  • Gblọndo Altakẹlikesi tọn (17-22)

  • Tẹmpli lọ gbigbá doalọte (23-24)

4  Whenue kẹntọ Juda po Bẹnjamini+ po tọn lẹ sè dọ mẹhe lẹkọwa sọn kanlinmọgbenu lẹ+ to tẹmpli de gbá na Jehovah Jiwheyẹwhe Islaeli tọn,  yé dọnsẹpọ Zelubabẹli po nukọntọ whédo otọ́ lẹ tọn lẹ po to afọdopolọji bo dọna yé dọmọ: “Mì dike mí ni gbá ẹ hẹ mì; na taidi mìwlẹ, Jiwheyẹwhe mìtọn wẹ mílọsu nọ basi sinsẹ̀n hlan*+ bo ko to avọ́sinsan basi hlan ẹn sọn ojlẹ Ahọlu Esali-hadọni Asilia tọn+ lẹ mẹ gbọ́n, yèdọ mẹhe plan mí wáfi.”+  Ṣigba, Zelubabẹli, Jeṣua po nukọntọ whédo otọ́ Islaeli tọn lẹ tọn he pò lẹ po dọna yé dọmọ: “Mì ma tindo jlọjẹ depope nado gbá ohọ̀ de hẹ mí na Jiwheyẹwhe mítọn,+ na míwlẹ kẹdẹ wẹ na gbá ẹ na Jehovah Jiwheyẹwhe Islaeli tọn, kẹdẹdile Ahọlu Kilusi, ahọlu Pẹlsia tọn ko degbena mí do.”+  To whenẹnu, mẹhe nọ nọ̀ aigba lọ ji lẹ to omẹ Juda tọn lẹ hẹn gbọjọ* mapote bo to ahungbadona yé ma nado gbá ohọ̀ lọ.+  Yé haya ayinamẹtọ lẹ sọta yé nado glọnalina tito yetọn lẹ+ to azán Ahọlu Kilusi Pẹlsia tọn lẹpo gbè kakajẹ gandudu Ahọlu Daliusi+ Pẹlsia tọn whenu.  To bẹjẹeji gandudu Ahasuelusi tọn, yé kanwe nado sawhẹdokọna tòmẹnu Juda po Jelusalẹm po tọn lẹ.  Podọ to azán Ahọlu Altakẹlikesi Pẹlsia tọn lẹ gbè, Biṣlami, Mitledati, Tabeẹli po hagbẹ etọn he pò lẹ po kanwehlan Altakẹlikesi ahọlu lọ; yé basi lẹdogbedevomẹ wekanhlanmẹ lọ tọn do Alamaikigbe mẹ,+ bo yí wekun Alamaiki tọn lẹ do kàn ẹn.*  * Lehumi ahọluzọnwatọ-gán po Ṣimṣai wekantọ po kanwehlan Ahọlu Altakẹlikesi sọta Jelusalẹm bo dọmọ:  (Ehe wá sọn Lehumi ahọluzọnwatọ-gán lọ, Ṣimṣai wekantọ lọ po hagbẹ yetọn he pò lẹ po dè, gọna whẹdatọ lẹ, ayimatẹn-gán pẹvipẹvi lẹ, wekantọ lẹ, omẹ Elẹki+ tọn lẹ, Babilọninu lẹ, mẹhe nọ nọ̀ Susa+ lẹ, enẹ wẹ Elaminu+ lẹ, 10  gọna akọta he pò bọ Asenapali he yin omẹ daho podọ yẹyinọ bẹ yì kanlinmọgbenu bo bẹ yé do tòdaho Samalia tọn lẹ mẹ lẹ,+ po mẹhe pò to lẹdo he tin to Tọ̀sisa lọ Godo* mẹ lẹ po, podọ todin 11  vọkan wekanhlanmẹ he yé dohlan ẹn lọ tọn die.) “Hlan Ahọlu Altakẹlikesi, sọn devizọnwatọ towe lẹ, mẹhe tin to lẹdo Tọ̀sisa lọ Godo tọn mẹ lẹ dè: Todin, 12  gbọ e ni yin hinhẹn zun yinyọnẹn na ahọlu dọ Ju he hẹji wá mí dè sọn dè we lẹ ko wá Jelusalẹm. Yé to tòdaho atẹṣitọ lẹ po mẹylankan lẹ po tọn lọ vọ́ gbá, podọ yé ko to adó lọ lẹ do fó+ bo to dodonu lọ lẹ jlado. 13  Todin, gbọ e ni yin hinhẹn zun yinyọnẹn na ahọlu dọ eyin tòdaho ehe yin vivọgbá bọ adó etọn lẹ yin dido fó, yé ma na nọ sú tòkuẹ, takuẹ+ kavi aliji-kuẹ, podọ ehe na dekọtọn do adọkun hinhẹngú mẹ na ahọlu lẹ. 14  To whenuena e yindọ ojẹ̀ họ̀nmẹ tọn wẹ mí nọ dù* bọ e ma sọgbe dọ míwlẹ ni mọdọ onú ahọlu tọn lẹ to gbigble bo nabọẹ, enẹwutu wẹ mí dowẹn hlan nado hẹn ehe zun yinyọnẹn na ahọlu, 15  na yè nido dindona sọn owe kandai tọn tọgbo towe lẹ tọn mẹ.+ Hiẹ na mọ to owe kandai lẹ tọn lọ lẹ mẹ bo nasọ yọnẹn dọ tòdaho atẹṣitọ lẹ tọn de wẹ tòdaho ehe yin bosọ yin owù de na ahọlu lẹ po agbegbe* lẹ po, podọ mẹhe yin gufọntọ lẹ wẹ nọ yin mimọ to e mẹ sọn hohowhenu. Enẹ wẹ zọ́n bọ tòdaho ehe do yin vivasudo.+ 16  Míwlẹ jlo na hẹn zun yinyọnẹn na ahọlu dọ eyin tòdaho ehe yin vivọgbá bọ adó lọ lẹ yin dido fó, hiẹ ma na penugo nado paṣẹ do* lẹdo he tin to Tọ̀sisa lọ Godo lẹ ji ba.”+ 17  Ahọlu sọ dowẹn hlan Lehumi ahọluzọnwatọ-gán lọ, Ṣimṣai wekantọ lọ po hagbẹ yetọn he pò bo nọ nọ̀ Samalia lẹ po, gọna pipotọ mẹhe nọ nọ̀ lẹdo he tin to Tọ̀sisa lọ Godo mẹ lẹ dọmọ: “N’dọnudo mì! Podọ todin 18  wekanhlanmẹ he mì dohlan mí lọ ko yin hihia hezeheze* to nukọn ṣie. 19  N’ko degbe dọ dodinnanu de ni yin bibasi bọ e yin mimọ dọ sọn whenu dindẹn die wẹ tòdaho lọ ko nọ diọnukunsọ ahọlu lẹ, bọ atẹṣiṣi po gufinfọn lẹ po ko wá aimẹ to finẹ.+ 20  Ahọlu huhlọnnọ lẹ ko dugán do Jelusalẹm ji bo paṣẹ do lẹdo he tin to Tọ̀sisa lọ Godo lẹ pete ji, bọ tòkuẹ, takuẹ po aliji-kuẹ po nọ yin súsú na yé. 21  Todin, mì degbe dọ sunnu enẹlẹ ni doalọtena azọ́n lọ, na tòdaho lọ nikaa yin vivọgbá kakajẹ whenue n’na degbe. 22  Mì nọ aṣeji ma nado dovọ́nanu to whẹho ehe mẹ, na onú ahọlu tọn lẹ nikaa yin hinhẹngble yinukọn dogọ.”+ 23  Todin, to whenue vọkan wekanhlanmẹ Ahọlu Altakẹlikesi tọn ko yin hihia to Lehumi, Ṣimṣai wekantọ lọ po hagbẹ yetọn lẹ po nukọn godo, yé yawu yì Ju lẹ dè to Jelusalẹm bo hẹn yé gánnugánnu nado doalọtena azọ́n lọ. 24  Lehe azọ́n ohọ̀ Jiwheyẹwhe tọn lọ tọn, ehe tin to Jelusalẹm, doalọte do niyẹn; e sọ gbọṣi mọ kakajẹ owhe awetọ gandudu Ahọlu Daliusi Pẹlsia tọn lọ tọn mẹ.+

Nudọnamẹ Odò Tọn

To paa mẹ, “nọ dín.”
To paa mẹ, “sin alọ hẹn gbọjọ.”
Kavi vlavo, “e yin kinkan do Alamaikigbe mẹ bo wá yin lilẹdogbedevomẹ.”
Ẹzl 4:8 jẹ 6:18 yin kinkan to dowhenu do Alamaikigbe mẹ.
Kavi “to Euflate Godo.”
Kavi “họ̀nmẹ wẹ nọ sú sunmẹ-kuẹ mí.”
Kavi “agbegbe fidugando.”
To paa mẹ, “nado tindo mimá to.”
Kavi vlavo, “ko yin lilẹdogbedevomẹ bo yin hihia.”