Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Ẹzla 1:1-11

NUHE E BẸHẸN LẸ

  • Kilusi degbe nado vọ́ tẹmpli lọ gbá (1-4)

  • Awuwiwle nado lẹkọ sọn kanlinmọgbenu to Babilọni (5-11)

1  To owhe tintan Ahọlu Kilusi+ Pẹlsia tọn mẹ, na ohó he Jehovah dọ gbọn Jelemia gblamẹ+ nido yin hinhẹndi, Jehovah whàn gbigbọ Ahọlu Kilusi Pẹlsia tọn nado basi nulila de lẹdo pé gbọn ahọluduta etọn mẹ, bọ e sọ basi kandai etọn+ dọmọ:  “Nuhe Ahọlu Kilusi Pẹlsia tọn dọ die, ‘Jehovah Jiwheyẹwhe olọn tọn ko na mi ahọluduta aigba ji tọn lẹpo,+ podọ e ko deazọ́nna mi nado gbá ohọ̀ de na ẹn to Jelusalẹm,+ ehe tin to Juda.  Mẹdepope to mì mẹ he yin omẹ etọn lẹ, na Jiwheyẹwhe etọn ni tin hẹ ẹ, mì sọ gbọ ewọ ni hẹji yì Jelusalẹm, ehe tin to Juda bo vọ́ ohọ̀ Jehovah Jiwheyẹwhe Islaeli tọn gbá—ewọ wẹ Jiwheyẹwhe nugbo lọ—mẹhe ohọ̀ etọn tin to Jelusalẹm.*  Mẹdepope he yin jonọ,+ to fidepope he ewọ sọgan tin te, mì gbọ kọmẹnu etọn* lẹ ni gọalọna ẹn bo na ẹn fataka po sika po, nutindo po kanlin po, gọna avọ́nunina sọn ojlo mẹ wá na ohọ̀ Jiwheyẹwhe nugbo lọ tọn,+ ehe tin to Jelusalẹm.’”  To whenẹnu, yé mẹhe yin nukọntọ whédo otọ́ Juda po Bẹnjamini po tọn lẹ gọna yẹwhenọ lẹ po Levinu lẹ po—yèdọ mẹdepope he gbigbọ Jiwheyẹwhe nugbo lọ tọn ko whàn—wleawu nado hẹji yì bo vọ́ ohọ̀ Jehovah tọn gbá, ehe tin to Jelusalẹm.  Mẹhe lẹdo yé pé lẹpo nọgodona yé* gbọn nuyizan fataka po sika po tọn lẹ, nutindo, kanlin po nuhọakuẹ lẹ po nina yé dali, gbọnvona avọ́nunina sọn ojlo mẹ wá lẹpo.  Ahọlu Kilusi sọ bẹ nuyizan ohọ̀ Jehovah tọn mẹ tọn lọ lẹ tọ́n, ehe Nẹbukadnẹzali ko bẹ yì sọn Jelusalẹm bo bẹ do ohọ̀ yẹwhe etọn tọn mẹ.+  Ahọlu Kilusi Pẹlsia tọn bẹ yé tọ́n to anademẹ Mitledati akuẹbẹhẹntọ lọ tọn glọ, mẹhe basi todohukanji yetọn na Ṣẹṣibazali*+ ahọvi Juda tọn.  Todin, todohukanji lọ die: ohà sika tọn 30, ohà fataka tọn 1 000, nuyizan 29 devo lẹ, 10  agbán sika tọn pẹvipẹvi 30, agbán fataka tọn pẹvipẹvi 410 po nuyizan 1 000 devo lẹ po. 11  Nuyizan sika po fataka po tọn lẹpo yin 5 400. Onú ehe lẹpo wẹ Ṣẹṣibazali hẹn hẹji wá to whenue mẹhe to kanlinmọgbenu lẹ+ yin hinhẹn jẹgbonu sọn Babilọni jei Jelusalẹm.

Nudọnamẹ Odò Tọn

Kavi vlavo, “mẹhe tin to Jelusalẹm.”
To paa mẹ, “sunnu he tin to fihe e nọ nọ̀.”
To paa mẹ, “hẹn alọ yetọn lẹ lodo.”
Vlavo Zelubabẹli to Ẹzl 2:2; 3:8 mẹ.