Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Ẹsteli 7:1-10

NUHE E BẸHẸN LẸ

  • Ẹsteli de Hamani gbà (1-6a)

  • Hamani yin piplado pòtin etọn go (6b-10)

7  Enẹwutu, ahọlu po Hamani+ po wá hùnwhẹ Ahọsi Ẹsteli tọn.  Ahọlu sọ dọna Ẹsteli whladopo dogọ to azán awetọ gbè to hùnwhẹ ovẹn tọn lọ whenu dọmọ: “Ahọsi Ẹsteli E, etẹwẹ yin ovẹ̀ towe? E na yin nina we. Podọ etẹwẹ yin obiọ towe? Etlẹ yin kakajẹ* odaa ahọluduta ṣie tọn ji, e na yin bibasi na we!”+  Ahọsi Ẹsteli gblọn dọmọ: “Ahọlu E, eyin n’ko mọ nukundagbe towe, podọ eyin e yọ́n to nukun ahọlu tọn mẹ, ovẹ̀ ṣie wẹ yindọ ogbẹ̀* ṣie ni yin whinwhlẹngán, podọ obiọ ṣie wẹ yindọ omẹ ṣie lẹ+ ni yin pipò do ogbẹ̀.  Na mí ko yin sisà,+ yèdọ yẹn po omẹ ṣie lẹ po, nado yin kúnsúdona bo yin hùhù bosọ yin vivasudo.+ Eyin mí yin sisà taidi afanumẹ sunnu po yọnnu po poun wẹ, n’ma na ko kẹnù. Amọ́, nugbajẹmẹji ehe ma dona yin alọkẹyi, na e na hẹnnugble to ahọlu lọsu go.”  Whenẹnu wẹ Ahọlu Ahasuelusi dọna Ahọsi Ẹsteli dọmọ: “Mẹnu wẹ mẹlọ, podọ fie wẹ dawe he gboadọ bo wà onú mọnkọtọn te?”  Ẹsteli dọmọ: “Dawe ylankan podọ kẹntọ lọ wẹ Hamani kanylantọ ehe.” Obu jẹ Hamani ji na ahọlu po ahọsi lọ po tọn wutu.  Ahọlu fọnṣite po adi po sọn hùnwhẹ ovẹn tọn lọ tẹnmẹ bo yì jipa họ̀nmẹ tọn mẹ, ṣigba Hamani fọ́n nado vẹvẹna Ahọsi Ẹsteli nado whlẹn ogbẹ̀* etọn, na e họnwun na ẹn dọ ahọlu ko magbe nado sayana emi.  Ahọlu lẹkọwa ohọ̀ hùnwhẹ tọn lọ mẹ sọn jipa họ̀nmẹ tọn mẹ bo mọdọ Hamani ko dlẹn ede do adọzan he ji Ẹsteli tin te lọ ji. Ahọlu sọ dawhá dọmọ: “E sọ jlo na zanhẹ ahọsi lọ gánnugánnu to ohọ̀ ṣie titi mẹ wẹ ya?” Tlolo he ohó ehelẹ tọ́n sọn onù ahọlu tọn mẹ wẹ yé ṣinyọnnudo nukunmẹ* na Hamani.  Todin, Halbona,+ dopo to ahọluzọnwatọ họ̀nmẹ tọn ahọlu tọn lẹ mẹ dọmọ: “Hamani ko sọ wleawu pòtin de tọn dai na Mọldekai,+ yèdọ mẹhe linlin etọn whlẹn ahọlu.+ Pòtin lọ to ote to owhé Hamani tọn gbè, bọ jiyiyi etọn yin awagbà 50.”* Whenẹnu wẹ ahọlu dọmọ: “Mì ze e plá dego.” 10  Enẹwutu, yé ze Hamani plá do pòtin he ewọ ko wleawu etọn dai na Mọldekai lọ go bọ adi ahọlu tọn sọ yìdo.

Nudọnamẹ Odò Tọn

Kavi “na.”
Kavi “alindọn.”
Kavi “alindọn.”
Aṣa hohowhenu tọn ehe nado ṣinyọnnudo nukunmẹ namẹ sọgan zẹẹmẹdo winyan kavi vlavo nugbajẹmẹji na mẹlọ.
Nudi m 22,3. Pọ́n Nud. B14.