Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Ẹsteli 1:1-22

NUHE E BẸHẸN LẸ

  • Hùnwhẹ he Ahọlu Ahasuelusi basi to Ṣuṣani (1-9)

  • Ahọsi Vaṣti gbẹ́ nado setonu (10-12)

  • Ahọlu pli hẹ nuyọnẹntọ etọn lẹ (13-20)

  • Gbedide ahọlu tọn yin didohlan (21, 22)

1  Todin, to azán Ahasuelusi* tọn lẹ gbè, enẹ wẹ Ahasuelusi he dugán do agbegbe* 127+ ji sọn India yì Etiopia,*  to azán enẹlẹ gbè, whenue Ahọlu Ahasuelusi to ofìn ahọlu tọn etọn ji to Ṣuṣani*+ figángán* lọ,  to owhe atọ̀ntọ gandudu etọn tọn mẹ, e basi hùnwhẹ de na ahọvi po devizọnwatọ etọn lẹpo po. Awhànpa Pẹlsia+ po Media+ po tọn, gọna omẹ nukundeji lẹ po ahọvi agbegbe* lọ lẹ tọn lẹ po sọ wá nukọn etọn,  bọ e do adọkun ahọluduta gigonọ etọn tọn gọna kiklo-yinyin po whanpẹ gigo daho etọn tọn po hia yé na azán susu, yèdọ na azán 180.  Podọ to vivọnu azán lọ lẹ tọn, ahọlu basi hùnwhẹ de na mẹhe wá lẹpo to Ṣuṣani* figángán* lọ na azán ṣinawe, yèdọ sọn omẹ daho hugan ji jẹ omẹ pẹvi pete yetọn ji, to awánu he tin to jipa họ̀nmẹ ahọlu tọn lọ mẹ.  To finẹ, yè sọgan mọ alavọ, sekanfun dagbedagbe po avọ̀ juju he yin sìnsìn do okàn avọ̀ he yọnwhanpẹ taun lẹ tọn go, sekan sopẹ́-sinmẹnọ to alọkẹ fataka tọn lẹ go, dòtin mabli tọn lẹ, podọ adọzan sika po fataka po tọn lẹ tin to fihe zannu pọlfili, mabli, peali po mabli yuu po tọn lẹ yin titẹ́ do.  Ovẹn nọ yin ninamẹ do kọfo* sika tọn lẹ mẹ; kọfo lọ lẹpo wẹ gbọnvona yede bọ ovẹn ahọlu tọn gọfla, sọgbe hẹ adọkun ahọlu tọn.  Osẹ́n lọ wẹ yindọ mẹde ma dona hẹnmẹ po huhlọn po* nado nù, na ahọlu ko basi tito hẹ ahọluzọnwatọ họ̀nmẹ tọn etọn lẹ dọ mẹdopodopo wẹ dona basi dile e jlo e do.  Ahọsi Vaṣti+ lọsu basi hùnwhẹ de na yọnnu lẹ to owhé* Ahọlu Ahasuelusi tọn gbè. 10  To azán ṣinawetọ gbè, whenue homẹ ahọlu tọn to hùnhùn na ovẹn wutu, e dọna Mẹhumani, Bizta, Halbona,+ Bigita, Abagta, Zetali po Kalkasi po, yèdọ ahọluzọnwatọ họ̀nmẹ tọn ṣinawe he nọ wadevizọn na Ahọlu Ahasuelusi tlọlọ lẹ, 11  nado plan Ahọsi Vaṣti wá ahọlu nukọn po tabla ahọsi tọn po to ota, nado do whanpẹ etọn hia gbẹtọ lọ lẹ po ahọvi lẹ po, na ewọ yọnwhanpẹ taun. 12  Ṣigba, Ahọsi Vaṣti gbẹ́ gbidigbidi nado wá to whenue ahọluzọnwatọ họ̀nmẹ tọn lọ lẹ ko dọ gbedide ahọlu tọn na ẹn godo. Whenẹnu, ahọlu gblehomẹ taun bo biọ adi sinsinyẹn mẹ. 13  Enẹgodo, ahọlu dọhona sunnu nuyọnẹntọ lẹ he tindo zinzin gando nuhe ko jọ wayi lẹ* go (na mọ wẹ whẹho ahọlu tọn nọ yin hinhẹnwa nukọnna mẹhe yọ́n osẹ́n po whẹho whẹdida tọn lẹpo po do niyẹn, 14  mẹhe sọ sẹpọ ẹ hugan lẹ wẹ Kalṣena, Ṣetali, Admata, Talṣiṣi, Melẹsi, Malsena po Memukani po, yèdọ ahọvi ṣinawe+ Pẹlsia po Media po tọn he nọ yì ahọlu dè tlọlọ bo tin to otẹn daho hugan mẹ to ahọluduta lọ mẹ lẹ). 15  Ahọlu kanse dọmọ: “Sọgbe hẹ osẹ́n, etẹwẹ dona yin wiwà na Ahọsi Vaṣti, na ewọ ma setonuna gbedide Ahọlu Ahasuelusi tọn he yin nina ẹn gbọn ahọluzọnwatọ họ̀nmẹ tọn lẹ gblamẹ?” 16  To whenẹnu, Memukani dọ to ahọlu po ahọvi lẹ po nukọn dọmọ: “E ma yin ahọlu kẹdẹ wẹ Ahọsi Vaṣti hùwhẹ do gba,+ amọ́ do ahọvi po mẹhe tin to agbegbe* Ahọlu Ahasuelusi tọn mẹ lẹpo po. 17  Na nuhe ahọsi lọ wà ehe na wá yin sisè gbọn asi lẹpo dali bọ yé na nọ vlẹ asu yetọn lẹ dọ, ‘Ahọlu Ahasuelusi biọ nado plan Ahọsi Vaṣti wá nukọn etọn, ṣigba e gbẹ́ nado yì.’ 18  To azán ehe gbè, ahọvi-yọnnu Pẹlsia po Media po tọn lẹ he sè nuhe ahọsi lọ wà na dọ ẹ na ahọvi ahọlu tọn lẹpo, bọ ehe na dekọtọn do vlẹko po winyan daho po mẹ. 19  Eyin e yọ́n to nukun ahọlu tọn mẹ, gbọ ewọ ni de gbedide ahọlu tọn de tọ́n bo gbọ e ni yin kinkandai do osẹ́n Pẹlsia po Media po tọn lẹ mẹ, ehe ji yè ma sọgan zẹhudo,+ dọ Vaṣti ni masọ wá Ahọlu Ahasuelusi nukọn gbede ba blo; podọ gbọ ahọlu ni de yọnnu devo he pọnte hú ewọ taidi ahọsi. 20  Podọ whenue gbedide ahọlu tọn na yin sisè to fidepope he ahọluduta etọn gbloada yì lẹpo mẹ, asi lẹpo na nọ gbògbéna asu yetọn lẹ, yèdọ sọn omẹ daho hugan ji jẹ omẹ pẹvi pete yetọn ji.” 21  Ayinamẹ ehe yọ́n to nukun ahọlu po ahọvi lẹ po tọn mẹ, ahọlu sọ basi nuhe Memukani dọ. 22  Enẹwutu, ewọ do wekanhlanmẹ lẹ hlan agbegbe ahọluduta etọn tọn* lẹpo mẹ,+ yèdọ hlan agbegbe* dopodopo sọgbe hẹ wekinkan* etọn podọ akọta dopodopo to ogbè etọn titi mẹ, na asu lẹpo nido yin klunọ* to owhé yetọn titi gbè podọ nado dọho do ogbè omẹ yetọn titi lẹ tọn mẹ.

Nudọnamẹ Odò Tọn

Ewọ yin yinyọnẹn taidi Xerxès I, visunnu Daliusi Daho lọ (Daliusi Hystaspe) tọn.
Kavi “agbegbe fidugando.”
Kavi “Kuṣi.”
Kavi “Susa.”
Kavi “họ̀nmẹ; fibẹtado.”
Kavi “agbegbe fidugando.”
Kavi “Susa.”
Kavi “họ̀nmẹ; fibẹtado.”
Kavi “núzinzan; sinnù-gbán.”
Kavi “dona yin alọhẹndotena.”
Kavi “họ̀nmẹ.”
Kavi “aliho nuyiwa tọn lẹ.” To paa mẹ, “ojlẹ lẹ.”
Kavi “agbegbe fidugando.”
To paa mẹ, “agbegbe fidugando ahọlu tọn.”
Kavi “agbegbe fidugando.”
Kavi “aliho nukinkan tọn.”
Kavi “ahọvi.”