Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Matiu 8:1-34

8  To whenuena e ko jẹte sọn osó lọ ji godo, gbẹtọgun daho lẹ hodo e.  Podọ, pọ́n! dawe pòtọnọ de wá bo jẹ taliaina ẹn ji, bo dọmọ: “Oklunọ, eyin hiẹ jlo domọ, hiẹ sọgan hẹn mi zun wiwe.”  Enẹwutu, e dlẹnalọ etọn, bo doalọ dawe lọ go, bo dọmọ: “Yẹn jlo. Yin hinhẹn zun wiwe.” Podọ to afọdopolọji, pòzọ̀n etọn yin kiklọ sọn e go.  Enẹgodo Jesu dọna ẹn dọmọ: “A dike bo dọna mẹde blo, ṣigba yì, bo do dewe hia yẹwhenọ, bosọ na nunina he Mose ko degbè etọn, taidi kunnudide de hlan yé.”  To whenuena e biọ Kapẹlnaumi, mẹkanwekowhàngán de wá e dè, bo to vẹvẹna ẹn  bosọ dọmọ: “Oklunọ, awukuzọ̀n to yasana devisunnu ṣie sinsinyẹn bọ e to aimimlọn to whégbè.”  E sọ dọna ẹn dọmọ: “Eyin yẹn jẹ finẹ, yẹn na hẹnazọ̀ngbọna ẹn.”  Mẹkanwekowhàngán lọ gblọnna ẹn dọmọ: “Oklunọ, yẹn ma yin mẹhe jẹ na hiẹ nido biọ họta ṣie glọ, ṣigba saa dọho poun podọ devisunnu ṣie na yin azọ̀nhẹngbọna.  Na yẹnlọsu yin mẹde he tin to aṣẹpipa glọ, bo tindo awhànfuntọ lẹ to oglọ ṣie, bọ yẹn sọ nọ dọna ode dọ, ‘Yì!’ ewọ sọ nọ yì, podọ na devo dọ, ‘Wá!’ ewọ sọ nọ wá, podọ na afanumẹ ṣie dọ, ‘Wà ehe!’ ewọ sọ nọ wà ẹ.” 10  Awuji Jesu to whenuena e sè ehe bọ e dọna mẹhe to hihodo e lẹ dọmọ: “Nugbo wẹ yẹn dọna mì, Yẹn ma ko mọ yise he klo sọmọ de to mẹdepope mẹ to Islaeli gba. 11  Ṣigba yẹn dọna mì dọ mẹsusu na wá sọn whèzẹtẹn-waji po whèyihọ-waji po bo na jagla to tafo kọ̀n hẹ Ablaham, Isaki po Jakọbu po to ahọluduta olọn tọn mẹ; 12  to whenuena e yindọ visunnu ahọluduta lọ tọn lẹ na yin zizedlan zinvlu mẹ to gbonu. Finẹ wẹ yé na viavi bo dù adúkúnkún te.” 13  To whenẹnu, Jesu dọna mẹkanwekowhàngán lọ dọmọ: “Yì. Gbọ e ni yì na we kẹdẹdile hiẹ ko yise do.” Podọ devisunnu lọ yin azọ̀nhẹngbọna to gànhiho enẹ mẹ. 14  Podọ to whenuena Jesu wá owhé Pita tọn gbè, e mọ onọ̀ asi etọn tọn to aimimlọn bo to azọ̀n agbasa-hùnmiyọ́n tọn jẹ. 15  Enẹwutu, e doalọ alọ etọn go, bọ agbasa-hùnmiyọ́n lọ yì sọn e ji, bọ e fọ́n bo jẹ lizọnyina ẹn ji. 16  Ṣigba to whenuena owhè ko jai, gbẹtọ lẹ hẹn susu mẹhe tindo gbigbọ aovi tọn lẹ wá e dè; podọ e yí ohó do yàn gbigbọ lọ lẹ jẹgbonu, bo hẹnazọ̀ngbọna mẹhe ma to gángán lẹpo; 17  na nuhe ko yin didọ gbọn yẹwhegán Isaia gblamẹ nido sọgan yin hinhẹndi, dọmọ: “Ewọ lọsu yí awutu mítọn lẹ bo bẹ azọ̀n mítọn lẹ hẹn.” 18  To whenuena Jesu mọ gbẹtọgun de lẹdo e, e degbè nado dehún yì awà awetọ ji. 19  Podọ wekantọ de wá bo dọna ẹn dọmọ: “Mẹplọntọ, yẹn na hodo we yì fidepope he hiẹ jlo na yì.” 20  Ṣigba Jesu dọna ẹn dọmọ: “Owọ̀ lẹ tindo odò lẹ podọ ohẹ̀ agahomẹ tọn lẹ tindo adọtẹn lẹ, ṣigba Visunnu gbẹtọ tọn ma tindo fidepope he e na ze ota etọn bọdai do.” 21  Enẹgodo, devi devo dọna ẹn dọmọ: “Oklunọ, nagbè mi nado yì bo dì otọ́ ṣie whẹ́.” 22  Jesu dọna ẹn dọmọ: “To hihodo mi zọnmii, bo gbọ oṣiọ lẹ ni dì oṣiọ yetọn lẹ.” 23  Podọ to whenuena e biọ tọjihun de mẹ, devi etọn lẹ hodo e. 24  Todin, pọ́n! jẹhọn sinsinyẹn de fọ́n to ohù lọ ji, sọmọ bọ agbówhẹn lẹ to gbigbaṣinyọ́n tọjihun lọ; etomọṣo ewọ to amlọndọ. 25  Podọ yé wá bo fọ́n ẹn, bo dọmọ: “Oklunọ, whlẹn mí, mí to na dọ̀n!” 26  Ṣigba e dọna yé dọmọ: “Naegbọn mì do to budi, mì yise pẹvinọ?” Enẹgodo, e fọ́n bo gbẹnuna jẹhọn lọ po ohù lọ po, bọ abọẹninọ daho de wá aimẹ. 27  Enẹwutu, awuji gbẹtọ lọ lẹ bọ yé dọmọ: “Omẹ nankọ wẹ ehe, bọ jẹhọn po ohù po tlẹ nọ setonuna ẹn?” 28  To whenuena e jẹ awà awetọ ji, to otò Gadaleninu lẹ tọn mẹ, dawe awe delẹ he tindo gbigbọ aovi tọn wá sọn yọdò lẹ ṣẹnṣẹn bo wá pé e, podọ yé ylanhùn tlala, sọmọ bọ mẹdepope ma tindo adọgbigbo nado gbọn aliho enẹ ji. 29  Podọ, pọ́n! yé dawhá, bo dọmọ: “Etẹwẹ míwlẹ tindo nado wà hẹ we, hiẹ Visunnu Jiwheyẹwhe tọn? Be hiẹ wáfi nado sayana mí jẹnukọnna ojlẹ dide lọ wẹ ya?” 30  Ṣigba pipli ohàn susu tọn de to núdù dẹn do yé. 31  Enẹwutu, aovi lọ lẹ jẹ vẹvẹna ẹn ji, dọmọ: “Eyin hiẹ yàn mí jẹgbonu, do mí hlan pipli ohàn tọn lọ mẹ.” 32  Enẹwutu, e dọna yé dọmọ: “Mì yì!” Yé tọ́njẹgbonu bo yì biọ ohàn lọ lẹ mẹ; podọ, pọ́n! pipli lọ pete hozín yì pópló lọ tónu bo flẹ jẹ ohù mẹ bosọ kú do osin mẹ. 33  Ṣigba, kanlinyìntọ lọ lẹ họnyi, bo biọ tòdaho lọ mẹ, bosọ na linlin onú lẹpo tọn, kakajẹ whẹho dawe he tindo gbigbọ aovi tọn lọ lẹ tọn ji. 34  Podọ, pọ́n! mẹhe nọ nọ̀ tòdaho lọ mẹ lẹpo tọ́n wá pé Jesu; podọ to whenuena yé ko mọ ẹn, yé vẹ̀ ẹ vẹkuvẹku nado tọ́n sọn agbegbe yetọn ji.

Nudọnamẹ Odò Tọn