Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Matiu 7:1-29

7  “Mì sọ dawhẹnamẹ ba blo na mì nikaa yin whẹdana;  na whẹdida he nkọ mì yí do to whẹdanamẹ wẹ yè na yí do dawhẹna mì; podọ nujlẹnu he mì to yíyí do jlẹ namẹ wẹ yé na yí do jlẹ na mì.  To whelọnu lo, naegbọn hiẹ do to núyọ he tin to nukun mẹmẹsunnu towe tọn ji pọ́n, ṣigba bo ma lẹn atinpo he tin to nukun towe titi ji tọn pọ́n?  Kavi nawẹ hiẹ sọgan dọna mẹmẹsunnu towe do dọ, ‘Dike ma de núyọ sẹ̀ sọn nukun towe ji’; to whenuena, pọ́n! atinpo de tin to nukun towe titi ji?  Yẹnuwatọ! De atinpo sẹ̀ sọn nukun towe titi ji whẹ́, podọ to enẹgodo hiẹ na mọnú gblegede nado de núyọ sẹ̀ sọn nukun mẹmẹsunnu towe tọn ji.  “Mì ze nuhe yin wiwe na avún lẹ blo, kavi yìn peali mìtọn lẹ donukọnna ohàn lẹ blo, na yé nikaa tùnafọ yetọn lẹ yé ji bosọ lẹgodo bo tlẹ́n mì.  “Mì to bibiọ zọnmii, e nasọ yin nina mì; mì to dindin zọnmii, mì nasọ mọ; mì to họ̀nhúhú zọnmii, e nasọ yin hùnhùn hlan mì.  Na mẹdepope he to bibiọ nọ mọyi, podọ mẹdepope he to dindin nọ mọ, podọ mẹdepope he to họ̀nhúhú wẹ e na yin hùnhùn hlan.  Na nugbo tọn, mẹnu to mì mẹ wẹ visunnu etọn na biọ ẹ akla—ewọ ma na ze zannu na ẹn, kavi e na wàmọ wẹ? 10  Kavi, vlavo e na biọ whèvi—ewọ ma na ze odàn na ẹn, kavi e na wàmọ wẹ? 11  Enẹwutu, eyin mìwlẹ, he tlẹ yin mẹylankan, yọ́n lehe yè nọ na nunina dagbe ovi mìtọn lẹ do, nẹmunẹmu wẹ Otọ́ mìtọn he tin to olọn mẹ ma nado na onú dagbe mẹhe to bibiọ ẹ lẹ! 12  “Enẹwutu, nudepope he mìwlẹ jlo dọ gbẹtọ lẹ ni nọ wà na mì, mọkẹdẹ wẹ mìwlẹ dona nọ wà na yé do ga; ehe, na taun tọn, wẹ nuhe Osẹ́n lọ po Yẹwhegán lẹ po zẹẹmẹdo. 13  “Mì gbọn họntonu bibó lọ nù biọ e mẹ; na gbigblo podọ gblagada wẹ aliho lọ he nọ planmẹ yì vasudo, susu sọ wẹ mẹhe to gbingbọn e ji biọ e mẹ lẹ; 14  to whenuena e yindọ bibó wẹ họntonu lọ podọ jinján wẹ aliho lọ he nọ planmẹ yì ogbẹ̀ mẹ, vude sọ wẹ mẹhe to dindin in mọ lẹ. 15  “Mì họ́ mìde gando yẹwhegán lalo lẹ go he nọ wá mì dè to avọ̀ lẹngbọ tọn mẹ, ṣigba ohla nuwledutọ lẹ wẹ yé to homẹ. 16  Gbọn sinsẹ́n yetọn lẹ dali wẹ mì na yọ́n yé. Gbẹtọ lẹ ma nọ gbẹ̀n ovẹn sinsẹ́n to tẹwùn lẹ ji, kavi ovò sinsẹ́n to vẹwùn lẹ ji gbede gba, kavi e ma yin mọ wẹ? 17  Mọdopolọ, atin dagbe lẹpo nọ de sinsẹ́n dagbe tọ́n, ṣigba atin ylankan lẹpo nọ de sinsẹ́n gbigble tọ́n; 18  atin dagbe de ma sọgan sẹ́n sinsẹ́n gbigble, mọjanwẹ atin ylankan de ma sọgan de sinsẹ́n dagbe tọ́n do niyẹn. 19  Atin depope he ma nọ de sinsẹ́n dagbe tọ́n nọ yin sinsán liai bo nọ yin zizedlan miyọ́n mẹ. 20  To whelọnu lo, na nugbo tọn, gbọn sinsẹ́n yetọn lẹ dali wẹ mì na yọ́n omẹ enẹlẹ. 21  “E ma yin mẹlẹpo he to didọna mi dọ, ‘Oklunọ, Oklunọ,’ wẹ na biọ ahọluduta olọn tọn mẹ gba, ṣigba ewọ he to ojlo Otọ́ ṣie he tin to olọn mẹ tọn wà. 22  Mẹsusu wẹ na dọna mi to azán enẹ gbè dọ, ‘Oklunọ, Oklunọ, be míwlẹ ma ko dọ dọdai to oyín towe mẹ, bo ko yàn aovi lẹ jẹgbonu to oyín towe mẹ, bo ko sọ wà azọ́n huhlọnnọ susu lẹ to oyín towe mẹ ya?’ 23  Ṣogan, whenẹnu wẹ yẹn na yigbena yé dọ: Yẹn ma yọ́n mì gbede! Mì tọ́n sọn dè e, mì mẹhe nọ wazọ́n sẹ́nhẹngba tọn lẹ. 24  “Enẹwutu, mẹdepope he sè ohó he yẹn to didọ ehelẹ bo basi yé, na yin yiyijlẹdo dawe nuyọnẹntọ de go, he gbá ohọ̀ etọn do osé gángán ji. 25  Podọ jikun sinsinyẹn ja bọ osin gọ́ bọ jẹhọn sọ yìn bo hò jẹ ohọ̀ lọ go, ṣigba e ma họ́jai, na e ko yin didó do osé gángán ji wutu. 26  To alọ devo mẹ, mẹdepope he to ohó he yẹn to didọ ehelẹ sè bo ma basi yé, na yin yiyijlẹdo dawe nulunọ de go, he gbá ohọ̀ etọn do tọkẹ́n ji. 27  Podọ jikun sinsinyẹn ja bọ osin gọ́ bọ jẹhọn sọ yìn bo hò jẹ ohọ̀ lọ go, podọ e họ́jai, daho sọ wẹ hihọliai etọn.” 28  Todin, to whenuena Jesu dotana ohó ehelẹ, kọdetọn lọ wẹ yindọ awuji gbẹtọgun lẹ na aliho mẹpinplọn tọn etọn wutu; 29  na e to nuplọn yé taidi mẹhe tindo aṣẹ, e ma yin taidi wekantọ yetọn lẹ gba.

Nudọnamẹ Odò Tọn