Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Matiu 4:1-25

4  Enẹgodo, gbigbọ plan Jesu yì danfafa ji nado yin whiwhlepọn gbọn Lẹgba dali.  To whenuena e ko blanù na okle kande ozán kande godo, enẹgodo huvẹ hù i.  Mẹwhlepọntọ lọ sọ wá bo dọna ẹn dọmọ: “Eyin hiẹ yin visunnu Jiwheyẹwhe tọn de, dọna zannu ehelẹ dọ yé ni lẹzun akla.”  Ṣigba e gblọnna ẹn dọmọ: “E ko yin kinkàn dọ, ‘Gbẹtọ ma nọ nọgbẹ̀ gbọn akla kẹdẹ dali gba, ṣigba gbọn ohó he nọ tọ́n sọn onù Jehovah tọn mẹ lẹpo dali.’”  Enẹgodo, Lẹgba plan ẹn yì tòdaho wiwe lọ mẹ, bo hẹn ẹn ṣite to aga adó tẹmpli lọ tọn  bosọ dọna ẹn dọmọ: “Eyin hiẹ yin visunnu Jiwheyẹwhe tọn de, lọ́n jẹte; na e ko yin kinkàn dọ, ‘Ewọ na degbena angẹli etọn lẹ na hiẹ tọn wutu, bọ yé na hẹn we do alọ yetọn lẹ mẹ, bọ hiẹ ma na klẹ́n afọ towe do zannu de go gbede.’”  Jesu dọna ẹn dọmọ: “E ko sọ yin kinkàn ga dọ, ‘Hiẹ ma dona whlé Jehovah Jiwheyẹwhe towe pọ́n.’”  Whladopo dogọ, Lẹgba plan ẹn yì osó he yiaga tlala de ji, bo do ahọluduta aihọn tọn lẹpo po gigo yetọn po hia ẹ,  bosọ dọna ẹn dọmọ: “Onú ehe lẹpo wẹ yẹn na na we eyin hiẹ jẹklo bo basi sinsẹ̀n hlan mi whladopo.” 10  Whenẹnu wẹ Jesu dọna ẹn dọmọ: “Tọ́n sọn fi, Satani! Na e ko yin kinkàn dọ, ‘Jehovah Jiwheyẹwhe towe wẹ hiẹ dona nọ sẹ̀n, podọ ewọ kẹdẹ wẹ hiẹ dona nọ wà sinsẹ̀nzọn wiwe hlan.’” 11  Enẹgodo, Lẹgba jo e do, podọ, pọ́n! angẹli lẹ wá bo jẹ lizọnyina ẹn ji. 12  Todin, whenuena e sè dọ Johanu ko yin wiwle, e tọ́nyi Galili. 13  Humọ, to whenuena e tọ́n sọn Nazalẹti godo, e wá bo nọ nọ̀ Kapẹlnaumi to huto, to agbegbe Zebuluni po Naftali po tọn lẹ ji, 14  na nuhe ko yin didọdai gbọn yẹwhegán Isaia gblamẹ nido sọgan yin hinhẹndi, dọmọ: 15  “Hiẹ aigba Zebuluni tọn po aigba Naftali tọn po, he to aliho huto tọn ji to Jọdani godo, yèdọ Galili akọta lẹ tọn E! 16  mẹhe sinai to zinvlu mẹ lẹ mọ hinhọ́n daho de, podọ na mẹhe sinai to lẹdo oyẹ̀ okú tọn mẹ lẹ, hinhọ́n họ́n do yé ji.” 17  Sọn ojlẹ enẹ mẹ sọyi, Jesu jẹ yẹwhehodọ ji bo to didọmọ, “Mì lẹnvọjọ, na ahọluduta olọn tọn ko dọnsẹpọ.” 18  Dile e to zọnlinzin gbọn ohù Galili tọn tó, e mọ nọvisunnu awe, yèdọ Simọni he nọ yin yiylọdọ Pita po Andle nọvisunnu etọn po he to odọ̀ yìn do ohù mẹ, na whèhutọ wẹ yé. 19  E sọ dọna yé dọmọ: “Mì hodo mi, yẹn nasọ yí mì do basi whèhutọ gbẹtọ lẹ tọn.” 20  To afọdopolọji, yé jo odọ̀ yetọn lẹ do bo hodo e. 21  To whenuena e sẹyì sọn finẹ, e mọ nọvisunnu awe devo lẹ, yèdọ Jakọbu visunnu Zebede tọn po Johanu nọvisunnu etọn po, he to tọjihun mẹ hẹ Zebede otọ́ yetọn, bo to odọ̀ yetọn lẹ tọ̀, podọ e sọ basi oylọna yé. 22  To afọdopolọji, yé jo tọjihun lọ po otọ́ yetọn po do, bo hodo e. 23  Enẹgodo e to yìyì lẹdo Galili lẹpo pé, bo to mẹplọn to sinagọgu yetọn lẹ mẹ bosọ to yẹwheho wẹndagbe ahọluduta lọ tọn dọ bo to azọ̀n wunmẹ lẹpo po madogán wunmẹ lẹpo po hẹngbọ to gbẹtọ lẹ ṣẹnṣẹn. 24  Podọ linlin etọn gbàpe to Silia lẹpo mẹ; podọ yé hẹn mẹhe ma to gángán lẹpo, yèdọ mẹhe azọ̀n po awufiẹsa voovo lẹ po to tuklado lẹ, mẹhe tindo gbigbọ aovi tọn lẹ, adingbènọ lẹ po mẹhe to awukuzọ̀n jẹ lẹ po wá e dè, bọ e sọ hẹnazọ̀ngbọna yé. 25  Enẹwutu, gbẹtọgun daho lẹ hodo e sọn Galili, Dekapole, Jelusalẹm, Jude podọ sọn Jọdani godo.

Nudọnamẹ Odò Tọn