Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Matiu 27:1-66

27  To whenuena ai ko họ́n, yẹwhenọgán lẹpo gọna sunnu mẹho lẹ dewé sọta Jesu nado sọgan hù i.  Podọ, to whenuena yé ko blá ẹ godo, yé plan ẹn sọyi bo ze e do alọmẹ na ayimatẹn-gán Pilati.  To whenẹnu, Juda, mẹhe de e hia, to whenue e mọdọ yè ko dawhẹ okú tọn na ẹn, e jẹ whẹgbledo ede ji bo gọ̀ fataka-kuẹ gbàn lọ lẹ jo na yẹwhenọgán lẹ po sunnu mẹho lẹ po,  bo dọmọ: “Yẹn waylando to whenue yẹn de ohùn dodonọ tọn hia.” Yé dọna ẹn dọmọ: “Etẹwẹ dù mí to enẹ mẹ? Hiẹ wẹ enẹ dù!”  Enẹwutu, e bẹ fataka-kuẹ lọ lẹ dlan do tẹmpli mẹ bo tọ́nyi, bosọ yì dokankọ bo kú.  Ṣigba yẹwhenọgán lẹ bẹ fataka-kuẹ lọ lẹ bo dọmọ: “E ma sọgbe hẹ osẹ́n nado bẹ yé do adọkunnu-bẹdotẹn wiwe lọ mẹ, na akuẹ ohùn tọn wẹ yé yin wutu.”  To whenuena yé ko dewé dopọ godo, yé yí akuẹ lọ do họ̀ aigba zẹ́ndotọ tọn nado nọ dì oṣiọ jonọ lẹ tọn do finẹ.  Enẹwutu wẹ aigba enẹ do nọ yin yiylọdọ “Aigba Ohùn tọn” kakajẹ azán ehe gbè.  Gbọnmọ dali, nuhe yin didọ gbọn yẹwhegán Jelemia gblamẹ yin hinhẹndi, dọmọ: “Podọ yé yí fataka-kuẹ gbàn lẹ, yèdọ akuẹ he ji delẹ to ovi Islaeli tọn lẹ mẹ ko kọngbedopọ do nado yí do họ̀ ẹ, 10  podọ yé yí yé do họ̀ aigba zẹ́ndotọ tọn lọ, sọgbe hẹ nuhe Jehovah ko degbè etọn na mi.” 11  Todin Jesu ṣite to ayimatẹn-gán lọ nukọn; podọ ayimatẹn-gán lọ kanse e dọmọ: “Be hiẹ wẹ ahọlu Ju lẹ tọn ya?” Jesu gblọn dọmọ: “Hiẹ lọsu wẹ dọ ẹ.” 12  Ṣigba, to whenuena yẹwhenọgán lẹ po sunnu mẹho lẹ po to whẹsadokọna ẹn, e ma kẹnù. 13  To whenẹnu, Pilati dọna ẹn dọmọ: “Be hiẹ ma sè onú susu he yé to kunnu etọn de sọta we lẹ wẹ?” 14  Ṣogan e ma kẹnù, lala, e ma dọ ohó depope na ẹn, sọmọ bọ e paṣa ayimatẹn-gán lọ susu tlala. 15  Todin, to hùnwhẹ dopodopo whenu, ayimatẹn-gán lọ tindo aṣa lọ nado nọ tún gàntọ de dote na gbẹtọgun lọ, yèdọ mẹhe jlo yé. 16  To ojlẹ enẹ lọ mẹ, yé tindo gàntọ he diyin to aliho ylankan mẹ de, he nọ yin Balabas. 17  Enẹwutu, to whenuena yé pli dopọ, Pilati dọna yé dọmọ: “Mẹnu wẹ mì jlo dọ yẹn ni tundote na mì, Balabas kavi Jesu, mẹhe yè nọ ylọdọ Klisti?” 18  Na e yọnẹn dọ nuvẹun wutu wẹ yé do ze e jo. 19  Humọ, to whenue e to aisinsin to whẹdaján ji, asi etọn dowẹn hlan ẹn, dọmọ: “A doalọ dawe dodonọ enẹ go blo, na yẹn jiya susu to odlọ mẹ to egbé na ewọ tọn wutu.” 20  Ṣigba yẹwhenọgán lẹ po sunnu mẹho lẹ po diọlinlẹnna gbẹtọgun lọ lẹ nado biọ Balabas, ṣigba nado mọdọ Jesu yin hùhù. 21  Todin, ayimatẹn-gán lọ sọ gblọnna yé dọmọ: “Mẹnu to yé omẹ awe lẹ mẹ wẹ mì jlo dọ yẹn ni tundote na mì?” Yé dọmọ: “Balabas.” 22  Pilati dọna yé dọmọ: “To whelọnu lo, etẹwẹ yẹn na wà na Jesu, mẹhe yè nọ ylọdọ Klisti?” Yemẹpo dọmọ: “Gbọ ewọ ni yin whiwhè do núgo!” 23  Ewọ sọ dọmọ: “Oylan tẹwẹ e ka wà taun?” Etomọṣo, yé sọ vọ́ to awhádo gángán dọmọ: “Gbọ ewọ ni yin whiwhè do núgo!” 24  To whenuena e mọdọ ehe ma jla nudepope do, ṣigba kakatimọ, zingidi wẹ to finfọn, Pilati yí osin bo klọ́ alọ etọn lẹ to gbẹtọgun lọ nukọn, bo dọmọ: “Yẹn wé sọn ohùn dawe ehe tọn mẹ. Mìwlẹ wẹ enẹ dù.” 25  Ṣigba, gbẹtọ lọ lẹpo gblọn dọmọ: “Ohùn etọn ni wá míwlẹ po ovi mítọn lẹ po ji.” 26  To whenẹnu, e tún Balabas dote na yé, ṣigba e dike Jesu yin hihò bo jo e do alọmẹ na yé nado yin whiwhè do núgo. 27  Enẹgodo, awhànfuntọ ayimatẹn-gán lọ tọn lẹ plan Jesu yì họ̀nmẹ ayimatẹn-gán tọn bo bẹ awhànfuntọ lọ lẹpo pli do e dè. 28  Podọ to whenuena yé ko de avọ̀ sọn e go, yé ṣinyọ́n awù daho vẹẹ ṣẹ́ṣẹ́ de na ẹn, 29  yé sọ lọ̀n jẹgbakun owùn tọn de bo ṣinyọ́n do ota na ẹn bosọ ze ofánpò de do adusilọ etọn mẹ. Podọ, yé nọ jẹklo to nukọn etọn bo nọ yí i do davlẹ, dọmọ: “Kúdo lewhenu, hiẹ Ahọlu Ju lẹ tọn!” 30  Podọ yé túntán do e go bo yí ofánpò lọ bosọ jẹ yíyí do lì ota na ẹn ji. 31  To godo mẹ, to whenue yé ko yí i do davlẹ pó godo, yé de awù daho lọ sọn e go bo dó awugbó etọn lẹ na ẹn bosọ plan ẹn yì nado whè e do núgo. 32  Dile yé tọ́n jei, yé mọ Silene-vi jiji de he nọ yin Simọni. Dawe ehe wẹ yé yí huhlọn do hẹn nado ze yatin etọn. 33  Podọ to whenuena yé jẹ fihe nọ yin Gọlgọta, he zẹẹmẹdo, Taká Tẹnmẹ, 34  yé na ẹn ovẹn he yè flusọ́ po vivẹ́ po nado nù; ṣigba, to whenue e dọ́ ẹ pọ́n, e gbẹ́ nado nù. 35  To whenuena yé ko whè e do núgo, yé má awugbó etọn lẹ gbọn ovò dide dali, 36  podọ yé sọ sinai to finẹ bo to ṣiṣọ́ ẹ. 37  Humọ, yé kàn owhẹ̀ he yin sisadokọna ẹn lọ do taligbé etọn dọmọ: “Jesu, Ahọlu Ju lẹ tọn lọ die.” 38  To whenẹnu, jaguda awe yin whiwhè do núgo hẹ ẹ, dopo to adusi etọn mẹ podọ awetọ to amiyọn etọn mẹ. 39  Enẹwutu, mẹhe juwajei lẹ jẹ zùnzùn in ji, bo nọ to ota yetọn mimí 40  bo nọ to didọmọ: “Hiẹ he jlo na họ́ tẹmpli lọ liai bo vọ́ ẹ gbá to azán atọ̀n gblamẹ, whlẹn dewe! Eyin hiẹ yin visunnu Jiwheyẹwhe tọn, jẹte sọn yatin lọ ji!” 41  Mọdopolọ ga, yẹwhenọgán lẹ, wekantọ lẹ po sunnu mẹho lẹ po sọ jẹ yíyí i do davlẹ ji bo to didọmọ: 42  “E whlẹn mẹdevo lẹ gán; e ma sọgan whlẹn ede gán! Ewọ wẹ Ahọlu Islaeli tọn; gbọ e ni jẹte sọn yatin ji todin, mí nasọ yí i sè. 43  Ewọ ko dejido Jiwheyẹwhe go; gbọ E ni whlẹn ẹn gán todin eyin E tindo ojlo to ewọ mẹ, na e dọ dọ, ‘Visunnu Jiwheyẹwhe tọn wẹ yẹn.’” 44  Mọdopolọ, jaguda he yin whiwhè do núgo po e po lẹ lọsu jẹ vivlẹ ẹ kò ji. 45  Bẹsọn gànhiho ṣidopotọ* mẹ, zinvlu ṣinyọ́n aigba lọ lẹpo ji, kakajẹ gànhiho ṣinẹnẹtọ* mẹ. 46  To nudi gànhiho ṣinẹnẹtọ mẹ, Jesu dawhá po ogbè lélé po dọmọ: “Eli, Eli, lama sabaktani?” he zẹẹmẹdo, “Jiwheyẹwhe ṣie, Jiwheyẹwhe ṣie, naegbọn hiẹ do gbẹ́ mi dai?” 47  To whenue yé sè ehe, delẹ to mẹhe to ote to finẹ lẹ mẹ jẹ didọ ji dọmọ: “Dawe ehe to Elija ylọ.” 48  Podọ to afọdopolọji, dopo to yé mẹ họ̀nwezun bo ze hùmẹ-tekan de bosọ ylọn ẹn do ovẹn he vẹsin mẹ bo ze e do ofánpò de nù bosọ na ẹn nado nù. 49  Ṣigba mẹhe pò lẹ dọmọ: “Jo e do! Mì gbọ mí ni pọ́n eyin Elija na wá whlẹn ẹn gán.” [[Dawe devo yí owhán bo sọ́ adà mẹ na ẹn, bọ ohùn po osin po tọ́njẹgbonu.]]* 50  Jesu sọ dawhá po ogbè lélé po whladopo dogọ, bo jo gbigbọ etọn do. 51  Podọ pọ́n! avọ̀ he gbò fiwiwe lọ tlẹ́n do awe, sọn aga wá odò, aigba sọ sisọ́, bọ osé gángán lẹ zẹ̀. 52  Podọ yọdò lẹ hùn bọ susu oṣiọ omẹ wiwe he ko damlọn to okú mẹ lẹ tọn tọ́njẹgbonu, 53  bo yin mimọ gbọn mẹsusu dali. (Podọ to whenuena ewọ ko yin finfọn godo, gbẹtọ lẹ, he to tintọ́n sọn yọdò lẹ ṣẹnṣẹn biọ tòdaho wiwe lọ mẹ.) 54  Ṣigba mẹkanwekowhàngán lọ po mẹhe gọna ẹn bo to ṣiṣọ́ Jesu lẹ po, to whenue yé mọ aigba sisọsisọ lọ po nuhe jọ lẹ po, yé dibu tlala, bo dọmọ: “Matin ayihaawe, Visunnu Jiwheyẹwhe tọn wẹ ehe.” 55  Humọ, yọnnu susu he ko hodo Jesu sọn Galili nado yilizọn na ẹn lẹ tin to finẹ bo to nupọn sọn olá; 56  Malia Magdaleni tin to yé mẹ, gọna Malia onọ̀ Jakọbu po Jose po tọn, po onọ̀ visunnu Zebede tọn lẹ tọn po. 57  Todin, to whenue tenu ko dó, dawe adọkunnọ Alimate tọn de, he nọ yin Josẹfu, he ewọ lọsu ko lẹzun devi Jesu tọn de wá finẹ. 58  Dawe ehe yì Pilati dè bo biọ oṣiọ Jesu tọn. Pilati sọ degbè dọ e ni yin zizejo. 59  Podọ Josẹfu ze oṣiọ lọ bo blá ẹ do alavọ wiwe dagbedagbe de mẹ, 60  bosọ tẹ́ ẹ do yọdò yọyọ etọn mẹ, ehe ewọ lọsu ko kùn do osé gángán mẹ. Podọ, to whenue e ko bli zannu daho de do ohọ̀n yọdò lọ tọn nù godo, e yì. 61  Ṣigba Malia Magdaleni po Malia diẹ po gbọṣi finẹ, bo to aisinsin to yọdò lọ nukọn. 62  To aihọngbè, yèdọ azán he bọdo azán Awuwle* tọn go, yẹwhenọgán lẹ po Falesi lẹ po pli dopọ to Pilati nukọn, 63  bo dọmọ: “Mẹdaho, mí flin dọ mẹblutọ enẹ dọ to whenue e gbẹ́ pò to ogbẹ̀ dọ, ‘Yẹn na yin finfọn to azán atọ̀n godo.’ 64  Enẹwutu, degbè dọ yọdò lọ ni yin ṣiṣọ́ kakajẹ azán atọ̀ntọ gbè, na devi etọn lẹ nikaa wá fìn in bo dọna gbẹtọ lẹ dọ, ‘Ewọ ko yin finfọn sọn oṣiọ lẹ mẹ!’ bọ mẹbublu godo mẹ tọn ehe nasọ ylanhu tintan tọn.” 65  Pilati dọna yé dọmọ: “Mì tindo nuhọ́tọ lẹ. Mì yì bo ṣọ́ ẹ dile mì sọgan do.” 66  Enẹwutu yé yì bo yí hiadonu do tlẹ́ zannu lọ bosọ de nuhọ́tọ lẹ nado ṣọ́ yọdò lọ.

Nudọnamẹ Odò Tọn

Mt 27:45 Enẹ wẹ, nudi ogàn 12 whèmẹ tọn, eyin yè hia sọn ojlẹ he mẹ owhè nọ zẹ̀.
Mt 27:45 Enẹ wẹ, nudi ogàn 3 whèmẹ tọn.
Mt 27:49 Na zẹẹmẹ do glọ̀ndo awe topọ lẹ ji, pọ́n Mt 16:3, nudọnamẹ odò tọn.
Mt 27:62 Enẹ wẹ, azán he nọ dlẹnalọdo azán he jẹnukọnna Gbọjẹzan sẹmẹsẹmẹ tọn, ehe whenu Ju lẹ nọ wleawuna núdùdù na Gbọjẹzan lọ, bo nọ dotana azọ́n niyaniya tọn depope he ma sọgan gbọṣi aimẹ jẹ Gbọjẹzan lọ godo. (Yijlẹdo Eks 16:5; 20:10 go.)