Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Matiu 26:1-75

26  Todin, to whenuena Jesu ko dotana ohó ehe lẹpo, e dọna devi etọn lẹ dọmọ:  “Mìwlẹ yọnẹn dọ bẹsọn din, juwayi pò azán awe, podọ Visunnu gbẹtọ tọn na yin zizejo nado yin whiwhè do núgo.”  To whenẹnu, yẹwhenọgán lẹ po sunnu mẹho lẹ po pli dopọ to awánu yẹwhenọ daho he nọ yin Kaifa tọn mẹ,  bo dewé dopọ nado gbọn ayiha wintinwintin dali wle Jesu bo hù i.  Ṣigba, yé to didọmọ: “E ma dona yin to hùnwhẹ lọ whenu, na zingidi nikaa fọ́n to gbẹtọ lẹ ṣẹnṣẹn.”  To whenuena Jesu tin to Bẹtani to owhé Simọni pòtọnọ lọ tọn gbè,  nawe de dọnsẹpọ ẹ po ogò alabasta* tọn de po, he mẹ amisisa owán gblingblinnọ akuẹgegenu tọn te, bo jẹ kinkọ̀n ẹn do ota na ẹn ji dile e jagla to tafo kọ̀n.  To whenuena devi lẹ mọ ehe, yé gblehomẹ bo dọmọ: “Nuhẹngu tẹ niyẹn?  Na ehe sọgan ko yin sisà yin akuẹ vivẹ́ bo yin nina wamọnọ lẹ.” 10  Na Jesu yọ́n ehe wutu, e dọmọ: “Naegbọn mì to tintẹnpọn nado dotukla nawe lọ? Azọ́n dagbe de wẹ e wà na mi. 11  Na wamọnọ lẹ tin to mì dè to whepoponu, ṣigba yẹn ma na tin to mì dè to whepoponu gba. 12  Na whenuena nawe ehe kọ̀n amisisa owán gblingblinnọ ehe do agbasa ṣie go, e basi i nado wleawuna mi na ṣiọdidi ṣie. 13  Nugbo wẹ yẹn dọna mì dọ, Fidepope he yẹwheho wẹndagbe lọ tọn ehe yin didọ te to aihọn lọ lẹpo mẹ, nuhe nawe ehe wà lọsu na yin didọ ga nado nọ flin in.” 14  Enẹgodo, dopo to omẹ wiawe lẹ mẹ, he nọ yin Juda Iskaliọti, yì yẹwhenọgán lẹ dè 15  bo dọmọ: “Etẹwẹ mì na na mi nado de e hia hlan mì?” Yé kọngbedopọ hẹ ẹ do fataka-kuẹ gbàn ji. 16  Enẹwutu, sọn ojlẹ enẹ mẹ, e nọ to dotẹnmẹ hundote dagbe de dín nado de e hia. 17  To azán tintan hùnwhẹ akla madotọ́n lẹ tọn gbè, devi lẹ wá Jesu dè, bo dọmọ: “Fie wẹ hiẹ jlo dọ mí ni wleawudaina we do nado dù juwayi?” 18  E dọmọ: “Mì yì tòdaho lọ mẹ to Omẹ-lé dè bo dọna ẹn dọ, Mẹplọntọ lọ dọ dọ, ‘Ojlẹ dide ṣie ko sẹpọ; yẹn na basi hùnwhẹ juwayi tọn hẹ devi ṣie lẹ to owhé towe gbè.’” 19  Podọ devi lọ lẹ basi dile Jesu degbena yé do, bo wleawu onú lẹ tọn dai na juwayi lọ. 20  Todin, to whenuena owhè ko jai, e jagla to tafo kọ̀n hẹ devi wiawe lẹ. 21  Dile yé to núdù, e dọmọ: “Nugbo wẹ yẹn dọna mì dọ, Dopo to mì mẹ na de mi hia.” 22  Na ehe blawuna yé tlala wutu, dopodopo yetọn jẹ didọna ẹn ji dọmọ: “Oklunọ, e ma yin yẹn, kavi yẹn wẹ ya?” 23  E gblọn dọmọ: “Dopo to mẹhe to alọ do agbán mẹ hẹ mi lẹ mẹ wẹ yin omẹ lọ he na de mi hia. 24  Nugbo wẹ dọ Visunnu gbẹtọ tọn jei, kẹdẹdile yè ko kanwe etọn gando e go do, ṣigba dindọn hlan dawe enẹ he gblamẹ Visunnu gbẹtọ tọn yin didehia gbọn! E na ko pọnte hugan na dawe enẹ eyin e ma ko yin jiji.” 25  Juda, mẹhe jlo na de e hia lọ, gblọn dọmọ: “E ma yin yẹn, kavi yẹn wẹ ya, Labbi?” E dọna ẹn dọmọ: “Hiẹ lọsu ko dọ ẹ.” 26  Dile yé gbẹ́ pò to núdù, Jesu yí akla de, podọ to whenue e ko dona godo, e wẹ́n ẹn bo yí i na devi etọn lẹ, bosọ dọmọ: “Mì yí, bo dù. Ehe nọtena agbasa ṣie.” 27  E sọ yí kọfo de, podọ to whenue e ko dopẹ́, e yí i na yé, bo dọmọ: “Mìmẹpo, mì nù sọn e mẹ; 28  na ehe nọtena ‘ohùn ṣie he yin alẹnu lọ tọn,’ he na yin kinkọndai do ota mẹsusu tọn mẹ na jona ylando lẹ tọn. 29  Ṣigba yẹn dọna mì dọ, Bẹsọn din, yẹn ma nasọ nù sinsẹ́n ovẹn tọn ehe depope hẹ mì to aliho depope mẹ ba kakajẹ azán enẹ gbè whenue yẹn na nù yọyọ etọn hẹ mì to ahọluduta Otọ́ ṣie tọn mẹ.” 30  To godo mẹ, to ohàn pipà tọn lẹ jiji godo, yé tọ́nyi Osó Olivie tọn ji. 31  To whenẹnu, Jesu dọna yé dọmọ: “Mìmẹpo wẹ na dahli to ozán ehe mẹ na nuhe na jọ do go e wutu, na e ko yin kinkàndai dọ, ‘Yẹn na linú lẹngbọhọtọ lọ, bọ lẹngbọ lẹngbọpa lọ tọn lẹ na gbàdo.’ 32  Ṣigba, to whenue yẹn na ko yin finfọn godo, yẹn na jẹnukọnna mì yì Galili.” 33  Ṣigba, Pita gblọnna ẹn dọmọ: “Eyin mẹhe pò lẹpo tlẹ dahli na nuhe na jọ do gowe wutu, yẹn ma na dahli gbede!” 34  Jesu dọna ẹn dọmọ: “Nugbo wẹ yẹn dọna we, To ozán ehe mẹ, whẹpo koklo na dosé, hiẹ na mọ́n mi whla atọ̀n.” 35  Pita dọna ẹn dọmọ: “Eyin etlẹ biọ dọ yẹn ni kú po hiẹ po, yẹn ma na mọ́n we gbede.” Devi he pò lẹpo sọ dọ onú dopolọ ga. 36  Enẹgodo, Jesu zọnhẹ yé wá fihe nọ yin Gẹtsemani, podọ e dọna devi lọ lẹ dọmọ: “Mì sinai tofi, na yẹn ni yì dọ́n bo hodẹ̀.” 37  Dile e plan Pita po visunnu Zebede tọn awe lẹ po, e jẹ awubla ji bosọ yin tuklado badabada. 38  To whenẹnu, e dọna yé dọmọ: “Alindọn ṣie blawu tlala, yèdọ kakajẹ okú. Mì nọfi bo nọ nukle hẹ mi.” 39  Podọ to whenue e sẹyì nukọn vude, e ṣinyọ́n nukunmẹ etọn ai, bo to dẹ̀ho, bosọ to didọmọ: “Otọ́ ṣie, eyin e yọnbasi, dike kọfo ehe ni juwayi sọn dè e. Ṣogan, e ma yin dile yẹn jlo do gba, ṣigba dile hiẹ jlo do.” 40  Podọ e wá devi lọ lẹ dè bo mọ yé to amlọndọ, bọ e dọna Pita dọmọ: “Be mìwlẹ ma sọgan nọ nukle hẹ mi na gànhiho dopo poun wẹ? 41  Mì nọ nọ̀ nukle bo nọ hodẹ̀ to whepoponu, na mì nikaa biọ whlepọn mẹ. Nugbo wẹ dọ gbigbọ to jijlo taun, ṣigba agbasa yin madogánnọ.” 42  E sọ vọ́ gọyì whla awetọ bo hodẹ̀ dọmọ: “Otọ́ ṣie, eyin e ma yọnbasi dọ ehe ni juwayi bọ yẹn na gọ̀n ma nù in, dike ojlo towe ni yin wiwà.” 43  Podọ e sọ vọ́ lẹkọwa bo mọ yé to amlọndọ, na nukun yetọn lẹ pẹ̀n na amlọn. 44  Enẹwutu, e jo yé do, bosọ vọ́ gọyì bo hodẹ̀ whla atọ̀ntọ, bosọ vọ́ onú dopolọ dọ. 45  Enẹgodo, e lẹkọwa devi lọ lẹ dè bo dọna yé dọmọ: “To ojlẹ taidi ehe nkọ mẹ, mìwlẹ to amlọndọ bosọ to gbigbọjẹ! Mì pọ́n! Gànhiho lọ ko sẹpọ na Visunnu gbẹtọ tọn nido yin didehia do alọ ylandonọ lẹ tọn mẹ. 46  Mì fọ́n, bo gbọ mí ni yì. Mì pọ́n! Mẹdehiatọ ṣie ko dọnsẹpọ.” 47  Podọ, dile e gbẹ́ pò to hodọ, pọ́n! Juda, dopo to omẹ wiawe lẹ mẹ wá bọ gbẹtọgun daho de hodo e sọn yẹwhenọgán lẹ po sunnu mẹho lẹ po dè bọ yé hẹn ohí lẹ po aglọpò lẹ po. 48  Todin, mẹdehiatọ etọn ko na yé ohia de, dọmọ: “Mẹdepope he yẹn donùnùgo na, ewọ lọ wẹ; mì wle e.” 49  Podọ dile e yì Jesu dè tlọlọ, e dọmọ: “Kúdo lewhenu, Labbi!” bo donùnùgo na ẹn po zohunhun po. 50  Ṣigba, Jesu dọna ẹn dọmọ: “Dawe, lẹndai tẹ wutu wẹ a do tin tofi?” To whenẹnu, yé sẹwá bo dealọ bosọ wle Jesu. 51  Ṣigba, pọ́n! dopo to mẹhe tin to Jesu dè lẹ mẹ dealọ etọn bo sún ohí etọn bosọ hú afanumẹ yẹwhenọ daho lọ tọn bo pà otó na ẹn. 52  To whenẹnu, Jesu dọna ẹn dọmọ: “Gọ̀ ohí towe do otẹn etọn mẹ, na mẹhe ze ohí lẹpo wẹ na dọ̀n gbọn ohí dali. 53  Kavi hiẹ lẹndọ yẹn ma sọgan vẹ̀ Otọ́ ṣie nado na mi hugan awhànpa angẹli lẹ tọn wiawe to afọdopolọji wẹ ya? 54  To whelọnu lo, nawẹ Owe-wiwe lẹ he dọ dọ e dona jọ domọ na mọ hẹndi do?” 55  To gànhiho enẹ mẹ, Jesu dọna gbẹtọgun lọ lẹ dọmọ: “Be yẹn wẹ mìwlẹ tọ́n wá wiwle gbé bo hẹn ohí lẹ po aglọpò lẹ po taidi mẹhe ja jaguda de dè ya? Egbesọegbesọ wẹ yẹn nọ saba sinai bo nọ to mẹplọn to tẹmpli mẹ, ṣogan mìwlẹ ma wle mi. 56  Ṣigba, ehe lẹpo jọ na nuhe yẹwhegán lẹ dọ to owe-wiwe lẹ mẹ nido mọ hẹndi.” To whenẹnu, devi lẹpo jo e do bo họnyi. 57  Mẹhe wle Jesu lẹ hẹn ẹn yì Kaifa, yẹwhenọ daho lọ dè, fie wekantọ lẹ po sunnu mẹho lẹ po pli dopọ do. 58  Ṣigba, Pita to hihodo e to aganu, kaka yì awánu yẹwhenọ daho lọ tọn, podọ to whenue e ko biọ whégbè, e sinai hẹ devizọnwatọ whégbè tọn lẹ nado pọ́n nuhe na jọ. 59  To ojlẹ enẹ mẹ, yẹwhenọgán lẹ po hagbẹ Whẹdatẹn Daho Ju lẹ tọn* lọ pete po to kunnudenu lalo tọn dín sọta Jesu nado sọgan hù i, 60  ṣigba yé ma mọ depope, dile etlẹ yindọ kunnudetọ lalo susu wẹ wá. To godo mẹ, yé omẹ awe wá 61  bo dọmọ: “Dawe ehe dọ dọ, ‘Yẹn penugo nado họ́ tẹmpli Jiwheyẹwhe tọn liai bo vọ́ ẹ gbá to azán atọ̀n gblamẹ.’” 62  To whenue yẹwhenọ daho lọ sè ehe, e fọnṣite bo dọna ẹn dọmọ: “Hiẹ ma gblọn nudepope wẹ? Etẹwẹ hiẹ lọsu lẹn gando kunnu he omẹ ehelẹ to dide sọta we go?” 63  Ṣigba Jesu ma kẹnù. Enẹwutu yẹwhenọ daho lọ dọna ẹn dọmọ: “Yẹn biọ to hiẹ si nado yí Jiwheyẹwhe ogbẹ̀nọ lọ do whlé nado dọna mí eyin hiẹ wẹ Klisti lọ, yèdọ Visunnu Jiwheyẹwhe tọn!” 64  Jesu dọna ẹn dọmọ: “Hiẹ lọsu ko dọ ẹ. Ṣogan yẹn dọna mì dọ, Bẹsọn din, mìwlẹ na mọ Visunnu gbẹtọ tọn to aisinsin to adusilọ huhlọn* tọn mẹ bọ e nasọ ja to aslọ olọn tọn lẹ mẹ.” 65  To whenẹnu wẹ yẹwhenọ daho lọ tlẹ́n awugbó etọn lẹ, bo dọmọ: “E zánnu! Etẹwẹ mí gbẹ́ pò to kunnudetọ lẹ dín na? Mì pọ́n! Mì ko sè nùzinzan lọ todin. 66  Etẹwẹ mìwlẹ lẹn?” Yé sọ gblọn dọmọ: “E jẹna okú.” 67  To whenẹnu, yé túntán do nukunmẹ na ẹn bo lì akotokún in. Mẹdevo lẹ hotómẹ na ẹn, 68  bo dọmọ: “Dọ dọdai na mí, hiẹ Klisti. Mẹnu wẹ linú we?” 69  Todin, Pita to aisinsin to gbonu to awánu; podọ deviyọnnu de wá e dè, bo dọmọ: “Hiẹ lọsu ga nọ zọnhẹ Jesu, Galilinu lọ!” 70  Ṣigba e mọ́n to yemẹpo nukọn, dọmọ: “Yẹn ma yọ́n nuhe dọ a te.” 71  To whenuena e ko tọ́njẹgbonu yì họngbo ji, viyọnnu devo mọ ẹn bo dọna mẹhe tin to finẹ lẹ dọmọ: “Dawe ehe nọ zọnhẹ Jesu, Nazalẹtinu lọ.” 72  Whladopo dogọ, e sọ yí whiwhle do mọ́n dọmọ: “Yẹn ma yọ́n dawe lọ!” 73  To ojlẹ vude godo, mẹhe ṣite to finẹ lẹ wá bo dọna Pita dọmọ: “Matin ayihaawe, hiẹ lọsu yin dopo to yé mẹ, na, nado dọ hójọhó, kọnugbè towe de we hia.” 74  To whenẹnu, e jẹ dẹ̀hodo ede ji bosọ jẹ whiwhle ji dọmọ: “Yẹn ma yọ́n dawe lọ!” Podọ to afọdopolọji, koklo dosé. 75  Podọ Pita flin nuhe Jesu ko dọ lọ, dọmọ: “Whẹpo koklo na dosé, hiẹ na mọ́n mi whla atọ̀n.” E sọ tọ́njẹgbonu bo viavi vivẹvivẹ.

Nudọnamẹ Odò Tọn

Mt 26:7* Enẹ wẹ, ogò pẹvi de he nọ yin bibasi po zannu he nọ yin mimọ sẹpọ Alabastron de po to Egipti.
Mt 26:59* To paa mẹ, Sanhedlin.
Mt 26:64* Kavi, “Omẹ Huhlọnnọ lọ.”