Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Matiu 25:1-46

25  “Humọ, ahọluduta olọn tọn na yin yiyijlẹdo awhli* ao go he ze miyọ́ngbán yetọn lẹ bo tọ́nyi nado pé asisunọ yọyọ.  Atọ́n to yé mẹ yin nulunọ, bọ atọ́n yin nuyọnẹntọ.  Na nuhe dù nulunọ lọ lẹ, yé ze miyọ́ngbán yetọn lẹ ṣigba bo ma hẹn amì dovo,  ṣigba nuyọnẹntọ lọ lẹ hẹn miyọ́ngbán yetọn lẹ, bosọ hẹn amì do ogò mẹ dogọ.  Dile asisunọ yọyọ lọ to dindẹn, yemẹpo samlọngọ bo damlọn.  To whenuena e jẹ zánhomẹ pete, awhá de di dọ, ‘Asisunọ yọyọ lọ die! Mì tọ́n wá pé e.’  To whenẹnu, awhli lọ lẹpo fọ́n bo wleawuna miyọ́ngbán yetọn lẹ.  Nulunọ lọ lẹ dọna nuyọnẹntọ lọ lẹ dọ, ‘Mì na mí amì mìtọn pẹẹde, na miyọ́ngbán mítọn lẹ to ṣíṣí.’  Nuyọnẹntọ lọ lẹ gblọnna yé dọ, ‘Vlavo e sọgan nọma pé na míwlẹ po mì po. Enẹwutu, mì gbọ bo yì mẹhe nọ sà lẹ dè bo jẹ mìtọn.’ 10  Dile yé tọ́n jei jijẹ gbé, asisunọ yọyọ lọ wá, bọ awhli he ko wleawufo lọ lẹ biọ họmẹ hẹ ẹ yì hùnwhẹ alọwle tọn lọ; ohọ̀n lọ sọ yin súsú. 11  Enẹgodo, awhli he pò lẹ lọsu wá, bo to didọmọ, ‘Mẹdaho, mẹdaho, hùnhọ̀n na mí!’ 12  E gblọnna yé dọ, ‘Nugbo wẹ yẹn dọna mì, yẹn ma yọ́n mì.’ 13  “Enẹwutu, mì nọ họ́ mìde, na mì ma yọ́n azán kavi gànmẹ lọ gba. 14  “Na e tin taidi dawe de, he jlo na tọ́nwhẹ̀n yì tògodo bo ylọ afanumẹ etọn lẹ pli bosọ ze nutindo etọn lẹ do alọmẹ na yé. 15  Podọ, e yí talẹnti* atọ́n na omẹ tintan, bo yí awe na omẹ awetọ, bosọ yí dopo na omẹ atọ̀ntọ, yèdọ omẹ dopodopo sọgbe hẹ nugopipe etọn, bosọ yì tògodo. 16  Mẹhe mọ talẹnti atọ́n yí lọ tọ́nyi to afọdopolọji bo yí yé do wàjọ bosọ duale talẹnti atọ́n tọn dogọ. 17  Mọdopolọ, mẹhe mọ awe yí lọ lọsu duale awe tọn dogọ. 18  Ṣigba, mẹhe mọ dopo gee yí lọ tọ́nyi, bo kùndò bosọ whlá fataka-kuẹ oklunọ etọn tọn. 19  “To ojlẹ dindẹn de godo, oklunọ afanumẹ lọ lẹ tọn wá bo biọ to yé si nado basi lẹnjo na ẹn. 20  To whenẹnu, mẹhe mọ talẹnti atọ́n yí lọ wá bo hẹn talẹnti atọ́n wá dogọ, bo dọmọ, ‘Oklunọ, talẹnti atọ́n wẹ hiẹ zedo alọmẹ na mi; pọ́n, yẹn duale talẹnti atọ́n tọn dogọ.’ 21  Oklunọ etọn dọna ẹn dọ, ‘A basi do ganji, hiẹ afanumẹ dagbe podọ nugbonọ! Hiẹ ko yin nugbonọ do onú pẹvi de ji. Yẹn na de we do onú susu ji. Biọ ayajẹ oklunọ towe tọn mẹ.’ 22  Enẹgodo, mẹhe mọ talẹnti awe yí lọ wá bo dọmọ, ‘Oklunọ, talẹnti awe wẹ hiẹ zedo alọmẹ na mi; pọ́n, yẹn duale talẹnti awe tọn dogọ.’ 23  Oklunọ etọn dọna ẹn dọ, ‘A basi do ganji, hiẹ afanumẹ dagbe podọ nugbonọ! Hiẹ ko yin nugbonọ do onú pẹvi de ji. Yẹn na de we do onú susu ji. Biọ ayajẹ oklunọ towe tọn mẹ.’ 24  “To godo mẹ, mẹhe mọ talẹnti dopo yí lọ wá bo dọmọ, ‘Oklunọ, yẹn yọnẹn dọ gbẹtọ sinsinyẹn de wẹ hiẹ, he nọ gbẹ̀n to fie hiẹ ma dó do, bosọ nọ bẹpli to fie hiẹ ma fú te. 25  Enẹ wẹ zọ́n bọ yẹn dibu bo tọ́nyi bosọ whlá talẹnti towe do okọ́ glọ. Onú towe die.’ 26  Oklunọ etọn gblọnna ẹn dọmọ, ‘Hiẹ afanumẹ ylankan podọ adidọnọ, a yọnẹn domọ, dọ yẹn nọ gbẹ̀n to fie yẹn ma dó do bosọ nọ bẹpli to fie yẹn ma fú te, kavi e ma yin mọ wẹ? 27  Eyọn, to whelọnu lo, hiẹ dona ko bẹ fataka-kuẹ ṣie lẹ do azọ́nwatọ akuẹsẹdotẹn tọn lẹ dè, bọ whenuena yẹn wá, yẹn na ko mọ onú ṣie yí po akuẹvi po. 28  “‘Enẹwutu, mì yí talẹnti lọ sọn e si bo yí i na mẹhe tindo talẹnti ao lọ. 29  Na mẹdepope he tindo, yè na na ẹn dogọ bọ e na tindo susugege; ṣigba na ewọ he ma tindo, yèdọ nuhe e tindo lọsu na yin yíyí sọn e si. 30  Todin, mì dlan afanumẹ nuvọ́nọ lọ do zinvlu mẹ to gbonu. Finẹ wẹ e na viavi bo dù adúkúnkún te.’ 31  “To whenuena Visunnu gbẹtọ tọn na wá to gigo etọn mẹ po angẹli lẹpo po, to whenẹnu wẹ e na sinai to ofìn gigonọ etọn ji. 32  Podọ akọta lẹpo na yin bibẹpli do nukọn etọn, bọ e na klan gbẹtọ lẹ dovo, yèdọ ode sọn awetọ go, kẹdẹdile lẹngbọhọtọ de nọ klan lẹngbọ lẹ sọn gbọgbọẹ lẹ go do. 33  E nasọ bẹ lẹngbọ lẹ do adusilọ etọn mẹ, ṣigba gbọgbọẹ lẹ do amiyọn etọn mẹ. 34  “To whenẹnu, ahọlu lọ na dọna mẹhe to adusi etọn mẹ lẹ dọ, ‘Mì wá, mì mẹhe Otọ́ ṣie ko dona lẹ, mì dugu ahọluduta lọ tọn he ko yin awú etọn wle dai na mì sọn whenue aihọn ko yin didoai. 35  Na huvẹ hù mi bọ mì na mi nude nado dù; nugbla hù mi bọ mì na mi nude nado nù. Yẹn yin jonọ bọ mì yí mi po gbigbọ johẹmẹ tọn po; 36  yẹn to omẹ́ bọ mì ṣinyọnavọ̀na mi. Yẹn jẹazọ̀n bọ mì penukundo go e. Yẹn to gànpamẹ bọ mì wá dè e.’ 37  To whenẹnu wẹ dodonọ lẹ na gblọnna ẹn dọmọ, ‘Oklunọ, whetẹnu wẹ míwlẹ mọ we to huvẹ bo na núdùdù we, kavi bọ nugbla hù we, bo na nude we nado nù? 38  Whetẹnu wẹ mí mọ bọ a yin jonọ bo yí we po gbigbọ johẹmẹ tọn po, kavi bọ hiẹ to omẹ́ bo ṣinyọnavọ̀na we? 39  Whetẹnu wẹ mí mọ bọ a to azọ̀njẹ kavi to gànpamẹ bo wá dè we?’ 40  Ahọlu lọ na gblọnna yé dọmọ, ‘Nugbo wẹ yẹn dọna mì, Dile mìwlẹ ko basi i na dopo to mẹhe whè hugan to mẹmẹsunnu ṣie ehelẹ mẹ, yẹn wẹ mì basi i na.’ 41  “Enẹgodo, e nasọ dọna mẹhe to amiyọn etọn mẹ lẹ dọ, ‘Mì tọ́n sọn dè e, mì mẹhe ko yin dẹ̀hodo lẹ, mì yì miyọ́n madopodo he ko yin awú etọn wle dai na Lẹgba po angẹli etọn lẹ po mẹ. 42  Na huvẹ hù mi, ṣigba mì ma na mi nude nado dù, podọ nugbla hù mi, ṣigba mì ma na mi nude nado nù. 43  Yẹn yin jonọ, ṣigba mì ma yí mi po gbigbọ johẹmẹ tọn po; yẹn to omẹ́, ṣigba mì ma ṣinyọnavọ̀na mi; yẹn jẹazọ̀n podọ yẹn to gànpamẹ, ṣigba mì ma penukundo go e.’ 44  To whenẹnu, yelọsu na gblọn dọmọ, ‘Oklunọ, whetẹnu wẹ míwlẹ mọ we to huvẹ kavi bọ nugbla hù we kavi yin jonọ kavi to omẹ́ kavi jẹazọ̀n kavi to gànpamẹ bo ma yilizọn na we?’ 45  Whenẹnu wẹ e na gblọnna yé dọmọ, ‘Nugbo wẹ yẹn dọna mì, Dile mìwlẹ ma ko basi i na dopo to mẹhe whè hugan to omẹ ehelẹ mẹ, yẹn wẹ mì ma basi i na.’ 46  Podọ omẹ ehelẹ na yin sinsánsẹ kakadoi, ṣigba dodonọ lẹ na nọgbẹ̀ kakadoi.”

Nudọnamẹ Odò Tọn

Mt 25:1* Hogbe Glẹki tọn lọ dlẹnalọdo yọnnu de he ma ko yọ́n sunnu pọ́n.
Mt 25:15* Pọ́n Mt 18:24, nudọnamẹ odò tọn.