Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Matiu 24:1-51

24  Todin, dile Jesu jei bo to tintọ́n sọn tẹmpli lọ mẹ, devi etọn lẹ dọnsẹpọ ẹ nado do ohọ̀ tẹmpli lọ tọn lẹ hia ẹ.  E gblọnna yé dọmọ: “Be mì mọ onú ehe lẹpo ya? Nugbo wẹ yẹn dọna mì, Zannu de ma na yin jijodo zannu de ji to aliho depope mẹ tofi, he ma na yin hihọliai.”  Dile e to aisinsin to Osó Olivie tọn ji, devi lẹ dọnsẹpọ ẹ dovo, bo dọmọ: “Dọna mí, Whetẹnu wẹ onú ehelẹ na jọ, podọ etẹwẹ na yin ohia tintin tofi towe tọn po vivọnu titonu lọ tọn po?”  Jesu sọ gblọnna yé dọmọ: “Mì payi na mẹdepope ni ma hẹn mì buali blo;  na mẹsusu wẹ na wá to oyín ṣie mẹ, bo na to didọmọ, ‘Yẹn wẹ Klisti lọ,’ bo nasọ hẹn mẹsusu buali.  Mì na sè awhàn zingidi po awhàn linlin lẹ po; mì dike obu di mì blo. Na onú ehelẹ dona jọ, ṣigba opodo lọ ma ko yin din gba.  “Na akọta na fọ́n do akọta ji podọ ahọluduta do ahọluduta ji, bọ núdùdù whèdomẹ po aigba sisọsisọ lẹ po na tin sọn fide jẹ fide.  Onú ehe lẹpo wẹ yin bẹjẹeji awufiẹsa he taidi ajipanu tọn lẹ.  “To whenẹnu, gbẹtọ lẹ na jo mì hlan nukunbibia bo na hù mì, podọ akọta lẹpo na gbẹwanna mì na oyín ṣie tọn wutu. 10  Humọ, mẹsusu nasọ yin hinhẹn dahli bo na de ode awetọ hia bo nasọ gbẹwanna ode awetọ. 11  Yẹwhegán lalo susu nasọ fọ́n bo na hẹn mẹsusu buali; 12  podọ, na jideji sẹ́nhẹngba tọn wutu owanyi suhugan gbẹtọ lẹ tọn na miọn. 13  Ṣigba, mẹhe doakọnna kakajẹ opodo, omẹ enẹ wẹ na yin whinwhlẹngán. 14  Podọ yẹwheho wẹndagbe ahọluduta lọ tọn ehe na yin didọ to aigba fininọ lẹpo ji taidi okunnu de na akọta lẹpo; podọ whenẹnu wẹ opodo lọ na wá. 15  “Enẹwutu, to whenue mì mọ awuhiọnu he nọ hẹn vọjijẹ wá, he yẹwhegán Daniẹli ko dọho etọn lọ, to ote to ofi wiwe, (na wehiatọ ni yí wuntuntun zan,) 16  to whenẹnu, mì gbọ mẹhe to Jude lẹ ni jẹ hinhọ̀n ji yì osó lẹ ji. 17  Mì gbọ mẹhe to họta ni ma jẹte nado bẹ nutindo lẹ sọn ohọ̀ etọn mẹ blo; 18  podọ na mẹhe to ogle mẹ ni ma lẹkọyi whégbè nado ze awugbó etọn blo. 19  Dindọn hlan yọnnu he to ohò po dehe to anọ́ na ovi lẹ po to azán enẹlẹ gbè! 20  Mì nọ hodẹ̀ dọ hinhọnyi mìtọn ni ma yin to avivọ-whenu, kavi to gbọjẹzangbe blo; 21  na to whenẹnu, nukunbibia daho de na tin ehe nkọ ma ko jọ pọ́n sọn bẹjẹeji aihọn tọn gbọ́n kakajẹ din, lala, e ma nasọ jọ gbede ba. 22  Na nugbo tọn, eyin azán enẹlẹ ma yin sinsán-dogli, mẹdepope* ma na yin whinwhlẹngán; ṣigba na mẹdide lẹ tọn wutu azán enẹlẹ na yin sinsán-dogli. 23  “To whenẹnu, eyin mẹdepope dọna mì dọ, ‘Mì pọ́n! Klisti tofi,’ kavi, ‘To dọ́n!’ mì yí enẹ sè blo. 24  Na Klisti lalo po yẹwhegán lalo lẹ po na fọ́n bo na basi ohia daho lẹ po nujiawu lẹ po nado sọgan hẹnmẹ buali, kakajẹ mẹdide lẹ lọsu ji, eyin e yọnbasi. 25  Mì pọ́n! Yẹn ko na mì avase jẹnukọn. 26  Enẹwutu, eyin gbẹtọ lẹ dọna mì dọ, ‘Mì pọ́n! E to danfafa ji,’ mì tọ́nyi blo; ‘Mì pọ́n! E to abò homẹ,’ mì yí enẹ sè blo. 27  Na kẹdẹdile abì nọ zẹ̀ sọn whèzẹtẹn-waji bo nọ họnwun kaka yì whèyihọ-waji do, mọ wẹ tintin tofi Visunnu gbẹtọ tọn na te. 28  Fidepope he onú kúkú te, finẹ wẹ akùn lẹ na pli dopọ te. 29  “To nukunbibia azán enẹlẹ gbè tọn godo tlolo, owhè na yin hinhẹn dózin, osun ma na na hinhọ́n etọn, sunwhlẹvu lẹ na flẹ sọn olọn, bọ huhlọn olọn tọn lẹ na yin whinwhàn. 30  Podọ to whenẹnu, ohia Visunnu gbẹtọ tọn na sọawuhia to olọn, bọ hẹnnu he to aigba ji lẹpo na doavigbè to whenẹnu, yé nasọ mọ Visunnu gbẹtọ tọn ja to aslọ olọn tọn lẹ mẹ to huhlọn po gigo daho po mẹ. 31  Podọ e na do angẹli etọn lẹ hlan po ogbè opẹ̀n tọn daho de po, bọ yé na bẹ mẹdide etọn lẹ pli sọn agosu ẹnẹ aihọn* tọn lẹ mẹ, sọn opodo olọn tọn de jẹ opodo devo. 32  “Todin, mì plọn onú ehe sọn apajlẹ ovòtin tọn mẹ: Tlolo he alà yọyọ etọn jẹ whinwhẹ́n ji bo jọ̀ amà, mì nọ yọnẹn dọ alunlun ko sẹpọ. 33  Mọdopolọ ga, to whenue mì mọ onú ehe lẹpo, mì ni yọnẹn dọ ewọ ko sẹpọ, yèdọ to ohọ̀n ji. 34  Nugbo wẹ yẹn dọna mì dọ, whẹndo ehe ma na juwayi to aliho depope mẹ kaka onú ehe lẹpo nado jọ. 35  Olọn po aigba po na juwayi, ṣigba ohó ṣie lẹ ma na juwayi to aliho depope mẹ. 36  “Na nuhe dù azán enẹ po gànmẹ lọ po, mẹdepope ma yọnẹn, etlẹ yin angẹli olọn tọn lẹ kavi Visunnu lọ lọsu, adavo Otọ́ lọ kẹdẹ. 37  Na kẹdẹdile azán Noa tọn lẹ te do, mọ wẹ tintin tofi Visunnu gbẹtọ tọn na te. 38  Na dile gbẹtọ lẹ te do to azán enẹlẹ gbè he jẹnukọnna singigọ lọ, bo to dùdù bosọ to nùnù, bọ sunnu lẹ to alọwle podọ yọnnu lẹ sọ to yinyin nina to alọwle mẹ, kakajẹ azán he gbè Noa biọ aki lọ mẹ; 39  bọ yé ma doayi e go kaka singigọ lọ do wá bo plọ́ yemẹpo yì, mọ wẹ tintin tofi Visunnu gbẹtọ tọn na te. 40  To whenẹnu, sunnu awe na to ogle mẹ: dopo na yin yíyí bọ awetọ na yin jijodai; 41  yọnnu awe na to nuli to osé kọ̀n: dopo na yin yíyí bọ awetọ na yin jijodai. 42  Enẹwutu, mì nọ họ́ali, na mì ma yọ́n azán he gbè Oklunọ mìtọn ja. 43  “Ṣigba, mì yọ́n ehe dọ, eyin whétọ lọ ko yọ́n ojlẹ he mẹ ajotọ lọ ja te to zánmẹ wẹ, e na ko gbọṣi nukle bo ma na dike yè ni gbò adó biọ owhé etọn gbè. 44  Na ehe wutu, mìwlẹ lọsu, mì wleawudai, na ogàn he mẹ mì ma lẹn do wẹ Visunnu gbẹtọ tọn ja. 45  “Na nugbo tọn, mẹnu wẹ afanumẹ nugbonọ podọ nuyọnẹntọ lọ he oklunọ etọn de do devizọnwatọ whégbè tọn etọn lẹ ji, nado na núdùdù yetọn yé to ojlẹ sisọ mẹ? 46  Ayajẹnọ wẹ afanumẹ enẹ eyin oklunọ etọn wá bo mọdọ e to mọwà! 47  Nugbo wẹ yẹn dọna mì, Ewọ na de e do nutindo etọn lẹpo ji. 48  “Ṣigba, eyin afanumẹ ylankan enẹ dọ to ahun ede tọn mẹ gbede dọ, ‘Oklunọ ṣie to dindẹn,’ 49  bo jẹ afanumẹ hatọ etọn lẹ hò ji, bosọ nọ dù bo nọ nù hẹ ahànnumunọ he peve lẹ, 50  oklunọ afanumẹ enẹ tọn na wá to azán he gbè ewọ ma donukun podọ to ogàn he ewọ ma yọnẹn mẹ, 51  bo na sayana ẹn to aliho he sinyẹn hugan mẹ bo nasọ na ẹn otẹn etọn do yẹnuwatọ lẹ ṣẹnṣẹn. Finẹ wẹ e na viavi bo dù adúkúnkún te.

Nudọnamẹ Odò Tọn

Mt 24:22* To paa mẹ, “agbasalan.”
Mt 24:31* To paa mẹ, “jẹhọn ẹnẹ aihọn tọn lẹ.”