Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Matiu 21:1-46

21  Nalete, to whenuena yé sẹpọ Jelusalẹm bo jẹ Bẹtfagi to Osó Olivie tọn ji, whenẹnu wẹ Jesu do devi awe hlan,  bo dọna yé dọmọ: “Mì yì gbétatò he mì to mimọ hlan lọ mẹ, podọ mì na mọ to afọdopolọji kẹtẹkẹtẹ de to sìnsìn, bọ kẹtẹkẹtẹvu de gọ́ na ẹn; mì tún yé bo hẹn yé wá na mi.  Podọ eyin mẹde dọ nudepope na mì, mì na dọ dọ, ‘Oklunọ tindo nuhudo yetọn.’ To whenẹnu e na do yé hlan to afọdopolọji.”  Ehe jọ na taun tọn, na nuhe yin didọ gbọn yẹwhegán lọ gblamẹ nido sọgan yin hinhẹndi, dọmọ:  “Mì dọna viyọnnu Ziọni tọn dọ, ‘Pọ́n! Ahọlu towe ja dè we, po homẹmimiọn po, bo hẹ kẹtẹkẹtẹ de ji, mọwẹ, kẹtẹkẹtẹvu de, yèdọ ovi kẹtẹkẹtẹ de tọn ji.’”  Enẹwutu, devi lọ lẹ yì bo basi kẹdẹdile Jesu degbena yé do.  Podọ yé hẹn kẹtẹkẹtẹ lọ po kẹtẹkẹtẹvu lọ po wá, bo tẹ́ awugbó yetọn lẹ do yé ji, bọ ewọ sọ sinai do yé* ji.  Suhugan gbẹtọgun lọ tọn tẹ́ awugbó yetọn lẹ do aliho ji, bọ mẹdevo lẹ jẹ alà atin lẹ tọn sán ji bo to titẹ́ yé do aliho ji.  Na nuhe dù gbẹtọgun lọ lẹ, mẹhe to yìyì to nukọnna ẹn lẹ po mẹhe to hihodo e lẹ po to awhádo mapote dọmọ: “Mí vẹ̀ we, whlẹn Visunnu Davidi tọn! Donanọ wẹ ewọ he ja to oyín Jehovah tọn mẹ! Mí vẹ̀ we, whlẹn ẹn to oji aga!” 10  Todin, to whenuena e biọ Jelusalẹm, tòdaho lọ pete hozín, bo to didọmọ: “Mẹnu wẹ ehe?” 11  Gbẹtọgun lọ lẹ to didọ madoalọte dọmọ: “Ehe wẹ yẹwhegán lọ, Jesu, sọn Nazalẹti Galili tọn!” 12  Podọ Jesu biọ tẹmpli lọ mẹ bo yàn mẹhe to nusà po mẹhe to nuhọ̀ to tẹmpli lọ mẹ lẹpo po jẹgbonu, bosọ takitina tafo akuẹdiọtọ lẹ po aisinnu mẹhe to apoe sà lẹ tọn lẹ po. 13  E sọ dọna yé dọmọ: “E ko yin kinkàn dọ, ‘Ohọ̀ ṣie na yin yiylọdọ ohọ̀ odẹ̀ tọn,’ ṣigba mìwlẹ to hinhẹn ẹn zun odò jaguda lẹ tọn.” 14  Humọ, nukuntọ́nnọ lẹ po sẹkunọ lẹ po wá e dè to tẹmpli lọ mẹ, bọ e hẹnazọ̀ngbọna yé. 15  To whenuena yẹwhenọgán lẹ po wekantọ lẹ po mọ onú jiawu he e wà lẹ po yọpọ sunnu lẹ po he to awhádo to tẹmpli lọ mẹ dọmọ: “Mí vẹ̀ we, whlẹn Visunnu Davidi tọn!” homẹgble yé 16  bọ yé dọna ẹn dọmọ: “Be a sè nuhe omẹ ehelẹ to didọ?” Jesu dọna yé dọmọ: “Mọwẹ. Be mì ma ko hia ehe gbede dọ, ‘Onù yọpọvu lẹ po ovi to anọ́nù lẹ po tọn mẹ wẹ hiẹ ko hẹn pipà wá sọn’?” 17  Podọ e jo yé do finẹ bo tọ́n sọn tòdaho lọ mẹ yì Bẹtani bosọ dọ́ dọ́n. 18  Dile e lẹkọja tòdaho lọ mẹ to afọnnu fuu, huvẹ hù i. 19  Podọ e mọ ovòtin de to aliho tó bo yì e kọ̀n, ṣigba e ma mọ nude to e ji adavo amà lẹ kẹdẹ, bọ e dọna atin lọ dọmọ: “Na sinsẹ́n de ni masọ sẹ́n to hiẹ ji pọ́n gbede ba blo.” Ovòtin lọ sọ fiọ to afọdopolọji. 20  Ṣigba to whenuena devi lẹ mọ ehe, e paṣa yé bọ yé dọmọ: “Naegbọn bọ ovòtin lọ do fiọ to afọdopolọji?” 21  Jesu gblọnna yé dọmọ: “Nugbo wẹ yẹn dọna mì, Eyin mì ko gbẹ́ tindo yise bo ma tindo ayihaawe, e ma yin nuhe yẹn wà na ovòtin lọ kẹdẹ wẹ mì na wà gba, ṣigba eyin mì sọ dọna osó ehe dọ, ‘Sẹtẹn sọn fi bo yì ohù mẹ,’ e na jọ domọ. 22  Podọ nudepope he mì biọ to odẹ̀ mẹ, eyin mì tindo yise, mì na mọyi.” 23  Todin, to whenuena e biọ tẹmpli lọ mẹ godo, yẹwhenọgán lẹ po sunnu mẹho lẹ po wá e dè dile e to mẹplọn bo dọmọ: “Aṣẹ tẹwẹ hiẹ yí do to onú ehelẹ wà? Podọ mẹnu wẹ na we aṣẹ ehe?” 24  Jesu gblọnna yé dọmọ: “Yẹnlọsu na kàn onú dopo biọ mì. Eyin mì dọ ẹ na mi, yẹnlọsu na dọ aṣẹ he yẹn yí do to onú ehelẹ wà na mì: 25  Baptẹm Johanu tọn, fie wẹ e wá sọn? Sọn olọn kavi sọn gbẹtọ lẹ dè?” Ṣigba, yé jẹ nulẹnpọn ji to yedelẹ ṣẹnṣẹn, dọmọ: “Eyin mí dọ, ‘Sọn olọn,’ ewọ na dọna mí dọ, ‘To whelọnu lo, naegbọn mì ma do yí i sè?’ 26  Ṣigba, eyin mí dọ, ‘Sọn gbẹtọ lẹ dè,’ mí dona dibuna gbẹtọgun lọ, na yemẹpo wẹ nọ pọ́n Johanu hlan di yẹwhegán de.” 27  Enẹwutu, yé gblọnna Jesu dọmọ: “Mí ma yọnẹn.” Ewọ lọsu dọna yé dọmọ: “Yẹnlọsu ma to na dọ aṣẹ he yẹn yí do to onú ehelẹ wà na mì. 28  “Etẹwẹ mìwlẹ lẹn? Dawe de tindo ovi awe. E yì tintan dè, bo dọmọ, ‘Ovi, yì wazọ́n to vẹngle mẹ to egbé.’ 29  Ewọ gblọn dọmọ, ‘Otọ́, yẹn na yì,’ ṣigba e ma yì. 30  E dọnsẹpọ awetọ lọ bo dọ nudopolọ. Ewọ gblọn dọmọ, ‘Yẹn ma na yì.’ To godo mẹ, e diọlinlẹn bo yì. 31  Detẹ to yé omẹ awe lẹ mẹ wẹ wà ojlo otọ́ etọn tọn?” Yé dọmọ: “Awetọ lọ.” Jesu dọna yé dọmọ: “Nugbo wẹ yẹn dọna mì dọ, tòkuẹ-ṣinyantọ lẹ po galọtọ lẹ po to nukọnjẹna mì biọ ahọluduta Jiwheyẹwhe tọn mẹ. 32  Na Johanu wá mì dè bo do aliho dodowiwa tọn hia mì, ṣigba mì ma yí i sè. Etomọṣo, tòkuẹ-ṣinyantọ lẹ po galọtọ lẹ po yí i sè, podọ dile mìwlẹ tlẹ mọ ehe, mì ma diọlinlẹn to godo mẹ nado yí i sè gba. 33  “Mì dotó apajlẹ devo: Dawe de tin, yèdọ whétọ de, he dó vẹngle de bo dó pákàn lẹdo e bosọ kùn ovẹn-finyọ́ndo de bo gbá atọ̀họ̀ de do e mẹ, bosọ haya ogle lọ na glesi lẹ, bo tọ́nwhẹ̀n yì tògodo. 34  To whenuena ojlẹ sinsẹ́n lẹ bibẹpli tọn wá, e do afanumẹ etọn lẹ hlan glesi lọ lẹ nado mọ sinsẹ́n etọn lẹ yí. 35  Ṣigba, glesi lọ lẹ wle afanumẹ etọn lẹ, bo hò dopo, bo hù devo, bosọ dlan zannu do devo. 36  Whladopo dogọ, e do afanumẹ devo lẹ hlan, he sù hú tintan tọn lẹ, ṣigba yé wà nudopolọ na yé. 37  To godo mẹ, e do visunnu etọn hlan yé, bo dọ dọ, ‘Yé na na sisi visunnu ṣie.’ 38  To whenuena glesi lọ lẹ mọ visunnu lọ, yé dọ to yedelẹ ṣẹnṣẹn dọ, ‘Gudutọ lọ die; mì wá, bo gbọ mí ni hù i bosọ yí ogú etọn!’ 39  To whenẹnu, yé wle e bo ze e dlan sọn vẹngle lọ mẹ bosọ hù i. 40  Enẹwutu, to whenuena klunọ vẹngle lọ tọn na wá, etẹwẹ e na wà na glesi enẹlẹ?” 41  Yé dọna ẹn dọmọ: “Na yé yin mẹylankan wutu, e na hẹn vasudo ylankan wá yé ji bo na haya vẹngle lọ na glesi devo lẹ, he na na ẹn sinsẹ́n etọn lẹ to whenuena ojlẹ yetọn sọ̀.” 42  Jesu dọna yé dọmọ: “Be mì ma ko hia to Owe-wiwe lẹ mẹ gbede dọ, ‘Zannu he họ̀dotọ lẹ gbẹ́ dai, enẹ lọ wẹ ko lẹzun zannu gángánsu họ̀gosu tọn. Jehovah dè wẹ ehe wá sọn, podọ e jiawu to nukun mítọn lẹ mẹ’? 43  Ehe wẹ zọ́n bọ yẹn dọna mì dọ, Ahọluduta Jiwheyẹwhe tọn na yin yíyí sọn mì si bo yin yíyí na akọta de he na de sinsẹ́n etọn lẹ tọ́n. 44  Humọ, mẹhe jai jẹ zannu ehe ji na gbà hányán. Ṣigba mẹdepope he ji e flẹ jẹ, e na lì i pọ́dọ́pọ́dọ́.” 45  Todin, to whenuena yẹwhenọgán lẹ po Falesi lẹ po ko sè apajlẹ etọn lẹ, yé doayi e go dọ emilẹ hodọ wẹ e te. 46  Ṣigba, dile yé tlẹ to dindin nado wle e, yé dibusi gbẹtọgun lọ lẹ, na omẹ ehelẹ nọ pọ́n ẹn hlan di yẹwhegán de wutu.

Nudọnamẹ Odò Tọn

Mt 21:7* E họnwun dọ hogbe lọ “yé” tofi, dlẹnalọdo awugbó lọ lẹ.