Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Matiu 20:1-34

20  “Na ahọluduta olọn tọn tin taidi dawe de, yèdọ whétọ de, he tọ́nyi to afọnnu fuu nado dà pakanọ lẹ do vẹngle etọn mẹ.  To whenuena e ko kọngbedopọ hẹ pakanọ lọ lẹ nado na yé denali* dopo gbèdopo, e do yé hlan vẹngle etọn mẹ.  Dile e sọ tọ́nyi to nudi gànhiho atọ̀ntọ* mẹ, e mọ mẹdevo lẹ to ote to ahimẹ he ma mọ azọ́n de nado wà;  podọ e dọna yé dọmọ, ‘Mìlọsu ga, mì yì vẹngle lọ mẹ, yẹn nasọ na mì nudepope he jẹ.’  Enẹwutu yé yì. E sọ tọ́nyi whladopo dogọ to nudi gànhiho ṣidopotọ* mẹ podọ to gànhiho ṣinẹnẹtọ* mẹ bo wà nudopolọ.  To godo mẹ, to nudi gànhiho widopotọ* mẹ, e tọ́nyi bo mọ mẹdevo lẹ to ote, bọ e dọna yé dọmọ, ‘Naegbọn mìwlẹ do to ote tofi na azán lọ blebu bo ma mọ azọ́n de nado wà?’  Yé dọna ẹn dọ, ‘Na mẹdepope ma dà mí di pakanọ wutu wẹ.’ E dọna yé dọmọ, ‘Mìlọsu, mì yì vẹngle lọ mẹ.’  “To whenuena owhè ko jai, oklunọ vẹngle lọ tọn dọna nukunpedonugotọ etọn dọmọ, ‘Ylọ pakanọ lọ lẹ bo sú azọ́nkuẹ yetọn yé, bẹsọn omẹ godotọ lẹ ji yì omẹ tintan lẹ ji.’  To whenuena mẹhe bẹ azọ́n to gànhiho widopotọ mẹ lẹ wá, dopodopo yetọn mọ denali dopo yí. 10  Enẹwutu, to whenuena omẹ tintan lẹ wá, yé lẹndọ yé na mọyi humọ; ṣigba yelọsu mọ denali dopodopo yí di azọ́nkuẹ. 11  To whenuena yé mọ ẹn yí, yé jẹ hùnhlún ji do whétọ lọ go 12  bo dọmọ, ‘Omẹ godotọ ehelẹ wazọ́n na gànhiho dopo poun; ṣogan hiẹ hẹn yé sọzẹn hẹ míwlẹ he ko wazọ́n sinsinyẹn na azán lọ pete to yozò sinsinyẹn nù!’ 13  Ṣigba, e gblọnna dopo to yé mẹ, dọmọ, ‘Dawe, yẹn ma waylan de do we. Hiẹ kọngbedopọ hẹ mi nado yí denali dopo, kavi e ma yin mọ wẹ? 14  Yí nuhe yin towe bo yì. E jlo mi nado na omẹ godotọ ehelẹ nudopolọ he yẹn na we. 15  Be yẹn ma tindo jlọjẹ nado yí onú ṣie titi do wà nuhe jlo mi ya? Kavi be nukun towe yin ylankan na yẹn wà dagbe wutu wẹ ya?’ 16  Mọdopolọ, omẹ godotọ lẹ na lẹzun tintan, bọ omẹ tintan lẹ na lẹzun godotọ.” 17  Todin, whenuena Jesu hẹji jei Jelusalẹm, e pli devi wiawe lẹ dovo dile yé to aliho ji, bo dọna yé dọmọ: 18  “Mì pọ́n! Mí hẹji jei Jelusalẹm, podọ Visunnu gbẹtọ tọn na yin zizejo na yẹwhenọgán lẹ po wekantọ lẹ po, bọ yé na gblewhẹ okú tọn do e, 19  bo na ze e jo na omẹ akọta lẹ tọn na yé nido yí i do davlẹ bo hò e bosọ whè e do núgo, podọ to azán atọ̀ntọ gbè, e na yin finfọn.” 20  To enẹgodo, onọ̀ visunnu Zebede tọn lẹ tọn dọnsẹpọ ẹ po visunnu etọn lẹ po, bo to taliai bosọ to nude biọ sọn e dè. 21  E dọna ẹn dọmọ: “Etẹwẹ hiẹ jlo?” Yọnnu lọ dọna ẹn dọmọ: “Degbè dọ visunnu ṣie awe ehelẹ ni sinai, dopo to adusilọ towe mẹ podọ awetọ to amiyọnlọ towe mẹ, to ahọluduta towe mẹ.” 22  Jesu gblọn dọmọ: “Mìwlẹ ma yọ́n nuhe biọ mì te. Be mìwlẹ sọgan nù kọfo he yẹn jlo na nù lọ ya?” Yé dọna ẹn dọmọ: “Mí sọgan.” 23  E dọna yé dọmọ: “Mì na nù kọfo ṣie nugbo, ṣigba nado sinai to adusilọ ṣie mẹ podọ to amiyọnlọ ṣie mẹ ma yin yẹn tọn nado namẹ gba, ṣigba otẹn ehelẹ tin na mẹhe Otọ́ ṣie ko wleawu etọn dai na lẹ.” 24  To whenue omẹ ao he pò lẹ sè ehe, yé gblehomẹ do nọvisunnu awe lọ lẹ go. 25  Ṣigba, Jesu ylọ yé wá ede dè, bo dọmọ: “Mì yọnẹn dọ ogán akọta lẹ tọn nọ duklunọ do yé ji podọ omẹ gboogbo lẹ nọ paṣẹ glanglan do yé ji. 26  E ma yinmọ to mìwlẹ ṣẹnṣẹn gba; ṣigba mẹdepope he jlo na lẹzun kiklo to mì ṣẹnṣẹn dona yin lizọnyitọ mìtọn, 27  podọ mẹdepope he jlo na yin tintan to mì ṣẹnṣẹn dona yin afanumẹ mìtọn. 28  Kẹdẹdile Visunnu gbẹtọ tọn wá, e ma yin nado yin lizọnyina gba, ṣigba nado yilizọn namẹ bo ze alindọn etọn jo taidi ofligọ de do ota mẹsusu tọn mẹ.” 29  Todin, dile yé to tintọ́n sọn Jẹliko, gbẹtọgun daho de hodo e. 30  Podọ, pọ́n! dawe nukuntọ́nnọ awe to aisinsin to aliho tó, to whenue yé sè dọ Jesu juwajei, yé dawhá, dọmọ: “Oklunọ, wàlẹblanu na mí, hiẹ Visunnu Davidi tọn!” 31  Ṣigba gbẹtọgun lọ degbè do yé sinsinyẹn nado nabọẹ; ṣogan yé sọ vọ́ dawhá gángán, bo to didọmọ: “Oklunọ, wàlẹblanu na mí, hiẹ Visunnu Davidi tọn!” 32  Enẹwutu, Jesu nọte, bo ylọ yé bosọ dọmọ: “Etẹwẹ mì jlo dọ yẹn ni wà na mì?” 33  Yé dọna ẹn dọmọ: “Oklunọ, dike nukun mítọn lẹ ni hùn.” 34  Lẹblanu whàn Jesu, bọ e doalọ nukun yetọn lẹ go, podọ nukun yetọn lẹ hùn to afọdopolọji, bọ yé sọ hodo e.

Nudọnamẹ Odò Tọn

Mt 20:2 Enẹ wẹ, fataka-kuẹ Lomu tọn de he nọ pẹnzin sọ gramme 3,85.
Mt 20:3 Enẹ wẹ, nudi ogàn 9 afọnnu tọn, eyin yè hia sọn ojlẹ he mẹ owhè nọ zẹ̀.
Mt 20:5 Enẹ wẹ, nudi ogàn 12 whèmẹ tọn, eyin yè hia sọn ojlẹ he mẹ owhè nọ zẹ̀.
Mt 20:5 Enẹ wẹ, nudi ogàn 3 whèmẹ tọn.
Mt 20:6 Enẹ wẹ, nudi ogàn 5 whèjai tọn.