Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Matiu 18:1-35

18  To gànhiho enẹ mẹ, devi lẹ dọnsẹpọ Jesu bo dọmọ: “Mẹnu wẹ yin mẹhe klohugan to ahọluduta olọn tọn mẹ taun?”  Enẹwutu, e ylọ yọpọvu de wá ede dè, bo ze e do ṣẹnṣẹn yetọn  bosọ dọmọ: “Nugbo wẹ yẹn dọna mì, Eyin mìwlẹ ma diọ bo taidi yọpọvu lẹ, mì ma na biọ ahọluduta olọn tọn mẹ to aliho depope mẹ.  Enẹwutu, mẹdepope he na whiwhẹ ede taidi yọpọvu ehe wẹ yin mẹhe klohugan to ahọluduta olọn tọn mẹ;  podọ mẹdepope he yí yọpọvu ehe nkọtọn dopo to oyín ṣie mẹ, yí yẹnlọsu ga.  Ṣigba mẹdepope he hẹn dopo to omẹ pẹvi he tindo yise to yẹn mẹ ehelẹ mẹ dahli, e doale na ẹn hú dọ yè ni sìn gilisé he kẹtẹkẹtẹ lẹ nọ lilẹ́ nkọtọn de do okọ̀ na ẹn bo siọ ẹ do ohù he siso mẹ.  “Dindọn hlan aihọn na zannu ahlìda tọn etọn lẹ wutu! Nugbo wẹ dọ, zannu ahlìda tọn lẹ dona wá dandan, ṣigba dindọn hlan omẹ lọ he gblamẹ zannu ahlìda tọn lọ gbọn do wá!  To whelọnu lo, eyin alọ towe kavi afọ towe to hinhẹn we dahli, sán ẹn sẹ̀ bo ze e dlan sọn dewe go; e na pọnte na we nado biọ ogbẹ̀ mẹ taidi klegbesatọ kavi sẹkunọ hú dọ hiẹ ni tindo alọ awe kavi afọ awe bo yin dindlan do miyọ́n madopodo mẹ.  Podọ ga, eyin nukun towe to hinhẹn we dahli, sún in sẹ̀ bo ze e dlan sọn dewe go; e na pọnte na we nado biọ ogbẹ̀ mẹ po nukun dopo po hú dọ hiẹ ni yin dindlan do Gẹhẹnna* miyọ́n tọn mẹ po nukun awe po. 10  Mì hẹn ẹn diun ma nado gbẹkọ dopo to omẹ pẹvi ehelẹ mẹ go; na yẹn dọna mì dọ whepoponu wẹ angẹli yetọn lẹ to olọn mẹ nọ tin to Otọ́ ṣie he tin to olọn mẹ nukọn. 11  ——* 12  “Etẹwẹ mì lẹn? Eyin dawe de tindo lẹngbọ kanweko bọ dopo to yé mẹ danbú, be ewọ ma na jo kanwe-fọtọ̀n-nukunẹnẹ lẹ do osó lẹ ji bo yì dín dopo he to dindanbu lọ ya? 13  Podọ eyin e wá mọ ẹn, nugbo wẹ yẹn dọna mì, ewọ na jaya tlala do e ji hú do kanwe-fọtọ̀n-nukunẹnẹ he ma danbú lẹ ji. 14  Mọdopolọ, e ma yin ojlo Otọ́ ṣie he tin to olọn mẹ tọn dọ dopo to omẹ pẹvi ehelẹ mẹ ni dọ̀n gba. 15  “Humọ, eyin mẹmẹsunnu towe waylando de, yì bo do nuṣiwa etọn hia ẹ to hiẹ po ewọ po kẹdẹ ṣẹnṣẹn. Eyin e sè towe, be hiẹ ko duale mẹmẹsunnu towe tọn. 16  Ṣigba, eyin e ma sè, plan omẹ dopo kavi awe dogọ dewe, na nuhe yin didọ lẹpo nido sọgan yin hinhẹn lodo to onù kunnudetọ awe kavi atọ̀n tọn mẹ. 17  Eyin e ma sè yetọn, dọ ẹ na agun. Eyin e masọ sè agun tọn ga, gbọ e ni tin hlan we kẹdẹdi omẹ akọta lẹ tọn de podọ di tòkuẹ-ṣinyantọ de. 18  “Nugbo wẹ yẹn dọna mì, Nudepope he mìwlẹ na blá to aigba ji na yin nuhe ko yin biblá to olọn mẹ lẹ, podọ nudepope he mìwlẹ na tún to aigba ji na yin nuhe ko yin túntún to olọn mẹ lẹ. 19  Humọ, nugbo wẹ yẹn dọna mì, Eyin omẹ awe to mì mẹ kọngbedopọ to aigba ji nado basi obiọ gando onú titengbe depope go, Otọ́ ṣie olọn tọn na basi i na yé. 20  Na fie omẹ awe kavi atọ̀n pli dopọ te to oyín ṣie mẹ, yẹn tin to ṣẹnṣẹn yetọn to finẹ.” 21  Enẹgodo, Pita wá bo dọna ẹn dọmọ: “Oklunọ, whla nẹmu wẹ mẹmẹsunnu ṣie na waylando do go e bọ yẹn dona jona ẹn? Kakajẹ whla ṣinawe wẹ ya?” 22  Jesu dọna ẹn dọmọ: “Yẹn ma dọna we dọ, Kakajẹ whla ṣinawe gba, ṣigba, Kakajẹ whla kandegbàn-atọ́n-nukunawe.* 23  “Enẹwutu wẹ ahọluduta olọn tọn yin yiyijlẹdo dawe de go, yèdọ ahọlu de, he jlo dọ afanumẹ etọn lẹ ni wá basi lẹnjo na ẹn. 24  To whenuena yé jẹ lẹnjo lọ basi na ẹn ji, dawe de yin hinhẹnwa he duahọ talẹnti* degba-awe-foo [enẹ wẹ denali 60000000]* tọn do e. 25  Ṣigba, na ewọ ma tindo nuhe e na yí do suahọ lọ wutu, oklunọ etọn degbè dọ ewọ, asi etọn po ovi etọn lẹ po, gọna nuhe e tindo lẹpo ni yin sisà, na ahọ́ lọ nido yin súsú. 26  Enẹwutu, afanumẹ lọ jẹklo bo jẹ taliaina ẹn ji, bosọ to didọmọ, ‘Fahomẹ pọ́n mi, yẹn nasọ suahọ lọ lẹpo we.’ 27  Na ehe wàlẹblanu na oklunọ afanumẹ lọ tọn wutu, e jo e bosọ jo ahọ́ he e dù na ẹn. 28  Ṣigba, afanumẹ enẹ tọ́nyi bo mọ dopo to afanumẹ hatọ etọn lẹ mẹ he duahọ denali kanweko tọn do e; podọ, e zunfán ẹn bo jẹ ovẹ́ finyọ́n na ẹn ji, bo to didọmọ, ‘Suahọ he a dù lẹpo.’ 29  Enẹwutu, afanumẹ hatọ etọn jẹklo bo jẹ vẹvẹna ẹn ji, dọ, ‘Fahomẹ pọ́n mi, yẹn nasọ suahọ lọ we.’ 30  Etomọṣo, ewọ ma jlo na sè, ṣigba e yì bo ze e dlan gànpamẹ kaka ewọ nado suahọ he e dù. 31  Enẹwutu, to whenuena afanumẹ hatọ etọn lẹ mọ nuhe jọ lẹ, e blawuna yé tlala, bọ yé yì bo basi zẹẹmẹ nuhe jọ lẹpo tọn na oklunọ yetọn. 32  To whenẹnu, oklunọ etọn ylọ ẹ wá bo dọna ẹn dọ, ‘Hiẹ afanumẹ ylankan, yẹn jo ahọ́ enẹ lẹpo na we to whenuena hiẹ vẹvẹna mi. 33  Be e ma jẹ dọ hiẹ lọsu ni do lẹblanu hia afanumẹ hatọ towe ga, yèdọ dile yẹn ko do lẹblanu hia we do ya?’ 34  Na enẹwutu, oklunọ etọn gblehomẹ, bo jo e na gàntọ-ṣọ́tọ lẹ, kaka e nado suahọ he e dù lẹpo. 35  Mọkẹdẹ wẹ Otọ́ ṣie olọn tọn na yinuwa hẹ mì do eyin dopodopo mìtọn lẹ ma nọ jona mẹmẹsunnu etọn sọn ahun mẹ wá.”

Nudọnamẹ Odò Tọn

Mt 18:9 Pọ́n Nudọnamẹ Dogọ 9.
Mt 18:11 Pọ́n Mt 17:21, nudọnamẹ odò tọn.
Mt 18:22 “Whla kandegbàn-atọ́n-nukunawe,” to kọndopọ mẹ hẹ Gẹ 4:24. To paa mẹ, “kandegbàn donu ṣinawe.”
Mt 18:24 Talẹnti dopo nọ pẹ̀n sọ nudi kilo 20,4. Sọ pọ́n Nudọnamẹ Dogọ 11.
Mt 18:24 Denali yin fataka-kuẹ Lomu tọn de. Denali dopo yin azọ́nkuẹ azán blebu glesi pakanọ de tọn (pọ́n Mt 20:2).