Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Matiu 17:1-27

17  To azán ṣidopo godo, Jesu plan Pita, podọ Jakọbu po nọvisunnu etọn Johanu po bo hẹn yé yì osó he yiaga taun de ji to olá.  Podọ wunmẹ etọn diọ to nukọn yetọn, bọ nukunmẹ etọn sẹ́ di owhè, podọ awugbó etọn lẹ họ́n taidi hinhọ́n.  Podọ, pọ́n! Mose po Elija po sọawuhia yé, bo to hodọ hẹ ẹ.  To whenẹnu, Pita dọna Jesu dọmọ: “Oklunọ, e yọ́n taun dọ mí ni nọfi. Eyin hiẹ jlo, yẹn na gbá gòhọ atọ̀n dofi, dopo na hiẹ, dopo na Mose podọ dopo na Elija.”  Dile e gbẹ́ to hodọ, pọ́n! aslọ sisẹ́ mlanmlan de ṣinyọ́n yé ji, podọ, pọ́n! ogbè de sọn aslọ lọ mẹ, to didọmọ: “Ehe wẹ Visunnu ṣie, mẹyiwanna lọ, mẹhe yẹn ko kẹalọyi; mì nọ dotoaina ẹn.”  To whenuena devi lẹ sè ehe, yé ṣinyọ́n nukunmẹ yetọn lẹ ai bosọ dibu tlala.  Enẹgodo Jesu dọnsẹpọ yé, bo doalọ yé go, bosọ dọmọ: “Mì fọnṣite, mì dibu blo.”  To whenuena yé ze nukun yetọn lẹ daga, yé ma mọ mẹdepope adavo Jesu dopo kẹdẹ.  Podọ dile yé to tejẹ sọn osó lọ ji, Jesu dosẹ́n na yé, dọmọ: “Mì dọ numimọ lọ na mẹdepope blo kaka Visunnu gbẹtọ tọn nado yin finfọn sọn oṣiọ lẹ mẹ.” 10  Ṣigba, devi lẹ kanse e dọmọ: “To whelọnu lo, naegbọn wekantọ lẹ do nọ dọ dọ Elija dona wá whẹ́?” 11  E gblọn dọmọ: “Nugbo wẹ, Elija na wá, bo na hẹn onú lẹpo gọwá otẹn yetọn mẹ. 12  Nalete, yẹn dọna mì dọ Elija ko wá bọ yé ma yọnẹn dọ ewọ wẹ, ṣigba yé wà nuhe jlo yé lẹ na ẹn. Mọdopolọ, Visunnu gbẹtọ tọn dona jiya to alọ yetọn mẹ ga.” 13  To whenẹnu wẹ devi lẹ doayi e go dọ Johanu Baptizitọ lọ hodọ wẹ e te na yé. 14  Podọ to whenuena yé wá gbẹtọgun lọ dè, dawe de dọnsẹpọ ẹ, bo jẹklo na ẹn bo to didọmọ: 15  “Oklunọ, wàlẹblanu na visunnu ṣie, na adingbènọ de wẹ ewọ, bọ e sọ to awutu jẹ, na e nọ jai jẹ miyọ́n mẹ whẹwhẹ bosọ nọ jai jẹ osin mẹ whẹwhẹ; 16  podọ yẹn ko hẹn ẹn yì devi towe lẹ dè, ṣigba yé ma sọgan hẹnazọ̀ngbọna ẹn.” 17  Jesu gblọn dọmọ: “Whẹndo mayisenọ podọ bublunọ E, nawẹ yẹn na nọ mì dè dẹnsọ? Podọ, nawẹ yẹn na sinyẹnlin hẹ mì dẹnsọ? Hẹn ẹn wá dè e tofi.” 18  Enẹgodo, Jesu gbẹnuna aovi lọ, bọ e tọ́njẹgbonu sọn yọpọ sunnu lọ mẹ; podọ ewọ yin azọ̀nhẹngbọna sọn gànhiho enẹ mẹ. 19  To whenẹnu, devi lẹ wá Jesu dè dovo bo dọmọ: “Naegbọn míwlẹ ma do sọgan yàn ẹn jẹgbonu?” 20  E dọna yé dọmọ: “Na yise mìtọn yin pẹvi wutu wẹ. Na nugbo wẹ yẹn dọna mì, eyin mì tindo yise he sọ okún mutaldi* tọn de, mì na dọna osó ehe dọ, ‘Sẹtẹn sọn fi yì dọ́n,’ bọ e na sẹtẹn, podọ nudepope ma na glo mì.” 21  ——* 22  To whenuena yé pli dopọ to Galili wẹ Jesu dọna yé dọmọ: “Visunnu gbẹtọ tọn dona yin didehia do alọ gbẹtọ lẹ tọn mẹ, 23  bọ yé na hù i, podọ to azán atọ̀ntọ gbè, e na yin finfọn.” Enẹwutu yé blawu tlala. 24  To whenuena yé ko wá Kapẹlnaumi godo, mẹhe nọ ṣinyan tòkuẹ dlakma awe* tọn lọ lẹ dọnsẹpọ Pita bo dọmọ: “Be mẹplọntọ mìtọn ma nọ sú tòkuẹ dlakma awe tọn lọ wẹ ya?” 25  E dọmọ: “Mọwẹ.” Ṣigba, to whenuena e biọ whégbè, Jesu whẹ́ wẹ dọhona ẹn dọmọ: “Etẹwẹ hiẹ lẹn, Simọni? Mẹnu si wẹ ahọlu aigba tọn lẹ nọ yí dèkuẹ lẹ kavi takuẹ te? Sọn visunnu yetọn lẹ si kavi sọn jonọ lẹ si?” 26  To whenuena e dọmọ: “Sọn jonọ lẹ si,” Jesu dọna ẹn dọmọ: “To whenẹnu, be visunnu lẹ vò sọn tòkuẹ nina mẹ niyẹn. 27  Ṣigba, na mí nikaa hẹn yé dahli wutu, hiẹ, yì ohù ji bo dlan omlẹn, bosọ yí whèvi tintan he na wá aga, podọ eyin hiẹ kẹ̀ onù etọn, a na mọ abọgan-kuẹ stateli* de. Yí enẹ bo ze e jo na yé, na yẹn po hiẹ po tọn.”

Nudọnamẹ Odò Tọn

Mt 17:20* Pọ́n Mt 13:31, nudọnamẹ odò tọn.
Mt 17:21* Wefọ ehe yin mimọ to lẹdogbedevomẹ Biblu tọn delẹ mẹ, ṣigba e ma yin mimọ to alọnuwe tangan hohowhenu tọn voovo Glẹki tọn lẹ mẹ.
Mt 17:24* Enẹ wẹ, abọgan-kuẹ de he sọzẹn hẹ dlakma awe.
Mt 17:27* Enẹ wẹ, abọgan-kuẹ de he sọzẹn hẹ dlakma ẹnẹ, sọ pọ́n Nudọnamẹ Dogọ he tindo hosọ lọ “Jijlẹ Akuẹ Tọn, Osin Tọn po Tedidi Tọn lẹ Po” glọ.