Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Matiu 16:1-28

16  Falesi lẹ po Sadusi lẹ po dọnsẹpọ ẹ to finẹ, podọ nado whlé e pọ́n, yé biọ to e si nado na yé ohia de sọn olọn.  E gblọnna yé dọmọ: “[[Eyin owhè jai, mì nọ saba dọ dọ, ‘Aimẹ na yọ́n, na jiwhé divẹẹ taidi miyọ́n wutu’;  podọ to afọnnu, ‘Avivọ na tin bọ jikun na ja to egbé, na jiwhé divẹẹ taidi miyọ́n, ṣigba bo súyu wutu.’ Mìwlẹ yọ́n lehe yè nọ detana jiwhé-nukunmẹ do, ṣigba mì ma sọgan detana ohia ojlẹ lẹ tọn.]]*  Whẹndo ylankan podọ ayọdetọ to ohia de dín mapote, ṣigba ohia de ma na yin nina ẹn adavo ohia Jona tọn.” To whenẹnu, e tọ́nyi bo jo yé do finẹ.  Todin, devi lẹ dasá yì awà awetọ ji bo wọn nado hẹn akla lẹ.  Jesu dọna yé dọmọ: “Mì hùn nukun mìtọn lẹ dote bo payi otọ́n Falesi lẹ po Sadusi lẹ po tọn go.”  Enẹwutu yé jẹ nulẹnpọn ji to yedelẹ ṣẹnṣẹn, dọmọ: “Mí ma hẹn akla depope.”  Na Jesu yọ́n ehe wutu, e dọmọ: “Naegbọn mìwlẹ do to onú ehe lẹnpọn to mìde ṣẹnṣẹn na mì ma tindo akla de wutu, mì yise pẹvinọ?  Be mìwlẹ ma ko doayi nuagokun lọ go kakajẹ din, kavi be mì ma flin akla atọ́n he yin yíyí do na núdùdù gbẹtọ degbade-fọtọ́n po ohà nẹmu he mì bẹpli po ya? 10  Kavi akla ṣinawe he yin yíyí do na núdùdù gbẹtọ degbade po ohà daho nẹmu he mì bẹpli po ya? 11  Naegbọn bọ mì ma mọnukunnujẹemẹ dọ yẹn ma to hodọna mì gando akla lẹ go? Ṣigba mì payi otọ́n Falesi lẹ po Sadusi lẹ po tọn go.” 12  Whenẹnu wẹ yé mọnukunnujẹemẹ dọ ewọ ma to didọna yé nado payi otọ́n akla lẹ tọn go gba, ṣigba nuplọnmẹ Falesi lẹ po Sadusi lẹ po tọn go. 13  Todin, to whenuena Jesu ko wá lẹdo Sesalea Filippi tọn lẹ mẹ, e jẹ kinkanse devi etọn lẹ ji dọmọ: “Mẹnu wẹ gbẹtọ lẹ to didọ dọ Visunnu gbẹtọ tọn yin?” 14  Yé dọmọ: “Mẹdelẹ nọ dọ Johanu Baptizitọ, mẹdevo lẹ nọ dọ Elija, podọ mẹdevo lẹ sọ nọ dọ Jelemia kavi dopo to yẹwhegán lẹ mẹ.” 15  E dọna yé dọmọ: “Ṣigba mìwlẹ, mẹnu wẹ mì nọ dọ dọ yẹn yin?” 16  Simọni Pita gblọn dọmọ: “Hiẹ wẹ Klisti lọ, Visunnu Jiwheyẹwhe ogbẹ̀nọ lọ tọn.” 17  Jesu gblọnna ẹn dọmọ: “Ayajẹnọ wẹ hiẹ, Simọni visunnu Jona tọn, na e ma yin agbasalan po ohùn po wẹ de e hia we gba, ṣigba Otọ́ ṣie he tin to olọn mẹ wẹ wàmọ. 18  Humọ, yẹn dọna we dọ, Hiẹ wẹ Pita, podọ osé gángán ehe ji wẹ yẹn na dó agun ṣie do, bọ họngbo Hadẹs* tọn lẹ ma na dohuhlọn do e ji. 19  Yẹn na na we họnhungan ahọluduta olọn tọn lẹ, podọ nudepope he hiẹ na blá to aigba ji, na yin nuhe ko yin biblá to olọn mẹ, podọ nudepope he hiẹ na tún to aigba ji, na yin nuhe ko yin túntún to olọn mẹ.” 20  To enẹgodo, e dosẹ́n na devi lẹ sinsinyẹn ma nado dọna mẹdepope dọ ewọ wẹ Klisti lọ. 21  Sọn ojlẹ enẹ mẹ sọyi, Jesu Klisti jẹ didohia devi etọn lẹ ji dọ ewọ dona yì Jelusalẹm bo jiya onú susu tọn to alọ sunnu mẹho lẹ, yẹwhenọgán lẹ, po wekantọ lẹ po tọn mẹ, bo yin hùhù, bosọ yin finfọn to azán atọ̀ntọ gbè. 22  To whenẹnu, Pita plan ẹn jẹ olá bo jẹ nugbẹna ẹn ji, dọmọ: “Wàlẹblanu na dewe, Oklunọ; ehe ma na jọ do gowe gbede.” 23  Ṣigba, e lẹgodo, bo dọna Pita dọmọ: “Tọ́n sọn godo ṣie, Satani! Zannu ahlìda tọn de wẹ hiẹ yin na mi, na nulẹnpọn towe ma sọgbe hẹ linlẹn Jiwheyẹwhe tọn lẹ gba, ṣigba dehe yin gbẹtọ tọn lẹ.” 24  Enẹgodo, Jesu dọna devi etọn lẹ dọmọ: “Eyin mẹdepope jlo nado hodo mi, mì gbọ e ni mọ́n ede bo ze yatin etọn bosọ to hihodo mi zọnmii. 25  Na mẹdepope he jlo na whlẹn alindọn etọn na hẹn ẹn bu; ṣigba mẹdepope he hẹn alindọn etọn bu na yẹn tọn wutu na whlẹn ẹn. 26  Na ale tẹwẹ tin to e mẹ na gbẹtọ eyin e duale aihọn lọ pete tọn ṣigba bo hẹn alindọn etọn bu? kavi etẹwẹ gbẹtọ na yí do diọ alindọn etọn? 27  Na Visunnu gbẹtọ tọn dona wá to gigo Otọ́ etọn tọn mẹ po angẹli etọn lẹ po, podọ to whenẹnu wẹ e na suahọ mẹdopodopo sọgbe hẹ walọ etọn. 28  Nugbo wẹ yẹn dọna mì dọ delẹ to mẹhe to ote tofi lẹ mẹ ma na dọ́ okú pọ́n to aliho depope mẹ kaka yé nado mọ Visunnu gbẹtọ tọn ja whẹ́ to ahọluduta etọn mẹ.”

Nudọnamẹ Odò Tọn

Mt 16:3* Glọ̀ndo awe topọ lẹ nọ dohia dọ nudọnamẹ lọ ko yin didesẹ sọn alọnuwe hohowhenu tọn delẹ mẹ ṣigba gbẹ́ tin to devo lẹ mẹ.
Mt 16:18* Pọ́n Nudọnamẹ Dogọ 8.