Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Matiu 15:1-39

15  To whenẹnu, Falesi lẹ po wekantọ lẹ po wá Jesu dè sọn Jelusalẹm, bo dọmọ:  “Naegbọn bọ devi towe lẹ do nọ tùnafọ aṣa omẹ hohowhenu tọn lẹ tọn ji? Di apajlẹ, yé ma nọ klọ́ alọ yetọn lẹ to whenuena yé jlo na dùnú.”  E gblọnna yé dọmọ: “Naegbọn bọ mìlọsu lẹ do nọ tùnafọ gbedide Jiwheyẹwhe tọn ji na aṣa mìtọn wutu?  Di apajlẹ, Jiwheyẹwhe dọ dọ, ‘Gbògbéna otọ́ towe po onọ̀ towe po’; podọ, ‘Ewọ he nọ vlẹ otọ́ kavi onọ̀, mì gbọ okú enẹ tọn ni hù i.’  Ṣigba mìwlẹ dọ dọ, ‘Mẹdepope he dọna otọ́ kavi onọ̀ etọn dọ: “Nudepope he yẹn tindo he hiẹ sọgan mọyi sọn dè e yin nunina de he ko yin kinklandowiwe hlan Jiwheyẹwhe,”  e ma yin dandan dọ ewọ ni gbògbéna otọ́ etọn to aliho depope mẹ.’ Podọ gbọnmọ dali, mìwlẹ ko hẹn ohó Jiwheyẹwhe tọn zun ovọ́ na aṣa mìtọn wutu.  Mì yẹnuwatọ lẹ, Isaia ko gbọn gbesisọ dali dọ dọdai gando mì go, to whenuena e dọ dọ,  ‘Omẹ ehelẹ nọ yí nùflo yetọn lẹ do gbògbéna mi, ṣogan ahun yetọn dẹn do mi tlala.  Ovọ́ mẹ wẹ yé to sinsẹ̀n-basi hlan mi te, na gbedide gbẹtọ tọn lẹ wẹ yé nọ plọnmẹ taidi nuplọnmẹ lẹ.’” 10  To whenẹnu, e ylọ gbẹtọgun lọ sẹpọ ede bo dọna yé dọmọ: “Mì dotoai bo mọnukunnujẹ zẹẹmẹ etọn mẹ: 11  E ma yin nuhe biọ onù mẹ wẹ nọ hẹn gbẹtọ flu gba; ṣigba nuhe tọ́n sọn onù mẹ wẹ nọ hẹn gbẹtọ flu.” 12  To enẹgodo, devi lẹ wá bo dọna ẹn dọmọ: “Be hiẹ yọnẹn dọ Falesi lẹ dahli to whenuena yé sè nuhe a dọ ya?” 13  E gblọn dọmọ: “Atin he Otọ́ ṣie olọn mẹ tọn ma dó lẹpo wẹ na yin hinhọ̀nsẹ. 14  Mì jo yé do. Alihiamẹtọ nukuntọ́nnọ wẹ yé. Enẹwutu, eyin nukuntọ́nnọ do ali hia nukuntọ́nnọ, yé omẹ awe lẹ na jai do odò mẹ.” 15  Pita gblọnna ẹn dọmọ: “Hẹn apajlẹ lọ họnwun na mí.” 16  To whenẹnu, e dọmọ: “Be mìlọsu ma ko mọnukunnujẹemẹ kakajẹ din wẹ? 17  Be mì ma yọnẹn dọ nuhe nọ biọ onù mẹ lẹpo wẹ nọ yì adọ̀mẹ bo nọ yin yinyẹ̀n jẹgbonu do adàdo mẹ ya? 18  Ṣigba, ahun mẹ wẹ nuhe nọ tọ́njẹgbonu sọn onù mẹ lẹ nọ wá sọn, podọ onú enẹlẹ wẹ nọ hẹn gbẹtọ flu. 19  Di apajlẹ, ahun mẹ wẹ linlẹn ylankan, hlọnhuhu, ayọdide, galilọ, ajojijẹ, kunnudide lalo, po nùzinzan lẹ po nọ wá sọn. 20  Onú ehelẹ wẹ nọ hẹn gbẹtọ flu; ṣigba nado yí alọ he ma yin kiklọ lẹ do dùnú ma nọ hẹn gbẹtọ flu gba.” 21  To whenuena Jesu tọ́n sọn finẹ, e yì lẹdo Tile po Sidoni po tọn lẹ mẹ. 22  Podọ, pọ́n! nawe Fenikenu de, he wá sọn agbegbe enẹlẹ ji, tọ́n wá bo dawhá dọmọ: “Wàlẹblanu na mi, Oklunọ, hiẹ Visunnu Davidi tọn. Gbigbọ aovi tọn to yasana viyọnnu ṣie sinsinyẹn.” 23  Ṣigba ewọ ma gblọn ohó de na ẹn. Enẹwutu devi etọn lẹ wá bo jẹ vivẹ ẹ ji dọmọ: “Dọna ẹn dọ e ni yì; na e to awhádo hodo mí mapote wutu.” 24  E gblọn dọmọ: “Yẹn ma yin didohlan mẹdevo depope adavo hlan lẹngbọ owhé Islaeli tọn he bu lẹ.” 25  To whenuena nawe lọ wá, e jẹ taliaina ẹn ji, bo to didọmọ: “Oklunọ, gọalọna mi!” 26  E gblọn dọmọ: “E ma sọgbe nado yí akla ovi lẹ tọn bo dlan ẹn hlan avún pẹvi lẹ gba.” 27  Nawe lọ dọmọ: “Mọwẹ, Oklunọ; ṣigba avún pẹvi lẹ nọ dù jàjá he nọ flẹ sọn tafo klunọ yetọn tọn ji lẹ be.” 28  To whenẹnu, Jesu gblọnna ẹn dọmọ: “Hiẹ yọnnu E, daho wẹ yise towe; na e ni yin wiwà hlan we kẹdẹdile hiẹ jlo do.” Podọ bẹsọn gànhiho enẹ mẹ, viyọnnu etọn yin azọ̀nhẹngbọna. 29  To whenuena Jesu tọ́nyi sọn finẹ, enẹgodo e wá ohù Galili tọn tó, podọ, to whenuena e ko hẹji yì osó ji, e sinai to finẹ. 30  To whenẹnu, gbẹtọgun daho lẹ dọnsẹpọ ẹ, bo hẹn mẹhe yin sẹkunọ, klegbesatọ, nukuntọ́nnọ, unbọpẹnnọ, gọna omẹ susu devo lẹ, bo zlọn yé do afọ etọn go poun, bọ ewọ hẹnazọ̀ngbọna yé; 31  sọmọ bọ awuji gbẹtọgun lọ dile yé mọ unbọpẹnnọ lẹ to hodọ, sẹkunọ lẹ to zọnlinzin, bọ nukuntọ́nnọ lẹ to numọ, podọ yé pagigona Jiwheyẹwhe Islaeli tọn. 32  Ṣigba Jesu ylọ devi etọn lẹ wá ede dè bo dọmọ: “Onú gbẹtọgun lọ tọn wàlẹblanu na mi, na e ko yì azán atọ̀n todin bọ yé ko tin to dè e bo ma tindo nude nado dù; yẹn masọ jlo nado do yé hlan adọ̀vọ. Agbọ́ sọgan pé yé to aliho ji.” 33  Ṣigba, devi lẹ dọna ẹn dọmọ: “Fie wẹ míwlẹ na hẹn akla susu sọmọ sọn to gblolo mẹ file nado gọ́ho na gbẹtọgun daho ehe nkọ?” 34  To whenẹnu, Jesu dọna yé dọmọ: “Akla nẹmu wẹ mì tindo?” Yé dọmọ: “Ṣinawe po whèvi flinflin vude po.” 35  Enẹwutu, to whenuena e ko dọna gbẹtọgun lọ nado jagla do kọmẹ godo, 36  e yí akla ṣinawe po whèvi lọ lẹ po, podọ to whenuena e ko dopẹ́ godo, e wẹ́n yé bo jẹ mimá na devi lẹ ji, bọ devi lẹ sọ má na gbẹtọgun lẹ. 37  Podọ yemẹpo dù bo gọ́ho, podọ dupò he pò bọ yé bẹpli lẹ gọ́ ohà daho ṣinawe. 38  Ṣogan, sọha mẹhe dùnú lẹ tọn yin sunnu degbade, mahia yọnnu lẹ po yọpọvu lẹ po. 39  To godo mẹ, to whenuena e ko do gbẹtọgun lẹ hlan, e biọ tọjihun mẹ bo wá agbegbe Magadani tọn lẹ ji.

Nudọnamẹ Odò Tọn