Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Matiu 14:1-36

14  To ojlẹ enẹ lọ mẹ, Hẹlọdi,* yèdọ ogán agbegbe tọn* lọ, sè linlin gando Jesu go  podọ e dọna devizọnwatọ etọn lẹ dọmọ: “Johanu Baptizitọ lọ wẹ. Ewọ ko yin finfọn sọn oṣiọ lẹ mẹ, podọ ehe wẹ zọ́n bọ e do penugo nado to azọ́n huhlọnnọ lẹ wà.”  Na Hẹlọdi ko wle Johanu bo blá ẹ bosọ ze e dlan gànpamẹ na Hẹlọdia, asi nọvisunnu etọn Filippi tọn wutu.  Na Johanu ko nọ dọna ẹn dọmọ: “E ma sọgbe hẹ osẹ́n dọ hiẹ ni tindo e taidi asi gba.”  Ṣigba, dile etlẹ yindọ ewọ jlo nado hù i, e dibusi gbẹtọgun lọ, na yé nọ pọ́n Johanu di yẹwhegán de wutu.  Ṣigba to whenuena hùnwhẹ jijizan Hẹlọdi tọn to yinyin bibasi, viyọnnu Hẹlọdia tọn dúwe to finẹ bo hẹn homẹhun Hẹlọdi sọmọ  bọ e yí whiwhle do dopagbe nado na ẹn nudepope he ewọ biọ.  To whenẹnu, to anademẹ onọ̀ etọn tọn glọ, e dọmọ: “Na mi ota Johanu Baptizitọ lọ tọn to agbánvla de mẹ tofi.”  Dile etlẹ yindọ e blawuna ahọlu lọ, na whiwhle etọn lẹ podọ na mẹhe jagla hẹ ẹ lẹ wutu, e degbè dọ e ni yin nina ẹn; 10  bọ e domẹhlan nado yì gbòtana Johanu to gànpamẹ. 11  Podọ ota etọn yin hinhẹnwa na awhli lọ to agbánvla de mẹ, bọ ewọ hẹn ẹn yì na onọ̀ etọn. 12  To godo mẹ, devi etọn lẹ wá ze oṣiọ etọn bo dì i bosọ wá dogbè na Jesu. 13  To whenuena Jesu sè ehe, e dó tọjihun sọn finẹ yì fihe to olá de nado sọgan nọ edeṣo; ṣigba to whenuena gbẹtọgun lẹ sè ehe, yé zọ̀n afọ hodo e sọn tòdaho lẹ mẹ. 14  Todin, whenuena e jẹte, e mọ gbẹtọgun daho de; podọ onú yetọn wàlẹblanu na ẹn, bọ e hẹnazọ̀ngbọna omẹ yetọn he to azọ̀njẹ lẹ. 15  Ṣigba to whenuena owhè ko jai, devi etọn lẹ wá e dè bo dọmọ: “Filọ jẹ gblolo mẹ podọ whenu ko yì taun; do gbẹtọgun lẹ hlan, na yé nido sọgan yì gbétatò lẹ mẹ bo họ̀ nuhe yé na dù na yede.” 16  Ṣigba, Jesu dọna yé dọmọ: “E ma biọ dọ yé ni yì gba: mì na nude yé nado dù.” 17  Yé dọna ẹn dọmọ: “Mí ma tindo nude tofi adavo akla atọ́n po whèvi awe po.” 18  E dọmọ: “Mì bẹ yé wá na mi tofi.” 19  To enẹgodo, e degbena gbẹtọgun lẹ nado jagla do ogbé lẹ ji, podọ e ze akla atọ́n po whèvi awe lọ lẹ po, bọ whenuena e pọ́n olọn, e dona, podọ to whenuena e ko wẹ́n akla lọ lẹ godo, e má yé na devi etọn lẹ, bọ devi lẹ sọ má na gbẹtọgun lẹ. 20  Gbọnmọ dali, yemẹpo dù bo gọ́ho, yé sọ bẹ dupò he pò lẹ pli, bọ e gọ́ ohà wiawe. 21  Ṣogan, mẹhe dùnú lẹ diblayi sunnu degbade-fọtọ́n, mahia yọnnu lẹ po yọpọvu lẹ po. 22  To enẹgodo tlolo, e degbena devi etọn lẹ nado biọ tọjihun lọ mẹ bo jẹnukọnna ẹn yì awà awetọ ji, to whenuena ewọ do gbẹtọgun lẹ hlan. 23  To godo mẹ, to whenuena e ko do gbẹtọgun lẹ hlan, e hẹji yì osó lọ ji edeṣo nado hodẹ̀. Mahopọnna dọ ozán ko kú, ewọ kẹdẹ wẹ to finẹ. 24  Todin, tọjihun lọ ko dẹn do agé na mẹtlu kanweko susu lẹ, bọ agbówhẹn lẹ to tuklado e badabada, na yé to jẹhọn pé wutu. 25  Ṣigba to mimá* ẹnẹtọ ozán tọn mẹ, e to zọnlinzin gbọn ohù ji ja yé dè. 26  To whenuena yé mọ ẹn bọ e to zọnlinzin to ohù ji, devi lẹ biọ bẹwlu mẹ, bo dọmọ: “Odlọ de wẹ!” Yé sọ dawhá na obu di yé wutu. 27  Ṣigba, to afọdopolọji Jesu dọna yé dọmọ: “Mì gboadọ, yẹn wẹ; mì dibu blo.” 28  Pita gblọnna ẹn dọmọ: “Oklunọ, eyin hiẹ wẹ, degbena mi nado gbọn osin ji wá dè we.” 29  E dọmọ: “Wá!” To afọdopolọji, Pita jẹte sọn tọjihun lọ mẹ, bo zinzọnlin gbọn osin ji jei Jesu dè. 30  Ṣigba to whenuena e pọ́n yujẹhọn lọ, obu di i, podọ, to whenuena e jẹ sisiọ ji, e dawhá dọmọ: “Oklunọ whlẹn mi!” 31  Jesu dlẹnalọ etọn to afọdopolọji bo hẹn e go bosọ dọna ẹn dọmọ: “Hiẹ yise pẹvinọ, naegbọn a do jẹ ayihaawe tindo ji?” 32  Podọ to whenuena yé ko biọ tọjihun lọ mẹ godo, yujẹhọn lọ doalọte. 33  Enẹgodo, mẹhe to tọjihun lọ mẹ lẹ litaina ẹn, bo dọmọ: “Na nugbo tọn, Visunnu Jiwheyẹwhe tọn wẹ hiẹ.” 34  Podọ yé dasá bo jẹte do Genezalẹti. 35  To whenuena mẹhe nọ nọ̀ finẹ lẹ yọnẹn dọ ewọ wẹ, yé dowẹn hlan otò he to lẹdo enẹ mẹ lẹpo, bọ gbẹtọ lẹ hẹn mẹhe to awutu jẹ lẹpo wá e dè. 36  Podọ yé jẹ vẹvẹna ẹn ji na yé nido sọgan doalọ okẹ̀yẹ̀ awugbó etọn tọn go poun; podọ mẹhe doalọ e go lẹpo yin hinhẹn jẹgangan mlẹnmlẹn.

Nudọnamẹ Odò Tọn

Mt 14:1 Pọ́n Luk 3:1, nudọnamẹ odò tọn.
Mt 14:1 To paa mẹ, tẹtlalkes. Ahọvi lẹdo tọn he nọ ze afọ ahọluigba-gán Lomu tọn dai.
Mt 14:25 To ojlẹ Biblu tọn lẹ mẹ, gbẹtọ lẹ nọ má ozán do ẹnẹ: Mimá tintan nọ bẹjẹeji to ogàn 6 whèjai tọn mẹ jẹ ogàn 9 zánmẹ tọn mẹ, mimá awetọ nọ bẹjẹeji to ogàn 9 zánmẹ tọn mẹ jẹ ogàn 12 zánmẹ tọn mẹ, mimá atọ̀ntọ nọ bẹjẹeji to ogàn 12 zánmẹ tọn mẹ jẹ ogàn 3 zánmẹ tọn mẹ, podọ mimá ẹnẹtọ nọ bẹjẹeji to ogàn 3 zánmẹ tọn mẹ jẹ ogàn 6 afọnnu tọn mẹ.