Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Matiu 13:1-58

13  To azán enẹ gbè, to whenuena Jesu ko tọ́n sọn whégbè, e sinai to ohù lọ tó;  podọ gbẹtọgun daho lẹ pli do e dè, sọmọ bọ e biọ tọjihun de mẹ bo sinai, bọ gbẹtọgun lọ lẹpo to ote to huto.  To whenẹnu, e dọ onú susu na yé gbọn apajlẹ lẹ dali, dọmọ: “Mì pọ́n! Nudotọ de tọ́nyi nado donú;  Podọ dile e to núdo, okún delẹ flẹ jẹ aliho tó, bọ ohẹ̀ lẹ wá bo ṣinyan yé dù.  Devo lẹ flẹ jẹ osé-yigba lẹ ji fie yé ma mọ okọ́ susu te, podọ yé tọ́nkun to afọdopolọji na yé ma mọ okọ́ he siso wutu.  Ṣigba to whenuena owhè zẹ̀, e fiọ yé, podọ na yé ma tindo adọ̀ wutu, yé hú.  Devo lẹ flẹ jẹ owùn lẹ ṣẹnṣẹn ga, podọ owùn lẹ tọ́n bo gbidikọna yé.  Ṣogan, devo lẹ flẹ jẹ aigba dagbe ji, podọ yé jẹ sinsẹ́n detọ́n ji, yèdọ ode donu kanweko, devo kandeko, podọ devo gbàn.  Mì gbọ ewọ he tindo otó ni dotoai.” 10  Enẹwutu, devi lẹ wá bo dọna ẹn dọmọ: “Naegbọn hiẹ do nọ dọhona yé gbọn apajlẹ lẹ yiyizan dali?” 11  E gblọn dọmọ: “Mìwlẹ wẹ e ko yin nina nado mọnukunnujẹ aṣli wiwe ahọluduta olọn tọn lẹ mẹ, ṣigba e ma ko yin nina omẹ enẹlẹ gba. 12  Na mẹdepope he tindo, e na yin nina ẹn dogọ bọ ewọ na tindo susugege; ṣigba mẹdepope he ma tindo, yèdọ nuhe e tlẹ tindo na yin yíyí sọn e si. 13  Ehe wutu wẹ yẹn do nọ dọhona yé gbọn apajlẹ lẹ yiyizan dali, na, to pinpọn mẹ, yé nọ pọ́n to ovọ́ mẹ, podọ to sisè mẹ, yé nọ sè to ovọ́ mẹ, mọjanwẹ yé masọ nọ mọnukunnujẹ zẹẹmẹ etọn mẹ do niyẹn; 14  podọ gando yé go, dọdai Isaia tọn lọ to hẹndi mọyi, he dọmọ, ‘Gbọn sisè dali, mìwlẹ na sè ṣigba mì ma na mọnukunnujẹ zẹẹmẹ etọn mẹ to aliho depope mẹ; podọ, to pinpọn mẹ, mìwlẹ na pọ́n, ṣigba mì ma na mọ to aliho depope mẹ. 15  Na ahun omẹ ehelẹ tọn ko sinyẹn, podọ yé ko yí otó yetọn lẹ do sè ṣogan bo ma yinuwa, podọ yé ko miọn nukun yetọn lẹ; na yé ma nado yí nukun yetọn lẹ do mọnú bo yí otó yetọn lẹ do sènu bosọ yí ahun yetọn lẹ do mọnukunnujẹ zẹẹmẹ etọn mẹ gbede, na yé nikaa lẹkọ bọ yẹn nado hẹnazọ̀ngbọna yé.’ 16  “Ṣigba, ayajẹnọ wẹ mìwlẹ na nukun mìtọn lẹ mọnú bọ otó mìtọn lẹ sènu. 17  Na nugbo wẹ yẹn dọna mì dọ, Yẹwhegán po dodonọ susu po wẹ ko jlo nado mọ nuhe mìwlẹ to mimọ ṣigba bo ma mọ, podọ nado sè nuhe mìwlẹ to sisè ṣigba bo ma sè. 18  “Enẹwutu, mì dotoaina apajlẹ dawe he donú lọ tọn. 19  To whenuena mẹdepope sè ohó ahọluduta lọ tọn ṣigba bo ma mọnukunnujẹ zẹẹmẹ etọn mẹ, mẹylankan lọ nọ wá bo nọ hò nuhe ko yin didó do ahun etọn mẹ lọ yí; ehe wẹ dehe yin didó do aliho tó lọ. 20  Na nuhe dù dehe yin didó do osé-yigba lẹ ji, ehe wẹ mẹhe sè ohó lọ bosọ yí ayajẹ do kẹalọyi i to afọdopolọji. 21  Ṣogan ohó lọ ma doadọ̀do to ewọ mẹ, ṣigba e gbọṣi aimẹ na ojlẹ de, podọ to whenuena nukunbibia po homẹkẹn po ko fọ́n na ohó lọ tọn wutu godo, e dahli to afọdopolọji. 22  Na nuhe dù dehe yin didó do owùn lẹ ṣẹnṣẹn, ehe wẹ mẹhe sè ohó lọ, ṣigba magbọjẹ titonu ehe tọn lẹ po huhlọn mẹkiklọ adọkunnu lẹ tọn po gbidikọna ohó lọ, bọ ewọ ma tindo sinsẹ́n. 23  Na nuhe dù dehe yin didó do aigba dagbe ji, ehe wẹ mẹhe sè ohó lọ bo mọnukunnujẹ zẹẹmẹ etọn mẹ, bosọ sẹ́n bo de sinsẹ́n tọ́n taun, yèdọ ode donu kanweko, devo kandeko, podọ devo gbàn.” 24  E na yé apajlẹ devo, dọmọ: “Ahọluduta olọn tọn yin yiyijlẹdo dawe de go, he dó okún dagbe do ogle etọn mẹ. 25  To whenuena gbẹtọ lẹ to amlọndọ, kẹntọ etọn wá bo dó ogbé ylankan lẹ do likun lọ lẹ ṣẹnṣẹn, bosọ tọ́nyi. 26  To whenuena likun lọ tọ́n amà bo de sinsẹ́n tọ́n, to whenẹnu, ogbé ylankan lọ lẹ sọawuhia ga. 27  Enẹwutu, afanumẹ whétọ lọ tọn lẹ wá bo dọna ẹn dọ, ‘Oklunọ, be e ma yin okún dagbe wẹ hiẹ dó do ogle towe mẹ ya? To whelọnu lo, nawẹ e wagbọn do tindo ogbé ylankan lẹ?’ 28  E dọna yé dọ, ‘Dawe de, yèdọ kẹntọ de wẹ wà ehe.’ Yé sọ dọna ẹn dọmọ, ‘Todin, be hiẹ jlo dọ mí ni tọ́nyi bo họ̀n yé sẹ̀ ya?’ 29  E dọmọ, ‘Lala; na gbọn nuṣiwa dali, mì nikaa họ̀n adọ̀ na likun lẹ to whenuena mì to ogbé ylankan lẹ họ̀n. 30  Mì gbọ awe lẹ ni whẹ́n dopọ jẹ jibẹwawhé whenu; podọ to jibẹwawhé whenu, yẹn na dọna jibẹwawhétọ lẹ dọ, Mì bẹ ogbé ylankan lẹ pli whẹ́ bo blá yé do kọnu-kọnu nado fiọ yé, enẹgodo mì yì bẹ likun lẹ pli do agbànhọ ṣie mẹ.’” 31  E na yé apajlẹ devo, dọmọ: “Ahọluduta olọn tọn tin taidi okún mutaldi* tọn de, he dawe de ze bo dó do ogle etọn mẹ; 32  ehe, na taun tọn, whè hugan to okún lẹpo mẹ, ṣigba to whenuena e whẹ́n e nọ klohugan omá lẹpo bo nọ lẹzun atin de, sọmọ bọ ohẹ̀ agahomẹ tọn lẹ nọ wá nọ alà etọn lẹ ji.” 33  E na yé apajlẹ devo dọmọ: “Ahọluduta olọn tọn tin taidi otọ́n, he yọnnu de yí bo whlá do linfin he sù sọ nujlẹka daho atọ̀n mẹ, kaka linfin lọ pete do fọ́n.” 34  Onú ehe lẹpo wẹ Jesu dọna gbẹtọgun lọ lẹ gbọn apajlẹ lẹ dali. Na nugbo tọn, ewọ ma nọ dọho de na yé matin apajlẹ; 35  na nuhe yin didọ gbọn yẹwhegán lọ gblamẹ nido sọgan yin hinhẹndi, mẹhe dọmọ: “Yẹn na yí apajlẹ lẹ do dọho, yẹn na lá nuhe ko yin whiwhla sọn whenue gbọ́n aihọn ko yin didoai.” 36  To enẹgodo, whenuena e ko do gbẹtọgun lẹ hlan godo, e biọ whégbè. Podọ devi etọn lẹ wá e dè bo dọmọ: “Basi zẹẹmẹ apajlẹ ogbé ylankan he to ogle mẹ lọ lẹ tọn na mí.” 37  E gblọn dọmọ: “Visunnu gbẹtọ tọn wẹ yin nudotọ okún dagbe lọ tọn; 38  ogle lọ wẹ aihọn; na nuhe dù okún dagbe lọ, ehelẹ wẹ ovi ahọluduta lọ tọn lẹ; ṣigba ogbé ylankan lọ lẹ wẹ ovi mẹylankan lọ tọn lẹ, 39  podọ kẹntọ he dó yé lọ wẹ Lẹgba. Jibẹwawhé lọ wẹ vivọnu titonu de tọn, podọ jibẹwawhétọ lọ lẹ wẹ angẹli lẹ. 40  Enẹwutu, kẹdẹdile ogbé ylankan lẹ yin bibẹpli bo yin fifiọ po miyọ́n po do, mọkẹdẹ wẹ e na te do to vivọnu titonu lọ tọn. 41  Visunnu gbẹtọ tọn na do angẹli etọn lẹ hlan bọ yé na bẹ nuhe nọ hẹnmẹ dahli lẹ po mẹhe nọ to sẹ́nhẹngba lẹpo po sẹ̀ sọn ahọluduta etọn mẹ, 42  podọ yé na dọ̀n yé dlan zòhọ miyọ́n tọn mẹ. Finẹ wẹ yé na viavi bo dù adúkúnkún te. 43  To ojlẹ enẹ mẹ, dodonọ lẹ na to sisẹ́ mlanmlan taidi owhè to ahọluduta Otọ́ yetọn tọn mẹ. Mì gbọ ewọ he tindo otó ni dotoai. 44  “Ahọluduta olọn tọn tin taidi adọkunnu de he yin whiwhla do ogle de mẹ, ehe dawe de mọ bo ze whlá; podọ na ayajẹ he e tindo wutu, e yì bo sà nuhe e tindo lẹ bosọ họ̀ ogle lọ. 45  “Humọ, ahọluduta olọn tọn tin taidi ajọwatọ tomẹyitọ de he to peali dagbe lẹ dín. 46  To whenuena e mọ peali he họakuẹ tlala de, e yì bo yawu sà nuhe e tindo lẹpo bosọ họ̀ ẹ. 47  “Humọ, ahọluduta olọn tọn tin taidi odọ̀-gbó de he yin yìnyìn do ohù mẹ he to whèvi wunmẹ lẹpo bẹpli. 48  To whenuena e gọ́, yé dọ̀n ẹn wá agé, podọ, to whenuena yé sinai, yé bẹ dehe yọ́n lẹ do númẹ, ṣigba yé bẹ dehe ma yọ́n lẹ dlan. 49  Mọkẹdẹ wẹ e na te do to vivọnu titonu lọ tọn: angẹli lẹ na tọ́nyi bo klan mẹylankan lẹ dovo na dodonọ lẹ 50  bo nasọ bẹ yé dlan do zòhọ miyọ́n tọn lọ mẹ. Finẹ wẹ yé na viavi bo dù adúkúnkún te. 51  “Be mì mọnukunnujẹ zẹẹmẹ onú ehe lẹpo tọn mẹ ya?” Yé dọna ẹn dọ: “Mọwẹ.” 52  To whenẹnu wẹ e dọna yé dọmọ: “To whelọnu lo, eyin nuplọnmẹtọ gbangba tọn depope yin nuplọn gando ahọluduta olọn tọn go, e tin taidi dawe de, yèdọ whétọ de, he nọ de onú yọyọ lẹ po hoho lẹ po tọ́n sọn adọkunnu sẹdotẹn etọn mẹ.” 53  Todin, to whenuena Jesu ko dotana apajlẹ ehelẹ, e tọ́nyi sọn finẹ. 54  Podọ to whenuena e ko wá otò etọn titi mẹ godo, e jẹ nuplọn yé ji to sinagọgu yetọn mẹ, sọmọ bọ awuji yé bọ yé dọmọ: “Fie wẹ dawe ehe hẹn nuyọnẹn ehe po azọ́n huhlọnnọ ehelẹ po sọn? 55  Be e ma yin visunnu whlẹpatọ lọ tọn die? Be e ma yin onọ̀ etọn wẹ nọ yin Malia, podọ nọvisunnu etọn lẹ wẹ Jakọbu, Josẹfu, Simọni, po Juda po ya? 56  Podọ nọviyọnnu etọn lẹ, be yemẹpo ma tin tofi po mí po ya? To whelọnu lo, fie wẹ dawe ehe hẹn onú ehe lẹpo sọn?” 57  Enẹwutu, yé jẹ ahlìda ji na ewọ tọn wutu. Ṣigba Jesu dọna yé dọmọ: “Yẹwhegán de ma nọ gọ̀n ma doyẹyi adavo to otò etọn titi mẹ podọ to owhé etọn titi gbè.” 58  Podọ ewọ ma wà azọ́n huhlọnnọ susu to finẹ, na yise matindo yetọn wutu.

Nudọnamẹ Odò Tọn

Mt 13:31 Enẹ wẹ, okún he whè hugan de he nọ yin mimọ to Palestine. Atin etọn sọgan dite na nudi mẹtlu 4 bo nọ tindo alà lẹ.