Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Matiu 10:1-42

10  Enẹwutu, e ylọ devi etọn wiawe lẹ pli bo na aṣẹ yé do gbigbọ mawé lẹ ji, nado yàn yé jẹgbonu podọ nado hẹn azọ̀n wunmẹ lẹpo po madogán wunmẹ lẹpo po gbọ.  Oyín apọsteli wiawe lọ lẹ tọn die: Tintan, Simọni, he nọ yin yiylọdọ Pita,* po Andle nọvisunnu etọn po; podọ Jakọbu visunnu Zebede tọn po Johanu nọvisunnu etọn po;  Filippi po Batelemi po; Tọmasi po Matiu tòkuẹ-ṣinyantọ lọ po; Jakọbu visunnu Alfe tọn, po Tade po;  Simọni Kananinu lọ, podọ Juda Iskaliọti, mẹhe de e hia to godo mẹ.  Omẹ wiawe ehelẹ wẹ Jesu dohlan, bo na yé gbedide ehelẹ: “Mì yì aliho akọta lẹ tọn ji blo, podọ mì biọ tòdaho Samalianu lẹ tọn de mẹ blo;  ṣigba, kakatimọ, mì nọ yì lẹngbọ owhé Islaeli tọn he bu lẹ dè.  Dile mì to yìyì, mì nọ dọyẹwheho, dọmọ: ‘Ahọluduta olọn tọn ko dọnsẹpọ.’  Mì nọ hẹnazọ̀ngbọna mẹhe to azọ̀njẹ lẹ, mì nọ fọ́n oṣiọ lẹ, mì nọ hẹn pòtọnọ lẹ zun wiwe, mì nọ yàn aovi lẹ jẹgbonu. Vọnu wẹ mì mọyi, vọnu wẹ mì ni namẹ.  Mì hẹn sika kavi fataka kavi gànvẹẹ do sẹgẹ mìtọn lẹ mẹ blo, 10  kavi hẹn aglò núdùdù tọn de na gbejizọnlin lọ, kavi awù odò tọn awe, kavi afọpa kavi opò de blo; na azọ́nwatọ jẹna núdùdù etọn. 11  “Tòdaho kavi gbétatò depope he mẹ mì biọ, mì dín mẹhe jẹ to finẹ mọ, bo nọ finẹ kaka mì nado tọ́nyi. 12  Eyin mì biọ owhé de gbè, mì dọnudo whédo lọ; 13  podọ eyin owhé lọ jẹ, na jijọho he mì jlo na ẹn ni wá e ji; ṣigba eyin e ma jẹ, na jijọho mìtọn ni gọ̀ do mì dè. 14  Eyin mẹdepope ma yí mì kavi dotoaina ohó mìtọn to fide, to whenue mì to tintọ́n sọn owhé enẹ gbè kavi tòdaho enẹ mẹ, mì húnhún kọ́gudu sẹ̀ sọn afọ mìtọn lẹ go. 15  Nugbo wẹ yẹn dọna mì, e na pọnte na otò Sodọmi po Gomọla po tọn to Whẹdazangbe hú na tòdaho enẹ. 16  “Mì pọ́n! yẹn to dido mì hlan taidi lẹngbọ lẹ to ohla lẹ ṣẹnṣẹn; enẹwutu mì yin zinzintọ taidi odàn ṣogan bo yin homẹvọnọ taidi apoe. 17  Mì nọ họ́ mìde sọta gbẹtọ lẹ; na yé na ze mì jo na whẹdatẹn pẹvi lẹ, bọ yé na hò mì to sinagọgu yetọn lẹ mẹ. 18  Yèdọ, mì na yin dindọn yì ayimatẹn-gán po ahọlu lẹ po nukọn na yẹn tọn wutu, nado dekunnu na yewlẹ podọ na akọta lẹ. 19  Ṣigba, to whenuena yé ze mì jo, mì yin magbọjẹnọ gando lehe kavi nuhe mì na dọ go blo; na nuhe mì na dọ na yin nina mì to gànhiho enẹ mẹ; 20  na e ma yin mìwlẹ kẹdẹ wẹ to hodọ gba, ṣigba gbigbọ Otọ́ mìtọn tọn wẹ to hodọ gbọn mì dali. 21  Humọ, nọvisunnu na ze nọvisunnu jo nado yin hùhù bọ otọ́ na ze ovi etọn jo, podọ ovi lẹ na fọ́n do mẹjitọ lẹ ji na yé nido yin hùhù. 22  Podọ gbẹtọ lẹpo na gbẹwanna mì na oyín ṣie tọn wutu; ṣigba mẹhe doakọnna kakajẹ opodo, omẹ enẹ wẹ na yin whinwhlẹngán. 23  Eyin yé dohomẹkẹn mì to tòdaho de mẹ, mì họnyi devo mẹ; na nugbo wẹ yẹn dọna mì, Mìwlẹ ma to na gbọn tòdaho Islaeli tọn lẹpo mẹ to aliho depope mẹ whẹpo Visunnu gbẹtọ tọn nido wá. 24  “Devi de ma nọ hú mẹplọntọ etọn, mọjanwẹ afanumẹ de ma nọ hú oklunọ etọn do niyẹn. 25  E ko pé dọ devi de ni wá tin taidi mẹplọntọ etọn, podọ afanumẹ taidi oklunọ etọn. Eyin gbẹtọ lẹ ko ylọ whétọ lọ dọ Beẹlzebuli, nẹmunẹmu wẹ yé ma na ylọ mẹhe to whédo etọn mẹ lẹ dọ mọ? 26  Enẹwutu, mì dibusi yé blo; na nudepope ma tin he yin nuṣinyọndo he ma na wá yin hunhundonuvo, podọ he yin aṣli he ma na wá yin yinyọnẹn. 27  Nuhe yẹn dọna mì to zinvlu mẹ, mì dọ ẹ to hinhọ́n nù; podọ nuhe mì sè bọ yè depá etọn, mì dọyẹwheho etọn sọn họta. 28  Podọ mì dibusi yé he nọ hù agbasa ṣigba he ma sọgan hù alindọn blo; ṣigba, mì kuku gbọ bo dibusi ewọ he sọgan và alindọn po agbasa po sudo to Gẹhẹnna* mẹ. 29  Be e ma yin oblẹnọ awe wẹ nọ yin sisà yin abọgan-kuẹ pẹvi dopo ya?* Ṣogan, depope to yé mẹ ma na flẹ jẹ kọmẹ bọ Otọ́ mìtọn ma na yọnẹn. 30  Ṣigba, etlẹ yin oda he to ota na mì lẹpo wẹ ko yin hihia. 31  Enẹwutu, mì dibu blo: mìwlẹ họakuẹ hú oblẹnọ susu. 32  “To whelọnu lo, mẹdepope he yigbe to gbẹtọ lẹ nukọn dọ emi tin to kọndopọ mẹ hẹ mi, yẹn na yigbe dọ yẹn tin to kọndopọ mẹ hẹ ẹ to Otọ́ ṣie he tin to olọn mẹ nukọn ga; 33  ṣigba, mẹdepope he mọ́n mi to gbẹtọ lẹ nukọn, yẹn na mọ́n ẹn to Otọ́ ṣie he tin to olọn mẹ nukọn ga. 34  Mì lẹndọ yẹn wá nado hẹn jijọho wá aigba ji blo; yẹn ma wá nado hẹn jijọho wá gba, adavo ohí. 35  Na yẹn wá nado hẹn kinklan wá, yèdọ visunnu sọta otọ́ etọn, viyọnnu sọta onọ̀ etọn, podọ asi jọja de sọta asu-nọ̀ etọn. 36  Na nugbo tọn, mẹhe tin to whédo mẹtọn titi mẹ lẹ wẹ na yin kẹntọ mẹtọn lẹ. 37  Ewọ he tindo owanyi na otọ́ kavi onọ̀ hú mi ma jẹna mi; podọ ewọ he tindo owanyi na visunnu kavi viyọnnu hú mi ma jẹna mi. 38  Podọ mẹdepope he ma jlo na hẹn yatin etọn bo hodo mi ma jẹna mi. 39  Ewọ he whlẹn alindọn etọn na hẹn ẹn bu, podọ ewọ he hẹn alindọn etọn bu na yẹn tọn wutu na whlẹn ẹn. 40  “Ewọ he yí mì, yí yẹnlọsu ga, podọ ewọ he yí mi sọ yí mẹhe do mi hlan lọsu ga. 41  Ewọ he yí yẹwhegán de na e yin yẹwhegán wutu, na mọ ale yẹwhegán tọn de yí, podọ ewọ he yí dodonọ de na e yin dodonọ wutu na mọ ale dodonọ tọn de yí. 42  Podọ mẹdepope he na osin fifá kọfo dopo tata dopo to omẹ pẹvi ehelẹ mẹ nado nù na e yin devi de wutu, nugbo wẹ yẹn dọna mì, ewọ ma na hẹn ale etọn bu to aliho depope mẹ gba.”

Nudọnamẹ Odò Tọn

Mt 10:2* “Pita” nọ yin yiylọ po yinkọ voovo atọ́n po: tofi taidi “Simọni, he nọ yin yiylọdọ Pita”; to Mt 16:16, “Simọni Pita”; to Ow 15:14, “Simeọni”; to Jo 1:42, “Kefa”; podọ nọ yin yiylọ whlasusu dọ “Pita,” dile e sọawuhia to Mt 14:28 mẹ do.
Mt 10:28* Pọ́n Nudọnamẹ Dogọ 9.
Mt 10:29* To paa mẹ, assaliọn, he nọtena mado fọtọ̀n-nukundopo azọ́nkuẹ gbèdopo tọn.