Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Malku 9:1-50

9  Humọ, e sọ dọna yé dọmọ: “Nugbo wẹ yẹn dọna mì, Delẹ to mẹhe to ote tofi lẹ mẹ ma na dọ́ okú pọ́n to aliho depope mẹ kaka yé nado mọ ahọluduta Jiwheyẹwhe tọn wá to huhlọn etọn mẹ whẹ́.”  Enẹwutu, to azán ṣidopo godo, Jesu plan Pita, Jakọbu po Johanu po, bo hẹn yé yì osó he yiaga taun de ji to olá. Podọ wunmẹ etọn diọ to nukọn yetọn,  bọ awugbó etọn lẹ lẹzun wewe, bo wé hú lehe avọ̀yantọ depope sọgan hẹn avọ̀ de zun wewe do to aigba ji.  Humọ, Elija po Mose po sọawuhia yé, bọ yé to hodọ hẹ Jesu.  Pita sọ dọna Jesu dọmọ: “Labbi, e yọ́n taun dọ mí ni nọfi, enẹwutu gbọ mí ni gbá gòhọ atọ̀n, dopo na hiẹ, dopo na Mose podọ dopo na Elija.”  Na nugbo tọn, ewọ ma yọ́n nuhe e na dọ, na yé dibu tlala wutu.  Podọ aslọ de sọawuhia bo ṣinyọ́n yé ji, ogbè de sọ dọho jẹgbonu sọn aslọ lọ mẹ dọmọ: “Ehe wẹ Visunnu ṣie, mẹyiwanna lọ; mì nọ dotoaina ẹn.”  Ṣigba, to ajiji mẹ, yé pọ́n lẹdo pé bo masọ mọ mẹdepope to yé dè ba, adavo Jesu kẹdẹ.  Dile yé to tejẹ sọn osó lọ ji, e degbena yé tlọlọ ma nado dọ nuhe yé mọ na mẹdepope, kakajẹ whenue Visunnu gbẹtọ tọn na ko fọ́n sọn oṣiọ lẹ mẹ. 10  Podọ yé hẹn ohó lọ do ahun mẹ, ṣigba bo nọ to hodọdopọ to yedelẹ ṣẹnṣẹn gando nuhe finfọn sọn oṣiọ lẹ mẹ ehe lọ zẹẹmẹdo go. 11  Yé sọ jẹ kinkanse e ji, dọmọ: “Naegbọn wekantọ lẹ do nọ dọ dọ Elija dona wá whẹ́?” 12  E dọna yé dọmọ: “Elija na wá whẹ́ bo na hẹn onú lẹpo gọwá otẹn yetọn mẹ; ṣigba naegbọn e do yin kinkàndai gando Visunnu gbẹtọ tọn go dọ e dona jugbọn yajiji susu mẹ bo yin nuyiwa hẹ taidi nuvọ́nọ? 13  Ṣigba yẹn dọna mì dọ, na nugbo tọn, Elija ko wá, bọ yé wà nuhe jlo yé lẹ na ẹn, kẹdẹdile e ko yin kinkàndai gando ewọ go do.” 14  Todin, to whenue yé wá devi he pò lẹ dè, yé mọ gbẹtọgun daho de lẹdo yé pé bọ wekantọ lẹ to núdọ̀n hẹ yé. 15  Ṣigba, tlolo he gbẹtọgun lọ lẹpo mọ ẹn, yé jọsi, bo họ̀nwezun wá e dè, bosọ jẹ nudọdo e ji. 16  E sọ kanse yé dọmọ: “Etẹ dọ̀n wẹ mì te hẹ yé?” 17  Dopo to gbẹtọgun lọ mẹ sọ gblọnna ẹn dọmọ: “Mẹplọntọ, yẹn plan visunnu ṣie wá dè we na e tindo gbigbọ unbọpẹn tọn de wutu; 18  podọ fidepope he e jẹ e ji te, e nọ dlan ẹn do kọmẹ, bọ e nọ to fútúfútú tún bosọ nọ to adúkúnkún dù bo nọ bà huhlọn pò. Yẹn sọ dọna devi towe lẹ nado yàn ẹn jẹgbonu, ṣigba yé ma penugo.” 19  E gblọnna yé dọmọ: “Whẹndo mayisenọ E, nawẹ yẹn na nọ mì dè dẹnsọ? Nawẹ yẹn na sinyẹnlin hẹ mì dẹnsọ? Hẹn ẹn wá dè e.” 20  Enẹwutu, yé hẹn ẹn wá e dè. Ṣigba to nukun etọn mẹ, gbigbọ lọ sọ vọ́ wá ovi lọ ji to afọdopolọji bo húnhún in gìgìgì, podọ to whenue e ko jai jẹ kọmẹ godo, e to bibli pé, bo to fútúfútú tún. 21  E sọ kanse otọ́ etọn dọmọ: “Whetẹnu gbọ́n wẹ ehe ko to jijọ do e go?” E dọmọ: “Sọn ovu whenu gbọ́n; 22  podọ sọn ojlẹ de mẹ jẹ devo mẹ, e nọ dlan ẹn do miyọ́n mẹ podọ do osin mẹ nado hù i. Ṣigba eyin hiẹ sọgan wà nudepope, wàlẹblanu na mí bo gọalọna mí.” 23  Jesu dọna ẹn dọmọ: “Hodidọ enẹ, ‘Eyin hiẹ sọgan’! Yèdọ, onú lẹpo wẹ sọgan yọnbasi na mẹde eyin e tindo yise.” 24  To afọdopolọji, otọ́ ovi pẹvi lọ tọn dọho po ogbè lélé po, bo dọmọ: “Yẹn tindo yise! Gọalọna mi to fie yẹn tindo nuhudo yise tọn dogọ te!” 25  Todin, Jesu doayi e go dọ gbẹtọgun de to whinwhlẹndo nado wá yé dè, e gbẹnuna gbigbọ mawé lọ bo dọna ẹn dọmọ: “Hiẹ gbigbọ unbọpẹnnọ podọ tókunọ, yẹn degbena we, tọ́n sọn ewọ mẹ bo masọ biọ ewọ mẹ ba blo.” 26  Podọ to whenue e ko dawhá po ogbè lélé po bo húnhún in gìgìgì godo; e tọ́n sọn ewọ mẹ bọ e taidi oṣiọ, suhugan yetọn sọ to didọmọ: “E ko kú!” 27  Ṣigba Jesu hẹn alọ etọn go bo fọ́n ẹn ṣite, ewọ sọ fọ́n. 28  Enẹwutu to whenue e ko biọ owhé de gbè godo, devi etọn lẹ wá e dè dovo bo jẹ kinkanse e ji dọmọ: “Naegbọn míwlẹ ma do sọgan yàn ẹn jẹgbonu?” 29  E sọ dọna yé dọmọ: “Ehe nkọ ma sọgan tọ́njẹgbonu gbọn nudepope dali adavo gbọn odẹ̀ dali.” 30  Yé tọ́nyi sọn finẹ bo jugbọn Galili, ṣigba e ma jlo dọ mẹdepope ni yọnẹn. 31  Na e to devi etọn lẹ plọn bo to didọna yé dọmọ: “Visunnu gbẹtọ tọn dona yin didehia do alọ gbẹtọ lẹ tọn mẹ bọ yé na hù i, ṣigba mahopọnna dọ ewọ yin hùhù, e na fọ́n to azán atọ̀n godo.” 32  Ṣigba, yé ma mọnukunnujẹ hodidọ lọ mẹ, yé sọ dibu nado kannubiọ ẹ. 33  Yé sọ wá Kapẹlnaumi. Todin, to whenue e to họmẹ, e kanse yé dọmọ: “Etẹ dọ̀n wẹ mì te to aliho ji?” 34  Yé ma kẹnù, na yé ko dọ̀nnu to yedelẹ ṣẹnṣẹn to aliho ji gando mẹhe klohu go. 35  Enẹwutu, e sinai bo ylọ omẹ wiawe lẹ bo dọna yé dọmọ: “Eyin mẹdepope jlo na yin tintan, ewọ dona yin omẹ godo tọn to mẹlẹpo mẹ bo na yin lizọnyitọ na mẹlẹpo.” 36  E sọ ylọ yọpọvu de wá ede dè, bo ze e do ṣẹnṣẹn yetọn bosọ yí alọ etọn lẹ do dọ̀n ẹn dogo bo dọna yé dọmọ: 37  “Mẹdepope he yí yọpọvu ehe nkọtọn dopo to oyín ṣie mẹ, yí yẹnlọsu ga; podọ mẹdepope he yí mi, e ma yin yẹn dopo kẹdẹ wẹ e yí, ṣigba mẹhe do mi hlan lọsu ga.” 38  Johanu dọna ẹn dọmọ: “Mẹplọntọ, mí mọ dawe de bọ e to aovi lẹ yàn jẹgbonu to oyín towe mẹ podọ mí tẹnpọn nado glọnalina ẹn, na ewọ ma to zinzọnhẹ mí wutu.” 39  Ṣigba, Jesu dọmọ: “Mì tẹnpọn nado glọnalina ẹn blo, na mẹdepope ma tin he na wà azọ́n huhlọnnọ de to oyín ṣie mẹ, bo na sọgan vlẹ mi po awubibọ po; 40  na ewọ he ma jẹagọdo mí tin po mí po. 41  Na mẹdepope he na mì osin kọfo dopo nado nù na mì yin Klisti tọn wutu, nugbo wẹ yẹn dọna mì, ewọ ma na hẹn ale etọn bu to aliho depope mẹ gba. 42  Ṣigba mẹdepope he hẹn dopo to omẹ pẹvi he tindo yise to yẹn mẹ ehelẹ mẹ dahli, e na pọnte na ẹn hú dọ yè ni sìn gilisé he kẹtẹkẹtẹ lẹ nọ lilẹ́ nkọtọn de do okọ̀ na ẹn bo dọ̀n ẹn dlan ohù mẹ. 43  “Podọ eyin alọ towe hẹn we dahli, sán ẹn sẹ̀; e na pọnte na we nado biọ ogbẹ̀ mẹ di klegbesatọ hú dọ hiẹ ni biọ Gẹhẹnna* mẹ po alọ awe po, yèdọ biọ miyọ́n he ma sọgan yin ṣíṣí lọ mẹ. 44  ——* 45  Podọ, eyin afọ towe hẹn we dahli, sán ẹn sẹ̀; e na pọnte na we nado biọ ogbẹ̀ mẹ di sẹkunọ hú dọ hiẹ ni yin dindọn dlan Gẹhẹnna mẹ po afọ awe po. 46  ——* 47  Podọ, eyin nukun towe hẹn we dahli, ze e dlan; e na pọnte na we nado biọ ahọluduta Jiwheyẹwhe tọn mẹ po nukun dopo po hú dọ hiẹ ni yin dindọn dlan Gẹhẹnna mẹ po nukun awe po, 48  fie owé yetọn ma nọ kú te bọ miyọ́n lọ ma nọ ṣí te. 49  “Omẹ dopodopo ji wẹ yè na húnhún miyọ́n do dile yè nọ húnhún ojẹ̀ do. 50  Ojẹ̀ yọ́n; ṣigba eyin ojẹ̀ hẹn huhlọn etọn bu, etẹwẹ mì nado hẹn ẹn dotọ́n? Mì tindo ojẹ̀ to mìdelẹ mẹ, bo nọ jijọho hẹ ode awetọ mìtọn.”

Nudọnamẹ Odò Tọn

Mk 9:43* Pọ́n Nudọnamẹ Dogọ 9.
Mk 9:44* Pọ́n Mt 17:21, nudọnamẹ odò tọn.
Mk 9:46* Pọ́n Mt 17:21, nudọnamẹ odò tọn.