Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Malku 8:1-38

8  To azán enẹlẹ gbè, to whenuena gbẹtọgun daho de sọ vọ́ pli bọ yé ma tindo nude nado dù, e ylọ devi etọn lẹ pli bo dọna yé dọmọ:  “Onú gbẹtọgun lọ tọn wàlẹblanu na mi, na e ko yì azán atọ̀n todin bọ yé ko tin to dè e bo ma tindo nude nado dù;  podọ eyin yẹn do yé hlan owhé yetọn lẹ gbè adọ̀vọ, agbọ́ na pé yé to aliho ji. Na nugbo tọn, delẹ to yé mẹ wá sọn fidindẹn.”  Ṣigba, devi etọn lẹ gblọnna ẹn dọmọ: “Fie wẹ mẹde na hẹn akla lẹ sọn to gblolo mẹ file nado gọ́ho na omẹ ehelẹ?”  Etomọṣo, e sọ kanbiọ yé dọmọ: “Akla nẹmu wẹ mì tindo?” Yé dọmọ: “Ṣinawe.”  E sọ dọna gbẹtọgun lọ nado jagla do kọmẹ, e sọ yí akla ṣinawe lọ lẹ, bo dopẹ́, bosọ wẹ́n yé, bo jẹ yíyí na devi etọn lẹ ji nado má, podọ yé má ẹn na gbẹtọgun lọ.  Yé sọ tindo whèvi flinflin vude ga; podọ, to whenue e ko dona ehelẹ, e sọ dọna yé nado má ẹn ga.  Enẹwutu, yé dù bo gọ́ho, podọ yé bẹ dupò he pò lẹ pli, bọ e gọ́ ohà daho ṣinawe.  Ṣogan nudi sunnu degbade wẹ to finẹ. To godo mẹ, e do yé hlan. 10  Podọ to afọdopolọji, e biọ tọjihun de mẹ hẹ devi etọn lẹ bo wá lẹdo Dalmanuta tọn lẹ mẹ. 11  Podọ Falesi lẹ tọ́n wá bo jẹ núdọ̀n hẹ ẹ ji, bosọ to ohia de dín to e si sọn olọn, nado whlé e pọ́n. 12  Enẹwutu, e wẹnhun sinsinyẹn to ede mẹ, bo dọmọ: “Naegbọn whẹndo ehe do to ohia de dín? Nugbo wẹ yẹn dọna mì, Ohia de ma na yin nina whẹndo ehe.” 13  Todin, e jo yé do, bo biọ ohún mẹ whladopo dogọ, bosọ yì awà awetọ ji. 14  Nalete, yé wọn nado hẹn akla lẹ, bo ma hẹn hú akla dopo to tọjihun lọ mẹ. 15  Podọ e jẹ gbedena yé ji tlọlọ dọmọ: “Mì hùn nukun mìtọn lẹ dote, mì payi otọ́n Falesi lẹ tọn po otọ́n Hẹlọdi tọn po go.” 16  Enẹwutu, yé jẹ núdọ̀n hẹ ode awetọ yetọn ji na yé ma hẹn akla depope wutu. 17  Na e doayi ehe go wutu, e dọna yé dọmọ: “Naegbọn mìwlẹ do to núdọ̀n na mì ma hẹn akla depope wutu? Be mìwlẹ ma ko tunwun bo doayi zẹẹmẹ lọ go kakajẹ din wẹ? Be e gbẹ́ vẹawuna ahun mìtọn nado mọnukunnujẹemẹ janwẹ? 18  ‘Dile mì tlẹ tindo nukun lẹ, be mì ma nọ mọnú wẹ; podọ dile mì tlẹ tindo otó lẹ, be mì ma nọ sènu wẹ?’ Podọ be mì ma flin wẹ, 19  to whenue yẹn wẹ́n akla atọ́n na sunnu degbade-fọtọ́n, ohà nẹmu wẹ dupò he mì bẹpli lọ gọ́?” Yé dọna ẹn dọmọ: “Wiawe.” 20  “To whenue yẹn wẹ́n ṣinawe lọ lẹ na sunnu degbade, ohà daho nẹmu wẹ dupò he mì bẹpli lọ gọ́?” Yé sọ dọna ẹn dọmọ: “Ṣinawe.” 21  Enẹwutu, e dọna yé dọmọ: “Be mì ma ko doayi zẹẹmẹ lọ go kakajẹ din wẹ?” 22  Todin, yé glinhún do Bẹtsaida. Gbẹtọ lẹ hẹn dawe nukuntọ́nnọ de wá e dè to finẹ, yé sọ vẹ̀ ẹ nado doalọ e go. 23  E sọ hẹn alọ dawe nukuntọ́nnọ lọ tọn go, bo plan ẹn jẹ gbonu gbétatò lọ tọn, podọ, to whenue e túntán do nukun etọn lẹ ji godo, e ze alọ etọn lẹ do e ji bo jẹ kinkanse e ji dọmọ: “Be hiẹ mọ nudepope ya?” 24  Dawe lọ sọ pọ́n aga bo jẹ didọ ji dọmọ: “Yẹn mọ gbẹtọ lẹ, na yẹn mọ onú delẹ he taidi atin lẹ, ṣigba yé to zọnlinzin pé.” 25  To whenẹnu, e sọ vọ́ doalọ nukun dawe lọ tọn lẹ go, dawe lọ sọ mọnú hezeheze, podọ e sọ gọ̀ jẹgangan, bo to onú lẹpo mọ gblegede. 26  Enẹwutu e do e hlan whé, bo dọmọ: “Ṣigba a biọ gbétatò lọ mẹ blo.” 27  Todin Jesu po devi etọn lẹ po yì gbétatò Sesalea Filippi tọn lẹ mẹ, podọ e jẹ ohó kanse devi etọn lẹ ji to aliho ji, dọmọ: “Mẹnu wẹ gbẹtọ lẹ to didọ dọ yẹn yin?” 28  Yé dọna ẹn dọmọ: “Johanu Baptizitọ, podọ mẹdevo lẹ nọ dọ Elija, podọ mẹdevo lẹ sọ nọ dọ, Dopo to yẹwhegán lẹ mẹ.” 29  E sọ kanse yelọsu dọmọ: “Ṣigba mìwlẹ, mẹnu wẹ mì nọ dọ dọ yẹn yin?” Pita gblọnna ẹn dọmọ: “Hiẹ wẹ Klisti lọ.” 30  Enẹwutu, e dosẹ́n na yé sinsinyẹn ma nado dọ mẹhe ewọ yin na mẹdepope. 31  Humọ, e jẹ pinplọn yé ji dọ Visunnu gbẹtọ tọn dona jiya onú susu tọn bọ sunnu mẹho lẹ po yẹwhenọgán lẹ po gọna wekantọ lẹ na gbẹ́ ẹ dai bo hù i, bọ e na fọ́n to azán atọ̀n godo. 32  Na nugbo tọn, e to ohó enẹ dọ madoadudẹ́ji. Ṣigba, Pita plan ẹn jẹ olá bo jẹ nugbẹna ẹn ji. 33  E lẹgodo, bo pọ́n devi etọn lẹ bosọ gbẹnuna Pita, dọmọ: “Tọ́n sọn godo ṣie, Satani, na nulẹnpọn towe ma sọgbe hẹ linlẹn Jiwheyẹwhe tọn lẹ gba, ṣigba dehe yin gbẹtọ tọn lẹ.” 34  Todin, e ylọ gbẹtọgun lọ wá ede po devi etọn lẹ po dè bo dọna yé dọmọ: “Eyin mẹdepope jlo nado hodo mi, mì gbọ e ni mọ́n ede bo ze yatin etọn bosọ to hihodo mi zọnmii. 35  Na mẹdepope he jlo na whlẹn alindọn etọn na hẹn ẹn bu; ṣigba mẹdepope he hẹn alindọn etọn bu na yẹn tọn podọ na wẹndagbe lọ tọn wutu, na whlẹn ẹn. 36  Na nugbo tọn, ale tẹwẹ tin to e mẹ na gbẹtọ nado duale aihọn lọ pete tọn ṣigba bo hẹn alindọn etọn bu? 37  Na taun tọn, etẹwẹ gbẹtọ na yí do diọ alindọn etọn? 38  Na mẹdepope he kuwinyan ṣie podọ na ohó ṣie lẹ to whẹndo ayọdetọ po ylandonọ ehe po mẹ, Visunnu gbẹtọ tọn nasọ kuwinyan etọn ga to whenue e na wá to gigo Otọ́ etọn tọn mẹ po angẹli wiwe lẹ po.”

Nudọnamẹ Odò Tọn