Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Malku 7:1-37

7  Todin, Falesi lẹ podọ delẹ to wekantọ lẹ mẹ he ko wá sọn Jelusalẹm pli lẹdo e.  Podọ to whenue yé mọ delẹ to devi etọn lẹ mẹ yí alọ mawé do dùnú, enẹ wẹ, alọ he ma yin kiklọ lẹ—  na Falesi lẹ po Ju lẹpo po ma nọ dùnú adavo yé klọ́ alọ yetọn lẹ kakajẹ awàgonu, na yé nọ tẹdo aṣa omẹ hohowhenu tọn lẹ tọn go,  podọ, eyin yé gọ̀ sọn ahimẹ, yé ma nọ dùnú adavo yé klọ́ yedelẹ wé gbọn osin húnhún dogo dali; podọ aṣa susu devo lẹ tin he yé ko mọyi bo tẹdego, yèdọ kọfo lẹ, tọ̀zẹ́n lẹ, po núzinzan ganvẹẹ tọn lẹ po kiklọwé;—  enẹwutu Falesi po wekantọ ehelẹ po kanse e dọmọ: “Naegbọn bọ devi towe lẹ ma nọ yinuwa sọgbe hẹ aṣa omẹ hohowhenu tọn lẹ tọn, ṣigba bọ yé nọ yí alọ mawé lẹ do dùnú?”  E dọna yé dọmọ: “Isaia ko gbọn gbesisọ dali dọ dọdai gando mì yẹnuwatọ lẹ go, dile e yin kinkàndai do dọ, ‘Omẹ ehelẹ nọ yí nùflo yetọn lẹ do gbògbéna mi, ṣigba ahun yetọn dẹn do mi tlala.  Ovọ́ mẹ wẹ yé to sinsẹ̀n-basi hlan mi te, na gbedide gbẹtọ tọn lẹ wẹ yé nọ plọnmẹ taidi nuplọnmẹ lẹ.’  Mìwlẹ jo gbedide Jiwheyẹwhe tọn do, bo tẹdo aṣa gbẹtọ lẹ tọn go.”  Humọ, e sọ dọna yé dọmọ: “Mìwlẹ yí ayiha wintinwintin do gbẹ́ gbedide Jiwheyẹwhe tọn dai nado sọgan tẹdo aṣa mìtọn go. 10  Di apajlẹ, Mose dọmọ, ‘Gbògbéna otọ́ towe po onọ̀ towe po,’ podọ, ‘Ewọ he nọ vlẹ otọ́ kavi onọ̀, mì gbọ okú enẹ tọn ni hù i.’ 11  Ṣigba, mìwlẹ dọ dọ, ‘Eyin mẹde dọna otọ́ etọn kavi onọ̀ etọn dọ: “Nudepope he yẹn tindo he hiẹ sọgan mọyi sọn dè e yin kọlbani, (enẹ wẹ, nunina de he ko yin kinklandowiwe hlan Jiwheyẹwhe,)”’— 12  gbọnmọ dali, mìwlẹ ma nọ dike ewọ ni basi onú dopo tata na otọ́ etọn kavi onọ̀ etọn ba, 13  podọ enẹwutu, mì hẹn ohó Jiwheyẹwhe tọn zun ovọ́ gbọn aṣa he mì zedai dali. Onú mọnkọtọn susu devo lẹ wẹ mì sọ nọ wà ga.” 14  Enẹwutu, e ylọ gbẹtọgun lọ do ede dè whladopo dogọ, bo dọna yé dọmọ: “Mìmẹpo ni dotoaina mi, bo mọnukunnujẹ zẹẹmẹ lọ mẹ. 15  Onú depope sọn gbonu he biọ gbẹtọ mẹ ma sọgan hẹn ẹn flu gba; ṣigba onú he tọ́n sọn gbẹtọ mẹ lẹ wẹ onú he nọ hẹn gbẹtọ flu.” 16  ——* 17  Todin, to whenue e ko tọ́n sọn gbẹtọgun lọ mẹ bo biọ owhé de gbè, devi etọn lẹ jẹ ohó kanse e ji gando apajlẹ lọ go. 18  Enẹwutu, e dọna yé dọmọ: “Be mìlọsu tin matin wuntuntun di yé wẹ? Be mì ma yọnẹn dọ nudepope sọn gbonu he biọ gbẹtọ mẹ ma sọgan hẹn ẹn flu, 19  to whenue e yindọ e ma biọ ahun etọn mẹ, ṣigba adọ̀ etọn lẹ mẹ wẹ e biọ, bo nọ yin yinyẹ̀n jẹgbonu do adàdo mẹ ya?” Gbọnmọ dali, e do núdùdù lẹpo hia nado yin wiwe. 20  Humọ, e dọmọ: “Enẹ he tọ́njẹgbonu sọn gbẹtọ mẹ wẹ nọ hẹn gbẹtọ flu; 21  na sọn homẹ, yèdọ sọn ahun gbẹtọ tọn mẹ wẹ linlẹn ylankan lẹ nọ tọ́njẹgbonu sọn: galilọ, ajojijẹ, hlọnhuhu, 22  ayọdide, nukunkẹn, kanyinylan, oklọ, wantuntun, nukun he gọ́ na nuvẹun, nùzinzan, sakla, po nulú po. 23  Homẹ wẹ onú ylankan ehe lẹpo nọ wá sọn bo nọ hẹn gbẹtọ flu.” 24  E fọ́n sọn finẹ bo yì agbegbe Tile po Sidoni po tọn lẹ ji. E sọ biọ owhé de gbè bo ma jlo dọ mẹdepope ni yọnẹn. Ṣogan e ma sọgan whlá ede; 25  ṣigba to afọdopolọji, nawe de he viyọnnu etọn pẹvi tindo gbigbọ mawé sè dogbọn ewọ dali bo wá bosọ ṣinyọ́n nukunmẹ etọn ai to afọ etọn lẹ kọ̀n. 26  Glẹkinu wẹ nawe lọ dai, ṣigba e ko lẹzun Silofenikenu gbọn akọta dali; podọ e to bibiọ to e si mapote nado yàn aovi lọ sọn viyọnnu etọn mẹ. 27  Ṣigba, e jẹ didọna nawe lọ ji dọmọ: “Gbọ ovi lẹ ni gọ́ho whẹ́, na e ma sọgbe nado yí akla ovi lẹ tọn bo dlan ẹn hlan avún pẹvi lẹ gba.” 28  Etomọṣo, nawe lọ gblọnna ẹn dọmọ: “Mọwẹ, oklunọ, ṣogan avún pẹvi he to tafo glọ lẹ nọ dù jàjá ovi pẹvi lẹ tọn.” 29  Enẹwutu, e dọna nawe lọ dọmọ: “Na hiẹ dọ ehe wutu, yì; aovi lọ ko tọ́n sọn viyọnnu towe mẹ.” 30  Enẹwutu, yọnnu lọ tọ́nyi whégbè bo mọdọ ovi pẹvi lọ tin to aimimlọn to adọ́zan ji bọ aovi lọ ko tọ́n sọn e mẹ. 31  Todin, to whenue e lẹkọwa agbegbe Tile tọn lẹ ji, e jugbọn Sidoni yì ohù Galili tọn waji podọ gbọn agbegbe Dekapole tọn lẹ ṣẹnṣẹn. 32  Yé hẹn dawe tókunọ he ma sọgan nọ dọho de wá e dè to finẹ, podọ yé vẹ̀ ẹ nado ze alọ etọn do e ji. 33  E sọ plan ẹn sọn gbẹtọgun lọ mẹ jẹ olá bo sisẹ́ alọvi etọn lẹ do otó etọn lẹ mẹ, podọ to whenue e ko túntán godo, e doalọ odẹ́ etọn go. 34  Podọ to whenue e pọ́n olọn, e gbọ̀ gángán bo dọna ẹn dọmọ: “Effata,” enẹ wẹ, “Hùn.” 35  Todin, otó etọn lẹ hùn, bọ okàn odẹ́ etọn tọn tún, bọ e sọ jẹ hodọ ji ganji. 36  Enẹwutu, e dosẹ́n na yé ma nado dọna mẹdepope; ṣigba dile e dosẹ́n na yé sọ, mọ wẹ yé nọ to lilá ẹ sù sọ. 37  Na nugbo tọn, awuji yé tlala bọ yé dọmọ: “E ko wà onú lẹpo ganji. E tlẹ hẹn tókunọ lẹ nado sènu podọ unbọpẹnnọ lẹ nado dọho.”

Nudọnamẹ Odò Tọn

Mk 7:16* Pọ́n Mt 17:21, nudọnamẹ odò tọn.