Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Malku 6:1-56

6  Podọ e tọ́n sọn finẹ bo wá otò etọn titi mẹ, devi etọn lẹ sọ hodo e.  To whenuena e jẹ gbọjẹzangbe, e jẹ mẹplọn ji to sinagọgu mẹ; podọ awuji suhugan mẹhe to todoai lẹ tọn bọ yé dọmọ: “Fie wẹ dawe ehe hẹn onú ehelẹ sọn? Podọ naegbọn nuyọnẹn ehe do yin nina dawe ehe, bọ azọ́n huhlọnnọ ehelẹ do yin wiwà gbọn ewọ dali?  Ehe wẹ whlẹpatọ lọ, visunnu Malia tọn podọ nọvisunnu Jakọbu, Josẹfu, Juda, po Simọni po tọn, kavi e ma yin mọ wẹ? Podọ nọviyọnnu etọn lẹ tofi hẹ mí, kavi e ma yin mọ wẹ?” Enẹwutu, yé jẹ ahlìda ji na ewọ tọn wutu.  Ṣigba Jesu sọ dọna yé dọmọ: “Yẹwhegán de ma nọ gọ̀n ma doyẹyi adavo to otò etọn titi mẹ podọ to hẹnnumẹ etọn lẹ ṣẹnṣẹn podọ to owhé etọn titi gbè.”  Enẹwutu ewọ ma sọgan wà azọ́n huhlọnnọ depope to finẹ adavo nado ze alọ etọn do vude to mẹhe to azọ̀njẹ lẹ mẹ ji bo hẹnazọ̀ngbọna yé.  Na nugbo tọn, yise matindo yetọn paṣa ẹ. Podọ e yì gbétatò he lẹdo e pé lẹ mẹ, bo to mẹplọn.  Todin, e ylọ devi wiawe lẹ pli, bo jẹ dido yé hlan awe awe ji, bosọ jẹ aṣẹ na yé ji do gbigbọ mawé lẹ ji.  Humọ, e degbena yé ma nado hẹn nudepope na gbejizọnlin lọ adavo opò kẹdẹ, podọ yé ma dona hẹn akla po aglò núdùdù tọn po, mọdopolọ yé ma dona hẹn gànvẹẹ-kuẹ do sẹgẹ yetọn lẹ mẹ,  ṣigba yé ni dó afọpa yetọn lẹ, podọ yé ni ma dó awù odò tọn awe blo. 10  Humọ, e dọna yé dọmọ: “Fidepope he mì biọ owhé de gbè te, mì nọ finẹ kaka mì nado tọ́n sọn finẹ. 11  Podọ fidepope he yè ma yí mì kavi sè ohó mìtọn te, to whenue mì to tintọ́n sọn finẹ, mì húnhún afínfín sẹ̀ sọn afọ mìtọn lẹ go, na okunnu de hlan yé.” 12  Enẹwutu yé tọ́nyi bo dọyẹwheho, na gbẹtọ lẹ nido sọgan lẹnvọjọ; 13  podọ yé nọ yàn aovi susu lẹ bo nọ sá amisisa na susu mẹhe to azọ̀njẹ lẹ tọn bosọ nọ hẹnazọ̀ngbọna yé. 14  Todin, Ahọlu Hẹlọdi* sè, na oyín Jesu tọn ko zun yinyọnẹn pé wutu, podọ gbẹtọ lẹ to didọmọ: “Johanu baptizi ko yin finfọn sọn oṣiọ lẹ mẹ, podọ, enẹwutu wẹ ewọ do to azọ́n huhlọnnọ lẹ wà.” 15  Ṣigba mẹdevo lẹ to didọmọ: “Elija wẹ.” Etomọṣo, mẹdevo lẹ dọmọ: “Yẹwhegán de wẹ ewọ yin taidi yẹwhegán he pò lẹ.” 16  Ṣigba to whenue Hẹlọdi sè ehe, e jẹ didọ ji dọmọ: “Johanu he yẹn gbòtana, ewọ lọ wẹ ko yin finfọn.” 17  Hẹlọdi ko dà Hẹlọdia, asi Filippi nọvisunnu etọn tọn. Na yọnnu lọ tọn wutu wẹ Hẹlọdi lọsu ko domẹhlan bo wle Johanu bosọ blá ẹ do gànpamẹ. 18  Na Johanu ko dọ whlasusu na Hẹlọdi dọmọ: “E ma sọgbe hẹ osẹ́n dọ hiẹ ni tindo asi nọvisunnu towe tọn gba.” 19  Ṣigba Hẹlọdia hẹn ewọ do homẹ bo to jijlo nado hù i, ṣigba e ma sọgan. 20  Hẹlọdi nọ dibusi Johanu, na e yọnẹn dọ dodonọ podọ omẹ wiwe de wẹ ewọ; e sọ hlá ẹ dogbẹ̀. Podọ to whedepopenu he e dotoaina Johanu e nọ jẹflumẹ bo ma nọ yọ́n nuhe e na wà, etomọṣo e zindonukọn nado nọ sè ohó etọn po homẹhunhun po. 21  Ṣigba, dotẹnmẹ hundote na Hẹlọdia to whenue Hẹlọdi wleawuna núdùdù whèjai tọn to jijizan etọn gbè na omẹ gboogbo etọn lẹ, po awhàngán daho lẹ po gọna omẹ nukundeji Galili tọn lẹ. 22  Podọ viyọnnu Hẹlọdia ehe lọ tọn wá bo dúwe bosọ hẹn homẹ Hẹlọdi po mẹhe jagla hẹ ẹ lẹ po tọn hùn. Ahọlu sọ dọna awhli lọ dọmọ: “Biọ mi nudepope he a jlo, yẹn nasọ na we.” 23  Mọwẹ, e whlé na ẹn dọmọ: “Nudepope he a biọ mi, yẹn na na we, yèdọ kakajẹ odaa ahọluduta ṣie tọn ji.” 24  Podọ e yì bo dọna onọ̀ etọn dọmọ: “Etẹwẹ yẹn na biọ?” Ewọ dọna ẹn dọmọ: “Ota Johanu baptizi tọn.” 25  To afọdopolọji, e yì ahọlu dè po awuyiya po bo basi obiọ etọn dọmọ: “Yẹn jlo dọ hiẹ ni na mi ota Johanu Baptizitọ lọ tọn to agbánvla de mẹ tlolo din.” 26  Dile etlẹ yindọ e blawuna ahọlu lọ tlala, ṣogan e ma jlo na gbẹ́ na ẹn, na whiwhle etọn lẹ po mẹhe jagla to tafo kọ̀n lẹ po tọn wutu. 27  Enẹwutu, to afọdopolọji ahọlu lọ do dopo to mẹhe nọ basi hihọ́na ẹn lẹ mẹ hlan nado hẹn ota etọn wá. Ewọ sọ tọ́nyi bo gbòtana ẹn to gànpamẹ 28  bo hẹn ota etọn wá to agbánvla de mẹ, bọ e ze e na awhli lọ, awhli lọ sọ ze e yì na onọ̀ etọn. 29  To whenue devi etọn lẹ sè ehe, yé wá bo ze oṣiọ etọn bosọ tẹ́ ẹ do yọdò de mẹ. 30  Apọsteli lẹ sọ pli dopọ to Jesu dè bo na ẹn linlin nuhe yé ko wà bosọ plọnmẹ lẹpo tọn. 31  Ewọ sọ dọna yé dọmọ: “Mì wá bo gbọ mí ni sẹ̀ jẹ olá bo gbọjẹ vude.” Na mẹsusu wẹ to wiwá bo to yìyì, bọ yé ma tlẹ mọ whenu nado dùnú. 32  Enẹwutu yé biọ tọjihun mẹ bo yì fie to olá de. 33  Ṣigba gbẹtọ lẹ mọ whenue yé to yìyì, bọ mẹsusu sọ yọ́n filọ, podọ yé whlẹndo, bo zọnpọ gbọn afọ sọn tòdaho lọ lẹpo mẹ bosọ jẹnukọnna yé. 34  Todin, whenuena e jẹte, e mọ gbẹtọgun daho de, ṣigba onú yetọn wàlẹblanu na ẹn, na yé taidi lẹngbọ lẹ he ma tindo lẹngbọhọtọ de wutu. E sọ jẹ onú susu plọn yé ji. 35  Todin, whenu ko yì podọ devi etọn lẹ sọ wá e dè bo jẹ didọ ji dọmọ: “Filọ to olá, podọ whenu ko sọ yì. 36  Do yé hlan, na yé nido yì glètoho po gbétatò he lẹdo yé pé lẹ po mẹ bo họ̀ nude na yede nado dù.” 37  E gblọnna yé dọmọ: “Mì na nude yé nado dù.” Enẹwutu yé dọna ẹn dọmọ: “Be míwlẹ na tọ́nyi nado họ̀ akla he sọ denali fọde bo na gbẹtọ lọ lẹ nado dù wẹ?” 38  E dọna yé dọmọ: “Akla nẹmu wẹ mì tindo? Mì yì pọ́n!” To whenue yé ko dindona pó godo, yé dọmọ: “Akla atọ́n po whèvi awe po.” 39  E sọ dọna gbẹtọ lọ lẹpo nado jagla to gọnu-gọnu do ogbé-mú lẹ ji. 40  Podọ yé sọ jagla gọnu-gọnu omẹ kanweko-kanweko podọ omẹ kandeao-kandeao. 41  Todin, e yí akla atọ́n po whèvi awe lọ lẹ po bo pọ́n olọn bosọ dona, e sọ wẹ́n akla lọ lẹ bo jẹ yíyí i na devi lẹ ji, na yé nido na gbẹtọ lẹ; podọ e sọ má whèvi awe lọ lẹ na mẹlẹpo. 42  Enẹwutu yemẹpo dù bo gọ́ho; 43  yé sọ bẹ dupò lẹ pli, bọ e gọ́ ohà wiawe, mahia whèvi lẹ. 44  Humọ, mẹhe dù akla lọ lẹ yin sunnu degbade-fọtọ́n. 45  Podọ to enẹgodo tlolo, e degbena devi etọn lẹ nado biọ tọjihun lọ mẹ bo jẹnukọnna ẹn yì awà awetọ ji sẹpọ Bẹtsaida, to whenue ewọ lọsu do gbẹtọgun lọ hlan. 46  Ṣigba to whenuena e ko dọ e yì whedenu na yé godo, e yì osó de ji nado hodẹ̀. 47  Todin, owhè ko jai, tọjihun lọ to ohù ṣẹnṣẹn, ṣigba e pò ewọ kẹdẹ to agé. 48  Podọ to whenue e mọdọ húnkùnkùn lọ to tuklado yé na yé to jẹhọn pé wutu, to nudi mimá* ẹnẹtọ ozán tọn mẹ, e dọnsẹpọ yé bo to zọnlinzin gbọn ohù ji; ṣigba bo basi taidi dọ e jlo na zẹ̀ yé go wẹ nkọ. 49  To whenuena yé mọ ẹn bọ e to zọnlinzin to ohù ji, yé lẹndọ: “Odlọ de wẹ!” yé sọ dawhá. 50  Na yemẹpo wẹ mọ ẹn bosọ biọ bẹwlu mẹ. Ṣigba to afọdopolọji, e dọho hẹ yé, bo dọna yé dọmọ: “Mì gboadọ, yẹn wẹ; mì dibu blo.” 51  Ewọ sọ biọ tọjihun he mẹ yé te, jẹhọn lọ sọ doalọte. Ehe sọ hẹn awuji yé tlala, 52  na yé ma ko mọnukunnujẹ zẹẹmẹ akla lọ lẹ tọn mẹ, podọ e gbẹ́ vẹawuna ahun yetọn nado mọnukunnujẹemẹ janwẹ. 53  Podọ to whenue yé dasá jẹ agé, yé wá Genezalẹti bo glinhún do yakẹ. 54  Ṣigba tlolo he yé jẹte sọn tọjihun lọ mẹ, gbẹtọ lẹ yọnẹn dọ ewọ wẹ, 55  podọ yé họ̀nwezun gbọn agbegbe enẹ lọ lẹpo ji, bo jẹ mẹhe to azọ̀njẹ lẹ hẹnwa ji to adọ́zan lẹ ji, wá fie yé sè dọ e tin te. 56  Podọ fidepope he e biọ, yèdọ gbétatò lẹ kavi tòdaho lẹ kavi glètoho lẹ mẹ, yé nọ hẹn mẹhe to azọ̀njẹ lẹ wá ahi lẹ mẹ, podọ yé nọ vẹ̀ ẹ na yé nido sọgan doalọ okẹ̀yẹ̀ awugbó etọn tọn go poun. Podọ mẹhe doalọ e go lẹpo wẹ jẹgangan.

Nudọnamẹ Odò Tọn

Mk 6:14* Pọ́n Luk 3:1, nudọnamẹ odò tọn.
Mk 6:48* Pọ́n Mt 14:25, nudọnamẹ odò tọn.