Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Malku 5:1-43

5  Todin, yé jẹ awà awetọ ohù lọ tọn ji to otò Gelazeninu lẹ tọn mẹ.  Podọ to afọdopolọji, to whenue e ko jẹte sọn tọjihun lọ mẹ, dawe de he tin to huhlọn gbigbọ mawé tọn de glọ wá pé e sọn yọdò lẹ ṣẹnṣẹn.  E nọ nọ̀ yọdò lẹ ṣẹnṣẹn; podọ kakajẹ ojlẹ enẹ mẹ, mẹdepope ma ko penugo nado blá ẹ sinsinyẹn, etlẹ yin po gẹdẹ po,  na whlasusu wẹ yè ko yí afọgàn lẹ po gẹdẹ lẹ po do blá ẹ, ṣigba e nọ wẹ́n gẹdẹ lẹ bo nọ saba gbà afọgàn lẹ; podọ mẹdepope ma tindo huhlọn nado huwhẹ́ ẹ.  Podọ to whepoponu, to ozán po okle po, e nọ to awhádo to yọdò lẹ ṣẹnṣẹn podọ to osó lẹ ji bo nọ yí zannu lẹ do to awugblena ede.  Ṣigba, to whenue e mọ Jesu hlan to olá, e họ̀nwezun bo litaina ẹn,  podọ, to whenue e ko dawhá po ogbè lélé po godo, e dọmọ: “Etẹwẹ yẹn tindo nado wà hẹ we, hiẹ Jesu, Visunnu Jiwheyẹwhe Gigogán lọ tọn? Yẹn biọ to hiẹ si nado yí Jiwheyẹwhe do whlé ma nado sayana mi.”  Na e ko to didọna ẹn dọmọ: “Tọ́njẹgbonu sọn dawe lọ mẹ, hiẹ gbigbọ mawé.”  Ṣigba Jesu jẹ kinkanbiọ ẹ ji dọmọ: “Nawẹ hiẹ nọ yin?” Podọ e dọna ẹn dọmọ: “Yẹn nọ yin Awhànpa, na mí omẹ susu wẹ.” 10  Podọ e vẹ̀ ẹ whlasusu ma nado yàn gbigbọ lọ lẹ sọn otò lọ mẹ. 11  Todin, pipli ohàn susu tọn de to núdù to finẹ to osó lọ ji. 12  Enẹwutu, yé vẹ̀ ẹ dọmọ: “Do mí hlan ohàn lọ lẹ mẹ, na mí nido sọgan biọ yé mẹ.” 13  E sọ nagbè yé. Enẹwutu, gbigbọ mawé lọ lẹ tọ́njẹgbonu bo biọ ohàn lọ lẹ mẹ; pipli lọ sọ hozín yì pópló lọ tónu bo flẹ jẹ ohù mẹ, yèdọ nudi foo lọ lẹpo siọ do ohù mẹ debọdo-dego. 14  Ṣigba, kanlinyìntọ lọ lẹ họnyi bo yì na linlin nuhe jọ lọ tọn to tòdaho lọ mẹ podọ to glètoho lọ mẹ; gbẹtọ lẹ sọ wá nado pọ́n nuhe ko jọ. 15  Enẹwutu, yé wá Jesu dè, bo mọ dawe he tindo gbigbọ aovi tọn dai lọ to aisinsin, e dó avọ̀ bọ ayiha etọn ko gọwá, yèdọ dawe lọ he ko tindo awhànpa dai; yé sọ gọ́ na obu. 16  Humọ, mẹhe mọ nuhe jọ do dawe he tindo gbigbọ aovi tọn dai lọ go podọ nuhe jọ do ohàn lẹ go lọ lẹ dọ lehe e jọ gbọn na yé. 17  Enẹwutu, yé jẹ vẹvẹna ẹn ji nado yì sọn agbegbe yetọn lẹ ji. 18  Todin, dile e to tọjihun mẹ biọ, dawe he tindo gbigbọ aovi tọn dai lọ jẹ vivẹ ẹ ji nado nọ zọnhẹ ẹ. 19  Podọ e ma dike, ṣigba e dọna ẹn dọmọ: “Yì whégbè to hẹnnumẹ towe lẹ dè, bo dọ nuhe Jehovah ko wà na we lẹpo gọna lẹblanu he e dohia we na yé.” 20  E sọ yì bo jẹ nuhe Jesu ko wà na ẹn lẹpo lá ji to Dekapole, bọ awú sọ ji gbẹtọ lẹpo. 21  Whladopo dogọ, to whenue Jesu ko dasá lẹkọwa awà awetọ ji to tọjihun lọ mẹ, gbẹtọgun daho de pli dopọ to e dè; ewọ sọ tin to huto. 22  Todin, dopo to ogán sinagọgu tọn lẹ mẹ, he nọ yin Jailu wá, podọ to whenue e mọ ẹn, e ṣinyọ́n nukunmẹ etọn ai to afọ etọn lẹ kọ̀n 23  bo vẹ̀ ẹ whlasusu dọmọ: “Viyọnnu ṣie pẹvi tin to kúdonu. Jaale, wá bo ze alọ towe do e ji na ewọ nido sọgan jẹgangan bo nọgbẹ̀.” 24  Enẹwutu, e hodo e yì. Podọ gbẹtọgun daho de to hihodo e bo to finfinyọ́n ẹn. 25  Todin, nawe de tin he to hùndi na owhe wiawe, 26  podọ e ko jiya susu sọn nukunpedomẹgo dotozọ́nwatọ voovo lẹ tọn mẹ bo ko zan nutindo etọn lẹpo bo masọ mọ kọgbọ depope, kakatimọ, e ylan deji. 27  To whenue e sè nuhe Jesu ko wà lẹ, e gbọn godo gbẹtọgun lọ tọn wá, bo doalọ awugbó etọn go; 28  na e to didọ to ede mẹ dọmọ: “Eyin yẹn ko gbẹ́ doalọ awugbó etọn lẹ go, yẹn na jẹgangan.” 29  podọ to afọdopolọji, asisa ohùn tọn etọn doalọte, bọ e mọ to ede mẹ dọ emi ko yin azọ̀nhẹngbọna sọn azọ̀n sinsinyẹn lọ mẹ. 30  Mọdopolọ, Jesu lọsu yọnẹn to ede mẹ dọ huhlọn ko tọ́nyi sọn emi mẹ, e sọ lẹgodo to gbẹtọgun lọ ṣẹnṣẹn bo jẹ didọ ji dọmọ: “Mẹnu wẹ doalọ awugbó ṣie lẹ go?” 31  Ṣigba, devi etọn lẹ jẹ didọna ẹn ji dọmọ: “Hiẹ mọ gbẹtọgun lọ to finfinyọ́n we, bọ hiẹ ka sọ dọ dọ, ‘Mẹnu wẹ doalọ go e?’” 32  Ṣigba, e to pinpọn lẹdo pé nado mọ yọnnu lọ he wà ehe. 33  Ṣigba, yọnnu lọ, he to budi bo to sisọsisọ, na e yọ́n nuhe ko jọ do e go wutu, wá bo jẹklo to nukọnna ẹn bosọ dọ nugbo lọ lẹpo na ẹn. 34  E dọna yọnnu lọ dọmọ: “Viyọnnu ṣie, yise towe ko hẹn we jẹgangan. Yì to jijọho mẹ, bo tindo agbasalilo sọn azọ̀n sinsinyẹn towe mẹ.” 35  Dile e gbẹ́ pò to hodọ, mẹdelẹ wá sọn owhé ogán sinagọgu tọn lọ tọn gbè bo dọmọ: “Viyọnnu towe ko kú! Naegbọn hiẹ gbẹsọ to tuklado mẹplọntọ?” 36  Ṣigba, to whenue Jesu gblató nuhe yin didọ lọ, e dọna ogán sinagọgu tọn lọ dọmọ: “A dibu blo, saa ko tindo yise poun.” 37  Todin, e ma dike mẹdepope ni hodo e adavo Pita, Jakọbu po Johanu nọvisunnu Jakọbu tọn po. 38  Enẹwutu, yé wá owhé ogán sinagọgu tọn lọ tọn gbè, bọ e mọ yé to bẹwlu sinsinyẹn mẹ, po mẹhe to avivi bo to avihàn do lẹ po, 39  podọ to whenue e biọ họmẹ, e dọna yé dọmọ: “Naegbọn mì do to bẹwlu sinsinyẹn mẹ bosọ to avivi? Ovi pẹvi lọ ma ko kú gba, ṣigba amlọndọ wẹ e te.” 40  Enẹwutu, yé jẹ ṣinṣàn ẹn kò ji. Ṣigba, to whenue e ko de yemẹpo tọ́n, e plan otọ́ po onọ̀ ovi pẹvi lọ tọn po gọna mẹhe zọnhẹ ẹ lẹ, bo biọ fie ovi pẹvi lọ te. 41  Podọ to whenuena e hẹn alọ ovi pẹvi lọ tọn, e dọna ẹn dọmọ: “Talita kumi,” he lẹdogbedevomẹ etọn yin: “Awhlivu, yẹn dọna we, Fọ́n!” 42  Podọ to afọdopolọji, awhlivu lọ fọ́n bo jẹ zọnlinzin ji, na ewọ yin owhe wiawe mẹvi de wutu. Podọ to afọdopolọji, yé gọ́ na aglinjijẹ daho de. 43  Ṣigba e degbena yé whlasusu ma nado dike mẹdepope ni sè ehe, podọ e dọ dọ nude ni yin nina ẹn nado dù.

Nudọnamẹ Odò Tọn