Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Malku 4:1-41

4  Whladopo dogọ, e sọ jẹ mẹplọn ji to huto. Gbẹtọgun daho tlala de sọ pli sẹpọ ẹ, sọmọ bọ e biọ tọjihun de mẹ bo sinai bosọ sẹyì ohù ji, ṣigba gbẹtọgun lọ lẹpo he to huto tin to agé.  Enẹwutu, e jẹ apajlẹ lẹ yí do to onú susu plọn yé ji bo nọ dọna yé to mẹpinplọn etọn mẹ dọmọ:  “Mì dotoai. Mì pọ́n! Nudotọ lọ tọ́nyi nado donú.  Podọ dile e to núdo, okún delẹ flẹ jẹ aliho tó, bọ ohẹ̀ lẹ wá bo ṣinyan dù.  Podọ okún devo flẹ jẹ osé-yigba ji, fie na nugbo tọn, e ma mọ okọ́ susu te, e sọ tọ́nkun to afọdopolọji, na e ma mọ okọ́ he siso wutu.  Ṣigba, to whenue owhè zẹ̀, e fiọ, podọ na e ma tindo adọ̀ wutu, e hú.  Podọ okún devo flẹ jẹ owùn lẹ ṣẹnṣẹn, podọ owùn lẹ tọ́n bo gbidikọna ẹn, podọ e ma de sinsẹ́n tọ́n.  Ṣigba devo lẹ flẹ jẹ aigba dagbe ji, podọ, to whenue yé whẹ́n bo yiaga, yé jẹ sinsẹ́n detọ́n ji, yèdọ donu gbàn, podọ kandeko, podọ kanweko.”  Enẹwutu, e yidogọ dọmọ: “Mì gbọ ewọ he tindo otó nado dotoai ni dotoai.” 10  Todin, to whenuena e tin to edeṣo, mẹhe tin to e dè lẹ po omẹ wiawe lọ lẹ po jẹ nukanbiọ ẹ ji gando apajlẹ lọ lẹ go. 11  Podọ e zindonukọn nado dọna yé dọmọ: “Mìwlẹ wẹ aṣli wiwe ahọluduta Jiwheyẹwhe tọn ko yin nina, ṣigba na mẹhe pò lẹ, onú he yé sè lẹpo tin taidi apajlẹ lẹ na yé poun, 12  na e nido yindọ, dile yé to pinpọn, yé nido sọgan pọ́n, ṣogan bo ma mọ, podọ dile yé to sisè yé nido sọgan sè, ṣogan bo ma mọnukunnujẹ zẹẹmẹ etọn mẹ, kavi lẹkọ na yé nido yin jijona.” 13  Humọ, e dọna yé dọmọ: “Mìwlẹ ma mọnukunnujẹ apajlẹ ehe mẹ, enẹwutu nawẹ mì na mọnukunnujẹ apajlẹ he pò lẹpo mẹ do? 14  “Nudotọ lọ dó ohó lọ. 15  Ehelẹ, to whelọnu lo, wẹ dehe tin to aliho tó fie ohó lọ yin didó do; ṣigba tlolo he yé ko sè e, Satani wá bo ṣinyan ohó lọ he ko yin didó do yé mẹ sẹ̀. 16  Mọdopolọ, ehelẹ wẹ dehe yin didó do osé-yigba lẹ ji: tlolo he yé ko sè ohó lọ, yé yí ayajẹ do kẹalọyi i. 17  Ṣogan, ohó lọ ma doadọ̀do to yé mẹ, ṣigba yé gbọṣi aimẹ na ojlẹ de; enẹgodo tlolo he nukunbibia kavi homẹkẹn fọ́n na ohó lọ tọn wutu, yé dahli. 18  Etomọṣo, devo lẹ tin he yin didó do owùn lẹ ṣẹnṣẹn; ehelẹ wẹ mẹhe ko sè ohó lọ, 19  ṣigba magbọjẹ titonu ehe tọn lẹ po huhlọn mẹkiklọ adọkunnu lẹ tọn po gọna ojlo na onú he pò lẹ biọ ahun yetọn mẹ bo gbidikọna ohó lọ, bọ e ma de sinsẹ́n tọ́n. 20  To godo mẹ, dehe yin didó do aigba dagbe ji lẹ wẹ mẹhe dotoaina ohó lọ bo yí i po ahun dagbe po lẹ bosọ de sinsẹ́n tọ́n, yèdọ donu gbàn podọ kandeko podọ kanweko.” 21  Podọ e sọ dọna yé dọmọ: “Miyọ́ngbán ma nọ yin hinhẹnwa nado yin zizedo ohà nujijlẹ tọn kavi adọ́zan glọ gba, kavi e ma yin mọ wẹ? Ṣigba, e nọ yin hinhẹnwa nado yin zizedo miyọ́ngbántin ji, kavi e ma yin mọ wẹ? 22  Na nudepope ma tin to nuglọ he ma na wá yin didehia; nudepope ma ko yin whiwhla po sọwhiwhe po he ma na wá yin hinhẹn jẹ gbangba. 23  Mẹdepope he tindo otó nado dotoai, mì gbọ e ni dotoai.” 24  Humọ, e dọna yé dọmọ: “Mì payi nuhe mì to sisè lẹ go. Nujlẹnu he mì to yíyí do jlẹ namẹ, enẹ wẹ na yin yíyí do jlẹ na mì, mọwẹ, e na yin yiyidogọ na mì. 25  Na ewọ he tindo, e na yin nina ẹn dogọ; ṣigba ewọ he ma tindo, yèdọ nuhe e tlẹ tindo na yin yíyí sọn e si.” 26  Enẹwutu, e yidogọ dọmọ: “Mọdopolọ ahọluduta Jiwheyẹwhe tọn yin yiyijlẹdo dawe de go he dlan okún do kọmẹ, 27  podọ e damlọn to zánmẹ bo fọ́n to aihọngbè, podọ okún lọ tọ́nkun bo whẹ́n yiaga, ṣigba e ma yọ́n lehe enẹ jọ gbọn. 28  Aigba lọ na ede nọ de sinsẹ́n tọ́n vudevude, tintan amà, enẹgodo sinsẹ́n, to godo mẹ, sinsẹ́n lọ nọ whẹ́n pete. 29  Ṣigba tlolo he sinsẹ́n lọ bia, e nọ hẹn agbogọdọẹ biọ e mẹ, na ojlẹ jibẹwawhé tọn ko sọ̀ wutu.” 30  E sọ yidogọ dọmọ: “Etẹ go wẹ mí na yí ahọluduta Jiwheyẹwhe tọn jlẹdo, kavi apajlẹ tẹwẹ mí na yí do do e hia? 31  E taidi okún mutaldi* tọn, ehe to whenue e yin didó do aigba mẹ, nọ whè hugan to okún he to aigba ji lẹpo mẹ— 32  ṣigba to whenue e ko yin didó, e nọ whẹ́n bo nọ klohugan omá he pò lẹpo bosọ nọ tindo alà daho lẹ, sọmọ bọ ohẹ̀ agahomẹ tọn lẹ nọ penugo nado nọ oyẹ̀ etọn glọ.” 33  Enẹwutu, apajlẹ mọnkọtọn susu wẹ e nọ yí do dọ ohó lọ na yé, dile yé penugo nado dotoai dẹnsọ. 34  Na nugbo tọn, ewọ ma nọ dọho de na yé matin apajlẹ, ṣigba e nọ basi zẹẹmẹ onú lẹpo tọn na devi etọn lẹ dovo. 35  Podọ to azán enẹ gbè, to whenue owhè ko jai, e dọna yé dọmọ: “Mì gbọ mí ni dasá yì awà awetọ ji.” 36  Enẹwutu, to whenue yé ko do gbẹtọgun lọ hlan godo, yé yí tọjihun lọ do ze e, kẹdẹdile e ko nọ yì do, podọ tọjihun devo lẹ sọ tin to finẹ. 37  Todin, yujẹhọn sinsinyẹn de fọ́n, bọ agbówhẹn lẹ to hihò biọ tọjihun lọ mẹ, sọmọ bọ osin dibla gọ́ tọjihun lọ. 38  Ṣigba, ewọ tin to húnyonu, bo to amlọndọ to kọ̀donu de ji. Enẹwutu yé fọ́n ẹn bo dọna ẹn dọmọ: “Mẹplọntọ, hiẹ ma hanú dọ mí to na dọ̀n?” 39  Enẹwutu, e fọ́n bo gbẹnuna jẹhọn lọ bosọ dọna ohù lọ dọmọ: “Danido! Nọ whii!” Podọ jẹhọn lọ doalọte, bọ abọẹninọ daho de wá aimẹ. 40  Enẹwutu, e dọna yé dọmọ: “Naegbọn mì do to budi? Mì ma ko tindo yise depope kakajẹ din wẹ?” 41  Ṣigba yé dibu tlala, bo jẹ didọna ode awetọ ji dọmọ: “Mẹnu wẹ ehe na taun tọn, na, yèdọ jẹhọn po ohù po tlẹ nọ setonuna ẹn?”

Nudọnamẹ Odò Tọn

Mk 4:31* Pọ́n Mt 13:31, nudọnamẹ odò tọn.