Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Malku 2:1-28

2  Ṣigba, to azán delẹ godo, e sọ vọ́ wá Kapẹlnaumi bọ e yin sisè dọ ewọ tin to whégbè.  Enẹwutu, mẹsusu pli dopọ, sọmọ bọ otẹn ma tin to finẹ ba, etlẹ yin kakajẹ ohọ̀n ji, e sọ jẹ wẹndagbe lọ lá na yé ji.  Podọ gbẹtọ lẹ hẹn awukuzọ̀njẹtọ he yin zize gbọn omẹ ẹnẹ dali de wá e dè.  Ṣigba, to whenue yé ma penugo nado hẹn ẹn wá Jesu dè tlọlọ na gbẹtọgun lọ tọn wutu, yé hùn ohọ̀ lọ ta to fie e te, podọ to whenue yé ko tọ́n odò de godo, yé hẹn adọ́zan he ji awukuzọ̀njẹtọ lọ mlọnai do jẹte gbọn nùvo lọ mẹ.  Podọ to whenue Jesu mọ yise yetọn, e dọna awukuzọ̀njẹtọ lọ dọmọ: “Ovi ṣie, ylando towe lẹ ko yin jijona we.”  Todin, delẹ to wekantọ lẹ mẹ tin to aisinsin to finẹ, bo to linlẹn to ahun yetọn mẹ dọmọ:  “Naegbọn dawe ehe do to hodọ dole? E to nùzan. Mẹnu wẹ sọgan jo ylando lẹ namẹ adavo omẹ dopo, yèdọ Jiwheyẹwhe?”  Ṣigba, to afọdopolọji he Jesu yọnẹn to ohò ede tọn mẹ dọ yé to onú mọnkọtọn lẹn to yedelẹ mẹ, e dọna yé dọmọ: “Naegbọn mì do to onú ehelẹ lẹn to ahun mìtọn mẹ?  Detẹ wẹ bọawu hugan, nado dọna awukuzọ̀njẹtọ lọ dọ, ‘Ylando towe lẹ yin jijona we,’ kavi nado dọ dọ, ‘Fọ́n, ze adọ́zan towe bo zinzọnlin’? 10  Ṣigba na mìwlẹ nido yọnẹn dọ Visunnu gbẹtọ tọn tindo aṣẹ nado jo ylando lẹ namẹ to aigba ji,”—e dọna awukuzọ̀njẹtọ lọ dọmọ: 11  “Yẹn dọna we dọ, Fọ́n, ze adọ́zan towe, bo yì owhé towe gbè.” 12  Enẹwutu, e fọ́n, bo ze adọ́zan etọn to afọdopolọji bosọ zinzọnlin tọ́nyi to yemẹpo nukọn, sọmọ bọ avò vò yemẹpo tlala, bọ yé sọ pagigona Jiwheyẹwhe, dọmọ: “Mí ma ko mọ ehe nkọ pọ́n gbede.” 13  Whladopo dogọ, e tọ́nyi huto; podọ gbẹtọgun lọ lẹpo to wiwá e dè, e sọ jẹ nuplọn yé ji. 14  Ṣigba, dile e juwajei, e mọ Levi, visunnu Alfe tọn to aisinsin to tòkuẹ-ṣinyantẹn, e sọ dọna ẹn dọmọ: “Lẹzun hodotọ ṣie.” Podọ e fọnṣite bo hodo e. 15  To godo mẹ, ewọ sọ jagla to tafo kọ̀n to owhé etọn gbè, podọ susu tòkuẹ-ṣinyantọ lẹ po ylandonọ lẹ po tọn jagla hẹ Jesu po devi etọn lẹ po, na susu yetọn wẹ to finẹ bọ yé sọ jẹ hihodo e ji. 16  Ṣigba, to whenuena wekantọ Falesi lẹ tọn mọdọ e to núdù hẹ ylandonọ lẹ po tòkuẹ-ṣinyantọ lẹ po, yé jẹ didọna devi etọn lẹ ji dọmọ: “E nọ dùnú hẹ tòkuẹ-ṣinyantọ lẹ po ylandonọ lẹ po wẹ ya?” 17  To whenue Jesu sè ehe, e dọna yé dọmọ: “Mẹhe to gángán lẹ ma nọ tindo nuhudo dotozọ́nwatọ tọn, adavo mẹhe to awutu jẹ lẹ wẹ nọ wàmọ. Yẹn ma wá nado ylọ dodonọ lẹ gba, adavo ylandonọ lẹ.” 18  Podọ, devi Johanu tọn lẹ po Falesi lẹ po nọ blanù. Enẹwutu, yé wá bo dọna ẹn dọmọ: “Naegbọn devi Johanu tọn lẹ po devi Falesi lẹ tọn po nọ blanù, ṣigba bọ devi towe lẹ ma nọ blanù?” 19  Podọ Jesu dọna yé dọmọ: “To whenue asisunọ yọyọ tin to yé dè, họntọn asisunọ yọyọ lọ tọn lẹ ma sọgan blanù, kavi e ma yin mọ wẹ? Dile e na dẹnsọ bọ asisunọ yọyọ na tin to yé dè, yé ma sọgan blanù. 20  Ṣigba azán lẹ ja bọ yè na yí asisunọ yọyọ lọ sọn yé dè, whenẹnu wẹ yé na blanù to azán enẹ gbè. 21  Mẹdepope ma nọ tọ̀ avọ̀nu avọ̀ yọyọ tọn do awugbó hoho go gba; eyin e wàmọ, huhlọn avọ̀nu lọ tọn na dọ̀n awugbó lọ, bọ yọyọ lọ na vún sọn hoho lọ go, podọ tintlẹ́n lọ nasọ ylanhu. 22  Mọdopolọ, mẹde ma nọ kọ̀n ovẹn yọyọ do ayúgò hoho lẹ mẹ gba; eyin e wàmọ, ovẹn lọ nọ là ayú lọ lẹ, podọ ovẹn lọ nọ kọnyingbe bọ ayú lọ lẹ nọ gble. Ṣigba, gbẹtọ lẹ nọ kọ̀n ovẹn yọyọ do ayúgò yọyọ lẹ mẹ.” 23  Todin, e sọ wá jọ bọ e gbọn likun-gle lẹ mẹ wá jei to gbọjẹzangbe, devi etọn lẹ sọ jẹ ota likun tọn lẹ wẹ́n ji. 24  Enẹwutu, Falesi lẹ dọna ẹn dọmọ: “Pọ́n fi! Naegbọn yé do to nuhe ma sọgbe hẹ osẹ́n wà to gbọjẹzangbe?” 25  Ṣigba, e dọna yé dọmọ: “Be mìwlẹ ma ko hia gbede, nuhe Davidi wà to whenue e tin to nuhudo mẹ bọ huvẹ to hùhù i, yèdọ po omẹ etọn lẹ po? 26  Be mìwlẹ ma ko hia to kandai he gando Abiatali yẹwhenọgán lọ go mẹ, lehe Davidi biọ ohọ̀ Jiwheyẹwhe tọn mẹ do bo dù akla didetọn lẹ bosọ na delẹ mẹhe tin po e po lẹ, yèdọ nude he ma sọgbe hẹ osẹ́n na mẹdevo depope nado dù adavo yẹwhenọ lẹ ya?” 27  Gbọnmọ dali, e dọna yé dọmọ: “Gbọjẹzan lọ wá aimẹ na gbẹtọ tọn wutu, e ma yin gbẹtọ wẹ wá aimẹ na gbọjẹzan wutu gba; 28  Enẹwutu, Visunnu gbẹtọ tọn sọ yin Oklunọ gbọjẹzan tọn ga.”

Nudọnamẹ Odò Tọn