Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Malku 15:1-47

15  Podọ tlolo he wunkẹn, yẹwhenọgán lẹ po sunnu mẹho lẹ po gọna wekantọ lẹ, yèdọ hagbẹ Whẹdatẹn Daho Ju lẹ tọn* pete, dewé dopọ bo blá Jesu bosọ plan ẹn sọyi bo ze e do alọmẹ na Pilati.  Enẹwutu, Pilati kanse e dọmọ: “Be hiẹ wẹ ahọlu Ju lẹ tọn ya?” E gblọnna ẹn dọmọ: “Hiẹ lọsu wẹ dọ ẹ.”  Ṣigba, yẹwhenọgán lẹ zindonukọn nado to owhẹ̀ onú susu lẹ tọn sadokọna ẹn.  Todin, Pilati sọ vọ́ jẹ kinkanse e ji dọmọ: “Hiẹ ma gblọn nudepope wẹ? Pọ́n owhẹ̀ susu he yé to sisadokọna we.”  Ṣigba, Jesu masọ gblọn nudepope ba, sọmọ bọ e paṣa Pilati.  Nalete, to hùnwhẹ dopodopo whenu, ewọ nọ saba tún gàntọ dopo dote na yé, yèdọ mẹhe yé basi obiọ na.  To ojlẹ lọ mẹ, mẹhe nọ yin Balabas tin to gànmẹ hẹ gufọntọ lẹ, mẹhe to gufinfọn yetọn mẹ, ko hùhlọ̀n.  Enẹwutu, gbẹtọgun lọ wá bo jẹ obiọ basi ji sọgbe hẹ nuhe ewọ ko nọ saba basi na yé.  Pilati gblọnna yé dọmọ: “Be mìwlẹ jlo dọ yẹn ni tún ahọlu Ju lẹ tọn lọ dote na mì ya?” 10  Na e yọnẹn dọ nuvẹun wutu wẹ yẹwhenọgán lẹ do ze e jo. 11  Ṣigba, yẹwhenọgán lẹ hẹn gbẹtọgun lọ nado fọnadán dọ kakatimọ, ewọ ni tún Balabas dote na yé. 12  Whladopo dogọ, Pilati sọ gblọnna yé dọmọ: “To whelọnu lo, etẹwẹ yẹn na wà na mẹhe mì ylọdọ ahọlu Ju lẹ tọn lọ?” 13  Whladopo dogọ, yé dawhá dọmọ: “Whè e do núgo!” 14  Ṣigba, Pilati sọ vọ́ dọna yé dọmọ: “Oylan tẹwẹ e ka wà taun?” Etomọṣo, yé sọ vọ́ dawhá gángán dọmọ: “Whè e do núgo!” 15  To whenẹnu, na Pilati jlo nado hẹn pekọ wá na gbẹtọgun lọ wutu, e tún Balabas dote na yé, podọ to whenue e dike Jesu yin hihò pó godo, e jo e do alọmẹ na yé nado yin whiwhè do núgo. 16  Todin, awhànfuntọ lẹ plan ẹn yì awánu, enẹ wẹ, họ̀nmẹ ayimatẹn-gán lọ tọn; yé sọ ylọ awhànfuntọ lọ lẹpo pli, 17  yé sọ yí sopẹ́-vọ̀ do doaṣọ́na ẹn bo lọ̀n jẹgbakun owùn tọn de bosọ ṣinyọ́n na ẹn. 18  Yé sọ jẹ nudọdo e ji dọmọ: “Kúdo lewhenu, hiẹ Ahọlu Ju lẹ tọn!” 19  Humọ, yé nọ lì ofánpò de ota na ẹn bo nọ túntán do e go, podọ yé nọ jẹklo bo nọ litaina ẹn. 20  To godo mẹ, to whenue yé ko yí i do davlẹ pó godo, yé de sopẹ́-vọ̀ lọ sọn e go bo dó awugbó etọn lẹ na ẹn. Yé sọ plan ẹn yì nado whè e do núgo. 21  Humọ, yé yí huhlọn do hẹn mẹhe juwajei de, yèdọ Simọni Silene tọn, otọ́ Alẹkzandle po Lufu po tọn, he gọ̀ sọn glètoho mẹ, na ewọ nido ze yatin etọn. 22  Enẹwutu, yé plan ẹn jẹ fihe yin Gọlgọta, he lẹdogbedevomẹ etọn zẹẹmẹdo, Taká Tẹnmẹ. 23  Tofi, yé tẹnpọn nado na ẹn ovẹn he yè yí zuya do hẹn sinyẹn, ṣigba e ma nù in. 24  Podọ yé whè e do núgo, yé sọ má awugbó etọn lẹ gbọn ovò dide dali nado yọ́n dehe mẹdopodopo na mọyi. 25  Todin, to gànhiho atọ̀ntọ mẹ wẹ yé whè e do núgo. 26  Podọ, yé kàn owhẹ̀ he yin sisadokọna ẹn lọ do aga dọ, “Ahọlu Ju lẹ tọn.” 27  Humọ, yé whè jaguda awe do núgo hẹ ẹ, dopo to adusi etọn mẹ podọ awetọ to amiyọn etọn mẹ. 28  ——* 29  Podọ mẹhe juwajei lẹ nọ to zùnzùn in, bo nọ to ota yetọn mimí bosọ nọ to didọmọ: “Ṣiọ! Hiẹ he jlo na họ́ tẹmpli lọ liai bo vọ́ ẹ gbá to azán atọ̀n gblamẹ, 30  whlẹn dewe gbọn tejijẹ sọn yatin lọ ji dali.” 31  Mọdopolọ ga, yẹwhenọgán lẹ po wekantọ lẹ po to yíyí i do davlẹ to yedelẹ ṣẹnṣẹn bo to didọmọ: “E whlẹn mẹdevo lẹ gán; e ma sọgan whlẹn ede gán! 32  Gbọ Klisti, Ahọlu Islaeli tọn lọ ni jẹte sọn yatin ji todin, na míwlẹ nido mọ bo yise.” Mẹhe yin whiwhè do núgo po e po lẹ lọsu to vivlẹ ẹ kò. 33  To whenue e jẹ gànhiho ṣidopotọ* mẹ, zinvlu ṣinyọ́n aigba lọ lẹpo ji kakajẹ gànhiho ṣinẹnẹtọ* mẹ. 34  Podọ to gànhiho ṣinẹnẹtọ mẹ, Jesu dawhá po ogbè lélé po dọmọ: “Eli Eli lama sabaktani?” he lẹdogbedevomẹ etọn yin: “Jiwheyẹwhe ṣie, Jiwheyẹwhe ṣie, naegbọn hiẹ do gbẹ́ mi dai?” 35  Podọ to whenue delẹ to mẹhe to ote sẹpọ finẹ lẹ mẹ sè ehe, yé jẹ didọ ji dọmọ: “Pọ́n! E to Elija ylọ.” 36  Ṣigba, dopo to yé mẹ họ̀nwezun bo ylọn hùmẹ-tekan de do ovẹn he vẹsin mẹ, bo ze e do ofánpò de nù, bosọ jẹ nina ẹn ji nado nù, bo dọmọ: “Mì jo e do! Mì gbọ mí ni pọ́n eyin Elija na wá hẹn ẹn jẹte.” 37  Ṣigba, Jesu dawhá po ogbè lélé po, gbigbọ etọn sọ ṣí. 38  Podọ avọ̀ he gbò fiwiwe lọ tlẹ́n do awe, sọn aga wá odò. 39  Todin, to whenue mẹkanwekowhàngán he to ote pannukọn ẹn lọ mọ ninọmẹ he mẹ e kú te lẹ, e dọmọ: “Matin ayihaawe, Visunnu Jiwheyẹwhe tọn wẹ dawe ehe.” 40  Yọnnu lẹ sọ to nupọn sọn olá, delẹ to yé mẹ wẹ, Malia Magdaleni, Malia onọ̀ Jakọbu Pẹvi lọ po Jose po tọn, gọna Salome, 41  yé mẹhe nọ saba zọnhẹ ẹ bo nọ yilizọn na ẹn dai to whenue e tin to Galili, gọna yọnnu susu devo lẹ he ko zọnpọ hẹ ẹ wá Jelusalẹm. 42  Todin, na tenu ko dó, bọ e sọ yin azán Awuwle* tọn, enẹ wẹ, azán he jẹnukọnna gbọjẹzan, 43  Josẹfu Alimate tọn wá, yèdọ hagbẹ Tòwedegbẹ́* lọ tọn, he yin omẹ nukundeji de, he ewọ lọsu to tenọpọn ahọluduta Jiwheyẹwhe tọn. E tindo adọgbigbo nado yì Pilati nukọn bo biọ oṣiọ Jesu tọn. 44  Ṣigba, Pilati tindo ayihaawe eyin e ko kú nugbo, podọ to whenue e ylọ mẹkanwekowhàngán lọ, e kanse e eyin e ko kú nugbonugbo. 45  Enẹwutu, to whenue e ko sè nugbo lọ sọn mẹkanwekowhàngán lọ dè, e jo oṣiọ lọ na Josẹfu. 46  Ewọ sọ họ̀ alavọ dagbedagbe, e sọ ze e jẹte, bo blá ẹ do alavọ dagbedagbe lọ mẹ bosọ tẹ́ ẹ do yọdò he yin kùnkùn do osé gángán mẹ de mẹ; podọ e bli zannu de do ohọ̀n yọdò lọ tọn nù. 47  Ṣigba, Malia Magdaleni po Malia onọ̀ Jose tọn po gbọṣi finẹ bo to fihe e yin titẹ́ do lọ pọ́n.

Nudọnamẹ Odò Tọn

Mk 15:1 Pọ́n Mt 26:59, nudọnamẹ odò tọn.
Mk 15:28 Pọ́n Mt 17:21, nudọnamẹ odò tọn.
Mk 15:33 Enẹ wẹ, nudi ogàn 12 whèmẹ tọn, eyin yè hia sọn ojlẹ he mẹ owhè nọ zẹ̀.
Mk 15:33 Enẹ wẹ, nudi ogàn 3 whèmẹ tọn, eyin yè hia sọn ojlẹ he mẹ owhè nọ zẹ̀.
Mk 15:42 Pọ́n Mt 27:62, nudọnamẹ odò tọn.
Mk 15:43 Kavi, Sanhedlin.