Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Malku 14:1-72

14  Todin, hùnwhẹ juwayi tọn po akla madotọ́n lẹ tọn po pò azán awe. Podọ yẹwhenọgán lẹ po wekantọ lẹ po to dindin lehe yé na gbọn ayiha wintinwintin dali wle e bo hù i do;  na yé to didọ pludopludo dọmọ: “E ma dona yin to hùnwhẹ lọ whenu; vlavo zingidi nikaa fọ́n to gbẹtọ lẹ ṣẹnṣẹn.”  Podọ to whenue e to Bẹtani to owhé Simọni pòtọnọ lọ tọn gbè, dile e jagla to núdùdù kọ̀n, nawe de wá bo hẹn ogò alabasta tọn de he mẹ amisisa owán gblingblinnọ de, yèdọ nadi akú he vẹahi taun tin te. To whenue nawe lọ wẹ́n okọ̀ na ogò alabasta tọn lọ, e jẹ kinkọ̀n do ota na ẹn ji.  Enẹwutu, mẹdelẹ to finẹ jẹ homẹgble dohia ji bo to didọ to yedelẹ ṣẹnṣẹn dọmọ: “Naegbọn amisisa owán gblingblinnọ ehe do to yinyin hinhẹngú?  Na amisisa owán gblingblinnọ ehe sọgan ko yin sisà yin nuhe hugan denali* fọde-kanweko bo yin nina wamọnọ lẹ!” Homẹ yetọn masọ hùn do nawe lọ go depope.  Ṣigba Jesu dọmọ: “Mì jo nawe lọ do. Naegbọn mì to tintẹnpọn nado dotukla ẹ? Azọ́n dagbe de wẹ e wà na mi.  Na wamọnọ lẹ tin to mì dè to whepoponu, podọ whedepopenu he mì jlo, mì sọgan wà dagbe na yé, ṣigba yẹn ma tin to mì dè to whepoponu.  Ewọ wà nuhe go e pé; e kọ̀n amisisa owán gblingblinnọ lọ do go e nado wleawuna mi jẹnukọn na ṣiọdidi ṣie.  Nugbo wẹ yẹn dọna mì dọ, Fidepope he yẹwheho wẹndagbe lọ tọn yin didọ te to aihọn lọ lẹpo mẹ, nuhe nawe ehe wà lọsu na yin didọ ga nado nọ flin in.” 10  Podọ Juda Iskaliọti, dopo to omẹ wiawe lẹ mẹ tọ́nyi yẹwhenọgán lẹ dè nado sọgan de e hia na yé. 11  To whenuena yé sè ehe, yé jaya bo dopagbe nado na ẹn fataka-kuẹ. Enẹwutu, e jẹ aliho he bọawu de dín ji nado de e hia. 12  Todin, to azán tintan hùnwhẹ akla madotọ́n lẹ tọn gbè, yèdọ whenue yé nọ yí kanlin juwayi tọn lọ do sanvọ́ to aṣa-liho, devi etọn lẹ dọna ẹn dọmọ: “Fie wẹ hiẹ jlo dọ mí ni wleawudaina we do nado dù juwayi?” 13  Enẹwutu, e do awe to devi etọn lẹ mẹ hlan bo dọna yé dọmọ: “Mì yì tòdaho lọ mẹ, podọ dawe de he hẹn tọ̀zẹ́n osin tọn de na pé mì. Mì hodo e, 14  podọ fidepope he e biọ, mì dọna whétọ lọ dọ, ‘Mẹplọntọ lọ dọmọ: “Fie wẹ abò jonọyiyi tọn lọ he mẹ yẹn sọgan dù juwayi hẹ devi ṣie lẹ te?”’ 15  E nasọ do abò aga tọn daho de hia mì, he ko yin jijlado bo yin awú etọn wle dai; finẹ wẹ mì ni wleawudaina mí do.” 16  Enẹwutu, devi lẹ tọ́nyi, bo biọ tòdaho lọ mẹ bosọ mọ kẹdẹdile e ko dọna yé do; podọ yé wleawudaina juwayi lọ. 17  To whenue owhè ko jai, e wá po omẹ wiawe lẹ po. 18  Podọ dile yé jagla to tafo kọ̀n bo to núdù, Jesu dọmọ: “Nugbo wẹ yẹn dọna mì dọ, Dopo to mì mẹ, he to núdù hẹ mi, na de mi hia.” 19  Yé jẹ awubla ji bọ dopodopo yetọn nọ dọna ẹn dọmọ: “E ma yin yẹn, kavi yẹn wẹ ya?” 20  E dọna yé dọmọ: “Dopo to omẹ wiawe lẹ mẹ, he to alọ do agbán dopolọ mẹ hẹ mi wẹ. 21  Nugbo wẹ dọ Visunnu gbẹtọ tọn jei, kẹdẹdile yè ko kanwe etọn gando e go do, ṣigba dindọn hlan dawe enẹ he gblamẹ Visunnu gbẹtọ tọn yin didehia gbọn! E na ko pọnte hugan na dawe enẹ eyin e ma ko yin jiji.” 22  Podọ dile yé gbẹ́ pò to núdù, e yí akla de, bo dona bosọ wẹ́n ẹn, bo yí i na yé bosọ dọmọ: “Mì yí, ehe nọtena agbasa ṣie.” 23  E sọ yí kọfo de, bo dopẹ́ bosọ yí i na yé, yemẹpo sọ nù sọn e mẹ. 24  Podọ e dọna yé dọmọ: “Ehe nọtena ‘ohùn ṣie he yin alẹnu lọ tọn,’ he na yin kinkọndai do ota mẹsusu tọn mẹ. 25  Nugbo wẹ yẹn dọna mì, Yẹn ma nasọ nù sinsẹ́n ovẹn tọn hẹ mì to aliho depope mẹ ba kakajẹ azán enẹ gbè whenue yẹn na nù yọyọ etọn hẹ mì to ahọluduta Jiwheyẹwhe tọn mẹ.” 26  To godo mẹ, to ohàn pipà tọn lẹ jiji godo, yé tọ́nyi Osó Olivie tọn ji. 27  Jesu sọ dọna yé dọmọ: “Mìmẹpo wẹ na dahli, na e ko yin kinkàndai dọ, ‘Yẹn na linú lẹngbọhọtọ lọ, bọ lẹngbọ lẹ na gbàdo.’ 28  Ṣigba, to whenue yẹn na ko yin finfọn godo, yẹn na jẹnukọnna mì yì Galili.” 29  Ṣigba, Pita dọna ẹn dọmọ: “Eyin mẹhe pò lẹpo tlẹ dahli, yẹn ma na wàmọ.” 30  Enẹwutu, Jesu dọna ẹn dọmọ: “Nugbo wẹ yẹn dọna we, To egbé, mọwẹ, to ozán ehe mẹ, whẹpo koklo na dosé whla awe, yèdọ hiẹ na mọ́n mi whla atọ̀n.” 31  Ṣigba e jẹ didọ ji vẹkuvẹku dọmọ: “Eyin e tlẹ biọ dọ yẹn ni kú po hiẹ po, yẹn ma na mọ́n we gbede.” Humọ, mẹhe pò lẹpo jẹ onú dopolọ dọ ji. 32  Enẹwutu, yé wá fihe nọ yin Gẹtsemani, podọ e dọna devi etọn lẹ dọmọ: “Mì sinai tofi, to whenue yẹn na to dẹ̀ho.” 33  E sọ plan Pita, Jakọbu po Johanu po hẹn, podọ e biọ bẹwlu mẹ bosọ yin tuklado badabada. 34  E sọ dọna yé dọmọ: “Alindọn ṣie blawu tlala, yèdọ kakajẹ okú. Mì nọfi bo nọ nukle.” 35  Podọ to whenue e sẹyì nukọn vude, e họ́jai do kọmẹ bo jẹ dẹ̀ho ji dọ, eyin e yọnbasi, gànhiho ehe ni juwayi sọn dè e. 36  E sọ jẹ didọ ji dọmọ: “Abba,* Otọ́, onú lẹpo wẹ yọnbasi na we; de kọfo ehe sọn dè e. Ṣogan, e ma yin nuhe yẹn jlo, ṣigba nuhe hiẹ jlo.” 37  E sọ wá bo mọ yé to amlọndọ, bọ e dọna Pita dọmọ: “Simọni, amlọndọ wẹ a te ya? Be hiẹ ma tindo huhlọn nado nọ nukle na gànhiho dopo wẹ? 38  Mì nọ nọ̀ nukle bo nọ hodẹ̀, na mì nikaa biọ whlepọn mẹ. Nugbo wẹ dọ gbigbọ to jijlo taun, ṣigba agbasa yin madogánnọ.” 39  E sọ vọ́ gọyì bo hodẹ̀, bosọ vọ́ onú dopolọ dọ. 40  Podọ e sọ vọ́ lẹkọwa bo mọ yé to amlọndọ na nukun yetọn lẹ pẹ̀n na amlọn, enẹwutu, yé ma yọ́n nuhe yé na gblọnna ẹn. 41  E sọ vọ́ lẹkọwa whla atọ̀ntọ bo dọna yé dọmọ: “To ojlẹ taidi ehe nkọ mẹ, mìwlẹ to amlọndọ bosọ to gbigbọjẹ! E pé! Gànhiho lọ ko wá! Mì pọ́n! Visunnu gbẹtọ tọn yin didehia do alọ ylandonọ lẹ tọn mẹ. 42  Mì fọ́n, bo gbọ mí ni yì. Mì pọ́n! Mẹdehiatọ ṣie ko dọnsẹpọ.” 43  Podọ to afọdopolọji, dile e gbẹ́ pò to hodọ, Juda, dopo to omẹ wiawe lẹ mẹ wá bọ gbẹtọgun de hodo e sọn yẹwhenọgán lẹ, wekantọ lẹ po sunnu mẹho lẹ po dè bọ yé hẹn ohí lẹ po aglọpò lẹ po. 44  Todin, mẹdehiatọ etọn ko na yé ohia de he ji yé kọngbedopọ do, dọmọ: “Mẹdepope he yẹn donùnùgo na, ewọ lọ wẹ; mì wle e bo plan ẹn sọyi, mì dike e họnyi blo.” 45  E sọ wá tlọlọ, bo dọnsẹpọ ẹ, bosọ dọmọ: “Labbi!” bo donùnùgo na ẹn po zohunhun po. 46  Enẹwutu, yé dealọ bo wle e. 47  Ṣigba, dopo to mẹhe to ote to finẹ lẹ mẹ sún ohí etọn bo hú afanumẹ yẹwhenọ daho lọ tọn bosọ pà otó na ẹn. 48  Ṣigba, Jesu dọna yé dọmọ: “Be yẹn wẹ mìwlẹ tọ́n wá wiwle gbé bo hẹn ohí lẹ po aglọpò lẹ po taidi mẹhe ja jaguda de dè ya? 49  Egbesọegbesọ wẹ yẹn tin po mì po bo to mẹplọn to tẹmpli mẹ, ṣogan mìwlẹ ma wle mi. Ṣigba, ehe yinmọ na Owe-wiwe lẹ nido sọgan yin hinhẹndi.” 50  Yemẹpo sọ jo e do bo họnyi. 51  Ṣigba, dẹpẹ he dó awù alavọ tọn de dogo jẹ hihodo e ji afọsu-afọsi; yé sọ tẹnpọn nado wle e, 52  ṣigba e jo awugbó alavọ tọn etọn do bo họnyi. 53  Todin, yé plan Jesu yì yẹwhenọ daho lọ dè, bọ yẹwhenọgán lẹpo po sunnu mẹho lẹ po gọna wekantọ lẹ sọ pli. 54  Ṣigba, Pita to hihodo e to aganu kaka yì awánu yẹwhenọ daho lọ tọn; podọ e sinai hẹ devizọnwatọ whégbè tọn lẹ bo to miyọ́n hú. 55  To ojlẹ enẹ mẹ, yẹwhenọgán lẹ po hagbẹ Whẹdatẹn Daho Ju lẹ tọn* po to kunnudenu dín sọta Jesu nado sọgan hù i, ṣigba yé ma to depope mọ. 56  Na nugbo tọn, mẹsusu to kunnu lalo de sọta ẹ, ṣigba kunnudenu yetọn lẹ ma sọgbe hẹ yede. 57  Humọ, mẹdelẹ to finfọn bo to kunnu lalo de sọta ẹ, bosọ to didọmọ: 58  “Mí sè bọ e dọ dọ, ‘Yẹn na họ́ tẹmpli ehe, he yin bibasi po alọ po bo na gbá devo he ma yin bibasi po alọ po to azán atọ̀n gblamẹ.’” 59  Ṣigba depope to kunnudenu yetọn ehelẹ mẹ ma sọgbe hẹ yede. 60  To godo mẹ, yẹwhenọ daho lọ fọ́n to ṣẹnṣẹn yetọn bo kanbiọ Jesu dọmọ: “Hiẹ ma gblọn nudepope wẹ? Etẹwẹ hiẹ lọsu lẹn gando kunnu he omẹ ehelẹ to dide sọta we go?” 61  Ṣigba, e ma kẹnù bo masọ gblọn nudepope. Whladopo dogọ, yẹwhenọ daho lọ jẹ kinkanse e ji dọmọ: “Be hiẹ wẹ Klisti lọ, yèdọ Visunnu Donanọ lọ tọn ya?” 62  To whenẹnu, Jesu dọmọ: “Yẹn wẹ; mìwlẹ nasọ mọ Visunnu gbẹtọ tọn to aisinsin to adusilọ huhlọn tọn mẹ bọ e nasọ ja to aslọ olọn tọn lẹ mẹ.” 63  Enẹwutu, yẹwhenọ daho lọ tlẹ́n awù odò tọn etọn lẹ bo dọmọ: “Etẹwẹ mí gbẹ́ pò to kunnudetọ lẹ dín na? 64  Mì ko sè nùzinzan lọ. Etẹwẹ mì lẹn?” Yemẹpo gblewhẹdo e dọ e jẹna okú. 65  Mẹdelẹ sọ jẹ tántún do e go ji bo nọ ṣinyọnnudo nukunmẹ na ẹn pete bosọ nọ lì akotokún in bo nọ dọna ẹn dọmọ: “Dọ dọdai!” Podọ, yé hotómẹ na ẹn to whenue devizọnwatọ whẹdatẹn tọn lẹ plan ẹn jei. 66  Todin, to whenue Pita tin to odò to awánu, dopo to deviyọnnu yẹwhenọ daho lọ tọn lẹ mẹ wá, 67  podọ, to whenue e mọ Pita to miyọ́n hú, e pọ́n ẹn tlintlin bo dọmọ: “Hiẹ lọsu ga nọ zọnhẹ Nazalẹtinu lọ, yèdọ Jesu ehe.” 68  Ṣigba, e mọ́n bo dọmọ: “Yẹn ma yọ́n ewọ mọjanwẹ yẹn masọ mọnukunnujẹ nuhe dọ a te mẹ,” ewọ sọ tọ́njẹgbonu yì awánu. 69  To whenue deviyọnnu lọ mọ ẹn to finẹ, e sọ vọ́ jẹ didọna mẹhe to ote to finẹ lẹ ji dọmọ: “Dopo to yé mẹ die.” 70  Ewọ sọ vọ́ mọ́n. Podọ whladopo dogọ, to ojlẹ vude godo, mẹhe to ote to finẹ lẹ jẹ didọna Pita ji dọmọ: “Matin ayihaawe, hiẹ yin dopo to yé mẹ, na, nado dọ hójọhó, Galilinu de wẹ hiẹ.” 71  Ṣigba, e jẹ dẹ̀hodo ede ji bosọ jẹ whiwhle ji dọmọ: “Yẹn ma yọ́n dawe he hodọ mì te ehe.” 72  Podọ to afọdopolọji, koklo dosé whla awetọ; Pita sọ flin nuhe Jesu ko dọna ẹn dọmọ: “Whẹpo koklo na dosé whla awe, hiẹ na mọ́n mi whla atọ̀n.” E sọ blawu bo jẹ avivi ji.

Nudọnamẹ Odò Tọn

Mk 14:5* Pọ́n Mt 18:24, nudọnamẹ odò tọn.
Mk 14:36* Hogbe Alamaiki tọn de he zẹẹmẹdo “otọ́,” kavi, “Otọ́ E.”
Mk 14:55* Pọ́n Mt 26:59, nudọnamẹ odò tọn.