Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Malku 12:1-44

12  Humọ, e jẹ apajlẹ lẹ yí do dọhona yé ji dọmọ: “Dawe de dó vẹngle de bo dó pákàn lẹdo e bosọ kùn ovẹn-dò de nado nọ finyọ́n ovẹn bo gbá atọ̀họ̀ de do e mẹ, bosọ haya ogle lọ na glesi lẹ, bo tọ́nwhẹ̀n yì tògodo.  Todin, to osaa sisọ mẹ, e do afanumẹ de hlan glesi lọ lẹ dè, na e nido sọgan mọ delẹ to sinsẹ́n vẹngle lọ tọn lẹ mẹ yí sọn glesi lọ lẹ si.  Ṣigba, yé wle e bo hò e bosọ do e hlan asigbá-alọgbá.  Whladopo dogọ, e sọ do afanumẹ devo hlan yé; podọ yé linú ota na enẹlọ bo dowinyan ẹn.  E sọ do devo hlan bọ yé hù enẹ; podọ e do mẹsusu devo lẹ hlan, yé hò delẹ to yé mẹ bo hù devo lẹ.  E tindo omẹ dopo dogọ, yèdọ visunnu yiwanna etọn. To godo mẹ, e do ewọ hlan yé, bo dọ dọ, ‘Yé na na sisi visunnu ṣie.’  Ṣigba glesi lọ lẹ dọ to yedelẹ ṣẹnṣẹn dọ, ‘Gudutọ lọ die. Mì wá, bo gbọ mí ni hù i bọ ogú lọ na lẹzun mítọn.’  Enẹwutu, yé wle e bo hù i, bosọ ze e dlan gbonu vẹngle lọ tọn.  Etẹwẹ klunọ vẹngle lọ tọn na wà? E na wá bo hù glesi lọ lẹ, bo na yí vẹngle lọ na mẹdevo lẹ. 10  Be mìwlẹ ma ko hia adà Owe-wiwe tọn ehe gbede dọ, ‘Zannu he họ̀dotọ lẹ gbẹ́ dai, ehe lọ wẹ ko lẹzun zannu gángánsu họ̀gosu tọn. 11  Jehovah dè wẹ ehe wá sọn, podọ e jiawu to nukun mítọn lẹ mẹ’?” 12  Enẹwutu, na yé doayi e go dọ yewlẹ hodọ wẹ e te to apajlẹ lọ mẹ wutu, yé jẹ aliho dín ji nado wle e, ṣigba yé dibusi gbẹtọgun lọ. Enẹwutu, yé jo e do bo tọ́nyi. 13  Enẹgodo, yé do delẹ to Falesi lẹ po mẹhe tin to ogbẹ́ Hẹlọdi tọn mẹ lẹ po hlan nado domọwle e to hodidọ etọn mẹ. 14  To whenue omẹ ehelẹ wá, yé dọna ẹn dọmọ: “Mẹplọntọ, mí yọnẹn dọ hiẹ nọ dọ nugbo bo ma nọ hò nukunta mẹdepope tọn pọ́n, na hiẹ ma nọ pọ́n awusọhia gbonu tọn gbẹtọ lẹ tọn, ṣigba hiẹ nọ plọnmẹ aliho Jiwheyẹwhe tọn to nugbo mẹ: Be e jẹ nado sú takuẹ hlan Sesali ya kavi lala? 15  Mí ni sú wẹ, kavi mí ni gbọ?” Na e doayi yẹnuwiwa yetọn go wutu, e dọna yé dọmọ: “Naegbọn mìwlẹ do to whiwhle mi pọ́n? Mì hẹn denali* de wá ma pọ́n.” 16  Yé hẹn dopo wá. E sọ dọna yé dọmọ: “Yẹdide po nukinkan mẹnu tọn po die?” Yé dọna ẹn dọmọ: “Sesali tọn.” 17  To whenẹnu, Jesu dọmọ: “Mì yí onú he yin Sesali tọn lẹ na Sesali, ṣigba onú he yin Jiwheyẹwhe tọn lẹ na Jiwheyẹwhe.” Awú sọ ji yé. 18  Todin, Sadusi lẹ he nọ dọ dọ fọnsọnku ma tin wá e dè, yé sọ kanse e dọmọ: 19  “Mẹplọntọ, nuhe Mose kàn dai na mí wẹ, eyin nọvisunnu mẹde tọn kú bo jo asi do ṣigba bo ma jo ovi de do, nọvisunnu etọn dona sọ́n asi lọ bo jivi do nọvisunnu etọn tẹnmẹ. 20  Nọvisunnu ṣinawe delẹ tin; tintan sọ dà asi, ṣigba e ma jivi de whẹpo do kú. 21  Awetọ sọ sọ́n yọnnu lọ, ṣigba e ma jivi whẹpo do kú; nudopolọ sọ jọ do atọ̀ntọ go. 22  Podọ ṣinawe lọ lẹ ma jivi depope. To godo mẹ, yọnnu lọ lọsu kú. 23  Asi mẹnu tọn wẹ e na yin to fọnsọnku whenu? Na yé omẹ ṣinawe lẹ wẹ dà ẹ di asi.” 24  Jesu dọna yé dọmọ: “Be e ma yin ehe wutu wẹ mì do to nuṣiwa, na mì ma yọ́n Owe-wiwe lẹ kavi huhlọn Jiwheyẹwhe tọn? 25  Na whenue yé na fọ́n sọn oṣiọ lẹ mẹ, sunnu lẹ ma na wlealọ mọjanwẹ yọnnu lẹ ma na yin nina to alọwle mẹ, ṣigba yé na tin taidi angẹli lẹ to olọn mẹ. 26  Ṣigba, gando oṣiọ lẹ go, dọ yé na yin finfọn, be mì ma ko hia to owe Mose tọn mẹ, to kandai he gando wùnkan go lọ mẹ, lehe Jiwheyẹwhe dọna ẹn do dọ, ‘Yẹn wẹ Jiwheyẹwhe Ablaham tọn, Jiwheyẹwhe Isaki tọn podọ Jiwheyẹwhe Jakọbu tọn’? 27  E ma yin Jiwheyẹwhe oṣiọ lẹ tọn, ṣigba mẹhe to ogbẹ̀ lẹ tọn. Nuṣiwa wẹ mì te taun.” 28  Todin, na dopo to wekantọ he wá bo sè bọ yé to núdọ̀n lọ lẹ mẹ yọnẹn dọ e ko na gblọndo yé to aliho dagbe mẹ wutu, ewọ kanse e dọmọ: “Gbedide tẹwẹ yin tintan to popolẹpo mẹ?” 29  Jesu gblọn dọmọ: “Tintan lọ wẹ, ‘Sè hiẹ Islaeli E, Jehovah Jiwheyẹwhe mítọn, Jehovah dopo wẹ, 30  podọ hiẹ dona yí ahun towe lẹpo, alindọn towe lẹpo, ayiha towe lẹpo, podọ huhlọn towe lẹpo do yiwanna Jehovah Jiwheyẹwhe towe.’ 31  Awetọ lọ die, ‘Hiẹ dona yiwanna kọmẹnu towe di dewe.’ Gbedide depope ma klohu ehelẹ.” 32  Wekantọ lọ dọna ẹn dọmọ: “Mẹplọntọ, hiẹ dọ hójọhó he sọgbe hẹ nugbo, ‘Dopo wẹ Ewọ, devo de masọ tin gbọnvona Ewọ’; 33  podọ yíyí ahun mẹtọn lẹpo, nukunnumọjẹnumẹ mẹtọn lẹpo, podọ huhlọn mẹtọn lẹpo do yiwanna ẹn, podọ nado yiwanna kọmẹnu mẹtọn taidi mẹdetiti, ehelẹ yin nujọnu taun hú avọ́nunina mimẹ̀ po avọ́sinsan lẹpo po.” 34  Enẹwutu, na Jesu mọdọ e na gblọndo po zinzin po wutu, e dọna ẹn dọmọ: “Hiẹ ma dẹn do ahọluduta Jiwheyẹwhe tọn.” Ṣigba mẹdepope masọ tindo adọgbigbo nado kàn kanbiọ de sè e ba. 35  Ṣigba, to whenue Jesu to gblọndo na, e jẹ didọ ji to whenuena e to mẹplọn to tẹmpli mẹ dọmọ: “Naegbọn wekantọ lẹ do dọ dọ Klisti yin visunnu Davidi tọn? 36  Davidi lọsu dọ to anademẹ gbigbọ wiwe tọn glọ dọ, ‘Jehovah dọna Oklunọ ṣie dọmọ: “Sinai to adusilọ ṣie mẹ kaka yẹn nado yí kẹntọ towe lẹ do afọ towe lẹ glọ.”’ 37  Davidi lọsu ylọ ẹ dọ ‘Oklunọ,’ ṣigba, nawẹ ewọ yin visunnu etọn gbọn lo?” Gbẹtọgun daho lọ sọ to todoaina ẹn po homẹhunhun po. 38  Podọ e zindonukọn to mẹpinplọn etọn mẹ dọmọ: “Mì payi wekantọ lẹ go, he nọ jlo nado nọ to yìyì pé to tewu lẹ mẹ bo nọ jlo nado yin nudọdo to ahi lẹ mẹ 39  bosọ nọ jlo aisintẹn nukọn tọn lẹ to sinagọgu lẹ mẹ podọ otẹn nukundeji lẹ to núdùdù whèjai tọn lẹ whenu. 40  Yewlẹ wẹ to owhé asuṣiọsi lẹ tọn lẹ dù sudo bo nọ gbọn yẹnuwiwa dali hodẹ̀ gaa lẹ; omẹ ehelẹ na mọ whẹdida he sinyẹn hugan de yí.” 41  Ewọ sọ sinai pannukọn adọkun potin lọ lẹ bo jẹ pinpọn lehe gbẹtọgun lọ to akuẹ dlan do adọkun potin lọ lẹ mẹ do ji; adọkunnọ susu sọ to abọgan-kuẹ susu dlan do yé mẹ. 42  Todin, asuṣiọsi wamọnọ de wá bo dlan abọgan-kuẹ flinflin awe,* he ma họakuẹ sọmọ do e mẹ. 43  Enẹwutu, e ylọ devi etọn lẹ wá ede dè bo dọna yé dọmọ: “Nugbo wẹ yẹn dọna mì dọ asuṣiọsi wamọnọ ehe dlan do e mẹ hú mẹhe to akuẹ dlan do adọkun potin lọ lẹ mẹ lẹpo; 44  na yemẹpo wẹ dlan do e mẹ sọn lankan yetọn lẹ mẹ, ṣigba ewọ, sọn matindo etọn mẹ, dlan nuhe e tindo lẹpo, yèdọ nutindo gbẹ̀mẹ tọn etọn lẹpo do e mẹ.”

Nudọnamẹ Odò Tọn

Mk 12:15* Pọ́n Mt 20:2, nudọnamẹ odò tọn.
Mk 12:42* To paa mẹ, Lepta awe, he nọtena mado kandeko-nukunẹnẹ azọ́nkuẹ gbèdopo tọn. Sọ pọ́n Nudọnamẹ Dogọ 11.