Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Malku 11:1-33

11  Todin, to whenue yé to sisẹpọ Jelusalẹm, Bẹtfagi po Bẹtani po to Osó Olivie tọn ji, e do awe to devi etọn lẹ mẹ hlan  bo dọna yé dọmọ: “Mì yì gbétatò he mì to mimọ hlan lọ mẹ, podọ tlolo he mì biọ e mẹ, mì na mọ kẹtẹkẹtẹvu de to sìnsìn, ehe ji gbẹtọvi depope ma ko sinai do pọ́n; mì tún in bo hẹn ẹn wá.  Podọ eyin mẹde dọna mì dọ, ‘Naegbọn mì do to ehe wà?’ mì dọ dọ, ‘Oklunọ tindo nuhudo etọn, podọ e na lẹkọ na ẹn wáfi to afọdopolọji.’”  Enẹwutu, yé yì bo mọ kẹtẹkẹtẹvu lọ to sìnsìn to ohọ̀n lọ kọ̀n, to gbonu to fihe tòhomẹ-liho lọ klan te, yé sọ tún in.  Ṣigba, delẹ to mẹhe to ote to finẹ lẹ mẹ jẹ didọna yé ji dọmọ: “Naegbọn mì do to kẹtẹkẹtẹvu lọ tún?”  Yé dọna omẹ lọ lẹ kẹdẹdile Jesu ko dọ do; yé sọ jo yé do.  Podọ yé hẹn kẹtẹkẹtẹvu lọ wá Jesu dè bo tẹ́ awugbó yetọn lẹ do e ji, bọ ewọ sọ sinai do e ji.  Humọ, mẹsusu tẹ́ awugbó yetọn lẹ do aliho ji, ṣigba mẹdevo lẹ sán amà lẹ sọn ogle mẹ.  Mẹhe sọ to yìyì to nukọn lẹ po mẹhe ja to godo lẹ po to awhádo mapote dọmọ: “Mí vẹ̀ we, whlẹn ẹn! Donanọ wẹ ewọ he ja to oyín Jehovah tọn mẹ! 10  Donanọ wẹ ahọluduta otọ́ mítọn Davidi tọn he ja! Mí vẹ̀ we, whlẹn ẹn to oji aga!” 11  E sọ biọ Jelusalẹm, to tẹmpli lọ mẹ; e sọ pọ́n onú lẹpo lẹdo pé, podọ dile gànmẹ ko yì, e tọ́nyi Bẹtani po omẹ wiawe lẹ po. 12  To aihọngbè, to whenue yé ko tọ́n sọn Bẹtani, huvẹ hù i. 13  Podọ e mọ ovòtin de he tindo amà sọn olá, e sọ yì nado pọ́n eyin vlavo e na mọ nude to e ji. Ṣigba, to whenue e wá e kọ̀n, e ma mọ nude to e ji adavo amà lẹ kẹdẹ, na ovò sinsẹ́n whenu ma ko wá. 14  Enẹwutu, e dọna atin lọ dọmọ: “Mẹdepope sọ dù sinsẹ́n to hiẹ ji gbede ba blo.” Devi etọn lẹ sọ to sisè. 15  Todin, yé wá Jelusalẹm. Ewọ biọ tẹmpli lọ mẹ to finẹ bo jẹ mẹhe to nusà po mẹhe to nuhọ̀ to tẹmpli lọ mẹ lẹ po yàn jẹgbonu ji, podọ e takitina tafo akuẹdiọtọ lẹ po aisinnu mẹhe to apoe sà lẹ po tọn lẹ; 16  podọ e ma nọ dike mẹdepope ni hẹn onú depope gbọn tẹmpli lọ mẹ wayi, 17  ṣigba e to mẹplọn bo to didọmọ: “Be e ma ko yin kinkàn dọ, ‘Ohọ̀ ṣie na yin yiylọdọ ohọ̀ odẹ̀ tọn na akọta lẹpo ya’? Ṣigba mìwlẹ ko hẹn ẹn zun odò jaguda lẹ tọn.” 18  Yẹwhenọgán lẹ po wekantọ lẹ po sọ sè, bo jẹ lehe yé na wagbọn bo hù i dín ji; na yé to budisi i, na gbẹtọgun lọ lẹpo wẹ mẹpinplọn etọn nọ jiawu na to whepoponu. 19  Podọ eyin tenu ko dó, yé nọ tọ́nyi sọn tòdaho lọ mẹ. 20  Ṣigba to whenue yé juwajei to afọnnu fuu azán awetọ tọn, yé mọ bọ ovòtin lọ ko fiọ kakajẹ adọ̀ etọn lẹ ji. 21  Enẹwutu, na Pita flin wutu, e dọna ẹn dọmọ: “Labbi, pọ́n! ovòtin he hiẹ hodẹ̀do lọ ko fiọ.” 22  Jesu sọ gblọn bo dọna yé dọmọ: “Mì tindo yise to Jiwheyẹwhe mẹ. 23  Nugbo wẹ yẹn dọna mì dọ mẹdepope he dọna osó ehe dọ, ‘Sẹtẹn sọn fi bo yì ohù mẹ,’ bo masọ tindo ayihaawe to ahun etọn mẹ ṣigba bo tindo yise dọ nuhe emi dọ lọ na jọ, e na jọ domọ. 24  Enẹwutu wẹ yẹn dọna mì dọ, Onú lẹpo he mì hodẹ̀ bo biọ, mì ni yise dọ mì ko mọyi wẹ nkọ, mì nasọ mọ yé yí. 25  Podọ eyin mì to ote bo to dẹ̀ho, nudepope he mì tindo sọta mẹdepope, mì jona ẹn; na Otọ́ mìtọn he tin to olọn mẹ nido sọgan jo sẹ́nmẹjijẹ mìtọn lẹ na mì ga.” 26  ——* 27  Yé sọ vọ́ wá Jelusalẹm. Podọ dile e to zọnlinzin to tẹmpli mẹ, yẹwhenọgán lẹ po wekantọ lẹ po gọna sunnu mẹho lẹ wá e dè 28  bo jẹ didọna ẹn ji dọmọ: “Aṣẹ tẹwẹ hiẹ yí do to onú ehelẹ wà? kavi mẹnu wẹ na we aṣẹ ehe nado wà onú ehelẹ?” 29  Jesu dọna yé dọmọ: “Yẹn na kàn onú dopo biọ mì. Mì gblọnna mi, yẹnlọsu na dọ aṣẹ he yẹn yí do to onú ehelẹ wà na mì. 30  Baptẹm Johanu tọn, sọn olọn wẹ kavi sọn gbẹtọ lẹ dè? Mì na mi gblọndo.” 31  Enẹwutu, yé jẹ nulẹnpọn ji to yedelẹ ṣẹnṣẹn dọmọ: “Eyin mí dọ, ‘Sọn olọn,’ ewọ na dọ, ‘To whelọnu lo, naegbọn mì ma do yí i sè?’ 32  Ṣigba, be míwlẹ hà nado dọ, ‘Sọn gbẹtọ lẹ dè’?”—Yé to budisi gbẹtọgun lọ, na yemẹpo wẹ ko nọ pọ́n Johanu hlan di yẹwhegán de nugbo. 33  Todin, yé gblọnna Jesu dọmọ: “Mí ma yọnẹn.” Jesu sọ dọna yé dọmọ: “Yẹnlọsu ma to na dọ aṣẹ he yẹn yí do to onú ehelẹ wà na mì.”

Nudọnamẹ Odò Tọn

Mk 11:26 Pọ́n Mt 17:21, nudọnamẹ odò tọn.