Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Malku 10:1-52

10  E fọ́n sọn finẹ bo wá dogbó Jude tọn lẹ ji podọ to Jọdani godo, gbẹtọgun daho de sọ vọ́ pli do e dè, podọ dile e ko nọ wà do, e sọ jẹ nuplọn yé ji.  Todin, Falesi lẹ dọnsẹpọ, podọ nado whlé e pọ́n, yé jẹ kinkanse e ji vlavo e sọgbe hẹ osẹ́n na sunnu de nado gbẹ́ asi dai.  E gblọnna yé dọmọ: “Etẹwẹ Mose degbè etọn na mì?”  Yé dọmọ: “Mose na dotẹnmẹ nado nọ kàn owe gbẹdai tọn de bo gbẹ́ ẹ dai.”  Ṣigba Jesu dọna yé dọmọ: “Na ahun sinsinyẹn mìtọn wutu wẹ e do kàn gbedide ehe na mì.  Ṣigba, sọn bẹjẹeji nudida tọn ‘Ewọ basi yé asu po asi po.  Enẹwutu, sunnu na jo otọ́ po onọ̀ etọn po do,  bọ yé omẹ awe lẹ na lẹzun agbasalan dopo’; sọmọ bọ yé masọ yin agbasalan awe ba, adavo dopo.  Enẹwutu, nuhe Jiwheyẹwhe kọndopọ mì dike mẹde klan ẹn blo.” 10  To whenue e sọ vọ́ to whégbè, devi lẹ jẹ ohó kanse e ji gando ehe go. 11  E sọ dọna yé dọmọ: “Mẹdepope he gbẹ́ asi etọn dai bo wlealọ hẹ devo deayọ, bosọ waylando sọta ẹ, 12  podọ eyin yọnnu de, to whenue e gbẹ́ asu etọn dai godo, wlealọ hẹ devo, e deayọ.” 13  Todin, gbẹtọ lẹ jẹ yọpọvu lẹ hẹnwa e dè ji na e nido doalọ yé go; ṣigba devi lẹ gbẹnuna yé. 14  To whenue Jesu mọ ehe, e gblehomẹ bo dọna yé dọmọ: “Mì gbọ yọpọvu lẹ ni wá dè e; mì tẹnpọn nado glọnalina yé blo, na omẹ mọnkọtọn lẹ wẹ ahọluduta Jiwheyẹwhe tọn tin na. 15  Nugbo wẹ yẹn dọna mì, Mẹdepope he ma yí ahọluduta Jiwheyẹwhe tọn taidi yọpọvu de ma na biọ e mẹ to aliho depope mẹ.” 16  E sọ bẹ ovi lẹ do awà etọn lẹ mẹ bo jẹ didona yé ji, bosọ ze alọ etọn lẹ do yé ji. 17  Podọ dile e to yìyì to aliho ji, dawe de họ̀nwezun wá bo jẹklo to nukọn etọn bosọ kanbiọ ẹ dọmọ: “Mẹplọntọ Dagbe, etẹwẹ yẹn dona wà nado dugu ogbẹ̀ madopodo tọn?” 18  Jesu gblọnna ẹn dọmọ: “Naegbọn hiẹ do ylọ mi dọ mẹdagbe? Mẹdepope ma yin mẹdagbe, adavo omẹ dopo, yèdọ Jiwheyẹwhe. 19  Hiẹ yọ́n gbedide lọ lẹ he dọ, ‘Hiẹ hùhlọ̀n blo, Hiẹ deayọ blo, Hiẹ fìnnú blo, Hiẹ dekunnu lalo blo, Hiẹ hòmẹdu blo, Gbògbéna otọ́ po onọ̀ towe po.’” 20  Dawe lọ dọna ẹn dọmọ: “Mẹplọntọ, yẹn ko nọ yìn onú ehe lẹpo sọn jọja whenu ṣie gbọ́n.” 21  Jesu pọ́n ẹn bo yiwanna ẹn bosọ dọna ẹn dọmọ: “Onú dopo wẹ whè do we: Yì, bo sà nuhe hiẹ tindo lẹ bosọ na wamọnọ lẹ, hiẹ nasọ tindo adọkun to olọn mẹ, enẹgodo wá bo lẹzun hodotọ ṣie.” 22  Ṣigba, ohó lọ hẹn awuku i bọ e tọ́nyi po awubla po, na e tindo adọkunnu susu wutu. 23  To whenuena Jesu pọ́n lẹdo pé, e dọna devi etọn lẹ dọmọ: “Lehe e na vẹawuna mẹhe tindo akuẹ lẹ nado biọ ahọluduta Jiwheyẹwhe tọn mẹ do sọ!” 24  Ṣigba, ohó etọn lẹ paṣa devi etọn lẹ. Jesu sọ vọ́ dọna yé dọmọ: “Ovi ṣie lẹ emi, lehe e na vẹawu nado biọ ahọluduta Jiwheyẹwhe tọn mẹ do sọ! 25  E bọawuna kanklosọ́ de nado gbọn onù yẹnvi tọn mẹ hú na adọkunnọ de nado biọ ahọluduta Jiwheyẹwhe tọn mẹ.” 26  E sọ vọ́ paṣa yé tlala bọ yé dọna ẹn dọmọ: “Mẹnu wẹ sọgan yin whinwhlẹngán na taun tọn?” 27  To whenue Jesu pọ́n yé tlọlọ, e dọmọ: “Gbẹtọ lẹ wẹ ehe ma yọnbasi na, ṣigba e ma yinmọ na Jiwheyẹwhe, na onú lẹpo wẹ yọnbasi na Jiwheyẹwhe.” 28  Pita jẹ didọna ẹn ji dọmọ: “Pọ́n! Míwlẹ jo onú lẹpo do bo to hihodo we.” 29  Jesu dọmọ: “Nugbo wẹ yẹn dọna mì, Mẹdepope ma tin he jo owhé kavi nọvisunnu lẹ kavi nọviyọnnu lẹ kavi onọ̀ kavi otọ́ kavi ovi lẹ kavi aigba lẹ do na yẹn tọn podọ na wẹndagbe lọ tọn wutu 30  he ma na mọ donu kanweko to ojlẹ ehe mẹ todin, owhé lẹ, nọvisunnu lẹ, nọviyọnnu lẹ, onọ̀ lẹ, ovi lẹ, po aigba lẹ po, gọna homẹkẹn lẹ, podọ ogbẹ̀ madopodo to titonu he ja mẹ. 31  Ṣigba, mẹsusu he yin tintan na lẹzun godotọ, podọ godotọ na lẹzun tintan.” 32  Todin, yé to aliho ji jei Jelusalẹm, Jesu to yìyì to nukọn yetọn, awú sọ ji yé; ṣigba mẹhe hodo yé lẹ jẹ budi ji. E sọ vọ́ plan omẹ wiawe lẹ dovo bo jẹ nuhe dona jọ do e go lẹ dọna yé ji dọmọ: 33  “Todin, mí hẹji jei Jelusalẹm, podọ Visunnu gbẹtọ tọn na yin zizejo na yẹwhenọgán lẹ po wekantọ lẹ po, bọ yé na gblewhẹ okú tọn do e bo na ze e jo na omẹ akọta lẹ tọn, 34  yé nasọ yí i do davlẹ bo túntán do e go bosọ hò e bo hù i, ṣigba to azán atọ̀n godo, e na fọ́n.” 35  Jakọbu po Johanu po, visunnu Zebede tọn awe lẹ sọ wá e dè bo dọna ẹn dọmọ: “Mẹplọntọ, mí jlo dọ hiẹ ni wà nudepope he mí biọ we na mí.” 36  E dọna yé dọmọ: “Etẹwẹ mì jlo dọ yẹn ni wà na mì?” 37  Yé dọna ẹn dọmọ: “Dike mí ni sinai, dopo to adusilọ towe mẹ podọ awetọ to amiyọnlọ towe mẹ to gigo towe mẹ.” 38  Ṣigba Jesu dọna yé dọmọ: “Mìwlẹ ma yọ́n nuhe biọ mì te. Be mìwlẹ penugo nado nù kọfo he yẹn to nùnù lọ, kavi nado yin bibaptizi po baptẹm he yè to yíyí do baptizi mi lọ po ya?” 39  Yé dọna ẹn dọmọ: “Mí penugo.” Enẹwutu Jesu dọna yé dọmọ: “Mì na nù kọfo he yẹn to nùnù, podọ mì na yin bibaptizi po baptẹm he yè to yíyí do baptizi mi lọ po. 40  Ṣigba, nado sinai to adusi kavi amiyọn ṣie mẹ ma yin yẹn tọn nado namẹ gba, ṣigba otẹn ehelẹ tin na mẹhe e ko yin awú etọn wle dai na lẹ.” 41  Todin, to whenue omẹ ao he pò lẹ sè ehe, yé jẹ homẹgble ji do Jakọbu po Johanu po go. 42  Ṣigba, to whenue Jesu ko ylọ yé wá ede dè godo, e dọna yé dọmọ: “Mì yọnẹn dọ mẹhe sọawuhia nado to gandu do akọta lẹ ji nọ duklunọ do yé ji podọ omẹ gboogbo lẹ nọ paṣẹ glanglan do yé ji. 43  E ma yinmọ to mìwlẹ ṣẹnṣẹn gba; ṣigba mẹdepope he jlo na lẹzun kiklo to mì ṣẹnṣẹn dona yin lizọnyitọ mìtọn, 44  podọ mẹdepope he jlo na yin tintan to mì ṣẹnṣẹn dona yin afanumẹ mẹlẹpo tọn. 45  Na Visunnu gbẹtọ tọn lọsu wá, e ma yin nado yin lizọnyina gba, ṣigba nado yilizọn namẹ bo ze alindọn etọn jo taidi ofligọ de do ota mẹsusu tọn mẹ.” 46  Yé sọ wá Jẹliko. Ṣigba dile ewọ po devi etọn lẹ po gọna gbẹtọgun he yinukunkẹ de to tintọ́njẹgbonu sọn Jẹliko, Batime (visunnu Time tọn), he yin nukuntọ́nnọ nubiọdutọ de, tin to aisinsin to aliho tó. 47  To whenue e sè dọ Jesu Nazalẹti tọn wẹ, e jẹ awhádo ji dọmọ: “Wàlẹblanu na mi, Jesu, hiẹ Visunnu Davidi tọn!” 48  Enẹwutu, mẹsusu jẹ gbèdedo e ji sinsinyẹn nado nabọẹ; ṣigba e to awhádo gángán mapote dọmọ: “Wàlẹblanu na mi, hiẹ Visunnu Davidi tọn!” 49  To whenẹnu, Jesu nọte bo dọmọ: “Mì ylọ ẹ.” Yé sọ ylọ dawe nukuntọ́nnọ lọ, bo dọna ẹn dọmọ: “Gboadọ, fọnṣite, ewọ to yiylọ we.” 50  E de awugbó etọn dlan, bo zlọn fọ́n bosọ yì Jesu dè. 51  Jesu sọ gblọnna ẹn dọmọ: “Etẹwẹ hiẹ jlo dọ yẹn ni wà na we?” Dawe nukuntọ́nnọ lọ dọna ẹn dọmọ: “Labboni, dike yẹn ni mọnú.” 52  Jesu sọ dọna ẹn dọmọ: “Yì, yise towe ko hẹn we jẹgangan.” Podọ to afọdopolọji, e mọnú, bo jẹ hihodo e ji to aliho ji.

Nudọnamẹ Odò Tọn