Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Luku 8:1-56

8  To enẹgodo tlolo, e zingbejizọnlin sọn tòdaho de mẹ jẹ tòdaho de mẹ podọ sọn gbétatò de mẹ jẹ gbétatò de mẹ, bo to yẹwhehodọ bosọ to wẹndagbe ahọluduta Jiwheyẹwhe tọn lá. Omẹ wiawe lẹ sọ tin po e po,  gọna yọnnu delẹ he mẹ gbigbọ ylankan lẹ ko yin yinyan sọn bo ko yin azọ̀nhẹngbọna, yèdọ Malia he nọ yin yiylọdọ Magdaleni, mẹhe mẹ aovi ṣinawe ko tọ́njẹgbonu sọn,  podọ Joana asi Kuza, he yin nukunpedonugotọ Hẹlọdi tọn tọn, podọ Susana po yọnnu susu devo lẹ po, he nọ yí nutindo yetọn lẹ zan nado yilizọn na yé.  Todin, to whenue gbẹtọgun daho de po mẹhe hodo e sọn tòdaho de mẹ jẹ tòdaho de mẹ lẹ po ko pli dopọ, e yí apajlẹ de do dọho dọmọ:  “Nudotọ de tọ́nyi nado dó okún lẹ. Podọ dile e to núdo, delẹ to e mẹ flẹ jẹ aliho tó bo yin afọtùn e ji, bọ ohẹ̀ agahomẹ tọn lẹ ṣinyan ẹn dù.  Devo lẹ flẹ jẹ osé gángán ji, podọ, to whenue yé ko tọ́nkun godo, yé fiọ na yé ma mọ fifá wutu.  Devo lẹ flẹ jẹ owùn lẹ ṣẹnṣẹn, podọ owùn he whẹ́n dopọ hẹ yé lẹ gbidikọna yé.  Devo lẹ flẹ jẹ aigba dagbe ji, podọ, to whenue yé ko tọ́nkun godo, yé de sinsẹ́n tọ́n, yèdọ donu kanweko.” Dile e dọ onú ehelẹ pó godo, e zindonukọn nado dọmọ: “Mì gbọ ewọ he tindo otó nado dotoai, ni dotoai.”  Ṣigba, devi etọn lẹ jẹ nuhe apajlẹ ehe zẹẹmẹdo kanse e ji. 10  E dọmọ: “Mìwlẹ wẹ e ko yin nina nado mọnukunnujẹ aṣli wiwe ahọluduta Jiwheyẹwhe tọn lẹ mẹ, ṣigba na mẹhe pò lẹ, apajlẹ lẹ poun wẹ e yin na yé, na e nido yindọ, dile yé to pinpọn, yé nido sọgan pọ́n to ovọ́ mẹ podọ, dile yé to sisè, yé ni ma do doayi zẹẹmẹ lọ go blo. 11  Todin, nuhe apajlẹ lọ zẹẹmẹdo die: Okún lọ wẹ ohó Jiwheyẹwhe tọn. 12  Dehe tin to aliho tó lẹ wẹ mẹhe ko sè, enẹgodo Lẹgba wá bo ṣinyan ohó lọ sọn ahun yetọn mẹ na yé ni ma do yise bo yin whinwhlẹngán blo. 13  Dehe tin to osé gángán ji lẹ wẹ mẹhe, to whenue yé sè ohó lọ, yé yí ayajẹ do kẹalọyi i, ṣigba ehelẹ ma doadọ̀do; yé yise na ojlẹ de, ṣigba yé jai to whenue whlepọn wá. 14  Na nuhe dù dehe flẹ jẹ owùn lẹ ṣẹnṣẹn, ehelẹ wẹ mẹhe sè, ṣigba, na magbọjẹ po adọkunnu lẹ po gọna gbẹdudu aihọn ehe tọn lẹ duto yé ji wutu, yé yin kọgbidina mlẹnmlẹn bọ sinsẹ́n yetọn gboawupo nado whẹ́n. 15  Na nuhe dù dehe tin to aigba dagbe ji, ehelẹ wẹ mẹhe, to whenue yé ko yí ahun he yọ́n bosọ yin dagbe do sè ohó lọ godo, yé yí i hẹn bo yí akọndonanu do de sinsẹ́n tọ́n. 16  “Mẹdepope ma nọ tá miyọ́ngbán, bo nọ ṣinyọnnudo e kavi ze e do adọ́zan de glọ, ṣigba e nọ ze e do miyọ́ngbántin ji, na mẹhe to whégbè biọ lẹ nido sọgan mọ hinhọ́n. 17  Na nudepope ma tin to nuglọ he ma na wá yin didehia, mọdopolọ nudepope ma ko yin whiwhla po sọwhiwhe po he ma na wá yin yinyọnẹn bo yin hinhẹn jẹ gbangba. 18  Enẹwutu, mì payi lehe mì nọ dotoai do go; na mẹdepope he tindo, e na yin nina ẹn dogọ, ṣigba mẹdepope he ma tindo, yèdọ nuhe e tlẹ lẹndọ emi tindo na yin yíyí sọn e si.” 19  Todin, onọ̀ etọn po nọvisunnu etọn lẹ po ja e dè, ṣigba yé ma penugo nado wá e dè na gbẹtọgun lọ wutu. 20  Enẹwutu, ewọ yin didọna dọmọ: “Onọ̀ towe po nọvisunnu towe lẹ po to ote to gbonu bo to jijlo nado mọ we.” 21  E gblọnna yé dọmọ: “Onọ̀ ṣie po nọvisunnu ṣie lẹ po wẹ omẹ ehelẹ he sè ohó Jiwheyẹwhe tọn bo basi i.” 22  To azán enẹlẹ dopo gbè, ewọ po devi etọn lẹ po biọ tọjihun de mẹ, e sọ dọna yé dọmọ: “Mì gbọ mí ni dasá yì awà awetọ tándo lọ tọn ji.” Enẹwutu, yé súnhún. 23  Ṣigba, dile yé to yìyì, e damlọn. Todin, yujẹhọn sinsinyẹn de fọ́n to tándo lọ ji, podọ osin jẹ ohún lọ gọ́ ji bọ yé tin to owù mẹ. 24  To godo mẹ, yé yì e dè bo fọ́n ẹn, bosọ dọmọ: “Nuplọnmẹtọ, Nuplọnmẹtọ, mí to na dọ̀n!” To whenue e fọ́n, e gbẹnuna jẹhọn lọ po zingidi osin tọn lọ po, bọ yé nọ whii, bosọ nabọẹ. 25  To whenẹnu, e dọna yé dọmọ: “Fie wẹ yise mìtọn te?” Ṣigba, obu jẹ yé ji, bọ awuji yé, yé sọ to didọna ode awetọ dọmọ: “Mẹnu wẹ ehe na taun tọn, na e tlẹ nọ degbè do jẹhọn po osin po, bọ yé nọ setonuna ẹn?” 26  Yé sọ glinhún do huto to otò Gelazeninu lẹ tọn mẹ, he pannukọn Galili. 27  Ṣigba, dile e jẹte do agé, dawe de sọn tòdaho lọ mẹ he tindo aovi lẹ wá pé e. Podọ ewọ ma ko dó avọ̀ na ojlẹ de, bo ma nọ nọ̀ whégbè, ṣigba yọdò lẹ ṣẹnṣẹn. 28  To whenue e mọ Jesu, e dawhá po ogbè lélé po bo jẹklo to nukọn etọn, bosọ yí ogbè lélé do dọmọ: “Etẹwẹ yẹn tindo nado wà hẹ we, hiẹ Jesu Visunnu Jiwheyẹwhe Gigogán lọ tọn? Yẹn vẹ̀ we, a sayana mi blo.” 29  (Na e ko to gbede do gbigbọ mawé lọ nado tọ́njẹgbonu sọn dawe lọ mẹ. Na e ko to tuklado e sinsinyẹn na ojlẹ dindẹn, podọ whlasusu wẹ yè ko yí gẹdẹ lẹ po afọgàn lẹ po do blá ẹ bo nọ to ṣiṣọ́ ẹ, ṣigba e nọ wẹ́n gẹdẹ lọ lẹ bo nọ yin anadena gbọn aovi lọ dali yì fihe to olá lẹ.) 30  Jesu kanse e dọmọ: “Nawẹ hiẹ nọ yin?” E dọmọ: “Awhànpa,” na aovi susu wẹ ko biọ ewọ mẹ wutu. 31  Podọ yé to vivẹ ẹ mapote ma nado degbè dọ yé ni yì odò mapote mẹ. 32  Todin, pipli ohàn tọn he yinukunkẹ de to núdù to finẹ to osó lọ ji; enẹwutu, yé vẹ̀ ẹ nado dike yé ni biọ yé mẹ. E sọ nagbè yé. 33  To whenẹnu, aovi lọ lẹ tọ́njẹgbonu sọn dawe lọ mẹ bo biọ ohàn lọ lẹ mẹ, pipli lọ sọ hozín yì pópló lọ tónu bo flẹ jẹ tándo lọ mẹ bosọ siọ do osin mẹ. 34  Ṣigba, to whenue kanlinyìntọ lọ lẹ mọ nuhe jọ, yé họnyi bo na linlin etọn to tòdaho lọ mẹ podọ to glètoho lọ mẹ. 35  Enẹgodo, gbẹtọ lẹ wá nado pọ́n nuhe jọ, yé sọ wá Jesu dè bo mọ dawe lọ he mẹ aovi lọ yin yinyan jẹgbonu sọn, e dó avọ̀ bọ ayiha etọn ko gọwá, bọ e to aisinsin to afọ Jesu tọn lẹ kọ̀n; yé sọ dibu. 36  Mẹhe mọ nuhe jọ lọ lẹ dọ lehe dawe he tindo gbigbọ aovi tọn lọ yin hinhẹn jẹgangan do na yé. 37  Enẹwutu, gbẹtọgun he wá sọn lẹdo otò Gelazeninu lẹ tọn mẹ lẹpo biọ to e si nado yì sọn yé dè, na obu sinsinyẹn he jẹ yé ji lọ wutu. To whenẹnu, e biọ tọjihun lọ mẹ bo lẹkọ. 38  Ṣigba, dawe he mẹ aovi lẹ ko tọ́njẹgbonu sọn lọ to vivẹ ẹ mapote nado nọ zọnhẹ ẹ; ṣigba e do dawe lọ hlan, bo dọmọ: 39  “Lẹkọyi owhé towe gbè, bo nọ to nuhe Jiwheyẹwhe ko wà na we lẹ dọ.” Enẹwutu, e yì, bo to nuhe Jesu ko wà na ẹn lẹ lá lẹdo tòdaho lọ pete. 40  To whenue Jesu lẹkọwa, gbẹtọgun lọ lẹ yí homẹdagbe do yí i, na yemẹpo wẹ to nukundo e. 41  Ṣigba, pọ́n! dawe de he nọ yin Jailu wá, podọ dawe ehe yin ogán sinagọgu tọn de. Ewọ sọ jẹklo to afọ Jesu tọn lẹ kọ̀n bo jẹ vivẹ ẹ ji nado wá owhé etọn gbè, 42  na e tindo viyọnnu dopo akàn he yin owhe wiawe mẹvi de bọ e to kúdonu. Dile e to yìyì, gbẹtọgun lọ lẹ há do e. 43  Podọ nawe de, he ko to hùndi na owhe wiawe, he ma ko penugo nado mọ pọngbọ sọn mẹdepope dè, 44  gbọn godo etọn bo doalọ okẹ̀yẹ̀ awugbó etọn tọn go, hùndidi etọn sọ doalọte to afọdopolọji. 45  Enẹwutu Jesu dọmọ: “Mẹnu wẹ doalọ go e?” To whenue yemẹpo to mimọ́n, Pita dọmọ: “Nuplọnmẹtọ, gbẹtọgun lọ lẹ wẹ to hihá do we bosọ to finfinyọ́n we.” 46  Ṣogan, Jesu dọmọ: “Mẹde doalọ go e, na yẹn mọdọ huhlọn tọ́n sọn go e.” 47  To whenue yọnnu lọ mọdọ yè ko doayi emi go, e wá po obu po bo jẹklo to nukọnna ẹn bosọ dọ to gbẹtọ lẹpo nukọn nuhewutu e doalọ e go podọ lehe e yin azọ̀nhẹngbọna to afọdopolọji do. 48  Ṣigba, e dọna ẹn dọmọ: “Viyọnnu ṣie, yise towe ko hẹn we jẹgangan; yì to jijọho mẹ.” 49  Dile e gbẹ́ pò to hodọ, afọzedaitọ ogán sinagọgu tọn lọ tọn de wá, bo dọmọ: “Viyọnnu towe ko kú; a sọ dotukla mẹplọntọ ba blo.” 50  To whenue Jesu sè ehe, e gblọnna ẹn dọmọ: “A dibu blo, saa ko tindo yise poun, ewọ nasọ yin whinwhlẹngán.” 51  To whenue e jẹ owhé lọ gbè, e ma dike mẹdepope ni hodo e biọ họmẹ adavo Pita, Johanu po Jakọbu po gọna otọ́ po onọ̀ viyọnnu lọ tọn po. 52  Ṣigba, gbẹtọ lẹpo to avivi bo to awubla dohia na ewọ tọn wutu. Enẹwutu, e dọmọ: “Mì sọ viavi ba blo, na ewọ ma kú gba ṣigba amlọndọ wẹ e te.” 53  Enẹwutu, yé jẹ ṣinṣàn ẹn kò ji, na yé yọnẹn dọ e ko kú. 54  Ṣigba, e hẹn alọ etọn go bo ylọ ẹ bosọ dọmọ: “Viyọnnu, fọ́n!” 55  Gbigbọ etọn sọ gọ̀ biọ e mẹ, bọ e fọ́n to afọdopolọji, ewọ sọ degbè dọ nude ni yin nina ẹn nado dù. 56  Podọ, ayajẹ mẹjitọ etọn lẹ tọn gọfla; ṣigba e dọna yé ma nado dọ nuhe jọ lọ na mẹdepope.

Nudọnamẹ Odò Tọn