Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Luku 6:1-49

6  Todin, to gbọjẹzan de gbè, e jugbọn likun-gle lẹ mẹ wá jei, devi etọn lẹ sọ jẹ ota likun tọn lẹ wẹ́n ji bo to dùdù, bosọ to fiflé yé po alọ yetọn lẹ po.  Enẹwutu, delẹ to Falesi lẹ mẹ dọmọ: “Naegbọn mìwlẹ do to nuhe ma sọgbe hẹ osẹ́n wà to gbọjẹzangbe?”  Ṣigba, Jesu gblọnna yé dọmọ: “Be mìwlẹ ma ko hia nuhe Davidi wà to whenue huvẹ hù ewọ po mẹhe tin to e dè lẹ po gbede ya?  Lehe e biọ ohọ̀ Jiwheyẹwhe tọn mẹ do bo yí akla didetọn lẹ bosọ dù bo na delẹ mẹhe tin to e dè lẹ, ehe ma sọgbe hẹ osẹ́n na mẹdepope nado dù adavo yẹwhenọ lẹ kẹdẹ?”  E sọ dọna yé dọmọ: “Visunnu gbẹtọ tọn wẹ Oklunọ gbọjẹzan tọn.”  To gbọjẹzan devo gbè, e biọ sinagọgu mẹ bo jẹ mẹplọn ji. Podọ dawe de tin to finẹ he adusilọ etọn kúsẹ́.  Todin, wekantọ lẹ po Falesi lẹ po to ṣiṣọ́ ẹ sinsinyẹn nado pọ́n eyin e na hẹnazọ̀ngbọnamẹ to gbọjẹzangbe, na yé nido sọgan mọ nuhe yé na yí do sawhẹdokọna ẹn.  Ṣigba, ewọ yọ́n linlẹn yetọn, ṣogan e dọna dawe he alọ etọn kúsẹ́ lọ dọmọ: “Fọnṣite bo nọte to ṣẹnṣẹn.” Ewọ sọ fọ́n bo ṣite.  To whenẹnu, Jesu dọna yé dọmọ: “Yẹn na kàn nude sè mì, Be e sọgbe hẹ osẹ́n nado wà dagbe kavi nado wà oylan, nado whlẹn kavi nado hù alindọn de, to gbọjẹzangbe ya?” 10  Podọ, to whenue e pọ́n yemẹpo hlan lẹdo pé godo, e dọna dawe lọ dọmọ: “Dlẹnalọ towe.” Ewọ sọ wàmọ, bọ alọ etọn yin hinhẹn gọ̀ jẹgangan. 11  Ṣigba, yé gọ́ na adi, podọ yé jẹ hodọ ji hẹ ode awetọ yetọn gando nuhe yé sọgan wà na Jesu go. 12  To azán enẹlẹ gblamẹ, e yì osó ji nado hodẹ̀, e sọ yí ozán lọ blebu do hodẹ̀ hlan Jiwheyẹwhe. 13  Ṣigba, to whenue ai ko họ́n, e ylọ devi etọn lẹ bo de omẹ wiawe he e sọ ylọdọ “apọsteli lẹ” sọn yé mẹ: 14  Simọni, mẹhe e sọ ylọdọ Pita, po Andle nọvisunnu etọn po, podọ Jakọbu po Johanu po, podọ Filippi po Batelemi po, 15  podọ Matiu po Tọmasi po, podọ Jakọbu visunnu Alfe tọn, po Simọni mẹhe nọ yin “zohunhunnọ lọ” po, 16  podọ Juda visunnu Jakọbu tọn, po Juda Iskaliọti po, mẹhe lẹzun pàdutọ. 17  Podọ e jẹte po yé po bo ṣite to fihe to flala de, podọ devi etọn susugege to finẹ, gọna gbẹtọgun daho de sọn Jude lẹpo, po Jelusalẹm po, gọna lẹdo Tile po Sidoni po tọn he to huto lẹ, yèdọ mẹhe wá nado sè ohó etọn bo yin azọ̀nhẹngbọna lẹ. 18  Mẹhe gbigbọ mawé lẹ to tuklado lẹ lọsu yin azọ̀nhẹngbọna. 19  Podọ gbẹtọgun lọ lẹpo wẹ to dindin nado doalọ e go, na huhlọn to tintọ́njẹgbonu sọn ewọ mẹ bo to azọ̀nhẹngbọna yemẹpo. 20  Ewọ sọ ze nukun etọn lẹ daga bo pọ́n devi etọn lẹ bosọ jẹ didọ ji dọmọ: “Ayajẹnọ wẹ mì wamọnọ lẹ, na mìtọn wẹ ahọluduta Jiwheyẹwhe tọn. 21  “Ayajẹnọ wẹ mì mẹhe huvẹ to hùhù todin lẹ, na mì na gọ́ho. “Ayajẹnọ wẹ mì mẹhe to avivi todin lẹ, na mì na konu. 22  “Ayajẹnọ wẹ mìwlẹ to whedepopenu he gbẹtọ lẹ gbẹwanna mì, podọ whedepopenu he yé de mì sọn ogbẹ́ yetọn mẹ bo vlẹ mì kò bosọ kọnmasin do oyín mìtọn go taidi mẹylankan na Visunnu gbẹtọ tọn wutu. 23  Mì jaya to azán enẹ gbè bo lọ́n, na, pọ́n! daho wẹ ale mìtọn to olọn mẹ, na onú dopolọ lẹ wẹ tọgbo yetọn lẹ ko nọ wà na yẹwhegán lẹ. 24  “Ṣigba, dindọn hlan mì adọkunnọ lẹ, na mì ko mọ homẹmiọnnamẹ mìtọn yí to gigọ́ mẹ. 25  “Dindọn hlan mì mẹhe gọ́ho todin lẹ, na huvẹ na hù mì. “Dindọn, hlan mì mẹhe to nuko todin lẹ, na mì na nọ aluẹmẹ bo viavi. 26  “Dindọn, hlan mì to whedepopenu he gbẹtọ lẹpo to ohó mìtọn dagbe dọ, na onú ehelẹ nkọ wẹ tọgbo yetọn lẹ wà na yẹwhegán lalo lẹ. 27  “Ṣigba, yẹn dọna mì mẹhe to todoai lẹ dọ, Mì zindonukọn nado nọ yiwanna kẹntọ mìtọn lẹ, nado nọ wà dagbe na mẹhe gbẹwanna mì lẹ, 28  nado nọ dona mẹhe to dẹ̀hodo mì lẹ, bo nọ hodẹ̀ na mẹhe to zùnzùn mì lẹ. 29  Mẹhe hò alaka dopo na we, lẹ́ awetọ na ẹn ga; podọ mẹhe yí awugbó towe, a whlẹn awù odò tọn towe lọsu sọn e si blo. 30  Nọ nanú mẹdepope he to nubiọ we, podọ mẹhe yí onú towe lẹ, a kàn yé biọ sọn e si blo. 31  “Humọ, kẹdẹdile mìwlẹ jlo dọ gbẹtọ lẹ ni nọ wà na mì do, mọ wẹ mì ni nọ wà na yé do. 32  “Podọ eyin mì nọ yiwanna mẹhe yiwanna mì lẹ, ale tẹwẹ to e mẹ na mì? Na ylandonọ lẹ lọsu nọ yiwanna mẹhe yiwanna yé. 33  Podọ eyin mì nọ wà dagbe na mẹhe to dagbe wà na mì lẹ, ale tẹwẹ to e mẹ na mì taun? Ylandonọ lẹ lọsu nọ wà onú dopolọ. 34  Humọ, eyin mì nọ yàn matin akuẹvi na mẹhe si mì tindo todido nado mọyi sọn lẹ, ale tẹwẹ to e mẹ na mì? Ylandonọ lẹ lọsu nọ yàn matin akuẹvi na ylandonọ lẹ, na yé nido sọgan mọ ẹn yí lẹkọ. 35  To vogbingbọn mẹ, mì zindonukọn nado nọ yiwanna kẹntọ mìtọn lẹ podọ nado nọ wà dagbe bo nọ yàn namẹ matin akuẹvi, matin todido nado mọ nudepope yí lẹkọ; podọ ale mìtọn na yin daho, bọ mì na yin visunnu Gigogán lọ tọn lẹ, na ewọ nọ yin homẹdagbenọ hlan mayọndagbenọ lẹ po mẹylankan lẹ po. 36  Mì zindonukọn nado to lẹblanunọ yin, kẹdẹdile Otọ́ mìtọn yin lẹblanunọ do. 37  “Humọ, mì sọ dawhẹnamẹ ba blo, mì ma nasọ yin whẹdana to aliho depope mẹ; podọ mì sọ gblewhẹdomẹ ba blo, mì ma nasọ yin whẹgbledo to aliho depope mẹ. Mì zindonukọn nado nọ tundote, podọ mì na yin tuntundote. 38  Mì nọ namẹ, gbẹtọ lẹ nasọ na mì. Yé na kọ̀n nuhe yin jijlẹ ganji, he yè zíndo odò, bo whàn dopọ bosọ gọfla do akọ̀n na mì. Na nujlẹnu he mì to yíyí do jlẹ namẹ wẹ yé na yí do jlẹ na mì ga.” 39  Enẹgodo, e sọ na apajlẹ de yé ga dọmọ: “Nukuntọ́nnọ ma sọgan do ali hia nukuntọ́nnọ, kavi e sọgan wàmọ wẹ? Yé omẹ awe lẹ na jai do odò mẹ, kavi e ma yin mọ wẹ? 40  Nuplọntọ de ma nọ hú mẹplọntọ etọn, ṣigba mẹdepope he yin pinplọn ganji nọ taidi mẹplọntọ etọn. 41  To whelọnu lo, naegbọn hiẹ do to núyọ he tin to nukun mẹmẹsunnu towe tọn ji pọ́n, ṣigba bo ma hò atinpo he tin to nukun towe titi ji tọn pọ́n? 42  Nawẹ hiẹ sọgan dọna mẹmẹsunnu towe do dọ, ‘Mẹmẹsunnu, dike ma de núyọ he tin to nukun towe ji sẹ̀,’ to whenuena hiẹ lọsu ma to atinpo he tin to nukun towe ji lọ pọ́n? Yẹnuwatọ! De atinpo sẹ̀ sọn nukun towe titi ji whẹ́, podọ to enẹgodo hiẹ na mọnú gblegede nado de núyọ he tin to nukun mẹmẹsunnu towe tọn ji lọ sẹ̀. 43  “Na atin dagbe de ma tin he nọ de sinsẹ́n ylankan tọ́n; mọdopolọ atin ylankan de ma tin he nọ de sinsẹ́n dagbe tọ́n. 44  Na atin dopodopo wẹ nọ yin yinyọnẹn gbọn sinsẹ́n etọn titi dali. Di apajlẹ, gbẹtọ lẹ ma nọ gbẹ̀n ovò sinsẹ́n lẹ to owùn lẹ ji gba, mọdopolọ yé ma nọ gbẹ̀n ovẹn sinsẹ́n to wùnkan mẹ. 45  Omẹ dagbe nọ de onú dagbe lẹ tọ́n sọn adọkunnu dagbe he to ahun etọn mẹ lẹ mẹ, ṣigba omẹ ylankan nọ de onú ylankan lẹ tọ́n sọn adọkunnu ylankan etọn lẹ mẹ; na sọn susugege nuhe tin to ahun mẹ lẹ tọn mẹ wẹ onù nọ dọtọ́n. 46  “To whelọnu lo, naegbọn mìwlẹ do nọ ylọ mi dọ ‘Oklunọ! Oklunọ!’ ṣigba bo ma wà onú he yẹn dọ lẹ? 47  Mẹdepope he wá dè e bo sè ohó ṣie lẹ bosọ basi yé, yẹn na do mẹhe nkọ ewọ yin hia mì: 48  Ewọ taidi dawe de he to ohọ̀ gbá, he kùn odò he yìdo sisosiso bo dó dodonu do osé gángán ji. Enẹwutu, to whenue singigọ wá, tọ̀sisa lọ hò jẹ ohọ̀ lọ go, ṣigba e ma sinyẹn sọmọ nado whàn ẹn, na e yin gbigbá ganji wutu. 49  To alọ devo mẹ, ewọ he sè bo ma basi i, tin taidi dawe he gbá ohọ̀ do aigba ji matin dodonu de. Tọ̀sisa hò jẹ e go, podọ to afọdopolọji, e họ́, gbakija ohọ̀ enẹ tọn sọ yin daho.”

Nudọnamẹ Odò Tọn