Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Luku 5:1-39

5  To ojlẹ de mẹ, to whenuena gbẹtọgun lọ dọnsẹpọ ẹ pẹkipẹki bo to todoaina ohó Jiwheyẹwhe tọn, ewọ to ote to tándo Genezalẹti tọn tó.  Ewọ sọ mọ tọjihun awe glin do tándo lọ tó, ṣigba whèhutọ lọ lẹ ko tọ́n sọn yé mẹ bo to odọ̀ yetọn lẹ klọ́.  To whenue e biọ dopo to tọjihun lọ lẹ mẹ, ehe yin Simọni tọn, e dọna ẹn nado sẹ̀ ohún lọ sọn agé vude. Enẹgodo, e sinai bo jẹ gbẹtọgun lọ lẹ plọn ji sọn tọjihun lọ mẹ.  To whenue e doalọtena hodidọ, e dọna Simọni dọmọ: “Sẹ̀ ohún lọ yì fihe siso, na mì ni yìn odọ̀ mìtọn lẹ nado wle whèvi.”  Ṣigba, Simọni gblọn dọmọ: “Nuplọnmẹtọ, ozán lọ pete wẹ mí ko yí do jẹtukla bo ma wle nudepope, ṣigba na hiẹ degbè wutu, yẹn na yìn odọ̀ lọ lẹ.”  Podọ to whenue yé wà ehe, yé wle whèvi susugege. Na taun tọn, odọ̀ yetọn lẹ jẹ tintlẹ́n ji.  Enẹwutu, yé mìalọ hlan hagbẹ yetọn he to tọjihun awetọ lọ mẹ lẹ nado wá gọalọna yé; yé sọ wá, podọ whèvi lọ lẹ gọ́ tọjihun awe lọ lẹ, sọmọ bọ yé jẹ sisiọ ji.  To whenue Simọni Pita mọ ehe, e họ́jai to kligonu Jesu tọn lẹ kọ̀n, bo dọmọ: “Yì sọn dè e, Oklunọ, na ylandonọ de wẹ yẹn.”  Na whèvi he yé wle lọ lẹ wutu, avò daho vò ewọ po mẹhe tin to finẹ hẹ ẹ lẹ po, 10  gọna Jakọbu po Johanu po ga, he yin visunnu Zebede tọn lẹ, yèdọ azọ́nwatọgbẹ́ Simọni tọn lẹ. Ṣigba, Jesu dọna Simọni dọmọ: “A dibu ba blo. Na sọn din sọyi, hiẹ na nọ wle gbẹtọ lẹ gbẹ̀te.” 11  Enẹwutu, yé hẹn tọjihun lọ gọwá agé, bo jo onú lẹpo do bosọ hodo e. 12  To ojlẹ devo mẹ, to whenue e tin to dopo to tòdaho lọ lẹ mẹ, pọ́n! dawe de he to pòzọ̀n sinsinyẹn jẹ! To whenue e mọ Jesu, e ṣinyọ́n nukunmẹ etọn ai bo vẹ̀ ẹ dọmọ: “Oklunọ, eyin hiẹ jlo domọ, hiẹ sọgan hẹn mi zun wiwe.” 13  Enẹwutu, e dlẹnalọ etọn, bo doalọ dawe lọ go, bosọ dọmọ: “Yẹn jlo. Yin hinhẹn zun wiwe.” Podọ to afọdopolọji, pòzọ̀n etọn busẹ sọn e go. 14  E sọ gbẹ́ na dawe lọ ma nado dọna mẹdepope: “Ṣigba, yì bo do dewe hia yẹwhenọ, bosọ basi avọ́nunina to kọndopọ mẹ hẹ klọwé towe, kẹdẹdile Mose ko degbè etọn do, taidi kunnudide de hlan yé.” 15  Ṣigba, linlin etọn to gbigbayipe dogọ podọ gbẹtọgun daho lẹ nọ wá pli dopọ nado dotoai podọ nado yin azọ̀nhẹngbọna. 16  Ṣigba, e gbọṣi edeṣo to danfafa lẹ ji bo to dẹ̀ho. 17  Dile e to mẹplọn to gbèdopo, Falesi lẹ po osẹ́n plọnmẹtọ lẹ po he wá sọn gbétatò Galili tọn, Jude tọn gọna Jelusalẹm tọn lẹpo mẹ to aisinsin to finẹ; podọ huhlọn Jehovah tọn tin to ewọ ji nado hẹnazọ̀ngbọnamẹ. 18  Bo pọ́n! gbẹtọ lẹ hẹn dawe he to awukuzọ̀n jẹ de do adọ́zan de ji, podọ yé to aliho dín nado hẹn ẹn wá e dè bo ze e do nukọn etọn. 19  Enẹwutu, to whenue yé ma mọ aliho de nado hẹn ẹn wá e dè na gbẹtọgun lọ tọn wutu, yé hẹ aga yì ohọ̀ lọ ta, bo ze e jẹte to adọ́zan pẹvi de ji gbọn ozà-nùvo lọ mẹ do mẹhe tin to Jesu nukọn lẹ ṣẹnṣẹn. 20  Podọ to whenue e mọ yise yetọn, e dọmọ: “Dawe, ylando towe lẹ ko yin jijona we.” 21  To whenẹnu, wekantọ lẹ po Falesi lẹ po jẹ linlẹn ji dọmọ: “Mẹnu wẹ ehe, he to nùzan? Mẹnu wẹ sọgan jo ylando lẹ namẹ adavo Jiwheyẹwhe kẹdẹ?” 22  Ṣigba, na Jesu yọ́n linlẹn yetọn lẹ wutu, e gblọnna yé dọmọ: “Etẹ lẹn wẹ mìwlẹ te to ahun mìtọn mẹ? 23  Detẹ wẹ bọawu hugan, nado dọ dọ, ‘Ylando towe lẹ yin jijona we,’ kavi nado dọ dọ, ‘Fọ́n bo zinzọnlin’? 24  Ṣigba, na mìwlẹ nido yọnẹn dọ Visunnu gbẹtọ tọn tindo aṣẹ to aigba ji nado jo ylando lẹ namẹ—” e dọna awukuzọ̀njẹtọ lọ dọmọ: “Yẹn dọna we dọ, Fọ́n bo ze adọ́zan pẹvi towe bosọ yì owhé towe gbè.” 25  Podọ to afọdopolọji, e fọnṣite to nukọn yetọn, bo ze nuhe ji e nọ mlọnai do dai bosọ yì owhé etọn gbè, bo to gigopana Jiwheyẹwhe. 26  To whenẹnu, yemẹpo gọ́ na aglinjijẹ, bo jẹ gigopana Jiwheyẹwhe ji podọ yé gọ́ na obu bo dọmọ: “Mí mọ onú jiawu lẹ to egbé!” 27  Todin, to onú ehelẹ godo, e tọ́njẹgbonu bo mọ tòkuẹ-ṣinyantọ de he nọ yin Levi to aisinsin to tòkuẹ-ṣinyantẹn, e sọ dọna ẹn dọmọ: “Lẹzun hodotọ ṣie.” 28  Ewọ sọ jo onú lẹpo do, bo fọ́n bosọ to hihodo e. 29  Humọ, Levi wleawuna hùnwhẹ jonọyiyi tọn daho de na ẹn to owhé etọn gbè; podọ tòkuẹ-ṣinyantọ susu to finẹ bọ mẹdevo lẹ sọ jagla to núdùdù lọ kọ̀n hẹ yé. 30  To whenẹnu, Falesi lẹ po wekantọ yetọn lẹ po jẹ hùnhlún ji na devi etọn lẹ dọmọ: “Naegbọn mìwlẹ nọ dù bo nọ nù hẹ tòkuẹ-ṣinyantọ lẹ po ylandonọ lẹ po?” 31  Jesu gblọnna yé dọmọ: “Mẹhe to gángán lẹ ma nọ tindo nuhudo dotozọ́nwatọ tọn gba, adavo mẹhe to azọ̀njẹ lẹ. 32  Yẹn ma wá nado ylọ dodonọ lẹ gba, adavo ylandonọ lẹ hlan lẹnvọjọ kọ̀n.” 33  Yé dọna ẹn dọmọ: “Devi Johanu tọn lẹ nọ blanù gbọzangbọzan bo nọ basi ovẹvivẹ lẹ, mọjanwẹ Falesi lẹ tọn lọsu nọ wà do, ṣigba towe lẹ nọ dù bo nọ nù.” 34  Jesu dọna yé dọmọ: “Mì ma sọgan hẹn họntọn asisunọ yọyọ tọn lẹ nado blanù to whenue asisunọ yọyọ lọ tin to yé dè, kavi mì sọgan wàmọ wẹ? 35  Ṣogan, na taun tọn, azán lẹ ja bọ yè na yí asisunọ yọyọ lọ sọn yé dè; whenẹnu wẹ yé na blanù to azán enẹlẹ gbè.” 36  Humọ, e zindonukọn nado na yé apajlẹ de dọmọ: “Mẹdepope ma nọ sán avọ̀nu sọn awugbó yọyọ de go bo nọ tọ̀ ẹ do awugbó hoho de go gba; ṣigba eyin e wàmọ, whenẹnu, avọ̀nu yọyọ lọ nọ tlẹ́n bọ avọ̀nu awugbó yọyọ lọ tọn ma nọ sọgbe hẹ hoho lọ. 37  Humọ, mẹdepope ma nọ kọ̀n ovẹn yọyọ do ayúgò hoho lẹ mẹ gba; ṣigba eyin e wàmọ, whenẹnu, ovẹn yọyọ na là ayúgò lọ lẹ, podọ ovẹn lọ na kọnyingbe bọ ayúgò lọ lẹ na gble. 38  Ṣigba, ovẹn yọyọ dona yin kinkọ̀n do ayúgò yọyọ lẹ mẹ. 39  Mẹdepope he nù ovẹn hoho ma nọ jlo yọyọ gba; na e nọ dọ, ‘Hoho lọ yọ́n hú.’”

Nudọnamẹ Odò Tọn