Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Luku 4:1-44

4  Todin, Jesu, he gọ́ na gbigbọ wiwe, lẹkọ sọn Jọdani, bọ gbigbọ plan ẹn dánpe gbọn danfafa ji  na azán kande, bọ e to yinyin whiwhlepọn gbọn Lẹgba dali. Humọ, e ma dù nudepope to azán enẹlẹ gblamẹ, enẹwutu, to whenue yé wá vivọnu, huvẹ hù i.  To whenẹnu, Lẹgba dọna ẹn dọmọ: “Eyin hiẹ yin visunnu Jiwheyẹwhe tọn de, dọna zannu ehelẹ dọ yé ni lẹzun akla.”  Ṣigba, Jesu gblọnna ẹn dọmọ: “E ko yin kinkàn dọ, ‘Gbẹtọ ma nọ nọgbẹ̀ gbọn akla kẹdẹ dali gba.’”  Enẹwutu, e hẹn ẹn yì fihe yiaga de bo do ahọluduta aigba ji tọn lẹpo hia ẹ to nukunwhiwhe dopo mẹ;  Lẹgba sọ dọna ẹn dọmọ: “Yẹn na na we aṣẹpipa ehe lẹpo po gigo yetọn po, na yé ko yin zizedo alọmẹ na mi, podọ mẹdepope he jlo mi wẹ yẹn na yí i na.  Enẹwutu, eyin hiẹ basi sinsẹ̀n whladopo to nukọn ṣie, popolẹpo na lẹzun towe.”  Jesu gblọnna ẹn dọmọ: “E ko yin kinkàn dọ, ‘Jehovah Jiwheyẹwhe towe wẹ hiẹ dona nọ sẹ̀n, podọ ewọ kẹdẹ wẹ hiẹ dona nọ wà sinsẹ̀nzọn wiwe hlan.’”  Todin, e plan ẹn yì Jelusalẹm bo hẹn ẹn ṣite to aga adó tẹmpli lọ tọn bosọ dọna ẹn dọmọ: “Eyin hiẹ yin visunnu Jiwheyẹwhe tọn de, lọ́n jẹte sọn fi; 10  na e ko yin kinkàn dọ, ‘Ewọ na degbena angẹli etọn lẹ na hiẹ tọn wutu, nado basi hihọ́na we,’ 11  bọ, ‘Yé na hẹn we do alọ yetọn lẹ mẹ, bọ hiẹ ma na klẹ́n afọ towe do zannu de go gbede.’” 12  Jesu gblọnna ẹn dọmọ: “E ko yin kinkàn dọ, ‘Hiẹ ma dona whlé Jehovah Jiwheyẹwhe towe pọ́n.’” 13  Enẹwutu, na Lẹgba ko dotana whlepọn lọ lẹpo wutu, e yì sọn e dè kakajẹ dotẹnmẹ hundote dagbe devo whenu. 14  Todin, Jesu lẹkọyi Galili to huhlọn gbigbọ lọ tọn mẹ. Onú dagbe lẹ sọ yin didọ gbayipe gando ewọ go to otò he lẹdo pé lẹpo mẹ. 15  Humọ, e jẹ mẹplọn ji to sinagọgu yetọn lẹ mẹ, bọ mẹlẹpo nọ gbògbéna ẹn. 16  Podọ e wá Nazalẹti, fie yè pọ́n e go whẹ́n te; podọ dile e ko yin aṣa etọn to gbọjẹzangbe do, e biọ sinagọgu mẹ, bo ṣite nado hiawe. 17  Enẹwutu, owe-hihá yẹwhegán Isaia tọn yin zize na ẹn, e sọ hùn owe-hihá lọ bo mọ fie e yin kinkàn do dọmọ: 18  “Gbigbọ Jehovah tọn tin to oji e, na e ko yiamisisadode mi nado lá wẹndagbe na wamọnọ lẹ, ewọ do mi hlan nado dọyẹwheho tundote tọn hlan kanlinmọ lẹ podọ nukunnumimọ tọn hlan nukuntọ́nnọ lẹ, nado tún mẹhe yin kọgbidina lẹ dote, 19  nado dọyẹwheho owhe alọkẹyi Jehovah tọn.” 20  To whenẹnu, e há owe-hihá lọ, bo gọ̀ ẹ jo na devizọnwatọ lọ bosọ sinai; nukun mẹhe to sinagọgu mẹ lẹpo tọn sọ to pinpọ́n ẹn tlintlin. 21  Enẹwutu, e jẹ didọna yé ji dọmọ: “Egbehe wẹ adà Owe-wiwe tọn he mì ṣẹṣẹ sè ehe yin hinhẹndi.” 22  Podọ, yemẹpo jẹ kunnu dagbe de ji gando ewọ go bọ awú sọ to jiji yé gando ohó ojọmiọn tọn he to tintọ́n sọn onù etọn mẹ lẹ go, bọ yé to didọmọ: “Ehe wẹ visunnu Josẹfu tọn, kavi e ma yin mọ wẹ?” 23  Enẹwutu, e dọna yé dọmọ: “Matin ayihaawe, mìwlẹ na yí apajlẹ ehe zan gando go e dọ, ‘Dotozọ́nwatọ, hẹnazọ̀ngbọna dewe; nuhe mí sè bọ yé jọ to Kapẹlnaumi lẹ, basi yé ga to otò towe titi mẹ tofi.’” 24  Ṣigba, e dọmọ: “Nugbo wẹ yẹn dọna mì dọ yẹwhegán depope ma nọ yin alọkẹyi to otò etọn titi mẹ gba. 25  Di apajlẹ, nugbo wẹ yẹn dọna mì dọ, Asuṣiọsi susu wẹ tin to Islaeli to azán Elija tọn lẹ gbè, to whenue olọn yin súsú na owhe atọ̀n po osun ṣidopo po, bọ huvẹ daho de tọ́n to aigba lẹpo ji, 26  ṣogan, Elija ma yin didohlan depope to yọnnu enẹlẹ mẹ dè gba, adavo hlan asuṣiọsi de dè to Zalefati to otò Sidoni tọn mẹ kẹdẹ. 27  Humọ, pòtọnọ susu wẹ tin to Islaeli to ojlẹ yẹwhegán Eliṣa tọn mẹ, ṣogan depope to yé mẹ ma yin kiklọwé, adavo Naamani dawe Silia tọn lọ.” 28  Todin, mẹhe to onú ehelẹ sè to sinagọgu mẹ lẹpo gblehomẹ tlala; 29  podọ yé fọ́n bo sisẹ́ ẹ jẹgbonu sọn tòdaho lọ mẹ, bosọ plan ẹn yì bẹbẹnu osó he ji tòdaho yetọn yin gbigbá do lọ tọn, nado sọgan sisẹ́ ẹ sọtado. 30  Ṣigba e gbọn ṣẹnṣẹn yetọn bo yì. 31  Podọ e jẹte yì Kapẹlnaumi, tòdaho Galili tọn de mẹ. E sọ to yé plọn to gbọjẹzangbe; 32  awú sọ ji yé gando aliho mẹpinplọn tọn etọn go, na e to hodọ po aṣẹ po wutu. 33  Todin, dawe de tin to sinagọgu mẹ, he tindo gbigbọ de, yèdọ gbigbọ mawé de, podọ e dawhá po ogbè lélé po dọmọ: 34  “Etẹwẹ míwlẹ tindo nado wà hẹ we, hiẹ Jesu Nazalẹti tọn? Be hiẹ wá nado và mí sudo wẹ? Yẹn yọ́n mẹhe hiẹ yin na taun tọn, hiẹ wẹ Omẹ Wiwe Jiwheyẹwhe tọn.” 35  Ṣigba, Jesu gbẹnuna ẹn dọmọ: “Nabọẹ, bo tọ́n sọn ewọ mẹ.” Enẹwutu, to whenue aovi lọ ko dlan ẹn do kọmẹ to ṣẹnṣẹn yetọn godo, e tọ́n sọn ewọ mẹ bo ma gbleawuna ẹn. 36  To whenẹnu, avò vò mẹlẹpo, bọ yé jẹ didọna ode awetọ yetọn ji dọmọ: “Ohó nankọ die, na e nọ yí aṣẹ po huhlọn po do degbè do gbigbọ mawé lẹ, bọ yé nọ tọ́njẹgbonu?” 37  Enẹwutu, linlin he gando e go lẹ to gbigbayipe gbọn filẹpo to otò he lẹdo pé lẹpo mẹ. 38  To whenue e ko tọ́n sọn tẹmpli lọ mẹ godo, e biọ owhé Simọni tọn gbè. Todin, agbasa-hùnmiyọ́n sinsinyẹn de to tuklado asi-nọ̀ Simọni tọn, yé sọ vẹ̀ ẹ na yọnnu lọ tọn wutu. 39  Enẹwutu, e dẹ́ do e ji bo gbẹnuna agbasa-hùnmiyọ́n lọ, bọ e yì sọn e ji. Yọnnu lọ sọ fọ́n to afọdopolọji bo jẹ lizọnyina yé ji. 40  Ṣigba, to whenue owhè ko to họyì, mẹhe tindo awutunọ he to azọ̀n voovo jẹ lẹpo hẹn yé wá e dè. E nọ hẹnazọ̀ngbọna yé gbọn alọ etọn lẹ zizedo dopodopo yetọn ji dali. 41  Aovi lẹ lọsu nọ tọ́njẹgbonu sọn mẹsusu mẹ, bo nọ to awhádo dọmọ: “Hiẹ wẹ Visunnu Jiwheyẹwhe tọn.” Ṣigba, ewọ nọ gbẹnuna yé, bo ma nọ dike yé ni dọho, na yé yọnẹn dọ ewọ wẹ Klisti wutu. 42  Ṣigba, to whenue ai ko họ́n, e tọ́njẹgbonu bo yì fihe to olá de. Ṣigba, gbẹtọgun lẹ jẹ dindin in pé ji kaka wá fihe e te, yé sọ tẹnpọn nado glọnalina ẹn ma nado yì sọn yé dè. 43  Ṣigba, e dọna yé dọmọ: “Yẹn dona yì tòdaho devo lẹ mẹ ga nado lá wẹndagbe ahọluduta Jiwheyẹwhe tọn, na ehe wutu wẹ yẹn do yin didohlan.” 44  Enẹwutu, e zindonukọn nado to yẹwhehodọ to sinagọgu Jude tọn lẹ mẹ.

Nudọnamẹ Odò Tọn