Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Luku 24:1-53

24  Ṣigba, to azán tintan* osẹ lọ tọn gbè, yé yì yọdò lọ kọ̀n to afọnnu fuu, bo hẹn nuwhẹ́nkun he yé ko wleawuna lẹ.  Ṣigba, yé mọ bọ zannu lọ ko yin bibli sẹ̀ sọn yọdò lọ nù,  podọ to whenue yé biọ e mẹ, yé ma mọ oṣiọ Oklunọ Jesu tọn.  To whenue yé jẹflumẹ na ehe wutu, pọ́n! dawe awe delẹ he dó avọ̀ he to sisẹ́ ṣite to yé dè.  Dile yọnnu lọ lẹ dibu bo dokọdò, dawe lọ lẹ dọna yé dọmọ: “Naegbọn mì to Mẹhe to ogbẹ̀ dín to oṣiọ lẹ mẹ?  [[Ewọ ma tin tofi, ṣigba ko yin finfọn.]]* Mì flin nuhe e dọna mì to whenue e gbẹ́ pò to Galili,  dọ Visunnu gbẹtọ tọn dona yin zize do alọ sunnu ylandonọ lẹ tọn mẹ bo yin whiwhè do núgo ṣogan na fọ́n to azán atọ̀ntọ gbè.”  Enẹwutu, yé flin nuhe e dọ lẹ,  yé sọ lẹkọ sọn yọdò lọ kọ̀n bo dọ onú ehe lẹpo na omẹ widopo lẹ gọna mẹhe pò lẹpo. 10  Yewlẹ wẹ Malia Magdaleni, Joana, po Malia onọ̀ Jakọbu tọn po. Podọ ga, yọnnu he pò to yé dè lẹ to onú ehelẹ dọna apọsteli lẹ. 11  Ṣigba, ohó ehelẹ sọawuhia taidi nulunu hlan yé bọ yé ma yí yọnnu lọ lẹ sè. 12  [[Ṣigba, Pita fọ́n bo họ̀nwezun yì yọdò lọ kọ̀n, podọ dile e dẹ́ hlan nukọn, e mọ alavọ lẹ kẹdẹ. Enẹwutu, e yì, bọ nuhe ko jọ lọ to pipaṣa ẹ.]]* 13  Ṣigba, pọ́n! to azán enẹ dopolọ gbè, awe to yé mẹ to gbejizọnlinzin jei gbétatò de he nọ yin Emausi mẹ, he to nuhugan kilomẹtlu widopo do Jelusalẹm, 14  podọ yé to hodọ hẹ ode awetọ do onú ehe lẹpo he ko jọ lẹ ji. 15  Todin, dile yé to hodọ bo to nulẹnpọn dopọ, Jesu lọsu dọnsẹpọ bo jẹ zọnlinzin hẹ yé ji; 16  ṣigba yé ma penugo nado yọ́n ewọ. 17  E dọna yé dọmọ: “Whẹho tẹlẹ ji wẹ mì to núdọ̀n do to mìdelẹ ṣẹnṣẹn dile mì to yìyì?” Yé sọ nọte ṣúdúdú bọ nukunmẹ yetọn kúṣiọ. 18  Mẹhe nọ yin Kleopasi gblọnna ẹn dọmọ: “Be jonọ de wẹ hiẹ bo nọ nọ̀ dewe ṣo to Jelusalẹm bọ hiẹ ma do yọ́n nuhe ko jọ to e mẹ to azán ehelẹ gbè ya?” 19  Ewọ sọ dọna yé dọmọ: “Onú tẹlẹ wẹ?” Yé dọna ẹn dọmọ: “Onú he gando Jesu Nazalẹti tọn go lẹ wẹ, mẹhe lẹzun yẹwhegán huhlọnnọ de to azọ́n po ohó po mẹ to Jiwheyẹwhe po gbẹtọ lẹpo po nukọn; 20  podọ lehe yẹwhenọgán mítọn lẹ po ogán lẹ po ze e jo na yè nido dawhẹ okú tọn na ẹn bo whè e do núgo do. 21  Ṣigba míwlẹ tindo todido dọ dawe ehe wẹ omẹ lọ he dona whlẹn Islaeli; mọwẹ, podọ gbọnvona ehe lẹpo, azán atọ̀ntọ die he onú ehelẹ ko jọ. 22  Humọ, yọnnu delẹ sọn mí mẹ sọ hẹn avò vò mí, na yé ko yì yọdò lọ kọ̀n to afọnnu fuu 23  ṣigba bo ma mọ oṣiọ etọn, podọ yé wá bo to didọ dọ yé sọ mọ numimọ jiawu angẹli lẹ tọn ga, he dọ dọ ewọ to ogbẹ̀. 24  Podọ ga, delẹ to mẹhe tin po mí po lẹ mẹ yì yọdò lọ kọ̀n; yé sọ mọ domọ, kẹdẹdile yọnnu lọ lẹ ko dọ do, ṣigba yé ma mọ ewọ.” 25  Enẹwutu, e dọna yé dọmọ: “Mì gugutọ podọ mì he ahun mìtọn tliji nado yí onú lẹpo he yẹwhegán lẹ dọ sè lẹ emi! 26  Be e ma yin dandan na Klisti nado jiya onú ehelẹ tọn podọ nado sọgan mọ gigo he jẹ lọ yí ya?” 27  Podọ e bẹjẹeji sọn Mose po Yẹwhegán lẹ po ji bo detana onú he gando ewọ lọsu go lẹ to Owe-wiwe lẹpo mẹ na yé. 28  To godo mẹ, yé dọnsẹpọ gbétatò lọ fie yé to gbejizọnlinzin jei, podọ e basi di dọ gbejizọnlin etọn gbẹ́ zindonukọn wẹ nkọ. 29  Ṣigba, yé jẹ kọ̀ji na ẹn, bo dọmọ: “Nọ mí dè, na owhè ko jai bọ ozán ko kú.” Enẹwutu, e biọ whégbè nado nọ yé dè. 30  Podọ dile e jagla hẹ yé to núdùdù kọ̀n, e yí akla, bo dona, bosọ wẹ́n ẹn bo jẹ yíyí na yé ji. 31  To whenẹnu, nukun yetọn lẹ hùn hezeheze bọ yé yọ́n ewọ; e sọ bu sọn ṣẹnṣẹn yetọn. 32  Yé sọ dọna ode awetọ dọmọ: “Be ahun mítọn ma yin whinwhàn sinsinyẹn dile ewọ to hodọna mí to aliho ji, bo to zẹẹmẹ Owe-wiwe lẹ tọn basi na mí ya?” 33  Podọ to gànhiho enẹ dopolọ mẹ, yé fọ́n bo lẹkọyi Jelusalẹm, yé sọ mọ omẹ widopo lọ lẹ po mẹhe pli dopọ hẹ yé lẹ po, 34  to didọmọ: “Na nugbo tọn, Oklunọ ko yin finfọn podọ e sọawuhia Simọni!” 35  Todin, yelọsu na linlin nuhe jọ to aliho ji lẹ tọn podọ lehe yé wá yọ́n ẹn gbọn to whenue e wẹ́n akla godo. 36  Dile yé to hodọ do onú ehelẹ ji, ewọ lọsu ṣite to ṣẹnṣẹn yetọn [[bo dọna yé dọmọ: “Jijọho ni tin hlan mì.”]]* 37  Ṣigba, na yé dibu bọ ahun yetọn gbàdo wutu, yé to linlẹn dọ gbigbọ de wẹ yé mọ. 38  Enẹwutu, e dọna yé dọmọ: “Naegbọn mì do biọ bẹwlu mẹ, podọ naegbọn mì do tindo ayihaawe to ahun mìtọn mẹ? 39  Mì pọ́n alọ ṣie po afọ ṣie lẹ po, dọ yẹnlọsu wẹ; mì doalọ go e bo pọ́n, na gbigbọ ma nọ tindo agbasalan po ohú lẹ po dile mì mọdọ yẹn tindo do.” 40  [[Podọ dile e dọ ehe, e do alọ etọn po afọ etọn lẹ po hia yé.]]* 41  Ṣigba, na yé ma gbẹsọ yise na ayajẹ yetọn gọfla bọ awú gbẹ́ to jiji yé wutu, e dọna yé dọmọ: “Be mì tindo nude to finẹ nado dù ya?” 42  Yé sọ ze whèvi hìhì de na ẹn; 43  ewọ sọ yí i bo dù i to nukun yetọn mẹ. 44  Todin, e dọna yé dọmọ: “Ehelẹ wẹ ohó ṣie lẹ he yẹn dọna mì whenue yẹn gbẹ́ pò to mì dè, dọ onú lẹpo he yin kinkàn do osẹ́n Mose tọn mẹ podọ do Yẹwhegán lẹ po Psalm lẹ po mẹ gando yẹn go dona yin hinhẹndi.” 45  To whenẹnu, e hùn ayiha yetọn to gigọ́ mẹ nado mọnukunnujẹ zẹẹmẹ Owe-wiwe lẹ tọn mẹ, 46  e sọ dọna yé dọmọ: “E ko yin kinkàn dole dọ Klisti na jiya bo na fọ́n sọn oṣiọ lẹ mẹ to azán atọ̀ntọ gbè, 47  podọ to dodonu oyín etọn tọn ji, yẹwheho lẹnvọjọ tọn na jona ylando lẹ tọn na yin didọ to akọta lẹpo mẹ—yèdọ bẹsọn Jelusalẹm, 48  mìwlẹ wẹ na yin kunnudetọ onú ehelẹ tọn. 49  Podọ, pọ́n! yẹn na do enẹ he Otọ́ ṣie ko dopagbe etọn hlan mì. Ṣigba mìwlẹ ni gbọṣi tòdaho lọ mẹ kaka mì nado mọ huhlọn yí sọn oji aga.” 50  Ṣigba, e plan yé kaka yì Bẹtani, ewọ sọ ze alọ etọn lẹ daga bo dona yé. 51  Dile e to didona yé, e to yìyì sọn yé dè bo jẹ yinyin zize yì olọn mẹ ji. 52  Yé sọ litaina ẹn bo yí ayajẹ daho do lẹkọ do Jelusalẹm. 53  Yé sọ gbọṣi tẹmpli mẹ bo to Jiwheyẹwhe pà.

Nudọnamẹ Odò Tọn

Luk 24:1* Pọ́n Mt 28:1, nudọnamẹ odò tọn.
Luk 24:6* Na zẹẹmẹ do glọ̀ndo awe topọ lẹ ji, pọ́n Luk 23:34, nudọnamẹ odò tọn.
Luk 24:12* Na zẹẹmẹ do glọ̀ndo awe topọ lẹ ji, pọ́n Luk 23:34, nudọnamẹ odò tọn.
Luk 24:36* Na zẹẹmẹ do glọ̀ndo awe topọ lẹ ji, pọ́n Luk 23:34, nudọnamẹ odò tọn.
Luk 24:40* Na zẹẹmẹ do glọ̀ndo awe topọ lẹ ji, pọ́n Luk 23:34, nudọnamẹ odò tọn.