Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Luku 23:1-56

23  Enẹwutu, gbẹtọgun lọ, yèdọ yemẹpo fọ́n bo plan ẹn yì Pilati dè.  To whenẹnu, yé jẹ whẹsadokọna ẹn ji, bo to didọmọ: “Mí mọ dawe ehe bọ e to gufinfọn hẹnwa akọta mítọn mẹ bo to gbigbẹ́ dọ yè ma dona na tòkuẹ hlan Sesali bosọ to didọ dọ ewọ wẹ Klisti ahọlu lọ.”  Todin, Pilati kanse e dọmọ: “Be hiẹ wẹ ahọlu Ju lẹ tọn ya?” Ewọ sọ gblọnna ẹn dọmọ: “Hiẹ lọsu wẹ dọ ẹ.”  To whenẹnu, Pilati dọna yẹwhenọgán lẹ po gbẹtọgun lọ lẹ po dọmọ: “Yẹn ma mọ sẹ́nhẹngba de to dawe ehe mẹ.”  Ṣigba, yé vọ́ tẹkudeji dọmọ: “E nọ hẹn gbẹtọ lẹ fọnadán gbọn nupinplọnmẹ lẹdo Jude lẹpo pé dali, yèdọ bẹsọn Galili kaka wáfi.”  To whenue Pilati sè enẹ, e kanse eyin Galilinu de wẹ dawe lọ,  podọ, to whenue e ko họnwun dọ aṣẹpipa Hẹlọdi* tọn glọ wẹ e wá sọn, e do e hlan Hẹlọdi dè, mẹhe ewọ lọsu tin to Jelusalẹm to azán enẹlẹ gbè.  To whenue Hẹlọdi mọ Jesu, e jaya tlala, na sọn ojlẹ de mẹ gbọ́n wẹ e ko to jijlo nado mọ ẹn, na e ko sè linlin etọn wutu, podọ e tindo todido nado mọ ohia etọn delẹ.  Todin, e jẹ onú susu kanbiọ ẹ ji; ṣigba e ma gblọn nude na ẹn. 10  Etomọṣo, yẹwhenọgán lẹ po wekantọ lẹ po to finfọnṣite mapote bo to whẹsadokọna ẹn sinsinyẹn. 11  To whenẹnu, Hẹlọdi po awhànfuntọ he nọ basi hihọ́na ẹn lẹ po ṣàn ẹn kò, podọ e yí i do davlẹ gbọn awù he to sisẹ́ de didona ẹn dali bo do e lẹkọ hlan Pilati dè. 12  Todin, Hẹlọdi po Pilati po lẹzun họntọn hẹ yedelẹ to azán enẹ gbè; na okẹ̀n wẹ tin to ṣẹnṣẹn na yé dai. 13  Enẹgodo, Pilati ylọ yẹwhenọgán lẹ, ogán lẹ po gbẹtọ lẹ po pli 14  bo dọna yé dọmọ: “Mì hẹn dawe ehe wá dè e taidi mẹhe to gbẹtọ lẹ sisẹ́ nado fọ́ngu, podọ, pọ́n! yẹn dindona ẹn to mì nukọn ṣigba bo ma mọ dodonu de na owhẹ̀ he mì to sisadokọna dawe ehe. 15  Na nugbo tọn, mọjanwẹ Hẹlọdi lọsu ga, na e do e lẹkọ hlan mí; podọ, pọ́n! e ma ko wà nudepope he jẹna okú. 16  Enẹwutu, yẹn na sayana ẹn bo tún in dote.” 17  ——* 18  Ṣigba, yewlẹ po gbẹtọgun lọ lẹpo po dawhá jẹgbonu dọmọ: “De ewọ sẹ̀ sọn aimẹ, ṣigba tún Balabas dote na mí!” 19  (Dawe de he ko yin zizedo gànpamẹ na gufinfọn de he to jijọ to tòdaho lọ mẹ po hlọnhuhu po.) 20  Whladopo dogọ, Pilati dọhona yé, na e jlo nado tún Jesu dote wutu. 21  To whenẹnu, yé jẹ awhádo ji, bo to didọmọ: “Whè e do núgo! Whè e do núgo!” 22  E dọna yé whla atọ̀ntọ dọmọ: “Oylan tẹwẹ dawe ehe ka wà taun? Yẹn ma mọ nudepope he jẹna okú to ewọ mẹ; enẹwutu yẹn na sayana ẹn bo tún in dote.” 23  To whenẹnu, yé sọ vọ́ tẹkudeji, bo yí ogbè lélé do biọ dọ ewọ ni yin whiwhè do núgo; ogbè yetọn sọ duto e ji. 24  Enẹwutu, Pilati degbè nado basi sọgbe hẹ obiọ yetọn: 25  e tún dawe lọ he ko yin zizedo gànpamẹ na gufinfọn po hlọnhuhu po wutu, mẹhe yé to bibiọ lọ dote, ṣigba e ze Jesu do alọmẹ na yé sọgbe hẹ ojlo yetọn. 26  Todin, dile yé plan ẹn jei, yé wle Simọni, yèdọ Silene-vi jiji de, he gọ̀ sọn glètoho mẹ, yé sọ didá ẹ yatin lọ nado hẹn ẹn hodo Jesu. 27  Ṣigba, gbẹtọgun daho de to hihodo e gọna yọnnu he to awubla na ẹn bosọ to avihando lẹ. 28  Jesu lẹhlan yọnnu lọ lẹ bo dọmọ: “Viyọnnu Jelusalẹm tọn lẹ emi, mì viavi na mi ba blo. Kakatimọ, mì viavi na mìde podọ na ovi mìtọn lẹ; 29  na, mì pọ́n! azán lẹ ja to ehe mẹ gbẹtọ lẹ na dọmọ, ‘Ayajẹnọ wẹ yọnnu wẹnsinọ lẹ, podọ adọ̀ he ma jivi lẹ po anọ́ he yè ma nọ́ pọ́n lẹ po!’ 30  To whenẹnu, yé na jẹ didọna osó lẹ ji dọ, ‘Họ́ jẹ mí ji!’ podọ na okọ́ta lẹ dọ, ‘Ṣinyọ́n mí ji!’ 31  Na eyin yé wà onú ehelẹ to whenue atin lọ to omú, etẹwẹ na jọ to whenue e hú?” 32  Ṣigba, yè sọ plan sunnu awe devo lẹ, he yin ylanwatọ lẹ jei nado yin hùhù dopọ hẹ ẹ. 33  Podọ to whenue yé jẹ fihe nọ yin Taká, finẹ wẹ yé whè ewọ po ylanwatọ lọ lẹ po do, dopo to adusi etọn mẹ podọ awetọ to amiyọn etọn mẹ. 34  [[Ṣigba Jesu to didọmọ: “Otọ́, jona yé, na yé ma yọ́n nuhe wà yé te.”]]* Humọ, yé má awù etọn lẹ gbọn ovò dide dali. 35  Gbẹtọ lẹ sọ to ote bo to nupọn. Ṣigba ogán lẹ to awọnlín-yẹ́n, bo to didọmọ: “E whlẹn mẹdevo lẹ gán; gbọ e ni whlẹn ede gán, eyin ewọ lọ wẹ Klisti Jiwheyẹwhe tọn, Mẹdide lọ.” 36  Awhànfuntọ lẹ lọsu yí i do davlẹ, bo nọ dọnsẹpọ bosọ nọ na ẹn ovẹn vẹsin 37  bo nọ dọmọ: “Eyin hiẹ wẹ ahọlu Ju lẹ tọn, whlẹn dewe gán.” 38  Nukinkan de sọ tin to aga na ẹn dọmọ: “Ahọlu Ju lẹ tọn lọ die.” 39  Ṣigba dopo to ylanwatọ he yin whiwhè do núgo lẹ mẹ jẹ zùnzùn in ji dọmọ: “Hiẹ wẹ Klisti lọ, kavi e ma yin mọ wẹ? Whlẹn dewe po míwlẹ po.” 40  Omẹ awetọ gblọn bo gbẹnuna ẹn dọmọ: “Be hiẹ ma dibusi Jiwheyẹwhe paali wẹ, todin he hiẹ tin to whẹdida dopolọ mẹ? 41  Na nugbo tọn, sọgbe hẹ whẹdida dodo, míwlẹ to mimọyi to gigọ́ mẹ nuhe jẹna nuhe mí wà; ṣigba dawe ehe ma wà oylan de.” 42  Podọ e zindonukọn nado dọmọ: “Jesu, flin mi whenue hiẹ biọ ahọluduta towe mẹ.” 43  Ewọ sọ dọna ẹn dọmọ: “Nugbo wẹ yẹn dọna we to egbé, Hiẹ na tin hẹ mi to Paladisi mẹ.” 44  Todin, nudi gànhiho ṣidopotọ* mẹ wẹ, ṣogan zinvlu ṣinyọ́n aigba lọ lẹpo ji kakajẹ gànhiho ṣinẹnẹtọ* mẹ, 45  na owhè ma na hinhọ́n wutu; to whenẹnu avọ̀ he gbò fiwiwe lọ tlẹ́n sọn aga wá odò to ṣẹnṣẹn. 46  Jesu sọ dawhá po ogbè lélé po dọmọ: “Otọ́, alọ towe mẹ wẹ yẹn jo gbigbọ ṣie do.” To whenue e ko dọ ehe, gbigbọ etọn ṣí. 47  Na mẹkanwekowhàngán lọ mọ nuhe ko jọ lọ wutu, e jẹ gigopana Jiwheyẹwhe ji, dọmọ: “Na nugbo tọn, dodonọ de wẹ dawe ehe.” 48  Podọ to whenue gbẹtọgun lọ lẹpo he pli dopọ to finẹ na nujijọ ehe mọ nuhe jọ lọ lẹ, yé lẹkọ dedo, bo to akọ́nnu yetọn hò. 49  Humọ, mẹhe yọ́n ẹn lẹpo to ote to olá. Podọ, yọnnu he hodo e sọn Galili wá lẹ, to ote bo to onú ehelẹ pọ́n. 50  Podọ, pọ́n! dawe de he nọ yin Josẹfu, yèdọ hagbẹ Tòwedegbẹ́* lọ tọn de, he yin omẹ dagbe podọ dodonọ de— 51  dawe ehe ma blavo nado nọgodona yanwle po nuyiwa yetọn po—ewọ wá sọn Alimate, yèdọ tòdaho omẹ Jude tọn lẹ tọn de mẹ, bo to tenọpọn ahọluduta Jiwheyẹwhe tọn; 52  dawe ehe yì Pilati dè bo biọ oṣiọ Jesu tọn. 53  Ewọ sọ ze e jẹte bo blá ẹ do alavọ dagbedagbe mẹ bosọ tẹ́ ẹ do yọdò he yin kùnkùn do osé mẹ de mẹ, ehe mẹ mẹdepope ma ko yin titẹ́ do pọ́n. 54  Todin, azán Awuwle* tọn gbè wẹ, bọ hinhọ́n whèjai tọn gbọjẹzan tọn to dindọnsẹpọ. 55  Ṣigba, yọnnu he hodo e sọn Galili wá lọ lẹ lọsu yì pọ́n yọdò lọ podọ lehe oṣiọ etọn yin titẹ́ do; 56  yé sọ lẹkọyi nado wleawuna nuwhẹ́nkun lẹ po amisisa owán gblingblinnọ lẹ po. Ṣigba, na taun tọn, yé gbọjẹ to gbọjẹzangbe sọgbe hẹ gbedide lọ.

Nudọnamẹ Odò Tọn

Luk 23:7 Pọ́n Luk 3:1, nudọnamẹ odò tọn.
Luk 23:17 Pọ́n Mt 17:21, nudọnamẹ odò tọn.
Luk 23:34 Glọ̀ndo awe topọ lẹ nọ dohia dọ nudọnamẹ lọ ko yin didesẹ sọn alọnuwe hohowhenu tọn delẹ mẹ ṣigba gbẹ́ tin to devo lẹ mẹ.
Luk 23:44 Enẹ wẹ, nudi ogàn 12 whèmẹ tọn, eyin yè hia sọn ojlẹ he mẹ owhè nọ zẹ̀.
Luk 23:44 Enẹ wẹ, nudi ogàn 3 whèmẹ tọn, eyin yè hia sọn ojlẹ he mẹ owhè nọ zẹ̀.
Luk 23:50 Kavi, Sanhedlin.
Luk 23:54 Pọ́n Mt 27:62, nudọnamẹ odò tọn.