Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Luku 2:1-52

2  Todin, to azán enẹlẹ gbè, Sesali Augusti de gbedide de tọ́n na mẹhe nọ nọ̀ aigba ji lẹpo nado ze yinkọ dai;  (yinkọ zizedai tintan ehe wá aimẹ to whenue Kiliniu yin ayimatẹn-gán Silia tọn;)  gbẹtọ lẹpo sọ zingbejizọnlin yì tòdaho yetọn titi mẹ nado ze yinkọ dai.  Na nugbo tọn, Josẹfu lọsu tọ́n sọn Galili, tòdaho Nazalẹti tọn lọ mẹ, bo yì Jude, tòdaho Davidi tọn he nọ yin Bẹtlẹhẹm, na e yin hagbẹ owhé po whẹndo Davidi tọn po wutu,  nado ze yinkọ dai po Malia he ko yin nina ẹn to alọwle mẹ lọ po dile e ko dopagbe etọn do, mẹhe ohò etọn ko whẹ́n.  To whenue yé to finẹ, azán etọn pé nado jivi.  Podọ e ji visunnu de, yèdọ plọnji etọn, e sọ blá ẹ do avọ̀ de mẹ bo tẹ́ ẹ do otò* de mẹ, na otẹn ma tin na yé to adọtẹn jonọ tọn lọ mẹ wutu.  To otò enẹ dopolọ mẹ, lẹngbọhọtọ lẹ sọ to gbonu bo to lẹngbọpa yetọn lẹ họ́ to zánmẹ.  Angẹli Jehovah tọn de sọ ṣite to yé dè to ajiji mẹ, bọ gigo Jehovah tọn họ́n lẹdo yé pé, obu sọ di yé tlala. 10  Ṣigba, angẹli lọ dọna yé dọmọ: “Mì dibu blo, na, mì pọ́n! wẹndagbe de wẹ yẹn to lilá na mì gando ayajẹ daho de he gbẹtọ lẹpo na tindo go, 11  na Mẹwhlẹngántọ de yin jiji na mì to egbé, he yin Klisti Oklunọ lọ, to tòdaho Davidi tọn mẹ. 12  Podọ ohia de die na mì: Mì na mọ viyẹyẹ de he yin biblá do avọ̀ mẹ bo yin titẹ́ do otò de mẹ.” 13  Podọ to ajiji mẹ, awhànpa olọn tọn susugege de wá angẹli lọ dè, bo to Jiwheyẹwhe pà bosọ to didọmọ: 14  “Gigo to oji aga hlan Jiwheyẹwhe, podọ jijọho hlan gbẹtọ ojlo dagbenọ lẹ to aigba ji.” 15  Enẹwutu, to whenue angẹli lọ ko tọ́n sọn yé dè yì olọn mẹ, lẹngbọhọtọ lọ lẹ jẹ didọna ode awetọ ji dọmọ: “Mì gbọ mí ni yì Bẹtlẹhẹm tlọlọ nado pọ́n nuhe jọ lọ, ehe Jehovah ko hẹn zun yinyọnẹn na mí.” 16  Yé sọ yì po awuyiya po bo mọ Malia po Josẹfu po, bọ viyẹyẹ lọ to aimimlọn to otò lọ mẹ. 17  To whenue yé mọ ẹn, yé hẹn ohó he ko yin didọna yé gando ovi pẹvi ehe go lọ lẹ zun yinyọnẹn. 18  Awú sọ ji mẹlẹpo he sè nuhe lẹngbọhọtọ lọ lẹ dọna yé lẹ, 19  ṣigba Malia yí onú ehe lẹpo whlá do ayiha mẹ bo to nulẹnpọndo nuhe onú ehelẹ zẹẹmẹdo ji to ahun etọn mẹ. 20  To whenẹnu, lẹngbọhọtọ lẹ lẹkọyi, bo to gigopana Jiwheyẹwhe bosọ to pipà ẹ na nuhe yé sè bo mọ lẹpo, kẹdẹdile ehelẹ ko yin didọna yé do. 21  Todin, to whenue azán ṣinatọ̀ntọ lọ pé nado gboadà na ẹn, oyín etọn sọ yin yiylọdọ Jesu, yèdọ oyín he angẹli lọ ko ylọ ẹ dọ whẹpo ohò etọn do yin mimọ. 22  Humọ, to whenue azán lọ pé nado lẹ̀ yé wé sọgbe hẹ osẹ́n Mose tọn, yé hẹn ẹn wá Jelusalẹm nado ze e do nukọn na Jehovah, 23  kẹdẹdile e ko yin kinkàndai to osẹ́n Jehovah tọn mẹ do dọmọ: “Visunnu lẹpo he hùn adọ̀ dona nọ yin yiylọdọ wiwe hlan Jehovah,” 24  podọ nado nọ sanvọ́ sọgbe hẹ nuhe yin didọ to osẹ́n Jehovah tọn mẹ dọmọ: “Owhlé awe kavi awhànnẹvu awe.” 25  Podọ, pọ́n! dawe de tin to Jelusalẹm he nọ yin Simeoni, podọ dawe ehe yin dodonọ bo nọ dibusi Jiwheyẹwhe, bosọ to tenọpọn homẹmimiọn Islaeli tọn, gbigbọ wiwe sọ to e ji. 26  Humọ, Jiwheyẹwhe dehia ẹ gbọn gbigbọ wiwe dali dọ e ma na kú kakajẹ whenue e na ko mọ Klisti Jehovah tọn. 27  Todin, to huhlọn gbigbọ lọ tọn glọ, e wá tẹmpli mẹ; podọ to whenue mẹjitọ lọ lẹ hẹn Jesu ovi pẹvi lọ wá nado basi sọgbe hẹ nuyiwa aṣa osẹ́n lọ tọn, 28  ewọ lọsu yí i do alọ etọn lẹ mẹ bo pà Jiwheyẹwhe dọmọ: 29  “Todin, Oklunọ Nupojipetọ, hiẹ to didike afanumẹ towe ni yì gbọjẹ to jijọho mẹ sọgbe hẹ ohó towe; 30  na nukun ṣie lẹ ko mọ aliho mẹwhlẹngán tọn towe 31  he hiẹ ko wleawuna to gbẹtọ lẹpo nukọn, 32  hinhọ́n de nado de nukunmẹṣinyọnnu sẹ̀ sọn nukun akọta lẹ tọn mẹ podọ gigo de na Islaeli omẹ towe lẹ.” 33  Podọ nuhe yin didọ gando e go lẹ nọ to pipaṣa otọ́ po onọ̀ etọn po. 34  Humọ, Simeoni dona yé, ṣigba bo dọna Malia onọ̀ etọn dọmọ: “Pọ́n! Ewọ wẹ yin didoai na aijijẹ po finfọn mẹsusu tọn po to Islaeli podọ na ohia de he yè na dọho sọta 35  (mọwẹ, ohí gaa de na yin sisọ́ alindọn towe titi mẹ luntọ́n), na linlẹn he to ahun mẹsusu tọn mẹ lẹ nido sọgan yin didehia.” 36  Todin, yẹwhegán-yọnnu de tin he nọ yin Anna, viyọnnu Fanuẹli tọn, sọn hẹnnu Aṣeli tọn mẹ (owhe nawe ehe tọn ko sẹyì taun, podọ e wlealọ to awhli mẹ, bo nọ po asu po na owhe ṣinawe poun, 37  podọ asuṣiọsi de wẹ ewọ he tindo owhe kanwe-nukunẹnẹ todin), he ma nọ gọ̀n tẹmpli mẹ gbede, bo nọ yí nùbibla po ovẹ̀ po do to sinsẹ̀nzọn wiwe wà to ozán po okle po. 38  Podọ to ojlẹ enẹlọ mẹ, e dọnsẹpọ bo jẹ pẹdona Jiwheyẹwhe ji bosọ to ohó ovi lọ tọn dọna mẹhe to tenọpọn whlẹngán Jelusalẹm tọn lẹpo. 39  Enẹwutu, to whenue yé ko wà onú lẹpo sọgbe hẹ osẹ́n Jehovah tọn, yé lẹkọyi Galili to tòdaho yetọn titi Nazalẹti mẹ. 40  Ovi pẹvi lọ sọ to whinwhẹ́n deji bo to huhlọn tindo, bosọ to gigọ́ na nuyọnẹn, e sọ to nukundagbe Jiwheyẹwhe tọn tindo zọnmii. 41  Todin, aṣa mẹjitọ etọn lẹ tọn wẹ e yin sọn owhe de mẹ jẹ owhe de mẹ nado nọ yì Jelusalẹm na hùnwhẹ juwayi tọn. 42  Podọ to whenue e yin owhe wiawe mẹvi, yé hẹji yì sọgbe hẹ aṣa hùnwhẹ lọ tọn 43  bo nọ finẹ kakajẹ vivọnu hùnwhẹ lọ tọn. Ṣigba, to whenue yé lẹkọja, yọpọ sunnu lọ, Jesu gbọṣi Jelusalẹm, bọ mẹjitọ etọn lẹ ma doayi e go. 44  Yé lẹndọ e to gbejizọnlinzin dopọ hẹ pipli lọ, bọ yé ko zingbejizọnlin azán dopo tọn, enẹgodo yé jẹ dindin in pé ji to hẹnnumẹ lẹ po mẹyinyọnẹn lẹ po ṣẹnṣẹn. 45  Ṣigba, to whenue yé ma mọ ẹn, yé lẹkọyi Jelusalẹm bo yí sọwhiwhe do dín in. 46  To azán atọ̀n godo, yé mọ ẹn to tẹmpli mẹ, bọ e to aisinsin to mẹplọntọ lẹ ṣẹnṣẹn bo to dotoaina yé bosọ to ohó kanse yé. 47  Ṣigba, nukunnumọjẹnumẹ etọn po gblọndo etọn lẹ po nọ jiawu na mẹhe to todoaina ẹn lẹ. 48  Todin, to whenue yé mọ ẹn, awuji yé bọ onọ̀ etọn dọna ẹn dọmọ: “Ovi, naegbọn hiẹ yinuwa hẹ mí dole? Yẹn po otọ́ towe po ko yí ayimajai do to dindin we pé.” 49  Ṣigba, e dọna yé dọmọ: “Naegbọn mìwlẹ do to dindin mi pé? Be mì ma yọnẹn dọ yẹn dona tin to ohọ̀ Otọ́ ṣie tọn mẹ wẹ?” 50  Ṣigba, yé ma mọnukunnujẹ ohó he e dọna yé lọ mẹ. 51  E sọ hodo yé bo wá Nazalẹti, bosọ to mẹmẹglọ yin hlan yé zọnmii. Humọ, onọ̀ etọn hẹn ohó ehelẹ do ahun etọn mẹ po sọwhiwhe po. 52  Jesu sọ to whinwhẹ́n deji to nuyọnẹn mẹ podọ to agbasa mẹ podọ to nukundagbe Jiwheyẹwhe tọn po gbẹtọ tọn po mẹ.

Nudọnamẹ Odò Tọn

Luk 2:7 Enẹ wẹ, “Nuhe mẹ kanlin lẹ nọ dùnú te.”