Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Luku 18:1-43

18  Enẹgodo, e zindonukọn nado na yé apajlẹ de gando nuhudo lọ nado nọ hodẹ̀ to whepoponu podọ ma nado gbọjọ go,  dọmọ: “Dawe whẹdatọ de tin to tòdaho de mẹ he ma nọ dibusi Jiwheyẹwhe bo masọ nọ si gbẹtọ.  Ṣigba, asuṣiọsi de tin to tòdaho enẹ mẹ he nọ yì e dè whẹwhẹ, bo nọ dọmọ, ‘Hẹn ẹn diun dọ yẹn mọ whẹdida dodo yí do mẹhe ylọwhẹ mi lọ ji.’  Na ojlẹ de, ewọ ma tindo ojlo, ṣigba to godo mẹ, e dọna ede dọ, ‘Dile etlẹ yindọ yẹn ma nọ dibusi Jiwheyẹwhe kavi na sisi gbẹtọ sọ,  ganṣo, na asuṣiọsi ehe to tuklado mi mapote wutu, yẹn na hẹn ẹn diun dọ e mọ whẹdida dodo yí, na e nikaa to wiwá bo to yasana mi kaka agbọ́ nado pé mi.’”  Enẹgodo, Oklunọ dọmọ: “Mì sè nuhe whẹdatọ lọ dọ, dile e tlẹ yin mawadodonọ do sọ!  To whelọnu lo, na nugbo tọn, be Jiwheyẹwhe ma na hẹn whẹdida dodo nado yin bibasi na mẹdide etọn lẹ he to awhádo hlan ẹn to okle po ozán po, dile etlẹ yindọ e to linsinyẹn dohlan yé?  Yẹn dọna mì dọ, Ewọ na hẹn whẹdida dodo nado yin bibasi na yé po awuyiya po. Etomọṣo, whenuena Visunnu gbẹtọ tọn na wá, be ewọ na mọ yise to aigba ji nugbonugbo ya?”  Ṣigba, ewọ sọ na apajlẹ ehe mẹdelẹ he nọ dejido yedelẹ go nado yin dodonọ bo nọ pọ́n mẹhe pò lẹ hlan di nuvọ́nọ, dọmọ: 10  “Dawe awe yì tẹmpli mẹ nado hodẹ̀, dopo yin Falesi de bọ awetọ yin tòkuẹ-ṣinyantọ de. 11  Falesi lọ ṣite bo jẹ dẹ̀ho ji bosọ to onú ehelẹ dọ to ede mẹ dọmọ, ‘Jiwheyẹwhe E, yẹn dopẹna we dọ yẹn ma taidi mẹhe pò lẹ, yèdọ alọslonamẹtọ lẹ, mawadodonọ lẹ, ayọdetọ lẹ, kavi etlẹ yin taidi tòkuẹ-ṣinyantọ ehe. 12  Yẹn nọ blanù whla awe to osẹ dopo mẹ, yẹn nọ na madao nuhe yẹn tindo lẹpo tọn.’ 13  Ṣigba, tòkuẹ-ṣinyantọ lọ he ṣite to olá ma tlẹ jlo nado ze nukun etọn lẹ daga hlan olọn, ṣigba to akọ́nnu etọn hò bosọ to didọmọ, ‘Jiwheyẹwhe E, wàlẹblanu na mi, yẹn ylandonọ.’ 14  Yẹn dọna mì dọ, Dawe ehe yì owhé etọn gbè bo yin dodonọ hú dawe enẹ; na mẹdepope he ze ede daga wẹ yè na whiwhẹ, ṣigba ewọ he whiwhẹ ede wẹ yè na zedaga.” 15  Todin, gbẹtọ lẹ sọ jẹ yọpọ yetọn lẹ hẹnwa na ẹn ji na e nido doalọ yé go; ṣigba to whenue devi lẹ mọ ehe, yé jẹ nugbẹna yé ji. 16  Ṣigba, Jesu ylọ yọpọ lẹ wá ede dè, bo dọmọ: “Mì gbọ yọpọvu lẹ ni wá dè e, mì sọ tẹnpọn nado glọnalina yé blo. Na omẹ mọnkọtọn lẹ wẹ ahọluduta Jiwheyẹwhe tọn tin na. 17  Nugbo wẹ yẹn dọna mì, Mẹdepope he ma yí ahọluduta Jiwheyẹwhe tọn taidi yọpọvu de ma na biọ e mẹ to aliho depope mẹ.” 18  Ogán de sọ kanbiọ ẹ dọmọ: “Mẹplọntọ Dagbe, gbọn etẹ wiwà dali wẹ yẹn na dugu ogbẹ̀ madopodo tọn?” 19  Jesu gblọnna ẹn dọmọ: “Naegbọn hiẹ do ylọ mi dọ mẹdagbe? Mẹdepope ma yin mẹdagbe, adavo omẹ dopo, yèdọ Jiwheyẹwhe. 20  Hiẹ yọ́n gbedide lọ lẹ he dọ, ‘Hiẹ deayọ blo, Hiẹ hùhlọ̀n blo, Hiẹ fìnnú blo, Hiẹ dekunnu lalo blo, Gbògbéna otọ́ po onọ̀ towe po.’” 21  To whenẹnu, e dọmọ: “Yẹn ko nọ yìn onú ehe lẹpo sọn jọja whenu gbọ́n.” 22  To whenue Jesu sè enẹ, e dọna ẹn dọmọ: “Onú dopo wẹ gbẹ́ to whiwhè do we: Sà nuhe hiẹ tindo lẹpo bo má na wamọnọ lẹ, hiẹ nasọ tindo adọkun to olọn mẹ; enẹgodo wá bo lẹzun hodotọ ṣie.” 23  To whenue e sè ehe, e blawu tlala, na ewọ yin adọkunnọ taun wutu. 24  Jesu pọ́n ẹn bo dọmọ: “Lehe e na vẹawuna mẹhe tindo akuẹ lẹ nado biọ ahọluduta Jiwheyẹwhe tọn mẹ do sọ! 25  Na nugbo tọn, e bọawuna kanklosọ́ de nado gbọn onù yẹnvi he nọ tọ̀ avọ̀ de tọn mẹ hú na adọkunnọ de nado biọ ahọluduta Jiwheyẹwhe tọn mẹ.” 26  Mẹhe sè ehe lẹ dọmọ: “Mẹnu wẹ sọgan yin whinwhlẹngán lo?” 27  E dọmọ: “Onú he ma yọnbasi na gbẹtọ lẹ yọnbasi na Jiwheyẹwhe.” 28  Ṣigba, Pita dọmọ: “Pọ́n! Míwlẹ ko jo onú mítọn lẹ do bo hodo we.” 29  E dọna yé dọmọ: “Nugbo wẹ yẹn dọna mì, Mẹdepope ma tin he jo owhé kavi asi kavi nọvisunnu lẹ kavi mẹjitọ lẹ kavi ovi lẹ do na ahọluduta Jiwheyẹwhe tọn wutu 30  he ma na mọyi do donu susu ji to aliho de mẹ kavi devo mẹ to ojlẹ ehe mẹ, podọ ogbẹ̀ madopodo to titonu he ja mẹ.” 31  Enẹgodo, e plan omẹ wiawe lẹ do apadopo bo dọna yé dọmọ: “Mì pọ́n! Mí hẹji jei Jelusalẹm, bọ onú he yin kinkàndai gbọn yẹwhegán lẹ gblamẹ gando Visunnu gbẹtọ tọn go lẹpo na yin hinhẹndi mlẹnmlẹn. 32  Di apajlẹ, ewọ na yin zizejo na omẹ akọta lẹ tọn bo na yin yíyí do davlẹ bo nasọ yin nuyiwahẹ po kanyinylan po bo na yin tántún do e go; 33  podọ to hihò e godo, yé na hù i, ṣigba e na yin finfọn to azán atọ̀ntọ gbè.” 34  Ṣogan, yé ma mọnukunnujẹ depope to onú ehelẹ mẹ; ṣigba ohó ehe yin whiwhla do yé, bọ yé ma yọ́n nuhe yin didọ lẹ. 35  Todin, dile e to sisẹpọ Jẹliko, dawe nukuntọ́nnọ de tin to aisinsin to aliho tó bo to nubiọ. 36  Na e sè ogbè gbẹtọgun he juwajei de tọn wutu, e jẹ nuhe to jijọ lọ kanbiọ ji. 37  Yé dọna ẹn dọmọ: “Jesu Nazalẹti tọn lọ wẹ juwajei!” 38  Enẹwutu, e dawhá, bo dọmọ: “Jesu, hiẹ Visunnu Davidi tọn, wàlẹblanu na mi!” 39  Mẹhe sọ to yìyì to nukọn lẹ jẹ gbèdedo e ji sinsinyẹn nado nabọẹ, ṣigba e sọ vọ́ to awhádo gángán mapote dọmọ: “Wàlẹblanu na mi, hiẹ Visunnu Davidi tọn.” 40  To whenẹnu, Jesu nọte to tẹndo dopolọ mẹ bo degbè dọ dawe lọ ni yin pinplan wá e dè. To whenue e dọnsẹpọ, Jesu kanse e dọmọ: 41  “Etẹwẹ hiẹ jlo dọ yẹn ni wà na we?” Ewọ dọmọ: “Oklunọ, dike yẹn ni mọnú.” 42  Enẹwutu, Jesu dọna ẹn dọmọ: “Hiẹ ni mọnú; yise towe ko hẹn we jẹgangan.” 43  Podọ to afọdopolọji, e mọnú, bo jẹ hihodo e ji, bosọ to gigopana Jiwheyẹwhe. Humọ, to whenue gbẹtọ lẹpo mọ ehe, yé na pipà Jiwheyẹwhe.

Nudọnamẹ Odò Tọn