Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Luku 17:1-37

17  To whenẹnu, e dọna devi etọn lẹ dọmọ: “E glo nado dapana nuhe nọ hẹnmẹ dahli lẹ. Etomọṣo, dindọn hlan mẹhe gblamẹ yé gbọn do wá!  E na ko pọnte na ẹn hú eyin yè sìn gilisé de do okọ̀ etọn bọ ewọ yin dindọn dlan ohù mẹ hú dọ ewọ ni hẹn dopo to omẹ pẹvi ehelẹ mẹ dahli.  Mì payi mìde go. Eyin mẹmẹsunnu towe waylando de, gbẹnuna ẹn, podọ eyin e lẹnvọjọ, jona ẹn.  Eyin e tlẹ waylando do we whla ṣinawe to gbèdopo bo lẹkọwa dè we whla ṣinawe, bo dọmọ, ‘Yẹn lẹnvọjọ,’ hiẹ dona jona ẹn.”  Todin, apọsteli lẹ dọna Oklunọ dọmọ: “Do yise yise ji na mí.”  To whenẹnu, Oklunọ dọmọ: “Eyin mì tindo yise he sọ okún mutaldi* tọn de, mì na dọna atin sikamini tọn ehe dọ, ‘Họ̀n adọ̀ bo yin didó do ohù mẹ!’ e nasọ setonuna mì.  “Mẹnu wẹ tin to mì mẹ he tindo afanumẹ de he to aigba-jlo kavi to kanlin yìn bọ to whenue e lẹkọ sọn ogle mẹ ewọ na dọna ẹn dọ, ‘Wáfi to afọdopolọji bo jagla to tafo kọ̀n’?  Kakatimọ, be e ma na dọna ẹn dọ, ‘Wleawu nude tọn na mi nado dù to whèjai, bo ze azọ́nvọ̀ dó bosọ yilizọn na mi kakajẹ whenue yẹn na dù bo nù fó, podọ to enẹgodo hiẹ sọgan dù bo nù’?  E ma na dopẹna afanumẹ lọ na ewọ wà onú he yin didena ẹn lẹ wutu, kavi e na wàmọ wẹ? 10  Enẹwutu, mìlọsu ga, to whenue mì ko wà nuhe yin didena mì lẹ godo, mì dọ, ‘Afanumẹ madoalenọ lẹ wẹ mí. Nuhe mí dona wà wẹ mí wà.’” 11  Podọ to whenue e jei Jelusalẹm, e to jujugbọn* Samalia po Galili po. 12  Podọ dile ewọ to gbétatò de mẹ biọ, dawe pòtọnọ ao mọ ẹn, yé sọ fọnṣite to olá. 13  Yé sọ ze ogbè yetọn lẹ daga bo dọmọ: “Jesu, Nuplọnmẹtọ, wàlẹblanu na mí!” 14  Podọ to whenue e sọnukunmọ yé, e dọna yé dọmọ: “Mì yì, bo do mìde hia yẹwhenọ lẹ.” Enẹgodo, dile yé to yìyì, yé yin kiklọwé. 15  To whenuena dopo to yé mẹ mọdọ azọ̀n emitọn ko gbọ, e lẹkọwa godo bo to gigopana Jiwheyẹwhe po ogbè lélé po. 16  E ṣinyọ́n nukunmẹ etọn ai to afọ Jesu tọn go, bo to pẹdona ẹn; humọ, Samalianu de wẹ ewọ. 17  Jesu gblọn dọmọ: “Mì omẹ ao wẹ yin kiklọwé, kavi e ma yin mọ wẹ? To whelọnu lo, fie wẹ omẹ ṣinẹnẹ he pò lẹ te? 18  Be mẹdepope ma yin mimọ he lẹkọwa nado pagigona Jiwheyẹwhe gbọnvona dawe ehe he wá sọn akọta devo mẹ wẹ?” 19  E sọ dọna ẹn dọmọ: “Fọ́n, bo yì; yise towe ko hẹn we jẹgangan.” 20  Ṣigba, to whenue Falesi lẹ kanse e whenue ahọluduta Jiwheyẹwhe tọn na wá, e gblọnna yé dọmọ: “Ahọluduta Jiwheyẹwhe tọn ma na wá to aliho he na dọ̀n ayidonugo mẹ, 21  mọdopolọ gbẹtọ lẹ ma to na dọ, ‘Mì pọ́n fi!’ kavi, ‘Dọ́n!’ Na, mì pọ́n! ahọluduta Jiwheyẹwhe tọn tin to mì ṣẹnṣẹn.” 22  Enẹgodo, e dọna devi lẹ dọmọ: “Azán lẹ ja whenue mìwlẹ na jlo nado mọ dopo to azán Visunnu gbẹtọ tọn lẹ tọn mẹ ṣigba bọ mì ma na mọ ẹn. 23  Gbẹtọ lẹ nasọ dọna mì dọ, ‘Mì pọ́n dọ́n!’ kavi, ‘Mì pọ́n fi!’ Mì tọ́nyi kavi doafọna yé blo. 24  Na dile abì, to whenue e gbòdlán nọ na hinhọ́n sọn awà dopo ji to olọn glọ jẹ awà awetọ ji to olọn glọ do, mọ wẹ azán osọhia Visunnu gbẹtọ tọn na te. 25  Ṣigba, jẹnukọn whẹ́, ewọ dona jugbọn yajiji susu mẹ bo yin gbigbẹdai gbọn whẹndo ehe dali. 26  Humọ, kẹdẹdile e jọ do to azán Noa tọn lẹ gbè, mọdopolọ wẹ e na te do ga to azán Visunnu gbẹtọ tọn lẹ tọn gbè: 27  yé to dùdù, yé to nùnù, sunnu lẹ to alọwle, yọnnu lẹ to yinyin nina to alọwle mẹ, kakajẹ azán enẹ gbè he Noa biọ aki mẹ, bọ singigọ wá bo và yemẹpo sudo. 28  Mọdopolọ, kẹdẹdile e jọ do to azán Lọti tọn lẹ gbè: yé to dùdù, yé to nùnù, yé to hihọ̀, yé to sisà, yé to didó, yé to ohọ̀ gbá. 29  Ṣigba to gbeegbe Lọti tọ́n sọn Sodọmi, jikun miyọ́n po whèmi po tọn ja sọn olọn mẹ bo và yemẹpo sudo. 30  Mọdopolọ wẹ e na te do to azán enẹ gbè whenue Visunnu gbẹtọ tọn na yin hinhẹn sọawuhia. 31  “To azán enẹ gbè, mì gbọ mẹhe to họta bọ onú etọn lẹ tin to họmẹ ni ma jẹte nado wá bẹ yé blo, podọ mọdopolọ mẹhe to ogle mẹ ni ma lẹkọ do onú he to godo lẹ kọ̀n blo. 32  Mì flin asi Lọti tọn. 33  Mẹdepope he dín nado whlá alindọn etọn na ede na hẹn ẹn bu, ṣigba mẹdepope he hẹn ẹn bu na whlá ẹ dogbẹ̀. 34  Yẹn dọna mì dọ, To ozán enẹ mẹ, sunnu awe na tin to adọ́zan dopo ji; dopo na yin yíyí, ṣigba awetọ na yin jijodai. 35  Yọnnu awe na to nuli to osé dopolọ kọ̀n; dopo na yin yíyí, ṣigba awetọ na yin jijodai.” 36  ——* 37  Enẹwutu, yé gblọnna ẹn dọmọ: “Fie wẹ enẹ na jọ te, Oklunọ?” E dọna yé dọmọ: “Fie onú kúkú te, finẹ wẹ akùn lẹ na pli dopọ te ga.”

Nudọnamẹ Odò Tọn

Luk 17:6* Pọ́n Mt 13:31, nudọnamẹ odò tọn.
Luk 17:11* To paa mẹ, “Vlavo gbọn ṣẹnṣẹn.”
Luk 17:36* Pọ́n Mt 17:21, nudọnamẹ odò tọn.