Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Luku 16:1-31

16  To enẹgodo, e zindonukọn nado dọna devi lẹ ga dọmọ: “Dawe de yin adọkunnọ bo tindo họ̀nkọnsi de, yè sọ sawhẹdokọna ẹn to e dè dọ e to nutindo etọn lẹ hẹngu.  Enẹwutu, e ylọ ẹ bo dọna ẹn dọ, ‘Etẹ die he yẹn to sisè gando gowe? Ze kandai họ̀nkọnsi-zọ́n tọn towe jo, na hiẹ ma sọgan sọ deanana owhé lọ ba.’  To whenẹnu, họ̀nkọnsi lọ dọ to ede mẹ dọ, ‘Etẹwẹ yẹn na wà, to whenue e yindọ oklunọ ṣie na yí họ̀nkọnsi-zọ́n lọ sọn asi e? Yẹn ma tindo huhlọn sọmọ nado kùndò, winyan sọ nọ hù mi nado biọnu.  Ẹn hẹn! yẹn yọ́n nuhe yẹn na wà, bọ eyin yẹn wá yin yinyan sọn họ̀nkọnsi-zọ́n mẹ, gbẹtọ lẹ na kẹalọyi mi do owhé yetọn lẹ gbè.’  Podọ, to whenue e ylọ dopodopo ahọ́tọnọ oklunọ etọn tọn lẹ, e jẹ didọna tintan ji dọ, ‘Nẹmu wẹ hiẹ dù do oklunọ ṣie?’  E dọmọ, ‘Ojlẹnu amì olivie tọn bati* kanweko.’ Ewọ dọna ẹn dọ, ‘Gọ̀ kandai gbekọndopọ tọn towe ze bo sinai bosọ kàn kandeao po awuyiya po.’  Enẹgodo, e dọna devo dọ, ‘Todin, nẹmu wẹ hiẹ dù?’ E dọ, ‘Ojlẹnu likun tọn kọli* kanweko.’ Ewọ dọna ẹn dọ, ‘Gọ̀ kandai gbekọndopọ tọn towe ze bo kàn kanwe.’  Oklunọ etọn sọ pà họ̀nkọnsi lọ, dile e tlẹ yin mawadodonọ, na e yinuwa po nuyọnẹn po wutu; na ovi titonu ehe tọn lẹ nọ yọnnuin to aliho he yọ́n-na-yizan mẹ dohlan whẹndo yetọn titi hugan lehe e yin do na ovi hinhọ́n tọn lẹ.  “Humọ, yẹn dọna mì dọ, Mì jihọntọn lẹ na mìde gbọn adọkun mawadodo tọn lẹ yiyizan dali, na to whenue yé na busẹ, họntọn ehelẹ nido kẹalọyi mì do nọtẹn madopodo lẹ mẹ. 10  Mẹhe yin nugbonọ to onú pẹvi pete mẹ yin nugbonọ to onú susu mẹ ga, podọ mẹhe yin mawadodonọ to onú pẹvi pete mẹ yin mawadodonọ to onú susu mẹ ga. 11  Enẹwutu, eyin mì ma ko do mìde hia nado yin nugbonọ gando adọkun mawadodo tọn lẹ go, mẹnu wẹ na ze nuhe yin nugbo do alọmẹ na mì? 12  Podọ eyin mì ma ko do mìde hia nado yin nugbonọ gando nuhe yin mẹdevo lẹ tọn go, mẹnu wẹ na na mì nuhe yin mìtọn titi? 13  Devizọnwatọ whégbè tọn de ma sọgan yin afanumẹ na ogán awe; adavo ewọ na gbẹwanna ode bo yiwanna awetọ, kavi ewọ na sẹbọdo ode go bo gbẹkọ awetọ go. Mìwlẹ ma sọgan yin afanumẹ na Jiwheyẹwhe podọ na Adọkunnu lẹ.” 14  Todin, Falesi wanyina akuẹtọ lẹ to todoaina onú ehe lẹpo, yé sọ jẹ awọnlín-yẹ́n do e ji. 15  Enẹwutu, e dọna yé dọmọ: “Mìwlẹ wẹ mẹhe nọ do mìde hia di dodonọ to gbẹtọ lẹ nukọn, ṣigba Jiwheyẹwhe yọ́n ahun mìtọn lẹ; na nuhe gbẹtọ lẹ nọ pọ́n taidi nujọnu wẹ awuhiọnu de to nukun Jiwheyẹwhe tọn mẹ. 16  “Osẹ́n lọ po Yẹwhegán lẹ po tin kakajẹ ojlẹ Johanu tọn mẹ. Sọn whenẹnu sọyi, ahọluduta Jiwheyẹwhe tọn to yinyin lilá taidi wẹndagbe, podọ gbẹtọ wunmẹ lẹpo wẹ to vivẹnudo zọnmii hlan e kọ̀n. 17  Na nugbo tọn, e bọawu na olọn po aigba po nado juwayi hú na adà tiuntiun wekun Osẹ́n lọ tọn dopo nado nọma mọ hẹndi. 18  “Mẹdepope he gbẹ́ asi etọn dai bo wlealọ hẹ devo deayọ, podọ ewọ he wlealọ hẹ yọnnu he asu etọn gbẹdai, e deayọ. 19  “Ṣigba, dawe de yin adọkunnọ, bo nọ saba yí sopẹ́-vọ̀ po alavọ po do doaṣọ́na ede, bosọ nọ to gbẹdu egbesọegbesọ po gigo daho po. 20  Ṣigba, nubiọdutọ de he nọ yin Lazalọsi, he gọ́ na agàdá nọ saba yin zizedo họngbo etọn ji 21  bo nọ jlo nado dù nuhe to fiflẹ sọn tafo dawe adọkunnọ lọ tọn ji lẹ. Mọwẹ, avún lẹ lọsu nọ wá bo nọ didọ́ agàdá etọn lẹ. 22  Todin, to ojlẹ vude godo nubiọdutọ lọ kú bọ angẹli lẹ ze e yì akọ́nnu* Ablaham tọn. “Mọdopolọ, dawe adọkunnọ lọ kú bo yin dìdì. 23  Podọ to awufiẹsa mẹ to Hadẹs* mẹ, e ze nukun etọn lẹ daga bo mọ Ablaham to olá bọ Lazalọsi to akọ́nnu etọn. 24  Enẹwutu, e ylọ bo dọ, ‘Otọ́ Ablaham, wàlẹblanu na mi bo do Lazalọsi hlan nado ylọn bẹ́nu alọvi etọn tọn do osin mẹ bo fá odẹ́ ṣie, na yẹn to awufiẹsa mẹ to miyọ́n sinsinyẹn ehe mẹ wutu.’ 25  Ṣigba, Ablaham dọmọ, ‘Ovi, flindọ hiẹ ko mọ onú dagbe towe lẹ yí to gigọ́ mẹ to gbẹwhenu towe, ṣigba mọdopolọ, Lazalọsi onú ylankan lẹ. Todin, nalete, ewọ to homẹmimiọn tindo tofi ṣigba hiẹ tin to awufiẹsa mẹ. 26  Podọ gbọnvona onú ehe lẹpo, odò daho de ko yin zizedo míwlẹ po mìwlẹ po ṣẹnṣẹn, na mẹhe jlo nado tọ́n sọn mí dè bo wá mì dè lẹ ma sọgan wá, mọjanwẹ mẹde ma sọgan dasá sọn finẹ wá mí dè.’ 27  Enẹgodo, e dọmọ, ‘Eyin mọ wẹ, yẹn vẹ̀ we otọ́, dọ hiẹ ni do e hlan owhé otọ́ ṣie tọn gbè, 28  na yẹn tindo nọvisunnu atọ́n, na ewọ nido dekunnu mlẹnmlẹn na yé, bọ yelọsu ma nado wá tin to nọtẹn yasanamẹ tọn ehe mẹ.’ 29  Ṣigba, Ablaham dọmọ, ‘Yé tindo Mose po Yẹwhegán lẹ po; gbọ yé ni dotoaina yé.’ 30  To whenẹnu, e dọmọ, ‘Lala, otọ́ Ablaham, ṣigba eyin mẹde sọn oṣiọ lẹ mẹ yì yé dè, yé na lẹnvọjọ.’ 31  Ṣigba e dọna ẹn dọ, ‘Eyin yé ma dotoaina Mose po Yẹwhegán lẹ po, mọjanwẹ yé ma na yin linlẹndiọna eyin mẹde tlẹ fọ́n sọn oṣiọ lẹ mẹ.’”

Nudọnamẹ Odò Tọn

Luk 16:6 Enẹ wẹ, “Ojlẹnu de he sọzẹn hẹ litli 22.” Sọ pọ́n Nudọnamẹ Dogọ 11.
Luk 16:7 Enẹ wẹ, “Ojlẹnu de he sọzẹn hẹ kilo 170.” Sọ pọ́n Nudọnamẹ Dogọ 11.
Luk 16:22 Enẹ wẹ, “Otẹn nukundagbe vonọtaun tọn.”
Luk 16:23 Pọ́n Nudọnamẹ Dogọ 8.