Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Luku 15:1-32

15  Todin, tòkuẹ-ṣinyantọ lẹ po ylandonọ lẹpo po to dindọnsẹpọ ẹ nado sè ohó etọn.  Enẹwutu, Falesi lẹ po wekantọ lẹ po to hùnhlún, bo to didọmọ: “Dawe ehe nọ yí ylandonọ lẹ bo nọ dùnú hẹ yé.”  To whenẹnu, e na apajlẹ ehe yé, dọmọ:  “Mẹnu to mì mẹ, he tindo lẹngbọ kanweko, eyin e hẹn dopo to yé mẹ bu, bọ e ma na jo kanwe-fọtọ̀n-nukunẹnẹ he pò lẹ do danfafa ji nado yì dín dehe bu lọ, kakajẹ whenue e mọ ẹn?  Podọ to whenue e sọ mọ ẹn, e ze e do abọ́ etọn lẹ ji bosọ jaya.  Podọ to whenue e lẹkọwa whégbè, e ylọ họntọn po kọmẹnu etọn lẹ po pli, bo dọna yé dọ, ‘Mì jaya hẹ mi, na yẹn ko mọ lẹngbọ ṣie he bu lọ.’  Yẹn dọna mì dọ, mọdopolọ ayajẹ na sù humọ to olọn mẹ do ylandonọ dopo he lẹnvọjọ ji hugan do dodonọ kanwe-fọtọ̀n-nukunẹnẹ he ma tindo nuhudo lẹnvọjọ tọn lẹ ji.  “Kavi yọnnu tẹwẹ na tindo abọgan-kuẹ dlakma* ao, bọ eyin e hẹn abọgan-kuẹ dlakma dopo bu, e ma na tá miyọ́ngbán bo zà ohọ̀ etọn mẹ bosọ yí sọwhiwhe do dín kakajẹ whenue e mọ ẹn?  Podọ to whenue e ko mọ ẹn, e ylọ họntọn po kọmẹnu etọn yọnnu lẹ po pli, bo dọmọ, ‘Mì jaya hẹ mi, na yẹn ko mọ abọgan-kuẹ dlakma he yẹn hẹnbu lọ.’ 10  Enẹwutu, yẹn dọna mì dọ, ayajẹ nọ tin to angẹli Jiwheyẹwhe tọn lẹ ṣẹnṣẹn do ylandonọ dopo he lẹnvọjọ ji.” 11  Enẹgodo, e dọmọ: “Dawe de tindo visunnu awe. 12  Mẹhe yin yọpọ to yé mẹ lọ sọ dọna otọ́ etọn dọ, ‘Otọ́, na mi dehe yin adà ṣie to nutindo lọ lẹ mẹ.’ To whenẹnu, e má nutindo gbẹ̀mẹ tọn etọn lẹ na yé. 13  To godo mẹ, to azán vude godo, visunnu pẹvi lọ bẹ onú lẹpo pli bo zingbejizọnlin yì otò dindẹn de mẹ, podọ finẹ wẹ e zan nutindo etọn lẹ do apà mẹ te gbọn gbẹzan he gblezọn de zinzan dali. 14  To whenue e ko zan onú lẹpo vọ̀, huvẹ sinsinyẹn de tọ́n to otò lọ pete mẹ, e sọ biọ nuhudo mẹ. 15  E tlẹ yì bo jẹ kọ̀ji na dopo to tòvi otò enẹ tọn lẹ mẹ, bọ ewọ do e hlan ogle etọn mẹ nado penukundo ohàn lẹ go. 16  E sọ nọ jlo nado dù núdùdù* he ohàn lẹ nọ dù gọ́ho, podọ mẹdepope ma nọ na ẹn nudepope. 17  “To whenue e gọ̀ biọ ede mẹ, e dọmọ, ‘Nẹmunẹmu wẹ pakanọ otọ́ ṣie tọn lẹ he tindo núdùdù susugege, bọ yẹn to kúkú na huvẹ tofi! 18  Yẹn na fọ́n bo zingbejizọnlin yì otọ́ ṣie dè bo dọna ẹn dọmọ: “Otọ́, yẹn ko waylando do olọn podọ do hiẹ. 19  Yẹn masọ jẹ nado yin yiylọdọ visunnu towe ba. Yí mi do basi dopo to pakanọ towe lẹ mẹ.”’ 20  Enẹwutu, e fọ́n bo yì otọ́ etọn dè. Dile e gbẹ́ pò to olá, otọ́ etọn mọ ẹn bọ lẹblanu whàn ẹn, e sọ họ̀nwezun bo gbò e fán bosọ donùnùgo na ẹn. 21  To whenẹnu, visunnu lọ dọna ẹn dọ, ‘Otọ́, yẹn ko waylando do olọn podọ do hiẹ. Yẹn masọ jẹ nado yin yiylọdọ visunnu towe ba. Yí mi do basi dopo to pakanọ towe lẹ mẹ.’ 22  Ṣigba, otọ́ lọ dọna afanumẹ etọn lẹ dọ, ‘Mì yawu! bo hẹn tewu de wá, yèdọ dehe yọ́n hugan, bo dó na ẹn, bosọ dó alọkẹ de do alọ na ẹn podọ afọpa do afọ na ẹn. 23  Podọ mì hẹn oyìnsú winyanwinyan he dojó de wá, bo hù i bosọ gbọ mí ni dù bo jaya, 24  na visunnu ṣie ehe ko kú bo gọwá ogbẹ̀ whladopo dogọ; e ko bu bosọ yin mimọ.’ Yé sọ jẹ ayajẹ ji. 25  “Todin, visunnu etọn mẹho lọ tin to ogle mẹ; podọ dile e ja bo sẹpọ whégbè, e sè ogbè nuhiho daho de po wedudu po tọn. 26  Enẹwutu, e ylọ dopo to devizọnwatọ lẹ mẹ wá ede dè bo kàn nuhe to jijọ biọ. 27  Ewọ dọna ẹn dọ, ‘Nọvisunnu towe ko wá, bọ otọ́ towe hù oyìnsú winyanwinyan he dojó, na e mọ ẹn to agbasalilo mẹ wutu.’ 28  Ṣigba, ewọ gblehomẹ bo ma jlo na biọ whégbè. To whenẹnu, otọ́ etọn tọ́n wá bo jẹ vivẹ ẹ ji. 29  Ewọ gblọnna otọ́ etọn dọ, ‘Sọn owhe susu die gbọ́n wẹ yẹn ko to sinsẹ̀n we bo ma tùnafọ anademẹ towe ji pọ́n gbede, ṣogan hiẹ ma na mi gbọgbọẹvu dopo nado jaya hẹ họntọn ṣie lẹ pọ́n gbede. 30  Ṣigba, tlolo he visunnu towe ehe, he dù nutindo gbẹ̀mẹ tọn towe lẹ vọ̀ hẹ galọtọ lẹ wá, hiẹ hù oyìnsú winyanwinyan he dojó na ẹn.’ 31  To whenẹnu, e dọna ẹn dọ, ‘Ovi, whepoponu wẹ hiẹ tin hẹ mi, podọ towe wẹ onú he yin ṣie lẹpo; 32  ṣigba e jẹ dọ mí ni jaya bo hùnhomẹ, na nọvisunnu towe ehe ko kú bo gọwá ogbẹ̀, podọ ewọ ko bu bosọ yin mimọ.’”

Nudọnamẹ Odò Tọn

Luk 15:8* To paa mẹ, abọgan-kuẹ dlakma dopo yin atọ̀n to mado ẹnẹ azọ́nkuẹ gbèdopo tọn mẹ.
Luk 15:16* Kavi, atin-sinsẹ́n kelationi tọn.