Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Luku 12:1-59

12  To ojlẹ enẹ mẹ, to whenue gbẹtọgun lọ he sọha yetọn yì fọtọ́n susu lẹ ko pli dopọ bọ yé to afọtùn ode awetọ yetọn ji, e jẹ didọna devi etọn lẹ whẹ́ ji dọmọ: “Mì payi otọ́n Falesi lẹ tọn, he yin yẹnuwiwa go.  Ṣigba, nudepope ma tin he yin whiwhla po sọwhiwhe po he ma na wá yin didehia, podọ he yin aṣli he ma na wá yin yinyọnẹn.  Enẹwutu, nuhe mì dọ to zinvlu mẹ lẹ na yin sisè to hinhọ́n nù, podọ nuhe mì depá etọn to abò mìtọn titi lẹ mẹ na yin yẹwheho etọn dọ sọn họta.  Humọ, yẹn dọna mì mẹhe yin họntọn ṣie lẹ dọ, Mì dibusi yé he nọ hù agbasa podọ to enẹgodo masọ penugo nado wà nudepope ba lẹ blo.  Ṣigba, yẹn na do mẹhe mì na dibusi hia mì: Mì dibusi ewọ he sọgan hù bọ to enẹgodo tindo aṣẹ nado zedlan Gẹhẹnna* mẹ. Mọwẹ, yẹn dọna mì dọ, Omẹ ehe wẹ mì ni dibusi.  Oblẹnọ atọ́n wẹ nọ yin sisà yin abọgan-kuẹ* pẹvi awe, kavi e ma yin mọ wẹ? Ṣogan, Jiwheyẹwhe ma nọ wọn depope to yé mẹ.  Ṣigba, oda he to ota mìtọn lẹpo wẹ ko yin hihia. Mì dibu blo; mìwlẹ họakuẹ hú oblẹnọ susu.  “To whelọnu lo, yẹn dọna mì dọ, Mẹdepope he yigbe to gbẹtọ lẹ nukọn dọ emi tin to kọndopọ mẹ hẹ mi, Visunnu gbẹtọ tọn lọsu na yigbe ga dọ emi tin to kọndopọ mẹ hẹ ẹ to angẹli Jiwheyẹwhe tọn lẹ nukọn.  Ṣigba, ewọ he mọ́n mi to gbẹtọ lẹ nukọn na yin mimọ́n to angẹli Jiwheyẹwhe tọn lẹ nukọn. 10  Podọ mẹdepope he dọ ohó de sọta Visunnu gbẹtọ tọn, e na yin jijona ẹn; ṣigba ewọ he zánnu do gbigbọ wiwe go, e ma na yin jijona ẹn. 11  Ṣigba, to whenue yé plan mì wá gbẹtọgun lẹ po ahọluzọnwatọ lẹ po gọna aṣẹpipa lẹ nukọn, mì yin magbọjẹnọ gando lehe kavi nuhe mì na dọ nado yiavunlọ go kavi gando nuhe mì na gblọn go blo; 12  na gbigbọ wiwe na plọn mì nuhe mì dona dọ to gànhiho enẹ mẹ.” 13  To enẹgodo, omẹ dopo to gbẹtọgun lọ mẹ dọna ẹn dọmọ: “Mẹplọntọ, dọna nọvisunnu ṣie nado má ogú lọ hẹ mi.” 14  Ewọ dọna ẹn dọmọ: “Dawe, mẹnu wẹ de mi taidi whẹdatọ kavi numátọ do mì ji?” 15  To whenẹnu, e dọna yé dọmọ: “Mì hùn nukun mìtọn lẹ bo họ́ mìde sọta nukunkẹn wunmẹ lẹpo, na eyin mẹde tlẹ tindo susugege, nutindo etọn lẹ ma nọ na ẹn ogbẹ̀.” 16  To whenẹnu, e na apajlẹ de yé dọmọ: “Aigba dawe adọkunnọ de tọn de sinsẹ́n susu tọ́n. 17  Enẹwutu, e jẹ linlẹn ji to ede mẹ dọmọ, ‘Etẹwẹ yẹn na wà, todin he yẹn ma tindo fidepope nado bẹ jinukun ṣie lẹ do?’ 18  Enẹgodo, e dọmọ, ‘Nuhe yẹn na wà die: Yẹn na họ́ agbànhọ ṣie lẹ liai bo na gbá dehe klo humọ lẹ, bọ finẹ wẹ yẹn na bẹ likun ṣie lẹpo podọ onú dagbe ṣie lẹpo do; 19  yẹn nasọ dọna alindọn ṣie dọmọ: “Alindọn, hiẹ tindo onú susu he ko yin bibẹpli dai he hiẹ na yizan na owhe susu; hiẹ ni vò, bo nọ dù, bo nọ nù bosọ nọ dugbẹ.”’ 20  Ṣigba, Jiwheyẹwhe dọna ẹn dọ, ‘Hiẹ nulunọ, to ozán ehe mẹ, yè to alindọn towe biọ sọn dè we. To whelọnu lo, mẹnu tọn wẹ nuhe hiẹ bẹpli lẹ na yin?’ 21  Mọ wẹ e nọ yì do na omẹ lọ he bẹ adọkun pli na ede ṣigba bo ma yin adọkunnọ hlan Jiwheyẹwhe.” 22  Enẹgodo, e dọna devi etọn lẹ dọmọ: “Ehe wutu wẹ yẹn dọna mì dọ, Mì sọ yin magbọjẹnọ na alindọn mìtọn gando nuhe mì na dù go kavi na agbasa mìtọn gando nuhe mì na dó go ba blo. 23  Na alindọn họakuẹ hú núdùdù podọ agbasa hú avọ̀. 24  Mì doayi e go ganji dọ ohọ́n lẹ ma nọ dó jinukun kavi gbẹ̀n, podọ yé ma nọ tindo zínhọ kavi agbànhọ, ṣogan Jiwheyẹwhe nọ na núdùdù yé. Be mìwlẹ ma họakuẹ tlala hú ohẹ̀ lẹ wẹ ya? 25  Mẹnu to mì mẹ wẹ sọgan gbọn magbọjẹnọ-yinyin dali yí awagbà* dopo dogọ tedidi gbẹzan etọn tọn? 26  Enẹwutu, eyin mì ma sọgan wà nuhe whè hugan lọ, naegbọn mì do to magbọjẹnọ yin na nuhe pò lẹ? 27  Mì doayi lehe vounvoun lẹ nọ whẹ́n do go ganji; yé ma nọ wazọ́n kavi gbẹ̀n sekan; ṣigba yẹn dọna mì dọ, Sọlomọni lọsu to gigo etọn lẹpo mẹ ma tlẹ yin aṣọ́dona di dopo to ehelẹ mẹ. 28  Todin, eyin Jiwheyẹwhe nọ doaṣọ́ sọmọ na ogbé danji tọn lẹ he nọ tin to egbé bo nọ yin zizedlan adò mẹ to osọ he ja, nẹmunẹmu wẹ e ma na doaṣọ́na mì, mì yise pẹvinọ lẹ! 29  Enẹwutu, mì sọ yin magbọjẹnọ gando nuhe mì sọgan dù po nuhe mì sọgan nù po go blo, podọ mì doalọtena magbọjẹ he ma yin dandan tọn; 30  na ehe lẹpo wẹ onú he akọta aihọn tọn lẹ to afọdona vẹkuvẹku, ṣigba Otọ́ mìtọn olọn tọn yọnẹn dọ mì tindo nuhudo onú ehelẹ tọn. 31  Etomọṣo, mì to ahọluduta etọn dín zọnmii, podọ onú ehelẹ na yin yiyidogọ na mì. 32  “Mì dibu blo, lẹngbọpa pẹvi, na Otọ́ mìtọn mọdọ e jẹ nado na mì ahọluduta lọ. 33  Mì sà nuhe mì tindo lẹ bo na nunina lẹblanu tọn lẹ. Mì basi sẹgẹ he ma nọ dohó lẹ na mìde, yèdọ adọkun he ma nọ vọ̀ gbede do olọn mẹ, fie ajotọ de ma nọ sẹpọ bọ okọ́ ma nọ dùnú te. 34  Na fie adọkunnu mìtọn te, finẹ wẹ ahun mìtọn na te ga. 35  “Na mì ni blagbajana mìde bo gbọ miyọ́ngbán mìtọn ni to jiji, 36  podọ mìlọsu lẹ ni taidi dawe lọ lẹ he to tenọpọn whenue oklunọ yetọn na lẹkọwa sọn alọwle, na whenue e na wá bo húhúhọ̀n yé nido hùn na ẹn to afọdopolọji. 37  Ayajẹnọ wẹ afanumẹ enẹlẹ he oklunọ yetọn wá bo mọ to nukle! Nugbo wẹ yẹn dọna mì dọ, E na blagbajana ede bo na hẹn yé jagla to tafo kọ̀n bo nasọ wá yé dè nado yilizọn na yé. 38  Podọ eyin e wá to mimá* awetọ mẹ, kavi etlẹ yin atọ̀ntọ mẹ, bo mọ yé domọ, ayajẹnọ wẹ yé! 39  Ṣigba, mì yọ́n ehe dọ, eyin whétọ lọ ko yọ́n ogàn he mẹ ajotọ lọ na wá te wẹ, e na ko gbọṣi nukle bo ma na ko dike yè ni gbò adó biọ owhé etọn gbè. 40  Mìlọsu ga, mì wleawudai, na e yọnbasi dọ ogàn he mẹ mì ma lẹn do wẹ Visunnu gbẹtọ tọn ja.” 41  To whenẹnu Pita dọmọ: “Oklunọ, be míwlẹ wẹ hiẹ to apajlẹ ehe dọna kavi na mẹlẹpo?” 42  Oklunọ sọ dọmọ: “Mẹnu wẹ họ̀nkọnsi nugbonọ, nuyọnẹntọ, mẹhe oklunọ etọn na de do pipli devizọnwatọ etọn lẹ tọn ji nado nọ na yé núdùdù he pé yé to ojlẹ sisọ mẹ? 43  Ayajẹnọ wẹ afanumẹ enẹ, eyin oklunọ etọn wá bo mọ ẹn to mọwà! 44  Nugbo wẹ yẹn dọna mì, Ewọ na de e do nutindo etọn lẹpo ji. 45  Ṣigba, eyin afanumẹ enẹ dọ to ahun ede tọn mẹ gbede dọ, ‘Wiwá oklunọ ṣie tọn to dindẹn,’ bo jẹ devisunnu po deviyọnnu lẹ po hò ji, podọ bo nọ dù bosọ nọ nù bo nọ nùmú, 46  oklunọ afanumẹ enẹ tọn na wá to azán he gbè ewọ ma to nukundo e podọ to ogàn he mẹ ewọ ma yọnẹn, bo na sayana ẹn to aliho sinsinyẹn mẹ bo nasọ na ẹn otẹn etọn do mẹhe ma yin nugbonọ lẹ ṣẹnṣẹn. 47  To whenẹnu, afanumẹ enẹ he mọnukunnujẹ ojlo oklunọ etọn tọn mẹ ṣigba bo ma wleawudai kavi yinuwa sọgbe hẹ ojlo etọn na yin hihò po obá susu po. 48  Ṣigba, ewọ he ma mọnukunnujẹemẹ podọ na enẹwutu wà nuhe jẹna obá lẹ na yin hihò po obá vude po. Na nugbo tọn, mẹdepope he susu yin nina, susu na yin bibiọ to e si; podọ ewọ he gbẹtọ lẹ ze do onú susu ji, yé na biọ onú susu hú dehe dona yin bibiọ to e si. 49  “Yẹn wá nado flọ miyọ́n de do aigba ji, podọ etẹwẹ yẹn na gbẹsọ to jijlo eyin e ko yin fiflọ? 50  Na nugbo tọn, yẹn tindo baptẹm de he yè na yí do baptizi mi, podọ lehe yẹn yin ayimajainọ kakajẹ whenue e ko yin tadona do sọ! 51  Be mì lẹndọ yẹn wá nado hẹn jijọho wá aigba ji wẹ ya? Na nugbo tọn, yẹn dọna mì dọ, lala, adavo kinklan. 52  Na sọn din sọyi, omẹ atọ́n na tin to ohọ̀ dopo mẹ bọ yé na klan, omẹ atọ̀n sọta omẹ awe podọ omẹ awe sọta omẹ atọ̀n. 53  Yé na yin kinklan, yèdọ otọ́ sọta visunnu podọ visunnu sọta otọ́, onọ̀ sọta viyọnnu podọ viyọnnu sọta onọ̀ etọn, asu-nọ̀ sọta ovisi podọ ovisi sọta asu-nọ̀ etọn.” 54  Enẹgodo, e zindonukọn nado dọna gbẹtọgun lọ lẹ dọmọ: “To whenue mì mọ bọ aslọ súyu to whèyihọ-waji, mì nọ dọ to afọdopolọji dọ, ‘Yujẹhọn na tin,’ e sọ nọ yinmọ. 55  Podọ to whenue mì mọ jẹhọn hùwaji tọn to yìnyìn, mì nọ dọ, ‘Yozò sinsinyẹn na tin,’ e sọ nọ jọ domọ. 56  Mì yẹnuwatọ lẹ, mìwlẹ yọ́n lehe yè nọ tunwun awusọhia aigba po jiwhé-nukunmẹ tọn po go do, ṣigba naegbọn bọ mì ma yọ́n lehe yè nọ tunwun ojlẹ tangan ehe go do? 57  Naegbọn mìwlẹ ma do basi dide nuhe dodo yin tọn na mìde? 58  Di apajlẹ, to whenue hiẹ tin to aliho ji hẹ mẹhe ylọwhẹ we jei ogán de nukọn, yawu jẹ owhẹ̀ towe gbọ̀ hẹ ẹ ji to whenue mì tin to aliho ji, na ewọ ni ma do dọ̀n we yì whẹdatọ lọ nukọn, bọ whẹdatọ lọ na ze we do alọmẹ na ponọ whẹdatẹn tọn, ponọ whẹdatẹn tọn nasọ dlan we do gànpamẹ. 59  Yẹn dọna we dọ, Hiẹ ma na tọ́n sọn finẹ to aliho depope mẹ kaka hiẹ nado sú abọgan-kuẹ pẹvi pete godo tọn.”

Nudọnamẹ Odò Tọn

Luk 12:5* Pọ́n Nudọnamẹ Dogọ 9.
Luk 12:6* Pọ́n Mt 10:29, nudọnamẹ odò tọn.
Luk 12:25* Pọ́n Nudọnamẹ Dogọ 11.
Luk 12:38* Pọ́n Mt 14:25, nudọnamẹ odò tọn.