Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Juda 1:1-25

1  Juda, afanumẹ Jesu Klisti tọn, ṣigba nọvisunnu Jakọbu tọn, to wekanhlan mẹyiylọ lẹ he yè yiwanna to kọndopọ mẹ hẹ Jiwheyẹwhe Otọ́, bosọ yin whiwhla dai na Jesu Klisti:  Na lẹblanu, jijọho po owanyi po ni yin hinhẹn sudeji hlan mì.  Mẹyiwanna lẹ emi, dile yẹn tlẹ ko to vivẹnu lẹpo do dai nado kanwehlan mì gando whlẹngán he mí tindo to pọmẹ lọ go, yẹn mọdọ e yin dandan nado kanwehlan mì bo dotuhomẹna mì nado hoavùn sinsinyẹn na yise lọ he ko yin yíyí na omẹ wiwe lẹ whladopo podọ kakadoi.  Whẹwhinwhẹ́n he yẹn tindo wẹ yindọ mẹdelẹ ko lìn biọ mì mẹ, yèdọ omẹ jijọ-madi-Jiwheyẹwhe tọn lẹ he ko yin dide gbọn Owe-wiwe dali sọn whenu dindẹn die na whẹdida ehe, bo to nukundagbe majẹhẹ Jiwheyẹwhe mítọn tọn diọ zun whẹjijọ de nado jo yede na wantuntun bosọ nọ mọ́n Oklunọ mítọn dopo kẹdẹ he họ̀ mí lọ, enẹ wẹ Jesu Klisti.  Yẹn jlo nado flinnu mì, mahopọnna dọ mìwlẹ yọ́n nulẹpo todin podọ kakadoi, dọ, dile etlẹ yindọ Jehovah whlẹn omẹ etọn lẹ gán sọn aigba Egipti tọn ji, to godo mẹ, e và mẹhe ma do yise hia lẹ sudo.  Podọ angẹli he ma gbọṣi otẹn dowhenu tọn yetọn mẹ ṣigba bo jo nọtẹn he jẹna yé lọ do lẹ wẹ ewọ ko yí gẹdẹ madopodo lẹ do hla dote to zinvlu gọ́ngọ́n mẹ na whẹdida azán daho lọ tọn.  Mọdopolọ ga, Sodọmi po Gomọla po gọna tòdaho he lẹdo yé lẹ, to whenuena yewlẹ lọsu, kẹdẹdi mẹhe yin nùdego jẹnukọn enẹlẹ, ko peve to galilọ mẹ bo doafọna agbasalan na yizan he ma yin jọwamọ tọn godo, yé jiya whẹdida yasanamẹ miyọ́n madopodo tọn bo gbọnmọ dali yin zizedonukọnna mí taidi apajlẹ avase tọn de.  Nalete, to aliho dopolọ mẹ, omẹ ehelẹ lọsu, gbọn yede jijona odlọ lẹ dali, nọ to agbasalan hẹnflu bo nọ gbẹkọ oklunọ-yinyin* go bosọ nọ to nùzan do omẹ gigonọ lẹ go.  Ṣigba to whenuena Mikaẹli angẹligán lọ tindo wiwọ́ de hẹ Lẹgba bo to núdọ̀n gando oṣiọ Mose tọn go, e ma tẹnpọn nado hẹn whẹdida wá e ji po hogbe mẹzunzun tọn lẹ po gba, ṣigba e dọmọ: “Na Jehovah ni gbẹnuna we.” 10  Ṣogan omẹ ehelẹ nọ to nùzan gando onú he yé ma yọnẹn na taun tọn lẹpo go; ṣigba onú he mẹ yé mọnukunnujẹ to jọwamọ-liho lẹpo, yèdọ taidi kanlin he ma nọ lẹnnupọn lẹ, to onú ehelẹ mẹ wẹ yé zindonukọn nado to yedelẹ hẹn gblezọn te. 11  Dindọn hlan yé, na yé ko hodo ali Kaini tọn, bo ko dowezun hodo alibubu Balaami tọn na ale, bo ko sọ dọ̀n to hodidọ atẹṣiṣi Kola tọn mẹ! 12  Omẹ ehelẹ wẹ osé whiwhla lẹ to osin glọ to hùnwhẹ owanyi didohia tọn mìtọn lẹ whenu dile yé to núdù hẹ mì, lẹngbọhọtọ he nọ na núdùdù yedelẹ madibu; aslọ matin osin he jẹhọn nọ to hinhẹn yidọn-yide; atin he ma nọ de sinsẹ́n tọ́n to ojlẹ etọn mẹ,* he ko kú whla awe bọ yè ko họ̀n adọ̀ na lẹ wẹ yé; 13  agbówhẹn sinsinyẹn ohù tọn he nọ túntún fútúfútú winyannu yedetiti tọn lẹ jẹgbonu; sunwhlẹvu he to dindanpe lẹ, he yuudidi zinvlu tọn ko yin hihla dai na kakadoi wẹ yé. 14  Mọwẹ, Enọku, omẹ ṣinawetọ bẹsọn hukan Adam tọn ji, ko dọ dọdai gando yé go ga, to whenuena e dọmọ: “Mì pọ́n! Jehovah wá po fọtọ́n ao angẹli wiwe etọn lẹ tọn po, 15  nado hẹn whẹdida ṣẹ do mẹlẹpo ji, podọ nado gblewhẹdo omẹ jijọ-madi-Jiwheyẹwhe tọn lẹpo na walọ jijọ-madi-Jiwheyẹwhe tọn yetọn lẹpo he yé ko zan to aliho jijọ-madi-Jiwheyẹwhe tọn mẹ, podọ na ohó mẹhẹnjọsi tọn he ylanwatọ jijọ-madi-Jiwheyẹwhe tọn lẹ ko dọ sọta ẹ lẹpo wutu.” 16  Omẹ ehelẹ nọ to nuhlundọ, bo nọ to lewú gando ninọmẹ gbẹ̀mẹ tọn yetọn go, bosọ nọ to zọnlinzin sọgbe hẹ ojlo yedetiti tọn lẹ, podọ onù yetọn nọ to ohó gboogbo lẹ dọ, to whenuena yé nọ na sisi gbẹtọ lẹ na ale yedetiti tọn wutu. 17  Na mìwlẹ tọn, mẹyiwanna lẹ emi, mì flin ohó he apọsteli Oklunọ mítọn Jesu Klisti tọn lẹ ko dọ wayi lẹ, 18  Lehe yé nọ saba dọ hlan mì do dọmọ: “To azán godo tọn lẹ mẹ, mẹṣankotọ lẹ na tin, bo na to zọnlinzin sọgbe hẹ ojlo yetọn na onú jijọ-madi-Jiwheyẹwhe tọn lẹ.” 19  Omẹ ehelẹ wẹ yé he nọ hẹn kinklan wá lẹ, yèdọ gbẹtọ kanlinjọmẹ lẹ he ma tindo gbigbọnọ-yinyin. 20  Ṣigba, mì mẹyiwanna lẹ emi, gbọn mìde hinhẹn lodo to dodonu yise mìtọn he wé hugan lọ tọn ji dali, podọ gbọn dẹ̀hiho to gbigbọ wiwe mẹ dali, 21  mì hẹn mìde do owanyi Jiwheyẹwhe tọn mẹ, dile mì to tenọpọn lẹblanu Oklunọ mítọn Jesu Klisti tọn to todido mẹ na ogbẹ̀ madopodo. 22  Humọ, mì zindonukọn nado nọ do lẹblanu hia mẹdelẹ he tindo ayihaawe; 23  mì whlẹn yé gán gbọn hihò yé yí sọn miyọ́n mẹ dali. Ṣigba mì zindonukọn nado nọ do lẹblanu hia mẹdevo lẹ, bo nọ wàmọ po obu po, dile mì tlẹ gbẹwanna awù odò tọn lọ lọsu he agbasalan ko hẹn kudiho. 24  Todin, hlan omẹ lọ he penugo nado basi hihọ́na mì ma nado dahli bo hẹn mì madoblọ to gigo etọn nukọn po ayajẹ daho po, 25  yèdọ hlan Jiwheyẹwhe Mẹwhlẹngántọ mítọn dopo kẹdẹ lọ gbọn Jesu Klisti Oklunọ mítọn gblamẹ, wẹ gigo, kiklo, hlọnhlọn po aṣẹpipa po ni tin hlan sọn ojlẹ madopodo podọ todin podọ kakadoi. Niṣẹ.*

Nudọnamẹ Odò Tọn

Juda 8* Dlẹnalọdo Jiwheyẹwhe po mẹhe e na aṣẹpipa lẹ po.
Juda 12* To paa mẹ, “vivọnu afò-whenu tọn.”
Juda 25* Pọ́n Lo 1:25, nudọnamẹ odò tọn.