Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Johanu 5:1-47

5  To onú ehelẹ godo, hùnwhẹ Ju lẹ tọn de wá, Jesu sọ hẹji yì Jelusalẹm.  Todin, osindò de tin to họngbo lẹngbọ tọn ji to Jelusalẹm he nọ yin yiylọ to Heblugbe mẹ dọ Bẹtsata, he tindo agbà gaa* atọ́n.  Susugege mẹhe to azọ̀njẹ lẹ tọn, nukuntọ́nnọ lẹ, sẹkunọ lẹ, po mẹhe awutugonu yetọn lẹ ko kúsẹ́ lẹ po mlọnai to yé mẹ.  ——*  Ṣigba, dawe de tin to finẹ he ko to azọ̀njẹ na owhe gbàn-atọ́n-nukunatọ̀n.  To whenue Jesu mọ dawe ehe to aimimlọn, bo yọnẹn dọ e ko to azọ̀njẹ sọn ojlẹ dindẹn die, e dọna ẹn dọmọ: “Be hiẹ jlo na jẹgangan ya?”  Dawe he to azọ̀njẹ lọ gblọnna ẹn dọmọ: “Mẹdaho, yẹn ma tindo mẹde he na ze mi do osindò lọ mẹ to whenue osin lọ wlu; ṣigba eyin yẹn jei mẹdevo nọ jẹnukọnna mi.”  Jesu dọna ẹn dọmọ: “Fọ́n, ze adọ́zan towe bo zinzọnlin.”  To whenẹnu, dawe lọ jẹgangan to afọdopolọji, e sọ ze adọ́zan etọn bo jẹ zọnlinzin ji. Todin, gbọjẹzan de wẹ azán enẹ yin. 10  Enẹwutu, Ju lẹ jẹ didọna dawe he yin azọ̀nhẹngbọna lọ ji dọmọ: “Gbọjẹzangbe wẹ, podọ e ma sọgbe hẹ osẹ́n dọ hiẹ ni ze adọ́zan towe gba.” 11  Ṣigba, e gblọnna yé dọmọ: “Omẹ lọ he hẹn mi jẹgangan wẹ dọna mi dọ, ‘Ze adọ́zan towe bo zinzọnlin.’” 12  Yé kanbiọ ẹ dọmọ: “Mẹnu wẹ omẹ lọ he dọna we dọ, ‘Ze adọ́zan towe bo zinzọnlin’?” 13  Ṣigba, dawe he yin azọ̀nhẹngbọna lọ ma yọ́n omẹ lọ, na Jesu ko tọ́n sọn finẹ, podọ gbẹtọ sọ sù to finẹ. 14  To onú ehelẹ godo, Jesu mọ ẹn to tẹmpli mẹ bo dọna ẹn dọmọ: “Pọ́n, hiẹ ko jẹgangan. A sọ waylando ba blo, na onú he ylanhu de nikaa jọ do gowe.” 15  Dawe lọ tọ́nyi bo dọna Ju lẹ dọ Jesu wẹ hẹn ẹn jẹgangan. 16  Na ehe tọn wutu, Ju lẹ jẹ homẹkẹndo Jesu ji na e to onú ehelẹ wà to Gbọjẹzangbe wutu. 17  Ṣigba, e gblọnna yé dọmọ: “Otọ́ ṣie zindonukọn to azọ́nwiwa mẹ kakajẹ din, yẹnlọsu sọ to nukọnzindo to azọ́nwiwa mẹ.” 18  Na nugbo tọn, na ehe tọn wutu, Ju lẹ jẹ aliho lẹpo dín ji nado hù i, na e ma yin Gbọjẹzan kẹdẹ wẹ e ma yìn gba ṣigba e sọ to Jiwheyẹwhe ylọdọ Otọ́ etọn, bo to ede hẹn sọzẹn hẹ Jiwheyẹwhe. 19  Enẹwutu, Jesu gblọnna yé bo dọmọ: “Nugbonugbo wẹ yẹn dọna mì dọ, Visunnu ma sọgan wà onú dopo tata to ojlo ede tọn mẹ, adavo nuhe e mọ Otọ́ to wiwà kẹdẹ. Na nudepope he e mọ bọ Ewọ to wiwà, onú ehelẹ wẹ Visunnu lọsu nọ wà ga. 20  Na Otọ́ yiwanna Visunnu lọ bo nọ do nuhe ewọ lọsu to wiwà lẹpo hia ẹ, podọ e nasọ do azọ́n he klohu ehelẹ hia ẹ, na awú nido ji mì. 21  Na kẹdẹdile Otọ́ nọ fọ́n oṣiọ lẹ bo nọ na yé ogbẹ̀ do, mọ wẹ Visunnu lọsu nọ na ogbẹ̀ mẹhe jlo e lẹ do. 22  Na Otọ́ ma nọ dawhẹna mẹdepope, ṣigba ewọ ko ze whẹdida lẹpo do alọmẹ na Visunnu lọ, 23  na mẹlẹpo nido sọgan gbògbéna Visunnu lọ kẹdẹdile yé nọ gbògbéna Otọ́ do. Ewọ he ma gbògbéna Visunnu lọ ma gbògbéna Otọ́ lọ he do e hlan. 24  Nugbonugbo wẹ yẹn dọna mì dọ, Ewọ he sè ohó ṣie bo yí ewọ he do mi hlan sè na mọ ogbẹ̀ madopodo, podọ ewọ ma na yin whẹdana ṣigba e na tọ́n sọn okú mẹ biọ ogbẹ̀ mẹ. 25  “Nugbonugbo wẹ yẹn dọna mì dọ, Ojlẹ lọ ja, din sọ wẹ, whenuena oṣiọ lẹ na sè ogbè Visunnu Jiwheyẹwhe tọn lọ tọn bọ mẹhe ko dotoai lẹ na nọgbẹ̀. 26  Na kẹdẹdile Otọ́ tindo huhlọn nado namẹ ogbẹ̀ do, mọ wẹ e ko na huhlọn Visunnu lọsu do ga nado namẹ ogbẹ̀. 27  Podọ e ko na ẹn aṣẹ nado dawhẹ, na Visunnu gbẹtọ tọn wẹ ewọ yin wutu. 28  Ehe paṣa mì blo, na ojlẹ lọ ja, to ehe mẹ mẹhe to yọdò oflin tọn lẹ mẹ lẹpo na sè ogbè etọn 29  bo tọ́njẹgbonu, mẹhe wà dagbe lẹ na fọnsọnku ogbẹ̀ tọn, mẹhe wà onú ylankan lẹ na fọnsọnku whẹdida tọn. 30  Yẹn ma sọgan wà onú dopo tata sọn ojlo ṣie mẹ gba; dile yẹn sè do, wẹ yẹn nọ dawhẹ do; podọ owhẹ̀ dodo wẹ yẹn nọ dá, na yẹn ma nọ dín nuhe yin ojlo ṣie titi gba, adavo nuhe yin ojlo ewọ he do mi hlan tọn. 31  “Eyin yẹn dopo dekunnu gando dee titi go, kunnudide ṣie ma yin nugbo. 32  Omẹ devo de nọ dekunnu gando go e, podọ yẹn yọnẹn dọ kunnu he ewọ nọ de gando go e yin nugbo. 33  Mìwlẹ ko domẹhlan Johanu dè, bọ ewọ ko dekunnu gando nugbo lọ go. 34  Ṣigba, yẹn ma nọ kẹalọyi kunnudide he wá sọn gbẹtọ dè, ṣigba yẹn dọ onú ehelẹ na mìwlẹ nido sọgan yin whinwhlẹngán. 35  Miyọ́ngbán he to titá bo to hinhọ́n na de wẹ dawe enẹ, podọ mìwlẹ to jijlo nado jaya tlala to hinhọ́n etọn mẹ na ojlẹ gli de. 36  Ṣigba, yẹn tindo kunnudide lọ he klohu Johanu tọn, na azọ́n lọ lẹ lọsu he Otọ́ ṣie ko dena mi nado wadotana, yèdọ azọ́n lọ lẹ he yẹn to wiwà, dekunnu gando go e dọ Otọ́ wẹ do mi hlan. 37  Humọ, Otọ́ lọ he do mi hlan lọsu ko dekunnu gando go e. Mìwlẹ ma ko sè ogbè etọn kavi mọ ẹn pọ́n; 38  podọ ohó etọn ma gbọṣi mì mẹ, na mì ma yí omẹ lọ he e dohlan sè wutu. 39  “Mì to dogbapọnna Owe-wiwe lẹ, na mì lẹndọ mì sọgan mọ ogbẹ̀ madopodo gbọn enẹlẹ gblamẹ; podọ ehelẹ lọsu wẹ dekunnu gando go e. 40  Ṣogan, mìwlẹ ma jlo na wá dè e nado sọgan mọ ogbẹ̀. 41  Yẹn ma nọ kẹalọyi gigo he wá sọn gbẹtọ lẹ dè gba, 42  ṣigba yẹn yọnẹn ganji dọ mì ma tindo owanyi Jiwheyẹwhe tọn to mì mẹ. 43  Yẹn wá to oyín Otọ́ ṣie tọn mẹ, ṣigba mìwlẹ ma yí mi; eyin mẹdevo wá to oyín edetiti tọn mẹ, mìwlẹ na yí omẹ enẹ. 44  Nawẹ mì sọgan yise do, to whenue mì to alọkẹyi gigo he wá sọn ode awetọ dè bọ mì ma to gigo he wá sọn Jiwheyẹwhe dopo kẹdẹ lọ dè dín? 45  Mì lẹndọ yẹn na sawhẹdokọna mì to Otọ́ dè blo; omẹ de tin he nọ sawhẹdokọna mì, yèdọ Mose, mẹhe mẹ mìwlẹ ko ze todido mìtọn do. 46  Na nugbo tọn, eyin mìwlẹ ko yí Mose sè, mì na ko yí mi sè, na ewọ kanwe gando go e. 47  Ṣigba, eyin mìwlẹ ma yí kandai ewọ tọn lẹ sè, nawẹ mì na yí ohó ṣie lẹ sè gbọn?”

Nudọnamẹ Odò Tọn

Joh 5:2* Kavi, “họ̀nnuwá,” agbà gaa de he tindo dòtin lẹ he hẹn họgbánu lẹ to adà awe lẹ ji.
Joh 5:4* Pọ́n Mt 17:21, nudọnamẹ odò tọn.