Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN Pọ́n zinjẹgbonu 2015 tọn

Johanu 21:1-25

21  To onú ehelẹ godo, Jesu sọ vọ́ sọawuhia devi etọn lẹ to ohù Tibeliadi tọn tó; ṣigba aliho he mẹ e sọawuhia te die.  Omẹ ehelẹ tin topọ, yèdọ Simọni Pita, Tọmasi mẹhe nọ yin yiylọdọ Ahoho Lọ, Natanaeli he wá sọn Kana Galili tọn, visunnu Zebede tọn lẹ gọna devi etọn awe devo lẹ.  Simọni Pita dọna yé dọmọ: “Yẹn jei whèvi hù gbè.” Yé dọna ẹn dọmọ: “Mílọsu na hodo we ga.” Yé tọ́nyi bo biọ tọjihun mẹ, ṣigba yé ma wle nudepope to ozán enẹ mẹ.  Nalete, dile ai to hinhọ́n, Jesu ṣite to ohù lọ tó, ṣigba, na nugbo tọn, devi lẹ ma yọnẹn dọ Jesu wẹ.  To whenẹnu, Jesu dọna yé dọmọ: “Yọpọ lẹ emi, mì ma tindo nudepope nado dù, kavi e ma yin mọ wẹ?” Yé gblọnna ẹn dọ, “Mọwẹ!”  E dọna yé dọmọ: “Mì yìn odọ̀ lọ do adusiwhé tọjihun lọ tọn, mì nasọ mọ delẹ.” To whenẹnu, yé yìn in, ṣigba yé ma penugo nado dọ̀n ẹn biọ ohún mẹ na whèvi lọ lẹ sù tlala wutu.  To whenẹnu, devi lọ he Jesu yiwanna dọna Pita dọmọ: “Oklunọ wẹ!” Enẹwutu, to whenue Simọni Pita sè dọ Oklunọ wẹ, e ze awù aga tọn etọn dó, na e ko de e dai wutu, bo biọ ohù mẹ.  Ṣigba, devi he pò lẹ zọ̀n tọjihun pẹvi lọ mẹ wá, na yé ma dẹn do agé wutu, yèdọ nudi mẹtlu kanweko* poun, bo to odọ̀ whèvi tọn lọ dọ̀n.  Ṣigba, to whenue yé jẹage, yé mọ akán miyọ́n to finẹ bọ whèvi yin titẹ́ do e ji gọna akla. 10  Jesu dọna yé dọmọ: “Mì hẹn delẹ to whèvi he mì ṣẹṣẹ wle lọ lẹ mẹ wá.” 11  To whenẹnu, Simọni Pita biọ ohún lọ mẹ bo dọ̀n odọ̀ he gọ́ na whèvi daho lẹ lọ wá agé, yèdọ whèvi kantọ̀n-gbàn-nukunatọ̀n. Ṣigba, dile yé tlẹ sù sọ, odọ̀ lọ ma là. 12  Jesu dọna yé dọmọ: “Mì wá dù núdùdù afọnnu tọn mìtọn.” Dopo tata to devi lẹ mẹ ma tindo adọgbigbo nado kanse e dọmọ: “Mẹnu wẹ hiẹ yin?” na yé yọnẹn dọ Oklunọ wẹ. 13  Jesu wá bo ze akla lọ bosọ na yé, e sọ wà onú dopolọ gando whèvi go. 14  Todin, whla atọ̀ntọ die he Jesu sọawuhia devi lẹ sọn whenue e ko yin finfọn sọn oṣiọ lẹ mẹ. 15  Todin, to whenue yé ko dù núdùdù afọnnu tọn godo, Jesu dọna Simọni Pita dọmọ: “Simọni visunnu Johanu tọn, be hiẹ yiwanna* mi hú ehelẹ ya?” Ewọ dọna ẹn dọmọ: “Mọwẹ, Oklunọ, hiẹ yọnẹn dọ yẹn tindo owanyi* na we.” E dọna ẹn dọmọ: “Nọ na núdùdù lẹngbọvu ṣie lẹ.” 16  E sọ vọ́ dọna ẹn whla awetọ dọmọ: “Simọni visunnu Johanu tọn, be hiẹ yiwanna* mi ya?” Ewọ dọna ẹn dọmọ: “Mọwẹ, Oklunọ, hiẹ yọnẹn dọ yẹn tindo owanyi* na we.” E dọna ẹn dọmọ: “Nọ yìn lẹngbọ pẹvi ṣie lẹ.” 17  E dọna ẹn whla atọ̀ntọ dọmọ: “Simọni visunnu Johanu tọn, be hiẹ tindo owanyi na mi ya?” Pita gblehomẹ na e dọna ẹn whla atọ̀ntọ dọmọ: “Be hiẹ tindo owanyi na mi ya?” Enẹwutu, ewọ dọna ẹn dọmọ: “Oklunọ, hiẹ yọ́n onú lẹpo; hiẹ yọnẹn dọ yẹn tindo owanyi* na we.” Jesu dọna ẹn dọmọ: “Nọ na núdùdù lẹngbọ pẹvi ṣie lẹ. 18  Nugbonugbo wẹ yẹn dọna we dọ, To whenue hiẹ gbẹ́ yin jọja, hiẹ nọ saba blagbajana dewe bo nọ yì fidepope he a jlo. Ṣigba, eyin hiẹ poyọnho, hiẹ na nọ dlẹnalọ towe lẹ bọ mẹdevo na nọ blagbajana we bo na nọ plan we yì fihe hiẹ ma jlo.” 19  E dọ ehe nado do okú wunmẹ lọ he gblamẹ Pita na pagigona Jiwheyẹwhe te hia. Enẹwutu, to whenue e ko dọ ehe, e dọna ẹn dọmọ: “To hihodo mi zọnmii.” 20  To whenue Pita lẹgodo, e mọ devi lọ he Jesu yiwanna to hihodo yé, yèdọ mẹlọ he sọ dẹ́ yì godo hlan akọ́nnu etọn to núdùdù whèjai tọn lọ whenu ga bo dọmọ: “Oklunọ, mẹnu wẹ omẹ lọ he to na de we hia?” 21  Enẹwutu, to whenue e mọ ẹn, Pita dọna Jesu dọmọ: “Oklunọ, etẹwẹ dawe ehe na wà?” 22  Jesu dọna ẹn dọmọ: “Eyin ojlo ṣie wẹ dọ ewọ ni gbọṣi aimẹ kaka yẹn nado wá, etẹwẹ dù we to enẹ mẹ? Hiẹ ni to hihodo mi zọnmii.” 23  Enẹwutu, ohó ehe gbàpe to mẹmẹsunnu lẹ ṣẹnṣẹn, dọ devi enẹ ma na kú. Etomọṣo, Jesu ma dọna ẹn dọ ewọ ma na kú gba, ṣigba e dọmọ: “Eyin ojlo ṣie wẹ dọ ewọ ni gbọṣi aimẹ kaka yẹn nado wá, etẹwẹ dù we to enẹ mẹ?” 24  Devi ehe wẹ dekunnu gando onú ehelẹ go bo kàn onú ehelẹ, mí sọ yọnẹn dọ kunnudide etọn yin nugbo. 25  Na nugbo tọn, onú susu devo lẹ tin he Jesu wà, bọ eyin yé dona yin kinkàn to gigọ́ mẹ wẹ, yẹn lẹndọ, aihọn lọsu ma sọgan hẹn owe-hihá he na yin kinkàn lẹ.

Nudọnamẹ Odò Tọn

Joh 21:8* To paa mẹ, “nudi awagbà fọde.” Sọ pọ́n Nudọnamẹ Dogọ 11.
Joh 21:15* Ehe yin didesọn hogbe Glẹki tọn agape mẹ.
Joh 21:15* Ehe yin didesọn hogbe Glẹki tọn fileo mẹ.
Joh 21:16* Ehe yin didesọn hogbe Glẹki tọn agape mẹ.
Joh 21:16* Ehe yin didesọn hogbe Glẹki tọn fileo mẹ.
Joh 21:17* Ehe yin didesọn hogbe Glẹki tọn fileo mẹ.